NEHEMI 9 - Bibəl ta Sar̄

Ngé kán̄ naā gə̄ ɔrə̄n̄ gír majaĺ yādə́ gə̄

¹ Kem nāā kə́ kógə̄ḿ beē nəkɔ́ ń noō tə́, kə ndɔ̄ kə́ nge ko̰ kutə jōó gidə i sɔ́ anī, ngán Israel gə̄ kánə̄n̄ naā yā ndi ɓō tām̄ yā Nə́ɓā tə́. Nin̄ o̰o̰n̄ kūbə̄ kəhɔ ndoō ō, ɔyn̄ nán̄g kə̄ dɔdə́ tə́ adə̄ rɔ̄də́ i nán̄g malang ō.

² Nin̄ ɔrə̄n̄ rɔ̄də́ kɔ̄ɔ́ rɔ̄ tə̄rā gə̄ tə́ ba ndin̄ kə kérdə́ ō, ɔrə̄n̄ gír majaĺ yādə́ gə̄ ō, gíŕ yá̰á̰ kə́ gōtə́ aĺ gə̄ ń kaadə́ gə̄ rāān̄ ní ō.

³ Nin̄ unən̄ kum mbang mətá ran̄neé kə njadə́ dɔɔ́ gotə kógə̄ḿ oōn̄neé najə̄ ń a tə́dan̄ kem makətūbə̄ ndū najə̄ y ā Kɔ́ɔ̄ɓē Nə́ɓā yādə́ tə́ ní. Tél unən̄ kum mbang mətá ɓáý to̰ ɔrə̄n̄neé gír majaĺ yādə́ gə̄ ō, əsōn̄neé kə̄ nang tə́ no Kɔ́ɔ̄ɓē Nə́ɓā yādə́ tə́ ō.

⁴ Yesua ō Bani ō Kadəmiel ō Sebania ō Buni ō Serebia ō Banī ō Kenani ō ɔsən̄ nang ḭḭn̄ dɔɔ́ loo yā ngán Lebi gə̄ tə́ ba nōōn̄ kə̄ dɔ Kɔ́ɔ̄ɓē Nə́ɓā yādə́ tə́ yā dəjeń kadə̄ dḭḭ̄də́.

⁵ Gō tə́ anī Yesua ō Kadəmiel ō Banī ō Hasabəneya ō Serebia ō Hodia ō Sebania ō Petahia ō ń i ngán Lebi gə̄ ní ədan̄ na: Ḭ́ḭī dɔɔ́ ɔ́siī gɔn Kɔ́ɔ̄ɓē Nə́ɓā yāsí! Əlan̄ gír kɔsə gɔnən i jóó ngá̰ý ō, a to i ta kaw̄ jóo ō! Kɔ́ɔ̄ɓē, ādə̄ de gə̄ ədan̄ rīí kə́ majə! Rīí to kɔsə gɔn ō, bo tɔȳ najə̄ kə́ majə gə̄ malang ń de gə̄ asən̄ kəda d ɔ tə́ ní ō,

Ndɔ̄ȳ kə́ bo

⁶ I īkɔ́ ngóy kal kógə̄ḿ beē n i Kɔ́ɔ̄ɓē ní! I ḭ̄ n ī-rāā dɔ rā̰ adə̄ bo ngá̰ý ní ō, i ḭ̄ n ī-rāā tə́yō̰ gə̄ malang kə́ dɔ rā̰ tə́ ō, i ḭ̄ n ī-rāā dɔ nang kə yá̰a̰ malang kə́ tū tə́ ō, bā bo gə̄ kə yá̰a̰ malang kə́ kum tə́ gə̄ ō ní. I ḭ̄ n ī-rāā ādə̄ yá̰a̰ gə̄ ń noō malang ndin̄ kə kumdə́ ní ō, i ḭ̄ n yá̰a̰ malang kə́ dɔ rā̰ tə́ a əsō kə̄ nang tə́ a rɔyī ō ní.

⁷ I ḭ̄ Kɔ́ɔ̄ɓē Nə́ɓā n ī-gə̄rā Abəram ní. I ḭ̄ n ī-rāā ādə̄ ni teē kɔ̄ɔ́ kem ɓē kə́ Ur tə́, dɔ nang kə́ Kalde tə́, ba ə̄ndā rīn na i Abəraham dɔn tə́ ní.

⁸ Á̰a̰ā̰ kadə̄ ni i de kə́ ra dɔ ndūn tə́, adə̄ ə̄nī ndūí yā kadə̄n dɔ nang yā Kanaan gə̄ ō Het gə̄ ō Amor gə̄ ō Periji gə̄ ō Yebus gə̄ ō Girgas gə̄ ō, kadə̄ ngánən gə̄ ō ngán kaan gə̄ ō ndin̄ tū tə́. Ī-rāā yá̰á̰ ń ə̄nī ndūí yā rāā ní tɔdɔ̄ ḭ̄ i de kə́ súmūú.

⁹ Á̰a̰ kaají gə̄ loo ka̰a̰ tápə̄ tə́ dɔ nang kə́ Ejiptə tə́ ō, ōō kɔŕ ń əgan̄ ta bā tə̄ɓā gə̄ tə́ ní ō.

¹⁰ Ī-rāā yá̰a̰ gə̄ kə́ yā kɔjəń yá̰a̰ gə̄ ō, yá̰á̰ kə́ to kɔr kum gə̄ ō, dɔ Parao̰ tə́ ō, ngé rāā kəla yān gə̄ tə́ ō, de gə̄ malang kə́ kem ɓē yān tə́ gə̄ ō. Tɔdɔ̄ ī-ger̄ kɔjə ń de kə́ Ejiptə tə́ gə̄ ɔjən̄ rɔ̄də́ dɔ kaají gə̄ tə́ ní. Adə̄ rīí ɓār̄ ngá̰ý. Rī ɓār̄ yāí ní to ɓōólaā ɓáý.

¹¹ Ī-gān̄g bā bo no ngán Israel gə̄ tə́ adə̄ mānə̄n̄ danaá loo kə́ tutə tə́. Ī-mbə́rē ngé ngɔ̄də̄ gōdə́ gə̄ ī-tə́nādə́ dan ɓūl̄ bā tə́. Nin̄ jə̄ngā aw̄ ndin̄ gír maná tītə̄ mbal̄ beé.

¹² Ɔ́r no gír deē yāí gə̄ kadaá i kə kil̄ man̄ kə́ ra kə ngālāá ɓururu ō, ndɔ̄ɔ́ anī i kə hor kə́ ra kə ngālāá ɓururu kadə̄ a̰a̰n̄neé loo dɔ róbə́ n njə̄rādə́ tū tə́ ní tə́ ō.

¹³ Ḭ̄ ń ī-ndi dɔ rā̰ tə́ ní ī-risə dɔ mbal̄ Sinai tə́ ba ɔ̄r̄ najə̄ sedə́. Ə́dádə́ gō míndə kə́ gōtə́ kə́ kadə̄ rāān̄ gə̄ ō, ɔ́jə́də́ ndū najə̄ kə́ rɔ̄kum gə̄ ō, jī bēl̄ loo rāā yá̰a̰ gə̄ ō, yá̰á̰ kə́ majə gə̄ kə́ kadə̄ rāān̄ gə̄ ō.

¹⁴ Ī-rāā ādə̄ gerə̄n̄ ndɔ̄ sabat ń i ndɔ̄ yāí kə́ kɔr̄ kam̄ tayā ní ō, ə́dádə́ yá̰a̰ gə̄ kə́ kadə̄ rāān̄ gə̄ ō, ɔ́jə́də́ jī bēl̄ loo rāā yá̰a̰ gə̄ ō, ādə̄də́ ndū najə̄ ō, kə ta kūl̄ nge kəla yāí Moijə.

¹⁵ Ādə̄də́ yá̰a̰ kəsa kə́ ḭḭ dɔ rā̰ tə́ adə̄ əsan̄ adə̄ tɔ̄l̄ ɓōdə́ ō, ī-rāā ādə̄ man̄ teē tū mbal̄ tə́ adə̄ a̰ȳn̄ adə̄ gān̄g kəndā ń rāādə́ ní ō. Ə́dádə́ na kə reē kə taān̄ ɓē ń ɔ́y jīí kə̄ dɔɔ́ ī-túbəń ə́da na ā ādə̄də́ ní.

¹⁶ Banī kaají gə̄ ɔjən̄ rɔ̄də́ ō, rāān̄ dɔ ngan̄g ō, yá̰a̰ gə̄ ń ə́dádə́ kadə̄ rāān̄ ní oōn̄ aĺ ō.

¹⁷ Nin̄ mbātə́n̄ koō ō, dɔdə́ ndígə̄nal yá̰á̰ kə́ yáā gə̄ ń ī-rāā tām̄ yādə́ tə́ ní kɔ̄ɔ́ ō. Nin̄ rāān̄ dɔ ngan̄g ō, loo dum̄ naā yādə́ tə́ ní gírə̄n̄ tél kaw̄ Ejiptə ta kəla ɓəlo yādə́ tə́ gogə́ ō. Banī ḭ̄ i Nə́ɓā kə́ ā ī-mā̰ȳ rɔ̄í ō, kemií majə ō, kumií a o̰o̰ī ō, ī-rāā wōn̄g láẃ aĺ ō, ī-rāā kem majə ngá̰ý ō, adə̄ ə́yá̰də́ kɔ̄ɔ́ alé.

¹⁸ Nin̄ nōn̄ gində̄ rāān̄ ngōn̄ man̄g tə́ ba ədan̄ na: Nə́ɓā yājí ń teē sejí kɔ̄ɔ́ kem ɓē kə́ Ejiptə tə́ ní ni n t oó! Háĺdə́ ń rāān̄ seí ní i háĺ kə́ majaĺ ngá̰ý adə̄ najə̄ i dɔdə́ tə́.

¹⁹ Banī kumií o̰o̰ī ngá̰ý adə̄ ə́yá̰də́ kɔ̄ɔ́ kem dəla loo tə́ alé. Kil̄ man̄ kə́ ra kə ngālāá ɓururu ń a ɔjədə́ róbə kadaá ní ɔr̄ rɔ̄n kɔ̄ɔ́ rɔ̄də́ tə́ aĺ ō, hor kə́ ra kə ngālāá ɓururu ń a a̰a̰n̄neé loo dɔ róbə́ njə̄rādə́ tə́ ní ɔr̄ rɔ̄n kɔ̄ɔ́ rɔ̄də́ tə́ aĺ ō.

²⁰ Ḭ̄ ādə̄də́ ndílí kə́ majə kadə̄ gern̄neé yá̰a̰ ō, ɔ̄gə̄də́ mána aĺ ō, ādə̄də́ man̄ adə̄ a̰ȳn̄ kadə̄ tɔ̄l̄ kəndā ń rāādə́ ní ō.

²¹ Á̰a̰ gōdə́ ɓāl̄ kutə sɔ́ kem dəla loo tə́. Nin̄ nalə̄n̄ yá̰á̰ kógə̄ḿ alé. Kūbə̄ yādə́ gə̄ ngísən̄ aĺ gə̄ ō, njadə́ tágə̄ aĺ ō.

²² Ḭ̄ ə́la ɓē ko̰o̰ ō, gír de gə̄ ō, kem jīdə́ tə́. Nin̄ táān̄ dɔ nang kə́ kadə dɔ nang yādə́ tə́, adə̄ i dɔ nang yā Sihon mban̄g kə́ Hesəbon ō, dɔ nang yā Og mban̄g kə́ Basan ō.

²³ Ādə̄də́ ngán gə̄ ō, ngán kaadə́ gə̄ ō, kutədə́ i ngá̰ý tītə̄ tə́yō̰ gə̄ kə́ dɔ rā̰ tə́ ō. Ɔ́r nodə́ āw̄ sedə́ dɔ nang ń ə́da kaadə́ gə̄ kadə̄ aw̄ taān̄ ní tə́ ō.

²⁴ Ngáńdə́ gə̄ aw̄ ugə̄n̄ dɔ nang ní tə́ ba taān̄ rɔ̄kum. Ī-tetə dɔ Kanaan gə̄ ń i de kə́ kem ɓē ní tə́ gə̄ ní kɔ̄ɔ nodə́ tə́ ba ə́la dɔdə́ gíŕ tɔ́gə yādə́ tə́, naā tə́ kə mban̄g yādə́ gə̄ ō, de kə́ kem ɓēé gə̄ ō, kadə̄ rāān̄ sedə́ yá̰á̰ ń kemdə́ ndigə ní.

²⁵ Nin̄ taān̄ ɓē kə́ ngan̄g gə̄ ō, nang kə́ teē kōō ngá̰ý gə̄ ō, kújə́ kə́ yá̰a̰ kənge rosə kem gə̄ ō, bəlo man̄ kə́ ndēr̄ kɔ̄ɔ́ gə̄ ō, kāgə̄ nduú gə̄ ō, kāgə̄ olibə gə̄ ō, gotə kāgə̄ kə́ rang kə́ kan̄ gə̄ ō. Nin̄ əsan̄ yá̰a̰ ō, əsa ndānə̄n̄ ō, boon̄ lúbə́ lúbə́ ō, ndin̄ dan rɔ̄nel̄ tə́ ō, i kə ta kūl̄ rāā kem majə yāí kə́ ngá̰ý.

²⁶ Banī nin̄ rāān̄ dɔ ngan̄g, mbātə́n̄ kadə̄ ó̰o̰ ɓē dɔdə́ tə́. Taān̄ ndū najə̄ yāí ənīn̄ gidədə́ tə́ ta kaw̄ kə̄ nú. Nin̄ tɔ̄lə̄n̄ ngé koō ta yāí gə̄ ń i ngé ra sedə́ gagar ta tél reē gogə̄ rɔ̄í tə́ ní. Háĺdə́ ń rāān̄ ní majaĺ ngá̰ý,

²⁷ adə̄ ə́ládə́ kem jī madə̄ ba̰ā̰də́ gə̄ tə́ adə̄ rāān̄ kumdə́ ndoō tə́. Dan ń wur kɔl kə́ ngá̰ý əsō dɔdə́ tə́ ní, nōōn̄ kə̄ dɔí tə́, anī ī-ndi dɔ rā̰ tə́ ōō nōō yādə́. Kumií o̰o̰ī adə̄ ādə̄də́ ngé gān̄g dɔdə́ gə̄ adə̄ ɔrə̄n̄də́ kɔ̄ɔ́ jī m adə̄ ba̰ā̰də́ gə̄ tə́.

²⁸ Ba dan ń əngen̄ loo taā koō anī tél əlan̄ gír a rāān̄ majaĺ ta kumií tə́. Tā anī ḭ̄ ə́yá̰də́ kə̄ jī madə̄ ba̰ā̰də́ gə̄ tə́ adə̄ rāān̄də́ ndoō tə́. Tél nōōn̄ kə̄ dɔí tə́ ɓáý to̰, anī ī-ndi dɔ rā̰ tə́ ōō nōō yādə́. Ájə́də́ nja i ngá̰ý tɔdɔ̄ ī-táŕdə́.

²⁹ Ī-ra sedə́ ta tél reē gogə́ dɔ ndū najə̄ yāí tə́, banī nin̄ rāān̄ dɔ ngan̄g oōn̄ yá̰a̰ gə̄ ń ə́dádə́ ní alé. Gō míndə gə̄ ń ə́da kadə̄ deē rāā anī a ndi kə kumuú ní, nin̄ mbātə́n̄ rāā kɔ̄ɔ́. Nin̄ dumə̄n̄ naā ō, rāān̄ dɔ ngan̄g ō. Nin̄ mbātə́n̄ koō najə̄ yāí ō kɔ̄ɔ́.

³⁰ Ī-tə́gā taí dɔdə́ tə́ ɓāl̄ ngá̰ý. Ī-ndán̄gdə́ dɔ háĺdə́ kə́ majaĺ tə́ kə ta kūl̄ Ndílí, tɔdɔ̄ ə̄ndā najə̄ ta ngé koō ta yāí gə̄ tə́ adə̄ ədan̄də́, banī nin̄ nēlə̄n̄ mbīdə́ oōn̄neé najə̄ ní alé. Adə̄ ə́ládə́ kem jī de gə̄ kə dɔ ɓē kə́ rang gə̄ tə́.

³¹ Banī kumií o̰o̰ī ngá̰ý, adə̄ ə́ya̰də́ ādə̄ nujən̄ sedə́ kɔ̄ɔ́ malang aĺ ō, ə́yá̰də́ kɔ̄ɔ́ aĺ ō. Tɔdɔ̄ ḭ̄ i Nə́ɓā kə́ nge kem majə ō, kə́ kumií a o̰o̰ī adə̄ ā ī-mā̰ȳ rɔ̄í ō.

³² Ba ngɔlaā ní Nə́ɓā yājí, Nə́ɓā kə́ bo ō, kə́ tɔ́gí i ngá̰ý ō, kə́ ī-to ɓōĺ ngá̰ý, ḭ̄ ń ā ī-ra dɔ ndūí kə́ ə̄nī tə́ ō, ā ī-rāā háĺ kə́ sew ō ní, ko̰y gə̄ malang ń jḭḭ ō, mban̄g yājí gə̄ ō, ngār yājí gə̄ ō, ngé tun̄ yá̰a̰ yājí gə̄ ō, ngé koō ta yājí gə̄ ō, kaají gə̄ ō, gír deē yāí gə̄ malang ō, j-əla gír kənge ɓāl̄ yā mban̄g gə̄ kə́ Asiri tə́ bátə́ ɓōólaā ní, ī-lōō rāā yá̰á̰ kə́ sḛ́ý beē tə́.

³³ Ḭ̄ i de kə́ gōtə́ dan yá̰a̰ gə̄ malang ń teēn̄ dɔjí tə́ ní, tɔdɔ̄ ḭ̄ ī-rāā i yá̰á̰ kə́ rɔ̄kum, banī jḭḭ jə-rāā i kem ndul.

³⁴ Mban̄g yājí gə̄ ō, ngār yājí gə̄ ō ngé tun̄ yá̰a̰ yājí gə̄ ō kaají gə̄ ō, rāān̄ yá̰á̰ ń ndū najə̄ yāí əda ní aĺ ō, əndān̄ kumdə́ gír yá̰a̰ gə̄ ń ə́dádə́ kadə̄ rāān̄ ní tə́ aĺ ō, əndān̄ kumdə́ gír tāā gə̄ ń ī-tāādə́ kə̄ nja naā tə́ ní aĺ ō.

³⁵ Dan ń nin̄ a o̰o̰n̄neé ɓē tə́ ō, ī-rāań majə sedə́ adə̄ əngen̄neé yá̰á̰ ngá̰ý tə́ ō, dɔ nang kə́ laa ō teē yá̰á̰ ngá̰ý tə́ ō ń āw̄ sedə́ tū tə́ ní, nin̄ rāān̄ kəla adə̄nī aĺ ō, tūrə̄n̄ gidədə́ kɔ̄ɔ́ ta kəla rāādə́ kə́ majaĺ gə̄ tə́ aĺ ō.

³⁶ Ɓōólaā anī jḭḭ i ɓəlo gə̄! Jḭḭ i ɓəlo gə̄ dɔ nang ń ādə̄ kaají gə̄ kadə̄ əsan̄ kan̄ kāgə̄ kə́ tū tə́ gə̄ ō, yá̰á̰ kə́ majə kə́ tū tə́ gə̄ ō ní!

³⁷ Dɔ nang ní teē yá̰á̰ kə́ majə gə̄ ngá̰ý adə̄ mban̄g gə̄ ń ə̄ndādə́ dɔjí tə́ tām̄ majaĺ yājí gə̄ tə́ ní. Nin̄ o̰o̰n̄ ɓē dɔ dā̰ rɔ̄jí tə́ ō, dɔ yá̰a̰ kul̄ yājí gə̄ tə́ ō, tītə̄ ń kemdə́ ndigə ní. Ba jḭḭ jə-ndi i dan wur kɔl kə́ ngá̰ý tə́.