NGÉ SARYA 10 - Bibəl ta Sar̄

Ngé Sarya kə́ rang gə̄ Tola nin̄ kə Yair

¹ Gotə Abimelek tə́ ní i Tola ngōn̄ Puba kə́ ngōn̄ Dodo n ḭḭ yān yā kajə ngán Israel gə̄ ní. Ni i de kə́ gír ɓē yā Isakar tə́. Ndi i kem ɓē kə́ Samir tə́, gō nang kə́ mbalá yā Epəraim tə́.

² Ni-ɔr no ngán Israel gə̄ ɓāl̄ kutə jōó gidə i mətá. Gō tə́ anī oy adə̄ dubə̄nən̄ Samir.

³ De kə́ utə̄ gō Tola i Yair. Ni i de kə́ gō nang kə́ Galaad tə́. Ɔr no ngán Israel gə̄ ɓāl̄ kutə jōó gidə i jōó.

⁴ Ngánən kə́ dəngam gə̄ i kutə mətá ō, kərō kal̄də́ gə̄ i kutə mətá ō, ngán ɓē yādə́ gə̄ gō nang kə́ Galaad tə́ i kutə mətá ō. Bátə́ ɓōólaā gə̄gē ní a ɓārə́n̄ ngán ɓē gə̄ ní na i ngán ɓē gə̄ yā Yair.

⁵ Yair oy adə̄ dubə̄nən̄ Kamon.

⁶ Ngán Israel gə̄ tél rāān̄ yá̰á̰ kə́ majaĺ ta kum Kɔ́ɔ̄ɓē tə́ ɓáý to̰. Nin̄ ndɔ̄ȳn̄ ɓesə̄ Baal gə̄ ō, ɓesə̄ Astarte gə̄ ō, ɓesə̄ gə̄ yā Aram gə̄ ō, Sidon gə̄ ō, Moab gə̄ ō, ngán Amon gə̄ ō, Pilistin gə̄ ō. Nin̄ əya̰n̄ Kɔ́ɔ̄ɓē kɔ̄ɔ́ ba rāān̄ kəla yān to̰ alé.

⁷ Loo ń noō tə́ wōn̄g rāā Kɔ́ɔ̄ɓē sedə́ adə̄ əladə́ kem jī Pilistin gə̄ tə́ ō, ngán Amon gə̄ tə́ ō.

⁸ Adə̄ ɓāl̄ ń noō tə́ ní tetən̄də́ rɔ̄ɔ̄ ō, kem ɓāl̄ kutə gidə i sɔ́sɔ́ ní rāān̄ ngán Israel gə̄ ń ndin̄ gidə bā Jurdḛ kə́ dām̄ kə́ nú tə́ dɔ nang yā Amor gə̄ tə́ gō nang kə́ Galaad tə́ ní kə́ tōr̄ gə̄ ō, rāān̄ kumdə́ ndoō tə́ ō.

⁹ Ngán Amon gə̄ teēn̄ bā Jurdḛ ba aw̄ rɔ̄ɔ̄n̄ Juda gə̄ ō, Benjamḛ gə̄ ō, Epəraim gə̄ ō, adə̄ wur kɔl kə́ ngá̰ý əsō dɔ Israel tə́.

¹⁰ Loo ń noō tə́ nōōn̄ kə̄ dɔ Kɔ́ɔ̄ɓē tə́, ədanən̄ na: Jə-rāā majaĺ seí, tɔdɔ̄ j-əya̰ī ḭ̄ Nə́ɓā yājí kɔ̄ɔ́ ba jə-rāā kəla j-adə̄ ɓesə̄ Baal gə̄.

¹¹ Kɔ́ɔ̄ɓē tél ədadə́ na: Dan ń de kə́ Ejiptə gə̄ ō, Amor gə̄ ō, ngán Amon gə̄ ō, Pilistin gə̄ ō,

¹² Sidon gə̄ ō, Amalek gə̄ ō, Maon gə̄ ō, rāān̄ kumsí ndoō tə́ á ī-ɓāŕmī kadə̄ m̄-rāā sesí m-ájə́sí aĺ a?

¹³ Banī sḭḭ̄ ə́ya̰mī kɔ̄ɔ́ i yā rāań kəla kadə̄ ɓesə̄ gə̄. I tām̄ najə̄ ń noō tə́ n m-ā m-ájə́sí gogə́ to̰ aĺ ní.

¹⁴ Āw̄ ī-nōōī kə̄ dɔ ɓesə̄ gə̄ ń úniī gōdə́ ní tə́ ādə̄ ajən̄sí ndɔ̄ ń wur kɔl kə́ ngá̰ý əsōń dɔsí tə́ ní.

¹⁵ Anī ngán Israel gə̄ tél ədan̄ Kɔ́ɔ̄ɓē na: Kɔ́ɔ̄ɓē, jə-rāā majaĺ seí, adə̄ ī-rāā sejí yá̰a̰ malang ń kemií ndigə ní, banī ɓɔ́ ī-gān̄g dɔjí ɓōólaā.

¹⁶ Gō tə́ anī ró̰ȳn̄ ɓesə̄ yā tə́rā gə̄ ń udən̄ loodə́ ní kɔ̄ɔ́ ba tél rāān̄ kəla yā Kɔ́ɔ̄ɓē. Adə̄ Kɔ́ɔ̄ɓē asə tə́gā tan dɔ ko̰y yādə́ tə́ to̰ alé.

¹⁷ Ngán Amon gə̄ kánə̄n̄ naā ba aw̄ əndān̄ gérger yādə́ dɔ nang kə́ Galaad tə́ ō, ngán Israel gə̄ kánə̄n̄ naā ba aw̄ əndān̄ yādə́ Misəpa ō.

¹⁸ Ngán Israel gə̄ ń ndin̄ dɔ nang kə́ Galaad tə́ ní ō, ngār yādə́ gə̄ ō, ədan̄ naā na: I náā n a aw̄ yā rɔ̄ɔ̄ ngán Amon gə̄ ní? Deē ń a aw̄ ní kɔ́ɔ̄ a ndi ngār dɔ de gə̄ malang kə́ dɔ nang kə́ Galaad tə́.