NGÉ SARYA 15 - Bibəl ta Sar̄

Samso̰ rāā ba̰ā̰

¹ Gō tə́ sḛ́ý anī Samso̰ aw̄ go̰ō̰ nə̄yá̰n tə́. I dan yā sāā kōō gémē gə̄ tə́. Ni-əhɔ ngōn̄ bə̄yā̰ jīn tə́ yā kaw̄ń kadə̄ nə̄yá̰n. Sāā kudə kújú gō nə̄yá̰n tə́ anī umən kə́ dəngam ɔgə̄n

² ba ədan na: M-ɔ́jəń na nelī kə nə̄yá̰í alé rɔ̄kum adə̄ m-únən m-ādə̄n kə madí ń a̰a̰ gō yá̰a̰ gə̄ kə́ loo yá̰a̰ kūjə́ taā naā yāí tə́ ní. Ba gidən mandə tɔȳn aĺ a? Ī-taān kum gotən tā.

³ Samso̰ ədadə́ na: Kə́ ɓōó ń toō ní m-ā m̄-rāā Pilistin gə̄ yá̰á̰ kə́ majaĺ, ba najə̄ a gətóo dɔḿ tə́.

⁴ Samso̰ aw̄ əhɔ tal̄ gə̄ ɓú mətá ō, ɔy ngel̄ gə̄ ō, ba tūr̄ ta kə̄lá tal̄ gə̄ ní ɔsə naā tə́ jōó jōó ba do̰ō̰ kə kəlaá ō, tə́la ngel̄ gə̄ danaá kógə̄ḿ kógə̄ḿ ō.

⁵ Gō tə́ anī əla hor tū ngel̄ gə̄ ní tə́ ba əya̰ tal̄ gə̄ ní dɔɔ́ adə̄ aw̄n̄ kə̄ kem ndɔr̄ gémē gə̄ yā Pilistin gə̄ tə́. I beé n Samso̰ tə́lań hor dɔ dɔ do̰ō̰ kōō gémē gə̄ yā Pilistin gə̄ tə́ ō, dɔ kōō gémē gə̄ kə́ ra kə nja dɔɔ́ kanjə̄ kəja ɓáý tə́ ō, dɔ kāgə̄ nduú gə̄ tə́ ō, dɔ kāgə̄ olibə gə̄ tə́ ō ní.

⁶ Pilistin gə̄ dəjen̄ na ké i náā n rāā yá̰á̰ ní wa anī, tél ədan̄də́ na i Samso̰ n na rāā yá̰á̰ ní tām̄ umən ń i de kə́ Timna ní un nə̄yá̰n adə̄ madə̄n kə́ ndɔ̄ yá̰a̰ kūjə́ taā naā tə́. Loo ń noō tə́ Pilistin gə̄ aw̄ əlan̄ hor dɔ dəyá̰ ní tə́ ō, dɔ bɔbə̄n tə́ ō.

⁷ Samso̰ ədadə́ na n-a n-dal ba̰ā̰ dɔdə́ tə́ tām̄ yá̰á̰ ń rāān̄ tə́ noō pá tá na a asən ɓáý.

⁸ Ni-ənīdə́ rɔ̄ɔ̄ ba tetədə́ rɔ̄ɔ̄ tetə kə́ to ɓōĺ ngá̰ý. Gō tə́ anī aw̄ ndi bəlo mbal̄ kə́ Etam tə́.

Samso̰ ō, kə̄ngā mbɔ́r kərō ō

⁹ Pilistin gə̄ aw̄ əndān̄ gérger yādə́ dɔ nang kə́ Juda tə́ ba aw̄n̄ rɔ̄ɔ̄ ɓē kə́ Lehi tə́.

¹⁰ Anī de kə́ dəngam gə̄ kə́ Juda dəjen̄ Pilistin gə̄ na ké reēn̄ yā rɔ̄ɔ̄də́ ké i tām̄ rí tə́ wa? Anī Pilistin gə̄ tél ədan̄də́ na n-reēn̄ i kəhɔ Samso̰ tə́ yā rāā seneé yá̰á̰ ń ni-rāā sedə́ ní.

¹¹ Loo ń noō tə́ de kə́ dəngam kə́ Juda tə́ gə̄ dūbú mətá aw̄n̄ bəlo mbal̄ kə́ Etam tə́ ba ədan Samso̰ na i Pilistin gə̄ n ndin̄ dɔdə́ tə́ ní ké Samso̰ ger̄ nge ń noō aĺ wa? Ké rāā i rí kə́ beé sedə́ wa? Samso̰ ədadə́ na i yá̰á̰ ń rāān̄ seneé ní n na n-rāā sedə́ ō ní.

¹² Nin̄ tél ədanən̄ na n-reēn̄ na i kəhɔn tə́ yā do̰ō̰n kə kəla ba kadə̄n kə Pilistin gēé. Samso̰ ədadə́ na ré i nin̄ kɔ́ gə̄ n a tɔ̄l̄nən̄ aĺ ɓáa kə túbən̄ njadə́ kə adə̄nən̄.

¹³ De gə̄ ní ədan̄ Samso̰ na n-ndigən̄ na i tṵ́ṵ̄n kə kəlaá ba kadə̄n kə Pilistin gēé ngóy walá na n-sāān̄ i tɔ̄lən alé. Loo ń noō tə́ tṵ́ṵ̄nən̄ kə kəlā kə́ kijə gə̄ jōó ba teēn̄ seneé bəlo mbalá.

¹⁴ Dan ń Samso̰ reē ugə̄ ngɔr kə̄ kadə ɓē kə́ Lehi tə́ anī Pilistin gə̄ teē tə́nīn̄ tan kə kɔŕ tetə rɔ̄ɔ́. Banī Ndíĺ Kɔ́ɔ̄ɓē udə kem Samso̰ tə́, adə̄ kəla gə̄ ń tṵ́ṵ̄nəń jīn ní tél ton̄ i tītə̄ kəlā kūbə̄ lḛ́ḛ́ kə́ hor o̰o̰ beé adə̄ gángə̄n̄ i láẃ ngá̰ý.

¹⁵ Samso̰ teē dɔ kə̄ngē mbɔ́r kərō kə́ tɔ̄l̄ ngɔr ɓáý tə́ anī un tɔ̄ləń de gə̄ dūbú.

¹⁶ Gō tə́ anī Samso̰ əda na n-tɔ̄l̄ de gə̄ dūbú kə kə̄ngā mbɔ́r kərōó, na n-kán̄ nīń de gə̄ kə̄ dɔ naā tə́ kə kə̄ngā mbɔ́r kərōó.

¹⁷ Dan ń ɔr̄ najə̄ oy anī teē gír kə̄ngā mbɔ́r kərō ní tə́ əla ta kaw̄ sa̰y. I tām̄ najə̄ ń noō tə́ n əndānəń rī loo ní na i Ramatə Lehi, kumən na i loo kə́ kḭḭ kə̄ dɔɔ́ yā kə̄ngā mbɔ́r, ní.

¹⁸ Dan ń kəndā man̄ rāā Samso̰ ngá̰ý anī ɓāŕ Kɔ́ɔ̄ɓē kadə̄ rāā seneé, ədan na: Kɔ́ɔ̄ɓē, m̄-tetə rɔ̄ɔ̄ ń toō i kə ta kūlīí. Ba ngɔlaā ní kadə̄ kəndā man̄ kə tɔ̄lə̄m̄ ō, kadə̄ m-ə̄sō kem jī de kə́ ngé kəja mɔtədə́ aĺ gə̄ ń toō tə́ ō a?

¹⁹ Loo ń noō tə́ Kɔ́ɔ̄ɓē njar mbal̄ kə́ kemən rāā bəlo ń ra Lehi ní adə̄ man̄ teē tū tə́. Samso̰ a̰ȳ man̄ ní ō, tél ənge tɔ̄gə gogə́ rang ō. I tām̄ najə̄ ń noō tə́ n əndānəń rī dɔ ta kəɓa man̄ ní tə́ na i En Kore ní. Ɓōólaā gə̄gē ta kəɓa man̄ ní to Lehi noó ɓáý.

²⁰ Ɓāl̄ yā Pilistin gə̄ tə́ ní Samso̰ ɔr no ngán Israel gə̄ ɓāl̄ kutə jōó.