NGÉ SARYA 12 - Bibəl ta Sar̄

Jepte nin̄ kə Epəraim gə̄ rɔ̄ɔ̄n̄ naā

¹ De kə́ dəngam kə́ Epəraim tə́ gə̄ ɔsən̄ dɔdə́ naā tə́, teēn̄ bā Jurdḛ, aw̄n̄ Sapon ba ədan̄ Jepte na: Ḭ̄ ī-ɓāŕjí ādə̄ j-aw̄ dɔ nang yā ngán Amon gə̄ tə́ yā rɔ̄ɔ̄də́ seí aĺ i tām̄ rí tə́? J-a j-əla hor dɔí tə́ kadə̄ o̰o̰ī kə kújə yāí.

² Jepte tél ədadə́ na: Mā ō, gír deē yāḿ gə̄ ō, jə-kɔ̄l̄ naā ngá̰ý kété kə ngán Amon gēé, loo ń noō tə́ m̄-ɓāŕsí kadə̄ ī-dḭḭ̄mī, banī ájəmī alé.

³ Dan ń m-á̰a̰ kadə̄ ā ī-reēī yā kajəm̄ aĺ ní, m-ə̄nī rɔ̄ḿ kɔ̄ɔ́ m-ādə̄ yo, adə̄ m-āw̄ dɔ nang yā ngán Amon gə̄ tə́ m-ə̄nīdə́ rɔ̄ɔ̄, anī Kɔ́ɔ̄ɓē əladə́ kem jīḿ tə́, ba ī-reēī dɔḿ tə́ ɓōólaā kə rɔ̄ɔ́ i tām̄ yā rí tə́?

⁴ Gō tə́ anī Jepte kán̄ de kə́ Galaad gə̄ malang aw̄ ənīń Epəraim gə̄ rɔ̄ɔ̄. Galaad gə̄ rɔ̄ɔ̄n̄ Epəraim gə̄ i tām̄ najə̄ kɔr̄də́ tə́, tɔdɔ̄ nin̄ ədan̄ na: Sḭḭ̄ Galaad gə̄, sḭḭ̄ i deē yā Epəraim gə̄ ba ā̰yī naā i mbée n ī-ndiī dan Manase gə̄ tə́ ní.

⁵ Galaad gə̄ taān̄ loo gə̄ ń de gə̄ a udən̄ man̄ tū tə́ kum bā Jurdḛ tə́ ní yā gāngəń gír Epəraim gə̄. Adə̄ ré deē kógə̄ḿ kə́ Epəraim tə́ a̰ȳ ta rɔ̄ɔ̄ tə́ əda na: Ə́ya̰m̄ ādə̄ m-údə man̄ m̄-teē kə̄ gidə kə́ nú tə́, anī Galaad gə̄ a dəjenən̄ na: Ḭ̄, i Epəraim a? Ba ré deē ní tél əda na: A̰á̰,

⁶ anī a ədanən̄ na: Majə, ə́da na Jibolet. Anī Epəraim ní əda na Sibolet, tɔdɔ̄ ni asə kəda kum najə̄ ni kə gōó alé. Loo ń noō tə́ a əhɔnən̄ ō, a əjan̄ mindən kadə loo kudə man̄ bā Jurdḛ tə́ ō. Ɓāl̄ ń noō tə́ ní Epəraim gə̄ oyn̄ i 42 000.

⁷ Jepte kə́ Galaad ɔr no ngán Israel gə̄ ɓāl̄ mehḛ́. Gō tə́ anī oy, adə̄ dubə̄nən̄ i dɔ nang kə́ Galaad tə́, kem ɓē kojən tə́.

Ibəsan ō, Elon ō, Abədon ō,

⁸ Nge kɔr no Israel gə̄ kə́ gotə Jepte tə́ i Ibəsan. Ni i de kə́ Betlehem.

⁹ Ngánən kə dəngam gə̄ i kutə mətá ō, kə́ dəyá̰ gə̄ i kutə mətá ō. Adə̄ ngánən kə́ dəyá̰ gə̄ táān̄ ngaa gír ɓē kə́ rang gə̄ tə́ ō, táā ngáń kə́ dəyá̰ gə̄ kutə mətá kə́ gír ɓē kə́ rang tə́ adə̄ ngánən kə́ dəngam gə̄ ō. No ɔr no ngán Israel gə̄ ɓāl̄ sīrí.

¹⁰ Gō tə́ anī Ibəsan oy, dubə̄nən̄ i Betlehem.

¹¹ Nge kɔr no Israel gə̄ kə́ gotə Ibəsan tə́ i Elon. Ni i de kə́ gír ɓē yā Jabulo̰ tə́. Ɔr no Israel gə̄ ɓāl̄ kutə.

¹² Gō tə́ anī ni oy. Dubə̄nən̄ i kem ɓē kə́ Ayalon tə́, dɔ nang kə́ Jabulo̰ tə́.

¹³ Nge kɔr no Israel gə̄ kə́ gotə Elon tə́ i Abədon. Ni i ngōn̄ Hilel kə́ Piraton.

¹⁴ Ngánən kə́ dəngam gə̄ i kutə sɔ́ ō, ngán kaan kə́ dəngam gə̄ i kutə mətá ō. Kərō gə̄ ń ngánən gə̄ ō, ngán kaan gə̄ ō, a alə̄n̄ ní i kutə sīrí. Abədon ɔr no Israel gə̄ ɓāl̄ sɔ́sɔ́.

¹⁵ Dubə̄nən̄ i Piraton, dɔ nang kə́ Epəraim tə́, dɔ mbal̄ yā Amalek gə̄ tə́.