NGÉ SARYA 13 - Bibəl ta Sar̄

Ojən̄ Samso̰

¹ Ngán Israel gə̄ tél rāān̄ yá̰á̰ kə́ majaĺ ta kum Kɔ́ɔ̄ɓē tə́ ɓáý to̰, adə̄ Kɔ́ɔ̄ɓē əladə́ kem jī Pilistin gə̄ tə́ ɓāl̄ kutə sɔ́.

² Dan ń noō tə́ ní deē kógə̄ḿ kə́ gír ɓē yā Dan tə́ ndi kem ɓē kə́ Sora tə́, rīn na i Manoa. Nə̄yá̰n i kujə, adə̄ ngōnən gətóo.

³ Nge kaw̄ kəla yā Kɔ́ɔ̄ɓē ndɔ̄bən ba ədan na: m̄-ber̄ kadə̄ ḭ̄ i dəyá̰ kə́ kujə, adə̄ ngōnīí gətóo. Ba ā ī-ndān̄ ngōn̄ ō, ā ójə ngōn̄ kə́ dəngam ō.

⁴ Adə̄ ngɔlaā ní ī-lōō gír ka̰ȳ kasə nduú tə́ ō, kasə kə́ ngan̄g tə́ ō, ī-lōō kəsa yá̰á̰ kə́ majaĺ tákə̄ ō,

⁵ tɔdɔ̄ ā ndān̄ ngōn̄, ā ójə ngōn̄ kə́ dəngam. Deē a əndā nə́nga dɔn tə́ alé, tɔdɔ̄ ɔrə̄n̄ kam̄ ngōn̄ ní tām̄ yā Nə́ɓā tə́ i dan ń ni i kem kó̰o̰n tə́ ɓáý ní ō, i ni n a əla gír taā Israel gə̄ jī Pilistin gə̄ tə́ yā kajədə́ ní ō.

⁶ Anī dəyá̰ ní tél aw̄ ɓēé əda ngaan na: Deē yā Nə́ɓā kógə̄ḿ reē rɔ̄ḿ tə́, to i tītə̄ nge kəla yā Nə́ɓā, tām̄ to ɓōĺ ngá̰ý. m̄-dəjen loo ń ḭḭ tū tə́ ní aĺ ō, ədam̄ rīn aĺ ō.

⁷ Ba ədam̄ na, m-ā m̄-ndān̄ ngōn̄ yā kojə ngōn̄ kə́ dəngam. Ní kə m-ā̰ȳ kasə nduú to̰ aĺ ō, kasə kə́ ngāng to̰ aĺ ō, kə m-ə́sá yá̰á̰ kə́ majaĺ tákə̄ aĺ ō, tɔdɔ̄ a əlan̄ gír kɔr̄ kam̄ ngōn̄ ní tām̄ yā Nə́ɓā tə́ na i kem tə́ bátə́ ndɔ̄ koyn tə́.

⁸ Tā anī Manoa nōō kə̄ dɔ Kɔ́ɔ̄ɓē tə́ ədan na: Ɓɔ́ Kɔ́ɔ̄ɓē, deē yā Nə́ɓā ń ə́lan ní ādə̄ tél reē rɔ̄jí tə́ ɓáý to̰ ɔjəjí yá̰á̰ ń kadə̄ jə-rāā tām̄ yā ngōn̄ ń j-a j-ojə tə́ ní.

⁹ Nə́ɓā rāā yá̰á̰ ń Manoa dəjen ní. Adə̄ nge kəla yā Nə́ɓā tél reē rɔ̄ dəyá̰ ní ɓáý to̰. Dan ń reē ní dəyá̰ ní ra i ndɔrɔ́, ba ngaan tá i seneé alé.

¹⁰ Ɓáa a̰ȳ aw̄ əda ngaan na: Deē ń reē rɔ̄ḿ tə́ ndɔ̄ tə́ gēé ní tél ndɔ̄bə̄m̄ ɓáý to̰.

¹¹ Anī Manoa ḭḭ dɔɔ́ kə̄ gō nə̄yá̰n tə́. Reē rɔ̄ deē ní tə́ ba dəjen na ké i ni n ɔr̄ najə̄ kə dəyá̰ ń toō ní wa? Anī deē ní tél ədan na: A̰á̰ā̰ i mā.

¹² Anī Manoa ədan na: Ń toō ní taí a əhɔjí. Ní najə̄ kə́ dɔ ngōn̄ ń toō tə́ i rí ō, yá̰á̰ kə́ yā rāā tām̄ yān tə́ i rí ō?

¹³ Tā anī nge kaw̄ kəla yā Kɔ́ɔ̄ɓē ní əda Manoa na: Yá̰a̰ malang ń m-ɔ̄gə̄ dəyá̰ ń toō kəsa ní a lōō kəsa.

¹⁴ A əsa yá̰á̰ kə kan̄ nduú aĺ ō, a a̰ȳ kasən aĺ ō, a a̰ȳ kasə kə́ ngan̄g aĺ ō, a əsa yá̰á̰ kə́ majaĺ tákə̄ aĺ ō. A əndā kumən gíŕ yá̰a̰ malang ń m-ə́dan tə́ ní ō.

¹⁵ Manoa əda nge kaw̄ kəla yā Kɔ́ɔ̄ɓē na kə ngóōdə́ sḛ́ý kadə̄ kə n-tɔ̄lə̄n̄ ngōn̄ bə̄yā̰ kə n-rāā n-adə̄nən̄.

¹⁶ Anī nge kaw̄ kəla yā Kɔ́ɔ̄ɓē əda Manoa na: Ré ə́hɔm̄ mbā gə̄gē anī m-ā m-ə́sá yá̰a̰ yāí alé. Ba ré ī-ndigə anī ī-róō dā̰ horoó ī-ndējə̄ Kɔ́ɔ̄ɓē. Manoa ger̄ kadə̄ i nge kaw̄ kəla yā Kɔ́ɔ̄ɓē alé.

¹⁷ Adə̄ dəjen na ké rīn na i rí wa kadə̄ ndɔ̄ ń najə̄ ń əda ní rāā yá̰a̰ anī kə n-rɔȳnəń.

¹⁸ Anī nge kaw̄ kəla yā Kɔ́ɔ̄ɓē ədan na ké dəjen rīn i yā rāań rí wa? Tɔdɔ̄ na i rī kə́ majə al̄ naā ngá̰ý.

¹⁹ Manoa əhɔ ngōn̄ bə̄yā̰ kógə̄ḿ ō, un yá̰a̰ ndējə̄ kə́ rāā kə ndujú ō, ba aw̄ tun̄ dɔ mbal̄ tə́ adə̄ Kɔ́ɔ̄ɓē kə́ yá̰a̰ rāān majə al̄ naā ngá̰ý. Dan ń Manoa nin̄ kə nə̄yá̰neé ra a a̰a̰n̄

²⁰ ta ndo̰ hor kə́ dɔ loo tun̄ yá̰á̰ tə́ loo kḭ tə́ kum kə̄ dɔ rā̰ tə́ anī, a̰a̰n̄ nge kaw̄ kəla yā Kɔ́ɔ̄ɓē ní kum tə́ ta kaw̄ dɔɔ́. Loo ń noō tə́ əsō sébən̄ kumdə́ nang tə́.

²¹ Tā anī Manoa ger̄ kadə̄ deē ní i nge kaw̄ kəla yā Kɔ́ɔ̄ɓē. Ni-teē adə̄ Manoa nin̄ kə nə̄yá̰neé a̰a̰nən̄ gogə́ to̰ alé.

²² Manoa əda nə̄yá̰n na nin̄ na i kə́ yā koy gə̄, tɔdɔ̄ na n-a̰a̰n̄ Nə́ɓā kə kumdə́.

²³ Anī nə̄yá̰n tél ədan na ré Kɔ́ɔ̄ɓē gḛy kadə̄ n-oyn̄ anī na a ndigə dā̰ kə́ róō ō, yá̰a̰ ndējə̄ kə́ rāā kə ndujú ō ń n-adə̄nən̄ ní alé. Naa a ɔjədə́ yá̰á̰ ń n-a̰a̰n̄ kə kumdə́ ō, yá̰á̰ kə́ yā rāā gə̄ ń n-oōn̄ kə mbīdə́ ō ní na a ɔjədə́ alé.

²⁴ Nə̄yá̰ Manoa ojə ngōn̄ kə́ dəngam ba ənda rīn na i Samso̰. Ngōn̄ ní tɔgə ō, Kɔ́ɔ̄ɓē rāā majə seneé ō.

²⁵ Ndíĺ Kɔ́ɔ̄ɓē əla gír rāā Samso̰ i Mahane Dan, dɔ dán ɓē kə́ Sora kə ɓē kə́ Esətaol tə́.