NGÉ SARYA 1 - Bibəl ta Sar̄

Israel gə̄ ndin̄ Kanaan

¹ Dan ń Jojue oy kɔ̄ɔ́ anī ngán Israel gə̄ aw̄n̄ koō najə̄ kə́ ta Kɔ́ɔ̄ɓē tə́ yā gerə̄ń ké i náā gə̄ dɔ dáńdə́ tə́ n a aw̄n̄ yā rɔ̄ɔ̄ Kanaan gə̄ kété ní wa.

² Anī Kɔ́ɔ̄ɓē ədadə́ na i Juda gə̄ n a aw̄n̄ kété ní. Na n-əla de gə̄ kə́ dɔ nang ní tə́ kem jīdə́ tə́ kɔ̄ɔ́ ɓá.

³ Anī Juda gə̄ mērə̄n̄ Simeo̰ gə̄ ń i ngákó̰ó̰də́ gə̄ ní kaw̄ sedə́ rɔ̄ɔ̄ Kanaan gə̄ tə́, yā taāń dɔ nang yādə́ jīdə́ tə́. Ba gō tə́ anī kə n-ɓon̄ rɔ̄də́ tū yā Simeo̰ gə̄ tə́ kə n-aw̄ kə na taānəń dɔ nang yā Simeo̰ gə̄ jī Kanaan gə̄ tə́ ō.

⁴ Loo ń noō tə́ Simeo̰ gə̄ ɓoon̄ rɔ̄də́ tū yā Juda gə̄ tə́ aw̄nəń rɔ̄ɔ̄ tə́. Kɔ́ɔ̄ɓē əla Kanaan gə̄ ō, Periji gə̄ ō, kem jīdə́ tə́ adə̄ nin̄ tɔ̄lə̄n̄də́ dūbú kutə kem ɓē kə́ Bejek tə́.

⁵ Nin̄-əngen̄ Adoni Bejek kem ɓē kə́ Bejek tə́ adə̄ ənīnən̄ rɔ̄ɔ̄. Nin̄ tetən̄ Kanaan gə̄ ō, Periji gə̄ ō rɔ̄ɔ̄.

⁶ Adoni Bejek teē a̰ȳ, banī ngɔ̄də̄n̄ gōn aw̄ əhɔnən̄ ba gángə̄n̄ ta bo jīn gə̄ kə ta bo njan gə̄ kɔ̄ɔ́.

⁷ Adoni Bejek əda na: Kété ní mban̄g gə̄ kutə sīrí kə́ gángə̄n̄ ta bo jīdə́ gə̄ kə ta bo njadə́ gə̄ a ɔyn̄ butə̄ yá̰a̰ kəsa gə̄ ń a tə́sō nang tə́ ní gíŕ tábəl yāḿ tə́. Adə̄ i yá̰á̰ ń m̄-rāā ní n Nə́ɓā rāām̄ kum gotə kə̄rā ní. Aw̄n̄ seneé Jerusalem adə̄ ni-oy i noó.

⁸ Ngán Juda gə̄ ənīn̄ ɓē kə́ Jerusalem rɔ̄ɔ̄ ō, taān̄ ō. Nin̄ tɔ̄lə̄n̄ de kə́ kemeé gə̄ kɔ̄ɔ́ malang kə kəyā kaskaraá ba əlan̄ hor dɔ ɓē tə́.

⁹ Gō tə́ anī aw̄ rɔ̄ɔ̄n̄ Kanaan gə̄ ń ndin̄ gō nang kə́ mbalá tə́ ō, kə́ Negeb tə́ ō, gō nang kə́ mbal̄ bo gətóo tū tə́ tə́ ō ní.

¹⁰ Rɔ̄ɔ̄n̄ de kə́ Hebron gə̄ ō. Kété ní rī ɓē kə́ Hebron na i Kiryat Arba, adə̄ tɔ̄lə̄n̄ Sesay gə̄ ō, Ahiman gə̄ ō, Talmai gə̄ ō.

¹¹ Ḭḭn̄ noó aw̄ rɔ̄ɔ̄n̄ de gə̄ kə́ Debir. Kété ní rī ɓē kə́ Debir na i Kiryat Seper.

¹² Kaleb əda na deē ń taā ɓē kə́ Kiryat Seper anī, na n-a n-adə̄ kɔ́ɔ̄ ngōnən kə́ dəyá̰ ń rīn na i Aksa ni kadə̄ taā.

¹³ Otəniel kə́ ngōn̄ Kenas ń ni i gidə Kaleb ní aw̄ taā ɓē ní. Adə̄ Kaleb adə̄n̄ ngōnən kə́ dəyá̰ ń rīn na i Aksa ní kə́ nə̄yá̰n tə́.

¹⁴ Dan ń Aksa reē ugə̄ kújú jī Otəniel tə́ anī, ədan najə̄ ndɔr̄ kə́ kadə̄ dəje bɔbə̄n Kaleb. Aksa risə dɔ kərō yān tə́ anī Kaleb dəjen na ké gḛy i rí wa.

¹⁵ Anī Aksa tél əda na: Ī-rāā majə seḿ. Ādə̄m̄ ta kəɓa man̄ gə̄ tə́ tām̄ dɔ nang kə́ Negeb ń ādə̄m̄ ní man̄ gətóo tū tə́. Anī Kaleb adə̄n ta kəɓa man̄ gə̄ kə́ loo kə́ kḭḭ kə̄ dɔɔ́ tə́ ō, kə́ loo kə́ tél kə̄ nang tə́ tə́ ō.

¹⁶ Keni gə̄ ń i ngán um Moijə kə́ dəngam ní, ḭḭn̄ ɓē kə́ kāgə̄ túmbur gə̄ i tū tə́ ba aw̄n̄ naā tə́ kə ngán Juda gə̄ kem dəla loo yā Juda ń deē ra Arad anī i kə̄ dām̄ mbɔ́r ɓē kə́ geleé tə́ ní. Nin̄ aw̄ ndin̄ tū tə́ kə ngán Juda gə̄.

¹⁷ Juda gə̄ kə Simeo̰ gə̄ ń i ngákó̰ó̰də́ gə̄ ní, aw̄n̄ rɔ̄ɔ̄ tə́ anī tetən̄ Kanaan gə̄ ń ndin̄ Sepatə ní rɔ̄ɔ̄. Nin̄ bāān̄ dɔ ɓē ní tām̄ yā Nə́ɓā tə́, ba əndān̄ rīn na i Horma.

¹⁸ Juda gə̄ taān̄ ɓē kə́ Gaja ō, Askalon ō, Ekəron ō, naā tə́ kə loo gə̄ kə́ gō gīdə ɓē gə̄ ní tə́.

¹⁹ Kɔ́ɔ̄ɓē nəkɔ́ i naā tə́ sedə́ adə̄ nin̄ taān̄ gō nang kə́ mbalá. Banī asən̄ tə̄ɓā de gə̄ ń ndin̄ ndágə looó ní alé najə̄ púsə rɔ̄ɔ̄ yādə́ gə̄ kə́ rāā kə gindīí tə́.

²⁰ Adə̄n̄ Kaleb ɓē kə́ Hebron tītə̄ń Moijə ədań ní, adə̄ taā ɓē ní jī ngán Anak gə̄ ń ndin̄ gír loo mətá tə́ ní.

²¹ Ba Yebus gə̄ ń ndin̄ Jerusalem ní ngán Benjamḛ gə̄ tə̄ɓān̄də́ kɔ̄ɔ́ alé, adə̄ ndin̄ naā tə́ sedə́ kem ɓē kə́ Jerusalem tə́ bátə́ ɓōólaā.

²² Epəraim gə̄ ō, Manase gə̄ ō ń nin̄ i ngán Jəjep gə̄ ní, aw̄ rɔ̄ɔ̄n̄ ɓē kə́ Betel ba Kɔ́ɔ̄ɓē i naā tə́ sedə́.

²³ Ta kəga dɔ ní əlan̄ de gə̄ adə̄ aw̄ əndān̄ ma̰ȳ ɓē kə́ Betel. Kété ní rī Betel na i Lujə.

²⁴ Ngé kum̄ loo gə̄ ní a̰a̰n̄ deē kógə̄ḿ teē kem ɓēé anī ədanən̄ na: Ɔ́jə́jí loo kə́ yā kudəń kem ɓēé anī j-a jə-rāā kem majə seí.

²⁵ Deē ní ɔjədə́ loo kə́ yā kudəń kem ɓēé. I beé n nin̄ tɔ̄lnəń de kə́ kem ɓē ní tə́ gə̄ malang kə kəyā kaskaraá ní. Banī əya̰n̄ deē ní ō, de kə́ gír kaa yān tə́ gə̄ malang ō, adə̄ aw̄n̄.

²⁶ Deē ní aw̄ dɔ nang yā Het gə̄ tə́ aw̄ rāā ɓē kógə̄ḿ ba əndā rī ɓē ní na i Lujə. Adə̄ bátə́ ɓōólaā gə̄gē ní rī ɓē ní na i Lujə.

²⁷ Manse gə̄ tə̄ɓān̄ de gə̄ kə́ kem ɓē kə́ Bet Sean tə́ aĺ ō, Tanak tə́ aĺ ō, Dor tə́ aĺ ō, Ibəleam tə́ aĺ ō, Megido tə́ aĺ ō. Tə̄ɓān̄ de gə̄ ń ndin̄ kem ngán ɓē gə̄ ń ɓē gə̄ ń noō o̰o̰n̄ ɓē dɔ tə́ ní aĺ ō. Adə̄ Kanaan gə̄ ndin̄ dɔ nang ní tə́ kə̄ nodə́ tə́.

²⁸ Nəkɔ́ ń ngán Israel gə̄ ngan̄gnəń ngá̰ý gə̄gē ní, nin̄ tə̄ɓān̄ Kanaan gə̄ kɔ̄ó alé, ba əndān̄ i kəla ɓəlo kə́rēý gə̄ tá dɔdə́ tə́.

²⁹ Epəraim gə̄ tə̄ɓān̄ Kanaan gə̄ ń ndin̄ Gejer ní kɔ̄ɔ́ alé, adə̄ Kanaan gə̄ ndin̄ Gejer dandə́ tə́.

³⁰ Jabulo̰ gə̄ tə̄ɓān̄ Kanaan gə̄ ń ndin̄ Kitəron ní aĺ ō, Nahalal ní aĺ ō. Adə̄ Kanaan gə̄ ndin̄ dandə́ tə́. Banī kəla ɓəlo kə́rēý gə̄ tá əndān̄ dɔdə́ tə́.

³¹ Aser gə̄ tə̄ɓān̄ de gə̄ kə́ Ako ō, Sidon ō, Alab ō, Akjib ō, Helba ō, Apik ō, Rehob ō, kɔ̄ɔ́ alé.

³² Adə̄ nin̄ ndin̄ dan Kanaan gə̄ ń ndin̄ kem ɓēé ní, tām̄ nin̄ tə̄ɓān̄də́ kɔ̄ɔ́ alé.

³³ Nepətali gə̄ tə̄ɓān̄ Kanaan gə̄ ń ndin̄ Bet Semes ō, Bet Anat ō ní alé. Nin̄ ndin̄ dɔ dáńdə́ tə́ banī kəla ɓəlo kə́rēý gə̄ tá əndān̄ dɔdə́ tə́.

³⁴ Amor gə̄ tā̰ā̰n̄ ngán Dan gə̄ rɔ̄ɔ̄ aw̄ əndān̄də́ gō nang kə́ mbalá tə́. Nin̄ əya̰n̄də́ adə̄ risə aw̄n̄ ndágə looó alé.

³⁵ Nin̄-ndin̄ kem ɓē kə́ Har Heres tə́ ō, Ayalon tə́ ō, Salbim tə́ tə́ ō, kə̄ nodə́ tə́. Ba dan ń Epəraim gə̄ ō, Manase gə̄ ō, ngangə̄n̄ ngá̰ý ní anī əndān̄ kəla ɓəlo kə́rēý gə̄ dɔ Amor gə̄ tə́.

³⁶ Dɔ nin̄ dɔ nang yā Amor gə̄ əla gír i mbal̄ ń ra loo kə́ kḭḭ kə̄ dɔɔ́ kə́ Akrabim tə́ ní, ba əta tan kum kə̄ dām̄ mbɔ́r ɓē kə́ ko̰ó̰ tə́.