NEHEMI 6 - Bibəl ta Sar̄

Madə̄ ba̰ā̰ gə̄ tél reēn̄ gogə́ ɓáý

¹ Sanbalat ō Tobia ō Gesem ń i Arabə ní ō, gotə madə̄ ba̰ā̰jí kə́ rang gə̄ ō, oōn̄ kadə̄ m̄-tél m-ə̄ndā ndogə̄ mbal̄ gidə ɓē tə́ gogə́ ō, kadə̄ loo gə̄ ń ndogə̄ mbal̄ tétə̄ nang tə́ tū tə́ ní i kə́ tə́nī kum kɔ̄ɔ́ malang ō. Dan ngeé ń noō tə́ ní m̄-tə́lá bápə gə̄ ta róbə ndogə̄ gə̄ tə́ aĺ ɓáý.

² Sanbalat nin̄ kə Gesem əla ədamə̄n̄ na: Ī-reē ādə̄ j-əngeī naā Kepirim, wól loo kə́ Ono tə́ ba j-ɔrī najə̄. Nin̄ númə̄n̄ rāām̄ yá̰á̰ kə́ majaĺ.

³ Banī m-ə́la m-ə́dádə́ na: Kəla ń m-ā m̄-rāā ní i kəla kə́ ngá̰ý adə̄ m-ásə kaw̄ alé. Kə m-ə́ya̰ ta kəla kɔ̄ɔ́ ba kə m-āw̄ rɔ̄sí tə́ i najə̄ rí tə́?

⁴ Nin̄ əlan̄ de kə́ kógə̄ḿ beē nəkɔ́ ń noō nja i sɔ́, ba m̄-téĺ m-ə́dádə́ i kum najə̄ kə́ kógə̄ḿ beē.

⁵ Nja kə́ nge ko̰ mí anī Sanbalat əla i nge kəla yān kógə̄ḿ kə makətūbə̄ kə́ ta wōyōó.

⁶ Najə̄ kə́ kem makətūbə̄ ní tə́ n toó: Najə̄ ń nápar de gə̄ a ɔrə̄n̄ ní n toó, tá Gesem əda ō, na ḭ̄ ō, Jipə gə̄ ō, na ī-gírī i tā̰ mban̄g rɔ̄. Na ī-tél na ī-rāā ndogə̄ mbal̄ gogə́ rang na i tām̄ najə̄ ń noō tə́, na ḭ̄ na ī-sāā kadə̄ kə ḭ̄ i mban̄g yādə́ tītə̄ ń de gə̄ a ədan̄neé ní. Tá Gesem əda i beé ō.

⁷ Tá ḭ̄ na ī-tə́ndā ngé koō ta gə̄ Jerusalem gə̄gē ɓáý kadə̄ ənīn̄ mbēr̄ ədan̄ na ḭ̄ na i mban̄g kə́ Juda. Ń to ō ní a ədan̄ mban̄g najə̄ ń noō malang. Adə̄ ī-reē ādə̄ j-oō naā dɔ tə́.

⁸ Loo ń noō tə́ m-ə́la m-ə́dan na: Najə̄ kə́ rɔ̄kum gətóo tū najə̄ kɔrīí ń noō tə́. I kemií īkɔ́ n a ɔjiī najə̄ gə̄ ń noō ní!

⁹ Nin̄ malang ní sāān̄ i kəla ɓōĺ kemjí tə́, kadə̄ tɔ́gə́jí ur̄ wak kadə̄ j-əya̰ ta kəla kɔ̄ɔ́. Kɔ́ɔ̄ɓē, ādə̄m̄ tɔ́gə loo kəla yāḿ tə́!

¹⁰ Ndɔ̄ kə́rēý tə́ m-āw̄ ɓē Semaya kə́ ngōn̄ Delaya kə́ ngōn̄ Metabel, tɔdɔ̄ ni-ənge ta róbə reē rɔ̄ḿ tə́ alé. Anī ni ədam̄ na: Ādə̄ j-ənge naā kem kújə yā Nə́ɓā tə́, kem kújə yā Kɔ́ɔ̄ɓē tə́, ba ādə̄ j-utə̄ ta róbə gə̄ kɔ̄ɔ́ dɔjí tə́, tɔdɔ̄ madə̄ ba̰ā̰í gə̄ a reēn̄ yā tɔ̄lī. A reēn̄ tɔ̄līí tə́ i ndɔ̄ɔ́.

¹¹ m̄-téĺ m-ə́dan na: De kə́ dəngam kə́ tītə̄ḿ mā ń toō a a̰ȳ a? Tá de kə́ tītə̄ḿ mā ń toō ré udə kem kújə yā Kɔ́ɔ̄ɓē tə́ anī a ndi kə kumneé a? M-aā m-údə kemeé alé.

¹² m̄-ger̄ majə ngá̰ý kadə̄ i Nə́ɓā n əndā najə̄ tan tə́ kadə̄ ədam̄ ní alé. Ba i Tobia nin̄ kə Sanbalat n adə̄nən̄ nar kadə̄ ɔrə̄ń naajə̄ seḿ tītə̄ ń noō ní.

¹³ Adə̄nən̄ nar gírí i tām̄ yā rí tə́? I yā kadə̄ ré ɓōĺ kə rāām̄ ɓáa kə m̄-rāā tītə̄ ń ədań ní kadə̄ m̄-mānə ń dɔ ndū Nə́ɓā. Loo ń noō tə́ nin̄ a əngen̄ ta róbə kənda rīḿ loo tə́ kadə̄ rīḿ ɓār̄ majə aĺ ō, kadə̄ ədan̄ na mā n a i nge tájə̄ Nə́ɓā ō.

¹⁴ Nə́ɓā yāḿ, ādə̄ əga kemií dɔ Tobia nin̄ kə Sanbalat tə́ najə̄ yá̰a̰ rāādə́ gə̄ tə́ ō, ādə̄ əga kemií dɔ Noadia nge koō ta kə́ dəyá̰ tə́ ō, dɔ gotə ngé koō ta gə̄ ń sāān̄ kəla ɓōĺ kemḿ tə́ ní ō!

¹⁵ Gír kəla kəndā ndogə̄ mbal̄ gān̄g i kem nāā Elul tə́, kə ndɔ̄ nāā kə́ nge ko̰ kutə jōó gidə i mí. Malang ɓáa kəla kəndā ndogə̄ mbal̄ rāā i ndɔ̄ kutə mí gidə i jōó.

¹⁶ Dan ń madə̄ ba̰ā̰jí gə̄ malang oōn̄ ní, nápar de gə̄ malang ń ndin̄ gīrə̄n̄ gidəjí ní ɓōlə́n̄ ō, rɔ̄də́ sɔl̄də́ ngá̰ý ō. Nin̄ gerə̄n̄ kadə̄ i Nə́ɓā yājí n rāā kəla ní sejí ní.

¹⁷ Dan ngeé ń noō tə́ ní de kə́ bo kə́ Juda tə́ gə̄ ndangən̄ makətūbə̄ ngá̰ý adə̄n̄ Tobia ō, Tobia ndang adə̄də́ ngá̰ý ō.

¹⁸ Tɔdɔ̄ Juda gə̄ ngá̰ý túbən̄ ənīn̄neé míndə́də́ adə̄nən̄, tām̄ ni i um Sekania kə́ ngōn̄ Ara ō, ngōnən Yohanan taā ngōn̄ Mesulam kə́ ngōn̄ Berekia ō.

¹⁹ Nin̄ ədan̄ najə̄ yān kə́ majə ta kumḿ tə́ gə̄gē, télən̄ kə najə̄ kɔrə̄ḿ gə̄ aw̄ ədanən̄ ō. Kété ní Tobia ndang makətūbə̄ əlań adə̄m̄ yā kəlań ɓōĺ kemḿ tə́.