NEHEMI 8 - Bibəl ta Sar̄

^1-2 Kə ndɔ̄ kə́ ta kəga dɔ yā nāā kə́ nge ko̰ sīrí anī ngán Israel gə̄ kánə̄n̄ naā ndágə loo kə́ ta róbə yā man̄ gə̄ tə́. Nin̄ malang ní kemdə́ i kógə̄ḿ. Nin̄ ədan̄ Esdras nge ndóō de gə̄ ndū najə̄ kadə̄ reē kə makətūbə̄ ndū najə̄ ń Kɔ́ɔ̄ɓē adə̄ Moijə kadə̄ adə̄ Israel gə̄ ní. Esdras reēń nodə́ tə́, adə̄ i no dəngam gə̄ tə́ ō dəyá̰ gə̄ tə́ ō ngáń kə́ ɓāl̄də́ asə kadə̄ gerə̄n̄ kum najə̄ gə̄ tə́ ō.

³ Esdras tə́da najə̄ kə́ kem makətūbə̄ ní tə́ adə̄də́. Ni-əla gír tə́da i dəloí ɓatə bátə́ mbang ugə̄ dan ɓēé. Ni-ra i ndágə loo kə́ sɔɔ̄n̄ ta naā kə ta róbə yā man̄ gə̄ tə́ n tə́dań ní. De gə̄ malang nēlə̄n̄ mbīdə́ oōn̄neé najə̄ kə́ kem makətūbūú.

⁴ Esdras nge ndóō de gə̄ ndū najə̄ ra i kə njan kə́ dɔɔ́ dɔ loo kə́ kḭḭ kə̄ dɔɔ́ kə́ rāā kə kāgāá tām̄ yā kán̄ naā ní tə́. De gə̄ ń ran̄ dɔ jī ko̰n tə́ ní i Matitia ō Sema ō Anaya ō Uria ō Hilkia ō Maseya ō. De gə̄ kə́ dɔ jī gelən tə́ i Pedaya ō Misael ō Malkia ō Hasum ō Hasəbadana ō Jakari ō Mesulam ō.

⁵ Esdras ra i dɔɔ́ dɔ ngé kán̄ naā gə̄ tə́, adə̄ dan ń ni teē kem makətūbə̄ ní de gə̄ malang a̰a̰n̄ adə̄ ḭḭ ran̄ kə njadə́ dɔɔ́.

⁶ Esdras tɔ̄ȳ Kɔ́ɔ̄ɓē Nə́ɓā kə́ bo. Anī de gə̄ malang ɔyn̄ jīdə́ kə̄ dɔɔ́ ba tūr̄ ədan̄ na: Adə̄ i tītə̄ ń noō! Adə̄ i tītə̄ ń noō! Gō tə́ anī ɔsən̄ nodə́ nang tə́ no Kɔ́ɔ̄ɓē tə́ ō, rɔȳnən̄ ō.

⁷ Yesua ō Bani ō Serebia ō Yamin ō Akub ō Sabetai ō Hodia ō Maseya ō Kelita ō Ajaria ō Yojabad ō Hanan ō Pelaya ō ngán Lebi gə̄ ō ɔjən̄ de gə̄ kum ndū najə̄, ba de gə̄ ran̄ gotə kógə̄ḿ kə njadə́ kə̄ dɔɔ́ oōn̄neé.

⁸ Nin̄ tə́dan̄ najə̄ kə́ kem makətūbə̄ ndū najə̄ yā Nə́ɓā tə́ adə̄ unjə̄ wáńg wáńg ō, ɔjən̄ de gə̄ kum adə̄ de gə̄ gerə̄n̄ kum najə̄ ń tə́dan̄ ní ō.

⁹ Dan ń de gə̄ oōn̄ najə̄ ń tə́dan̄ ní anī, nin̄ malang nōōn̄. Adə̄ Nehemi nge ko̰o̰ ɓē ō, Esdras nge tun̄ yá̰á̰ kə́ nge ndóō de gə̄ ndū najə̄ ō, ngán Lebi gə̄ kə́ nge kɔjə de gə̄ kum najə̄ gə̄ ō, ədan̄ de gə̄ na: Ndɔ̄ kə́ ɓōólaā i ndɔ̄ kə́ kɔr̄ kam̄ tayā tām̄ yā Kɔ́ɔ̄ɓē Nə́ɓā yāsí tə́! Ī-lōōī kəhɔ ndoō ō nōō ō.

¹⁰ Esdras əda ɓáý to̰ na: Ī-tél āwī kə̄ ɓē yāsí gə̄ tə́, āw̄ ə́saī dā̰ kə́ yḛmbə gə̄ ō, ā̰yī kasə kə́ nel̄ gə̄ ō, ī-kēgī ə́laīneé ādī de gə̄ ń ndīrə̄n̄ yá̰a̰ aĺ ní tə́ ō. Tɔdɔ̄ ndɔ̄ kə́ ɓōólaā i ndɔ̄ kə́ kɔr̄ kam̄ tay ā tām̄ yā Kɔ́ɔ̄ɓē yājí tə́. Ī-lōōī kəhɔ ndoō. Tɔdɔ̄ rɔ̄nel̄ yā Kɔ́ɔ̄ɓē i tɔ́gə́sí!

¹¹ Ngán Lebi gə̄ sɔlə̄n̄ kem de gə̄ ō, nin̄ ədan̄ na: Ī-raī tasí mbóo! Ndɔ̄ kə́ ɓōólaā i ndɔ̄ kə́ kɔr̄ kam̄ tayā tām̄ yā Nə́ɓā tə́. Ādī wursí ɔlsí alé.

¹² Loo ń noō tə́ de gə̄ malang tél aw̄n̄ kə̄ ɓē gə̄ tə́ yā kəsa yá̰a̰ ō, ka̰ȳ yá̰a̰ ō. Nin̄ əlan̄ kə núsə yá̰a̰ k əsa yādə́ gēé adə̄n̄ ngé gə̄ ń yādə́ gətóó ní ō, rāān̄ rɔ̄nel̄ ngá̰ý ō, tɔdɔ̄ nin̄ gerə̄n̄ kum najə̄ gə̄ ń ɔjən̄də́ ní majə.

Rāān̄ nāā kújə́ kámbə gə̄

¹³ Teē kə ndɔ̄ kə́ nge ko̰ jōó anī, de kə́ dɔ gír kojə gə̄ yā ngán Israel gə̄ tə́ malang ō, ngé tun̄ yá̰a̰ gə̄ ō, ngán Lebi gə̄ ō, kánə̄n̄ naā rɔ̄ Esdras nge ndóō de gə̄ ndū najə̄ tə́ yā kəndā ma̰ȳ najə̄ gə̄ ń ndū najə̄ əda ní yā ger̄ kum kə gōó majə.

¹⁴ Kumdə́ teē dɔ ndū najə̄ ń Kɔ́ɔ̄ɓē adə̄ Moijə ndang ní tə́ adə̄ gerə̄n̄ na ré ngán Israel gə̄ a rāān̄ nāā kə́ kem nāā kə́ nge ko̰ sīrí tə́ anī, a ndin̄ i kem kújə́ kámbə gə̄ tə́ ō,

¹⁵ a ənīn̄ mbēr̄ ń toō kə̄ kem ɓē yādə́ gə̄ tə́ malang ō, kem ɓē kə́ Jerusalem tə́ ō, a ədan̄ na: Ī-teē āwī dɔ mbalá, āw̄ ī-reēī kə ta jī kāgə̄ olibə kə́ ndɔr̄ gə̄ ō, kə́ əɓan̄ dɔ rɔ̄də́ gə̄ ō, ta jī kāgə̄ mirtə gə̄ ō, ta jī kāgə̄ túmbur gə̄ ō, ta jí kāgə̄ gə̄ kə́ mbīdə́ əga ku gə̄ ō, yā rāań kújə́ kámbə gə̄ tītə̄ ń i kə́ ndang ní.

¹⁶ Loo ń noō tə́ ngán Israel gə̄ teē aw̄ sāān̄ ta jī kāgə̄ gə̄ yā reē rāań kújə́ kámbə gə̄. Ngé kə́rēý gə̄ rāān̄ kújə́ kámbə yādə́ gə̄ i dɔ kújə́ dúŕ dur yādə́ gə̄ tə́ ō, kə́rēý gə̄ rāān̄ yādə́ gə̄ i ndágə loo kə́ ta kújə yādə́ gə̄ tə́ ō, kə́rēý gə̄ rāān̄ yādə́ gə̄ i ndágə loo kə́ ta kújə yā Kɔ́ɔ̄ɓē tə́ ō, kə́rēý gə̄ rāān̄ yādə́ gə̄ i ndágə loo kə́ ta róbə yā man̄ tə́ ō, ndágə loo kə́ ta róbə yā Epəraim tə́ ō.

¹⁷ Ngé kán̄ naā gə̄ malang, adə̄ i ngé gə̄ ń télən̄ ɓəloó ní, rāān̄ kújə́ kámbə gə̄ ba ndin̄ kemeé. Rɔ̄ de gə̄ neldə́ ngá̰ý, tɔdɔ̄ əla gír ɓāl̄ yā Jojue ngōn̄ Nun tə́ bátə́ ɓōólaā ní, ngán Israel gə̄ rāān̄ yá̰á̰ kə́ tītə̄ ń noō alé.

¹⁸ Tə́dan̄ najə̄ kə́ kem makətūbə̄ ndū najə̄ yā Nə́ɓā tə́ kə dɔ ndɔ̄ gə̄. Əlan̄ gír i ndɔ̄ ń əlan̄neé gír rāā nāā tə́ ní bátə́ ndɔ̄ kə́ ta tɔ̄l̄ ta tə́. Rāān̄ nāā ní i ndɔ̄ sīrí, ba ndɔ̄ kə́ nge ko̰ sɔ́sɔ́ anī tɔ̄lə̄n̄ ta rāā nāā ní i kə kán̄ naā kə́ bo ngá̰ý tītə̄ ń ndū najə̄ ədań ní.