NGÉ SARYA 14 - Bibəl ta Sar̄

Samso̰ taā dəyá̰

¹ Samso̰ aw̄ Timna anī a̰a̰ dəyá̰ kógə̄ḿ dan ngán Pilistin kə́ dəyá̰ gə̄ tə́.

² Ni-tél aw̄ ɓēé əda bɔbə̄n nin̄ kə kó̰o̰neé na n-a̰a̰ dəyá̰ kógə̄ḿ dan ngán Pilistin kə́ dəyá̰ gə̄ tə́, ba n-gḛy kadə̄ kə taānən̄ kə adə̄nən̄.

³ Bɔbə̄n nin̄ kə kó̰o̰neé ədanən̄ na: Dəyá̰ kə́ yā kadə̄ ī-taā dan ngééí gə̄ tə́ aláa dan ngán Israel gə̄ tə́ gətóo i mbéé á kə āw̄ dan Pilistin gə̄ kə́ ngé kəja mɔtədə́ aĺ gə̄ tə́ tá kə ī-taā a? Banī Samso̰ əda bɔbə̄n na kə taā dəyá̰ ní kə adə̄n tɔdɔ̄ i ni n na nelə̄n seneé ní.

⁴ Bɔbə̄n nin̄ kə kó̰o̰neé gerə̄n̄ kadə̄ i Kɔ́ɔ̄ɓē n əndā ɓō dəyá̰ ní kem Samso̰ tə́ yā sāań ta Pilistin gə̄ ní alé. Dan ngeé ń noō tə́ Pilistin gə̄ ndin̄ dɔ Israel gə̄ tə́.

⁵ Samso̰ nin̄ kə bɔbə̄n ō, kó̰o̰n ō, a aw̄n̄ kə̄ Timna. Dan ń ugə̄n̄ ndɔr̄ kāgə̄ nduú gə̄ kə́ Timna tə́ anī balsáa ɓɔl kógə̄ḿ ḭḭ bal ba a nōō reēń kə̄ dɔ Samso̰ tə́.

⁶ Loo ń noō tə́ Ndíĺ Kɔ́ɔ̄ɓē udə kem Samso̰ tə́, adə̄ əhɔ ɓɔl ní rə̄yā̰n naā tə́ jōó tītə̄ loo rə̄yā̰ ngōn̄ bə̄yā̰ beé, kanjə̄ kadə̄ yá̰á̰ kógə̄ḿ i jīn tə́. Banī yá̰á̰ ń rāā ní əda bɔbə̄n nin̄ kə kó̰o̰neé gotə alé.

⁷ Gō tə́ anī un ta njə̄rā yān aw̄ Timna, aw̄ wál̄ najə̄ kə dəyá̰ ní. Nelə̄n seneé ngá̰ý.

⁸ Rāā ndɔ̄ kóndóńg wań gō tə́ anī, Samso̰ tél aw̄ kə̄ gogə Timna yā kaw̄ taā dəyá̰ ní. Ɓáa tɔ̄ɔ̄ ka̰a̰ nīń ɓɔl ní tə́ anī ənge tejə gə̄ kə́ ndin̄ kem kə̄ngān tə́ ō, əndān̄ yibə̄də́ kemeé ō.

⁹ Ni-ɔr̄ yibə̄ tejə ní kem jīn tə́ ba o̰o̰ dɔɔ́ dɔɔ́. Aw̄ kə tejə ní adə̄ bɔbə̄n nin̄ kə kó̰o̰neé adə̄ o̰o̰n̄ ō. Ba kadə̄ ə́dádə́ na n-ɔr̄ na i kem kə̄ngā ɓɔl tə́ ní ədadə́ alé.

Samso̰ əga Pilistin gə̄ səngó

¹⁰ Bɔbə̄ Samso̰ aw̄ ɓē dəyá̰ ní tə́, tɔdɔ̄ Samso̰ rāā yá̰a̰ kūjə́ taā naā looneé tītə̄ ń balsáa gə̄ a rāānəń ní.

¹¹ Dan ń Pilistin gə̄ a̰a̰n̄ Samso̰ anī gə̄rān̄ balsáa gə̄ kutə mətá kadə̄ ndin̄ seneé.

¹² Samso̰ əda balsáa gə̄ ní: M-a m-ə́gásí səngó kógə̄ḿ, ba ré ə́damī kum pá tá gír ndɔ̄ kə́ sīrí gə̄ yā yá̰a̰ kūjə́ taā naā gān̄g anī m-a m-ādə̄sí ngōmájə kutə mətá ō, kūbə̄ kə́ yā mbéləń gír madə̄ gə̄ kutə mətá ō.

¹³ Ba ré ásiī kədam̄ kum səngó ní aĺ anī i síī n a ādə̄mī ngōmájə kə́ kutə mətá gə̄ ní ō, kūbə̄ kə́ kutə mətá gə̄ kə́ yā mbéləń gír madə̄ gə̄ ní ō. Tā anī nin̄ ədanən̄ na kə əga səngó yān ní kadə̄ kə n-oōn̄.

¹⁴ Samso̰ ədadə́ na: Yá̰á̰ kə́ to kəsa kə́ teē kem nge kəsa yá̰á̰ tə́ ō, Yá̰á̰ kə́ nel̄ kə́ teē kem yá̰á̰ kə́ ngan̄g tə́ ō i rí? Balsáa gə̄ ní rāān̄ ndɔ̄ mətá kanjə̄ kadə̄ əngen̄ kum səngó ní.

¹⁵ Kə ndɔ̄ kə́ nge ko̰ sɔ́ anī ədan̄ nə̄yá̰ Samso̰ na: Ī-tɔ́y ngaaí ādə̄ ədají kum səngó ní, aĺ ɓáa j-a j-əla hor dɔí tə́ ō, dɔ de kə́ kem ndogə̄ yā bɔbí tə́ gə̄ ō. Ī-ɓāríījí i yā reē táā yá̰a̰ yājí gə̄ kɔ̄ɔ́ malang jījí tə́ a?

¹⁶ Nə̄yá̰ Samso̰ aw̄ kə nōō gēé əda ngaan na: Īmə̄m̄ ngá̰ý kemií tə́ ō, nelī seḿ aĺ ō, tɔdɔ̄ ə́ga deē yāḿ gə̄ səngó kanjə̄ kɔjəm̄ mā kum. Samso̰ tél ədan na: Bɔbə́ḿ nin̄ kə kúḿ gə̄gē m-ɔ́jə́də́ kum səngó ní aĺ anī ḭ̄ tá kə m-ɔ́jiī kum a?

¹⁷ Kem ndɔ̄ kə́ sīrí gə̄ ń i ndɔ̄ yá̰a̰ kūjə́ taā naā ní, dəyá̰ ní a nōō i mbée kə̄ dɔ Samso̰ tə́ kə dɔ ndɔ̄ gə̄. Kɔr rāā Samso̰ adə̄ ədan kum səngó ní kə ndɔ̄ kə́ nge ko̰ sīrí, tɔdɔ̄ dəyá̰ ní ra seneé katə katə ngá̰ý. Ɓáa dəyá̰ ní tél kə kum səngó ní aw̄ ɔjə Pilistin gə̄ ń i deē yān gə̄ ní.

¹⁸ Kə ndɔ̄ kə́ nge ko̰ sīrí ngeé ń noō, pá tá kadə̄ mbang udə ní, de kə́ kem ɓēé gə̄ reē ədan̄ Samso̰ na: Ké yá̰á̰ kə́ nel̄ tɔȳ tejə i rí wa, ké yá̰á̰ kə́ ngan̄g tɔȳ ɓɔl ké i rí wa. Anī Samso̰ tél ədadə́ na ré ndɔrə̄n̄ na i kə mandə man̄g yān nií aĺ anī na a gerə̄n̄ kum səngó ní alé.

¹⁹ Loo ń noō tə́ Ndíĺ Kɔ́ɔ̄ɓē udə kem Samso̰ tə́, adə̄ Samso̰ aw̄ Askalon tɔ̄l̄ de kə́ kemeé gə̄ kutə mətá, ba ró̰ȳ kūbə̄ kə́ rɔ̄də́ gə̄ reēń adə̄ de gə̄ ń ədanən̄ kum səngó ní. Gō tə́ anī télaw̄ gogə́ ɓē bɔbə̄neé kə wōngōó.

²⁰ Télən̄ kə nə̄yá̰n adə̄n̄ madə̄n ń a̰a̰ gō yá̰a̰ gə̄ kə́ loo yá̰a̰ kūjə́ taā naā yān tə́ ní adə̄ taā.