NGÉ SARYA 11 - Bibəl ta Sar̄

Jepte ndi ngār dɔ Israel gə̄ tə́

¹ Jepte ń i go̰ rɔ̄ɔ̄ kógə̄ḿ kə́ Galaad ní, ngōn̄ dəyá̰ kógə̄ḿ kə́ nge rāā ájə́ba. Rī bɔbə̄ kojən na i Galaad.

² Dəyá̰ jī Galaad ojə ngán gə̄ ō. Adə̄ dan ń nin̄ tɔgən̄ anī tə̄ɓān̄ Jepte kɔ̄ɔ́. Nin̄ ədanən̄ na: Ā ə́ngé yá̰a̰ ndəbā yā bɔbə̄jí alé, tɔdɔ̄ ḭ̄ i ngōn̄ dəyá̰ kə́ rang.

³ Adə̄ Jepte a̰ȳ ngákó̰o̰n gə̄ aw̄ sa̰y ndi dɔ nang kə́ Tob tə́. De kə́ yá̰a̰ aĺ gə̄ kánə̄n̄ naā kə̄ dɔn tə́ ō, aw̄n̄ rɔ̄ tə́ seneé ō.

⁴ Gō tə́ sḛ́ý anī ngán Amon gə̄ ənīn̄ Israel gə̄ rɔ̄ɔ̄.

⁵ Dan ń rɔ̄ɔ̄ əsō anī kum kɔɔ̄ kə́ Galaad gə̄ aw̄ sāān̄ nja Jepte dɔ nang kə́ Tob tə́.

⁶ Nin̄ ədanən̄ na: Ī-reē ún dɔ ngé rɔ̄ɔ̄ yājí gə̄ ādə̄ jə-rɔ̄ɔń ngán Amon gə̄.

⁷ Banī Jepte tél ədadə́ na: I sḭḭ̄ n īmīmī ō, ī-tə̄ɓāmī kɔ̄ɔ́ kem ndogə̄ yā bɔbə́ḿ tə́ ō ní aĺ a? Ré wur kɔl kə́ ngá̰ý kə əsō dɔsí tə́ pá tá ī-reē ā ī-saī njaḿ i tām̄ rí tə́?

⁸ Kum kɔɔ̄ kə́ Galaad gə̄ ədan̄ Jepte na: Ré jə-tél j-əda njaí anī i yā kadə̄ ī-reē ī-rɔ̄ɔ̄ ngán Amon gə̄ sejí ō, kadə̄ ó̰o̰ ɓē dɔjí jḭḭ Galaad gə̄ tə́ malang.

⁹ Jepte ədadə́ na: Ré ī-téliī seḿ kadə̄ m-āw̄ m̄-rɔ̄ɔ̄ ngán Amon gə̄ ō, Kɔ́ɔ̄ɓē aw̄ əladə́ kem jīḿ tə́ ō anī i mā n m-ā m-ó̰o̰ ɓē dɔsí tə́ ní.

¹⁰ Anī kum kɔɔ̄ kə́ Galaad gə̄ ədan̄ Jepte na: Kɔ́ɔ̄ɓē rāā kə́ kum tə́ yājí, adə̄ j-a jə-rāā yá̰á̰ ń ə́dá ní.

¹¹ Loo ń noō tə́ Jepte aw̄ naā tə́ kə́ kum kɔɔ̄ kə́ Galaad gə̄. Adə̄ de gə̄ aw̄ əndānən̄ ngār dɔdə́ tə́ ō, ngol ngé rɔ̄ɔ̄ yādə́ gə̄ ō. Jepte téĺ tə́da najə̄ kɔrə̄n gə̄ malang ta kum Kɔ́ɔ̄ɓē tə́ Misəpa.

Jepte əla kəla kə̄ dɔ Amon gə̄ tə́

¹² Jepte əla de gə̄ rɔ̄ɔ̄ mban̄g yā ngán Amon gə̄ tə́ kadə̄ ədanən̄ na ké i rí n i dɔ dáńdə́ tə́ seneé áké reē ənī ɓē yān rɔ̄ɔ̄ wa?

¹³ Anī mban̄g yā ngán Amon gə̄ əda de gə̄ ń Jepte əladə́ ní na: I tām̄ dan ń ngán Israel gə̄ ḭḭn̄ Ejiptə ní taān̄ dɔ nang yāḿ wól loo kə́ Arnon tə́ bátə́ ugə̄ń man̄ Yabok tə́ ō, bā Jurdḛ tə́ ō. Adə̄ ə́daī Jepte ādə̄ əya̰ dɔ nang ní jəke adə̄m̄.

¹⁴ Jepte tél əla de gə̄ rɔ̄ mban̄g yā ngán Amon gə̄ tə́ ɓáý to̰.

¹⁵ kadə̄ ədanən̄ na ngán Israel gə̄ taān̄ dɔ nang yā de kə́ Moab gə̄ aĺ ō, yā ngán Amon gə̄ aĺ ō.

¹⁶ Tɔdɔ̄ dan ń Israel gə̄ ḭḭn̄ Ejiptə ní, njə̄rān̄ kem dəla loo tə́ bátə́ teēn̄ bā tə̄ɓā gə̄ tə́ aw̄ ugə̄n̄ Kades.

¹⁷ Nin̄ əlan̄ kəla rɔ̄ mban̄g kə́ Edom tə́ kadə̄ adə̄də́ ta róbə mān̄ dɔ nang yān tə́, anī ni ɔgə̄də́. Tél əlan̄ kəla rɔ̄ mban̄g kə́ Moab tə́, anī ni ɔgə̄də́ ɓáý to̰. Adə̄ Israel gə̄ tél ndin̄ i Kades.

¹⁸ Loo ń noō tə́ nin̄ unən̄ róbə́ kə́ kem dəla loo tə́, ba gōngə̄n̄ dɔ nang kə́ Edom ō, kə́ Moab ō. Aw̄ ugə̄n̄ dām̄ kə́ gír ɓē tə́ banī əya̰n̄ dɔ nang kə́ Moab kə̄ dām̄ kə́ no ɓē tə́. Nin̄ əndān̄ gérger yādə́ gidə man̄ Arnon tə́ kə̄ dām̄ kə́ nú tə́ ba udən̄ dɔ nang kə́ Moab tə́ alé. Tɔdɔ̄ man̄ Arnon rāā rɔ̄n i dɔ nin̄ dɔ nang kə́ Moab tə́.

¹⁹ Nin̄ əlan̄ kəla rɔ̄ Sihon mban̄g kə́ Hesəbon ń a o̰o̰ ɓē dɔ Amor gə̄ tə́ ní, ədanən̄ na: Əyá̰jí ādə̄ jə-mān̄ dɔ nang yāí tə́ j-aw̄ń loo ń j-a j-aw̄ kə̄ tū tə́ ní.

²⁰ Banī Sihon taā kem ngán Israel gə̄ alé adə̄ ɔgə̄də́ mān̄ dɔ nang yān tə́. Ɔy deē yān gə̄ malang aw̄ ndiń Yahas ba ənī Israel gə̄ rɔ̄ɔ̄.

²¹ Kɔ́ɔ̄ɓē Nə́ɓā yā Israel əla Sihon kə deē yān gēé kem jī Israel gə̄ tə́ adə̄ tetən̄də́ rɔ̄ɔ̄. Israel gə̄ taān̄ dɔ nang yā Amor gə̄ jīdə́ tə́ kɔ̄ɔ́ malang,

²² Əla gír wól loo kə́ Arnon tə́ ugə̄ń man̄ Yabok tə́ ō, dəla loo kə́ dām̄ kə́ gír ɓēé tə́ ugə̄ń bā Jurdḛ tə́ ō.

²³ Kɔ́ɔ̄ɓē Nə́ɓā yā Israel rāā adə̄ jḭḭ deē yān gə̄ jə-taā dɔ nang yā Amor gə̄ jīdə́ tə́ kɔ̄ɔ́ anī ḭ̄ ī-gḛy taā jījí tə́ a?

²⁴ Nge ń ɓesə̄ yāí Kemos adī ní i gír jīí tə́ aĺ ɓáý a? Ní yá̰a̰ malang ń Kɔ́ɔ̄ɓē Nə́ɓā yājí adə̄jí ní kə j-ənge aĺ a?

²⁵ Ī-ngan̄g ī-tɔy Balak ngōn̄ Sipor ń i mban̄g kə́ Moab ní a? Ni-sāā Israel gə̄ bátə́ rɔ̄ɔńdə́ a?

²⁶ Kutə ɓāl̄ gə̄ ń Israel gə̄ ndinə̄ń Hesəbon ō, Aroer ō, kem ngán ɓē gə̄ ń ɓē gə̄ ń noō o̰o̰n̄ ɓē dɔ tə́ ní ō, kem ɓē gə̄ kə gō kadə man̄ Arnon ō ní i ɓāl̄ ɓú mətá. Ní i tām̄ rí tə́ ī-taāī dɔ nang ní jīdə́ tə́ dan ń noō tə́ aĺ ní?

²⁷ Mā tā anī m̄-rāā yá̰á̰ kógə̄ḿ kə́ majaĺ seí alé, ba i ḭ̄ n ī-rāā yá̰á̰ kə́ majaĺ seḿ tām̄ ī-rɔ̄ɔ̄m̄ ní. Ādə̄ Kɔ́ɔ̄ɓē ń i nge gān̄g sarya yā de gə̄ ní gān̄g sarya kə́ mbo̰ō̰ ngán Israel gə̄ tə́ kə ngán Amon ɓōólaā.

²⁸ Banī mban̄g yā ngán Amon gə̄ oō najə̄ ń Jepte ədan ní alé.

Jepte ənī ndūn

²⁹ Ndíĺ Kɔ́ɔ̄ɓē reē dɔ Jepte tə́, adə̄ un gō loo kə́ dɔ nang ká Galaad tə́ ō, kə́ Manase tə́ ō, aw̄ Misəpe kə́ Galaad tə́ ba ra noó ənda dɔ nin̄ dɔ nang yā ngán Amon gə̄ gān̄g.

³⁰ Jepte ənī ndūn adə̄ Kɔ́ɔ̄ɓē əda na: Kɔ́ɔ̄ɓē, ré ə́lá ngán Amon gə̄ kem jīḿ tə́ adə̄ m̄-tetədə́ rɔ̄ɔ̄ ō,

³¹ m̄-tél kə lápə́yaá ō anī, deē ń a teē ndogə̄ yāḿ tə́ yā tə́nī taḿ ní, m-ā ɔ̄r̄ kamə̄n tayā tām̄ yāí tə́ ō, m-ā m̄-róōn horoó yā kadī ō.

³² Jepte ənda dɔ nin̄ dɔ nang yā ngán Amon gə̄ gān̄g aw̄ ənīńdə́ rɔ̄ɔ̄ ō, Kɔ́ɔ̄ɓē ədadə́ kem jīn tə́ ō.

³³ Əla gír Aroer ugə̄ń ngɔr kə̄ Minitə ní ni-taā ɓē kutə jōó. Tá taā ɓē bátə́ ugə̄ń Abel-Keramim ō, adə̄ rɔ̄ɔ̄ rāā Amon gə̄ ngá̰ý. I loo ń noō tə́ n ngán Amon gə̄ əlanə̄ń dɔdə́ nang tə́ no ngán Israel gə̄ tə́ ní.

³⁴ Dan ń Jepte a tél a aw̄ kə̄ gogə́ ɓēé Misəpa anī, ngōnən kə́ dəyá̰ teē a tə́nī tan kə kɔdɔɔ́ ō, kə ndāmāá ō. I ngōnən kə́ kal kógə̄ḿ beē, ngōnən kə́ rang kə́ dəyá̰ aláa kə́ dəngam gətóo.

³⁵ Dan ń Jepte a̰a̰n anī əhɔ kūbə̄ kə́ rɔ̄n nəkɔ́ tə́ rə̄yā̰ ba əda na: Aa, ngōnə̄ḿ. ī-rāām̄ ādə̄ rɔ̄ḿ óý yélélé kɔ̄ɔ́. Ḭ̄ i dan ngé reē kə yá̰á̰ kə́ to kum kaȳ aĺ dɔḿ tə́ gə̄. M-ə̄nā ndūḿ m-ādə̄ Kɔ́ɔ̄ɓē kɔ̄ɔ́ ɓá, adə̄ m-ā m̄-tūr̄ to̰ alé.

³⁶ Ngōnən kə́ dəyá̰ ədan na: Bɔbə́ḿ, ré ə̄nī ndūí ādə̄ Kɔ́ɔ̄ɓē anī ī-rāā yá̰á̰ ń ə́dan ní seḿ. Tɔdɔ̄ ni dal ba̰ā̰í dɔ ngán Amon gə̄ tə́.

³⁷ Ɓá tā ba ɓɔ́ ə́ya̰m̄ karī nāā jōó ādə̄ m-āw̄ m̄-dáȳ kə madə́ḿ gēé dɔ mbal̄ gə̄ tə́ m̄-nōoń najə̄ ger̄ dəngam aĺ yāḿ tə́ rá tá.

³⁸ Jepte əya̰n karī mā jōó adə̄ aw̄ kə madə̄n gēé nōó dɔ mbal̄ gə̄ tə́ najə̄ ger̄ dəngam aĺ tə́.

³⁹ Aw̄ rāā nāā jōó tél dɔ tə́ reē ɓē bɔbə̄neé adə̄ rāā yá̰á̰ ń ənī ndūn dɔ tə́ adə̄ Kɔ́ɔ̄ɓē ní seneé. Ni-oy kanjə̄ ger̄ dəngam.

⁴⁰ Adə̄ kə dɔ ɓāl̄ gə̄ ngáń kə́ dəyá̰ kə́ Israel tə́ gə̄ a aw̄n̄ nōō ngōn̄ Jepte kə́ Galaad tə́. A nōōnən̄ i ndɔ̄ sɔ́ kə dɔ ɓāl̄ gə̄. Adə̄ tél i yá̰a̰ kāgə̄ ɓē dɔ nang kə́ Israel tə́.