NEHEMI 3 - Bibəl ta Sar̄

Jipə gə̄ tél əndān̄ ndogə̄ mbal̄ kə́ Jerusalem

¹ Eliasib kə́ ngol ngé tun̄ yá̰á̰ gə̄ nin̄ kə ngé tun̄ yá̰a̰ madə̄n gēé ḭḭn̄ dɔɔ́ rāān̄ kəla. Nin̄ rāān̄ ta róbə yā batə̄ gə̄ gogə́ rang. Ɔrə̄n̄ kamə̄n tayā ba tə́lan̄ bápə gə̄ ta tə́. Nin̄ rāān̄ loo kə́ nujə gə̄ kə́ tū ndogə̄ mbal̄ tə́ bátə́ ugə̄n̄ kújə́ kə́ ngāl̄ ɓururu yā ngé kə́ ɓú gə̄ tə́. Dan ń ɔrə̄n̄ kamə̄n tayā oy anī unən̄ ta kəla yādə́ rāān̄ bátə́ ugə̄ kújə́ kə́ ngāl̄ ɓururu yā Hananel tə́.

² De gə̄ ń rāān̄ kəla kadədə́ tə́ ní i de kə́ Jeriko gə̄. Ba deē ń rāā kəla kadə de kə́ Jeriko gə̄ tə́ ní i Jakur kə́ ngōn̄ Imri.

³ De gə̄ ń rāān̄ ta róbə yā kānjə̄ gə̄ ní i de kə́ Senaa gə̄. I nin̄ n rāān̄ dɔ ō, tə́lan̄ bápə gə̄ ta tə́ ō, rákə̄n̄ yá̰a̰ ta tə́ ō, əgan̄ kélé ta tə́ ō ní.

⁴ Deē ń rāā kəla kadədə́ tə́ ní i Meremot kə́ ngōn̄ Uria kə́ ngōn̄ Hakos. Deē ń rāā kəla kadə Meremot tə́ ní i Mesulam kə́ ngōn̄ Berekia kə́ ngōn̄ Mesejabel. Deē ń rāā kəla kadə Mesulam tə́ ní i Sadok kə́ ngōn̄ Baana.

⁵ De gə̄ ń rāān̄ kəla kadə Sadok tə́ ní i de kə́ Tekoa gə̄. Banī de kə́ bo yādə́ gə̄ mbātə́n̄ rāā kəla ń kɔ́ɔ̄ kəla gə̄ ɔjən̄də́ ní.

⁶ De gə̄ ń rāān̄ ta róbə́ kə́ Yesana ní i Yoyada kə́ ngōn̄ Pasea nin̄ kə Mesulam kə́ ngōn̄ Besodia. I nin̄ n rāān̄ dɔ ō, tə́lan̄ bápə gə̄ ta tə́ ō, rákə̄n̄ yá̰a̰ ta tə́ ō, əgan̄ kélé ta tə́ ō ní.

⁷ De gə̄ ń rāān̄ kəla kadədə́ tə́ ní i Melatia kə́ Gabaon ō, Yadon kə́ Meronot ō, de kə́ dəngam gə̄ kə́ Gabaon ō, kə́ Misəpa ō. Nin̄ rāān̄ kəla ní i tām̄ yā nge ko̰o̰ ɓē kə́ gō nang kə́ gidə bā Opəratə kə́ dām̄ kə́ no ɓē tə́.

⁸ Deē ń rāā kəla kadədə́ tə́ ní i Ujiel kə́ ngōn̄ Haraya nge rāā kəla lɔ́r. Ba deē ń rāā kəla kadə Ujiel tə́ ní i Hanania nge rāā ndujə̄ yá̰á̰ kə́ kotə majə gə̄.

⁹ Deē ń rāā kəla kadədə́ tə́ ní i Repaya kə́ ngōn̄ Hur. Ni i ngār kə́ dɔ núsə dɔ nang kə́ Jerusalem tə́.

¹⁰ Deē ń rāā kəla kadədə́ tə́ ní i Yedaya kə́ ngōn̄ Harumapə. Núsə loo ń ni-rāā kəla tū tə́ ní sɔɔ̄n̄ ta naā kə kújə yānneé. Deē ń rāā kəla kadədə́ tə́ ní i Hatus kə́ ngōn̄ Hasabəneya.

¹¹ Malkia kə́ ngōn̄ Harim nin̄ kə Hasub kə́ ngōn̄ Pahat Moab rāān̄ i núsən kə́ ko̰ jōó. Nin̄ rāān̄ kújə́ kə́ ngāl̄ ɓururu ń a ɓārə́n̄ na i kújə́ púr gə̄ ní ō.

¹² Deē ń rāā kəla kadədə́ tə́ ní i Salum kə́ ngōn̄ Halohes. Ni i ngār kə́ dɔ núsə dɔ nang kógə̄ḿ kə́ Jerusalem tə́. Ngánən kə́ dəyá̰ gə̄ rāān̄ kəla seneé.

¹³ Hanun nin̄ kə de kə́ Janoa gə̄ rāān̄ i ta róbə́ kə́ wól loo tə́. I nin̄ n rāān̄ ta róbə́ ní ō, tə́lan̄ bápə gə̄ ta tə́ ō, rákə̄n̄ yá̰a̰ ta tə́ ō, əgan̄ kélé ta tə́ ō ní. Ndogə̄ mbal̄ ń nin̄ rāān̄ ní ngālən asə métər ɓú mí. Nin̄ rāān̄ bátə́ ugə̄n̄ ta róbə dɔ bū loo tə́.

¹⁴ Deē ń rāā ta róbə dɔ bū loo ní i Malkia kə́ ngōn̄ Rekab. Ni i ngār kə́ gō nang kə́ Bet Kerem tə́. I ni n rāā tar óbə́ ní ō, tə́lá bápə gə̄ ta tə́ ō, rákə̄ yá̰a̰ ta tə́ ō, əga kélé ta tə́ ō ní.

¹⁵ Deē ń rāā ta róbə ta kəɓa man̄ ní i Salum kə́ ngōn̄ Kolhojə. Ni i ngār kə́ gō nang kə́ Misəpa tə́. I ni n rāā ta róbə́ ní ō, rāā dɔ ō, tə́lá bápə gə̄ ta tə́ ō, rákə̄ yá̰a̰ ta tə́ ō, əga kélé ta tə́ ō ní. Ndogə̄ mbal̄ kə́ kadə dang kə́ Siloe tə́ ń i dɔ dán ndɔr̄ yā mban̄g tə́ kə loo tə́ndā nja yā njə̄rań ń ḭḭ ɓē yā Dabid tə́ dɔɔ́ ba reē kum kə̄ nang tə́ ní i ni n rāā ō ní.

¹⁶ Deē ń rāā kəla kadə Salum tə́ ní i Nehemi kə́ ngōn̄ Asbuk. Ni i ngār kə́ dɔ núsə gō nang kə́ Bet Sur tə́. Ni ra kəla bátə́ ugə̄ dɔ ɓádə gə̄ yā Dabid tə́, bátə́ ugə̄ dang ń de gə̄ rāān̄ tə́ ní ō, kújə yā go̰ rɔ̄ɔ̄ gə̄ tə́ ō.

¹⁷ De gə̄ ń rāān̄ kəla kadən tə́ ní i ngán Lebi gə̄, adə̄ i Rehum kə́ ngōn̄ Bani ō, Hasabia ń i ngār kə́ dɔ núsə gō nang kə́ Keila tə́ ní ō. Ni-rāā kəla i tām̄ yā gō nang yān tə́.

¹⁸ Deē ń rāā kəla kadən tə́ ní i Binui kə́ ngōn̄ Henadad ń i ngār kə́ dɔ núsə gō nang kə́ Keila tə́ ní.

¹⁹ Deē ń rāā kəla kadə Binui tə́ ní i Ejer kə́ ngōn̄ Yesua ń i ngār kə́ Misəpa ní. Ni-rāā núsə ndogə̄ mbal̄ ń ra sɔɔ̄n̄ ta naā kə loo ń deē a al̄ a aw̄ń kə̄ loo rāā yá̰a̰ rɔ̄ɔ̄ gə̄ tə́ ní kíl ndogə̄ mbal̄ tə́.

²⁰ Deē ń rāā kəla kadə Ejer tə́ kə ngangá ngá̰ý ní i Baruk kə́ ngōn̄ Jabai. Ni-rāā núsə loo ń ḭḭ kíl ndogə̄ mbal̄ tə́ bátə́ ugə̄ ta róbə́ kújə yā Eliasib kə́ ngol ngé tun̄ yá̰a̰ gə̄ tə́ ní.

²¹ Deē ń rāā kəla kadən tə́ ní i Meremot kə́ ngōn̄ Uria kə́ ngōn̄ Hakos. Ni-rāā núsə ndogə̄ mbal̄ ń ḭḭ ta róbə́ kújə yā Eliasib tə́ bátə́ ugə̄ ta tɔ̄l ta kújə yān tə́ ní.

²² De gə̄ ń rāān̄ kəla kadə Meremot tə́ ní i ngé tun̄ yá̰a̰ gə̄ ń ndin̄ kə gō gidə ɓē kə́ Jerusalem ní.

²³ De gə̄ ń utə̄n̄ gō ngé tun̄ yá̰a̰ gə̄ ní i Benjamḛ nin̄ kə Hasub. Nin̄ rāān̄ i núsə ndogə̄ mbal̄ ń ra sɔɔ̄n̄ ta naā kə kújə yādə́ gə̄ ní. Deē ń rāā kəla kadədə́ nin̄ tə́ ní i Ajaria kə́ ngōn̄ Maseya kə́ ngōn̄ Anania. Ni-rāā kəla i kadə kújə yān tə́.

²⁴ Deē ń rāā kəla kadə Ajaria tə́ ní i Binui kə́ ngōn̄ Henadad. Ni-rāā i núsə ndogə̄ mbal̄ kə́ ko̰ jōó ń ḭḭ kújə yā Ajaria tə́ bátə́ ugə̄ kíl loo tə́ ní.

²⁵ Deē ń rāā kəla kadə Binui tə́ ní i Palal kə́ ngōn̄ Ujai. Ni-rāā i loo kə́ dɔ dáń kíl ndogə̄ mbal̄ tə́ kə kújə́ kə́ n gāl̄ ɓururu kə̄ dɔɔ́ ń ra kə̄ kété no kújə yā mban̄g tə́, kadə ndágə loo kə́ ta kújə dəngáý tə́ ní. Deē ń rāā kəla kadə Palal tə́ ní i Pedaya kə́ ngōn̄ Paros.

²⁶ Ngé kəla gə̄ ń ndin̄ Opel ní rāān̄ kəla ugə̄n̄ kújə́ kə́ ngāl̄ ɓururu kə́ teē kə̄ ndágá ń deē ra ta róbə yā man̄ tə́ anī i kə̄ dām̄ kə́ gír ɓē tə́ ní.

²⁷ De gə̄ ń rāān̄ kəla kadədə́ tə́ ní i de kə́ Tekoa gə̄. Əlan̄ gír i loo ń ra sɔɔ̄n̄ ta naā kə kújə́ kə́ ngāl̄ ɓururu kə́ bo ń teē kə̄ ndágá tə́ ní, bátə́ ugə̄n̄ ndogə̄ mbal̄ kə́ Opel tə́.

²⁸ Ngé tun̄ yá̰a̰ gə̄ əlan̄ gír kəla yādə́ i ta róbə yā sə́nda gə̄ tə́. Nin̄ kógə̄ḿ kógə̄ḿ ran̄ i loo kə́ sɔɔ̄n̄ ta naā kə ta kújə yādə́ tə́ n a rāān̄neé kəla ní.

²⁹ Deē ń rāā kəla kadə ngé tun̄ yá̰a̰ gə̄ tə́ ní i Sadok kə́ ngōn̄ Imer. Ni-ra i loo kə́ sɔɔ̄n̄ ta naā kə kújə yānneé tə́ n rāań kəla ní. Deē ń rāā kəla kadən tə́ ní i Semaya kə́ ngōn̄ Sekania. I ni n i nge ngɔ̄m̄ ta róbə́ kə́ dām̄ kə́ gír ɓē tə́ ní.

³⁰ Deē ń rāā kəla kadə Semaya tə́ ní i Hanania kə́ ngōn̄ Selemia. Ba deē ń rāā kəla kadə Hanania tə́ ní i Hanun ń i ngōn̄ Salap kə́ nge ko̰ mehḛ́ ní. Deē ń rāā kəla kadə Hanun tə́ ní i Mesulam kə́ ngōn̄ Berekia. Loo ń ni-rāā kəla tū tə́ ní sɔɔ̄n̄ ta naā kə kújə́ ń ni to kemeé ní.

³¹ Deē ń rāā kəla kadən tə́ ní i Malkia nge rāā kəla lɔ́r. Ni-rāā kəla bátə́ ugə̄ kújə yā ngé kəla gə̄ tə́ ō, ngé rāā gātə̄ gə̄ tə́ ō. Rāā kəla ní i loo ń sɔɔ̄n̄ ta naā kə ta róbə́ kə́ Mipəkad ní tə́. Ni-rāā kəla bátə́ ugə̄ kújə́ kə́ kíl loo tə́.

³² Ngé rāā kəla lɔ́r gə̄ ō, ngé rāā gātə̄ gə̄ ō, rāān̄ kəla i loo ń to dɔ dáń kújə́ kə́ dɔɔ́ kə́ kíl loo tə́ tə́ kə ta róbə yā batə̄ gēé ní tə́.

Madə̄ ba̰ā̰ Jipə gə̄ gḛyn̄ bā̰ā̰ ta kəla

³³ Dan ń Sanbalat oō kadə̄ jḭḭ Jipə gə̄ j-a j-əndā ndogə̄ mbal̄ ní anī wōn̄g rāān̄ ngá̰ý. Ni rāājí i yá̰á̰ tə́ alé,

³⁴ əda ta kum ngákó̰o̰n gə̄ tə́ ō, áskar kə́ Samari gə̄ tə́ ō na: Jipə gə̄ ń tɔ́gə́də́ gətóo toó ra a rāān̄ i rí? A əya̰n̄də́ kadə̄ rāān̄ a? A tunə̄n̄ yá̰a̰ a? A tɔ̄lə̄n̄ ta kəla ń noō ɓōólaā a? A rāān̄ mbal̄ kə́ hor o̰o̰ kɔ̄ɔ́ gə̄ ń ton̄ gotə horoó kum bumbə́rú tə́ ní kadə̄ ajən̄ a?

³⁵ Tobia kə́ Amon ń ra kadən tə́ ní əda na: I ndogə̄ mbal̄ kə́ ba̰ý beē! Ndogə̄ mbal̄ yādə́ ń rāān̄ kə mbal̄ gēé noō, ré njā̰ al̄ dɔ tə́ anī a tetə nang tə́ kadə̄ dām̄ loo a ra wōȳ tū tə́!

³⁶ Loo ń noō tə́ m-ə́da na: Kɔ́ɔ̄ɓē Nə́ɓā yājí, á̰á̰ mbóó ń madə̄ ba̰ā̰jí gə̄ mbóōn̄ sejí ní! Ī-rāā ādə̄ ndū ń tájə̄n̄jí ní tél əsō dɔdə́ nin̄ kɔ́ gə̄ tə́! Ī-rāā ādə̄ de gə̄ kídə̄n̄də́ ɓē ɓəlo tə́.

³⁷ Ī-lōō mā̰ȳ rɔ̄í dɔ yá̰á̰ kə́ gōtə́ aĺ gə̄ ń rāān̄ tə́ ní ō, ī-lōō kun majaĺ yādə́ kɔ̄ɔ́ ta kumií tə́ ō, tɔdɔ̄ nin̄ tájə̄n̄ ngé rāā kəla gə̄.

³⁸ Adə̄ j-əndā ndogə̄ mbal̄ adə̄ udə gírí. Ngālən kə́ kə̄ dɔɔ́ ugə̄ kə̄ ɓōdə̄ gə̄ tə́. Tɔdɔ̄ de gə̄ malang ní əndān̄ rɔ̄də́ ta rāā kəlan tə́ i kə ngarā̰ kemdə́ gēé mámák.