NEHEMI 2 - Bibəl ta Sar̄

Adə̄n̄ Nehemi ta róbə́ tél kaw̄ gogə́ Jerusalem

¹ Kem ɓāl̄ ko̰o̰ ɓē yā mban̄g Artajerses kə́ nge ko̰ kutə jōó tə́, kem nāā Nisan tə́ ní, ndɔ̄ kə́rēý tə́ mban̄g ndi ta yá̰a̰ kəsa tə́, anī m-ún kasə m-úr m-ādə̄n. Jóo toó rɔ̄ḿ nelə̄m̄ aĺ ta kum mban̄g tə́ aĺ ɓáý. Banī ndɔ̄ ń noō tə́ rɔ̄ḿ nelə̄m̄ alé,

² adə̄ mban̄g dəjem̄ gír əda na: I tām̄ rí tə́ á dɔ kumií nelī aĺ ní? Ḭ̄ i mo̰y a? I najə̄ n a tōr̄ kemií aké i yá̰á̰ kə́ rang ḿ? Loo ń noō tə́ ɓōĺ rāām̄ ngá̰ý

³ banī m-ə́da na: Kɔ́ɔ̄ ɓē gə̄, yá̰á̰ ń m̄-ndə̄ngā tām̄ yāí tə́ ní i kadə̄ ī-ndi kə kumií ngándáńg! Dan ń ɓē ń dubə̄n̄ kaaḿ gə̄ kemeé ní i kə́ nujə sák sák kɔ̄ɔ́ ō, bápə́ kə́ ta tə́ gə̄ i kə́ hor o̰o̰ kɔ̄ɔ́ ō ní, loo kadə̄ dɔ kumḿ a nelə̄m̄ i ba̰ý?

⁴ Mban̄g dəjem̄ na ké i rí n m̄-gḛy kadə̄ n-adə̄m̄ ní wa. Anī m̄-ndɔ̄ȳ Nə́ɓā kə́ dɔ rā̰ tə́,

⁵ ba m̄-tél m-ə́da mban̄g na: Kɔ́ɔ̄ ɓē gə̄, ré á̰a̰ā̰ ta kumií tə́ kadə̄ i yá̰á̰ kə́ majə ō, ré nelī seḿ mā nge kəla yāí ō anī, ādə̄m̄ ta róbə ādə̄ m-āw̄ gō nang kə́ Juda tə́, kem ɓē ń dubə̄n̄ kaaḿ gə̄ tū tə́ ní tə́, kadə̄ m̄-tél m̄-rāān gogə́ rang.

⁶ Mban̄g ń dəyá̰ jin̄ ndi kadən tə́ ní dəjem̄ ɓáý to̰ na ké mbā ń m-ā m-āw̄ ní ké m-ā m̄-rāā i ndɔ̄ kóndóńg wa, ké m-ā m̄-tél i ndɔ̄ kə́ ra tə́ wa. Mban̄g ndigə kadə̄ m-āw̄ ō, m-ə́dan ndɔ̄ ō.

⁷ M-ə́da mban̄g ɓáý to̰ na: Kɔ́ɔ̄ ɓē gə̄, ré á̰a̰ā̰ ta kumií tə́ kadə̄ i yá̰á̰ kə́ majanī, ādə̄ adə̄mə̄n̄ makətūbə̄ gə̄ tām̄ yā ngé ko̰o̰ ɓē gə̄ kə́ gidə bā Opəratə kə́ dām̄ kə́ no ɓē tə́, kadə̄ adə̄mə̄n̄ ta róbə adə̄ m̄-mān̄ m-āw̄ dɔ nang kə́ Juda tə́.

⁸ Ādə̄ adə̄mə̄n̄ makətūbə̄ kə́ tām̄ yā Asap nge ngɔ̄m̄ ku kāgə̄ gə̄ yā mban̄g tə́ ō, kadə̄ adə̄m̄neé kāgə̄ tə́ tām̄ yā ta róbə gə̄ kə́ tū kújə́ kə́ ngan̄g kə́ kadə kújə yā Kɔ́ɔ̄ɓē tə́ ō, ndogə̄ mbal̄ kə́ dɔ ɓē tə́ ō, kújə́ ń mā m-ā m̄-ndi kemeé ní ō. Mban̄g adə̄m̄ makətūbə̄ gə̄ ní, tɔdɔ̄ jī Nə́ɓā yāḿ kə́ majə i dɔḿ tə́.

⁹ M-āw̄ rɔ̄ ngé ko̰o̰ ɓē gə̄ kə́ gidə bā Opəratə kə́ dām̄ kə́ no ɓē tə́ ba m-ādə̄də́ makətūbə̄ gə̄ yā mban̄g ní. Mban̄g adə̄ ngol áskar gə̄ ō, ngé kal̄ sə́nda gə̄ ō, dānə̄mə̄n̄.

¹⁰ Dan ń Sanbalat kə́ Horon ō, Tobia kə́ Amon ń i nge kɔsə kilən kem kəlaá ní ō, oōn̄ kadə̄ m-ā m̄-reē noó anī, rɔ̄də́ neĺdə́ aĺ ngá̰ý, tām̄ oōn̄ kadə̄ deē kógə̄ḿ a reē kə̄ sāā ta róbə ndi majə yā ngán Israel gə̄ tə́.

Nehemi əndā ma̰ȳ ndogə̄ mbal̄ kə́ gidə ɓē tə́

¹¹ Dan ń m-ūgə̄ Jerusalem ní, m-ɔ̄r̄ koō ndɔ̄ mətá.

¹² Ba yá̰á̰ ń Nə́ɓā yāḿ əndā kemḿ tə́ kadə̄ m̄-rāā tām̄ yā ɓē tə́ ní m-ə́da deē kógə̄ḿ alé. Gō tə́ anī m-ḭ́i dɔɔ́ ndɔ̄ɔ́, de kə́rēý gə̄ i seḿ. Dā̰ kə́ rang kə́ seḿ gətóo ba i kərō ń m-āl̄ m̄-reēń ní tá ngóy.

¹³ M̄-teē kɔ̄ɔ́ kem ɓēé ndɔ̄ɔ́ kə ta róbə́ kə́ wól loo tə́ ba m-āw̄ kum kə̄ ta kəɓa man̄ ń a ɓār̄nən̄ na i dərago̰ ní tə́ ō, ta róbə dɔ bū loo tə́ ō. M-ə̄ndā ma̰ȳ ndogə̄ mbal̄ kə́ gidə ɓē kə́ Jerusalem tə́ anī m-á̰a̰ kadə̄ dāmən kə́ tétə̄ nang tə́ gə̄ ton̄ ō, ta róbə́ kə́ tū tə́ gə̄ i kə́ hor o̰o̰ kɔ̄ɔ́ ō.

¹⁴ m̄-mān̄ m-āw̄ kum kə̄ ta róbə́ ń rīn na i ta kəɓa man̄ tə́ ní ō, m-ādə̄ kumḿ sɔɔ̄ dang man̄ yā mban̄g tə́ ō. Gō tə́ anī kərō ń m̄-ndi dɔ tə́ ní a̰a̰ loo mān̄ to̰ alé.

¹⁵ Loo ń noō tə́ m-ún gō wól loo kə́ Sedəro̰ ń əta tan kum kə̄ dɔɔ́ ní i ndɔ̄ɔ́ ndɔ̄ nəkɔ́ ń noō tə́ m-ə̄ndāń ma̰ȳ ndogə̄ mbal̄ ní. Ba m̄-tél dɔ tə́ m-āw̄ ɓēé kə ta róbə́ kə́ wól looó.

¹⁶ Ngé rāā sarya kə́ kem ɓēé gə̄ gerə̄n̄ loo ń m-āw̄ tū tə́ ní aĺ ō, gerə̄n̄ yá̰á̰ ń m̄-rāā ní aĺ ō, tɔdɔ̄ bátə́ kum mbang ń noō tə́ ní najə̄ kə́ kemḿ tə́ ní m-ə́da deē alé. M-ə́da Jipə gə̄ aĺ ō, ngé tun̄ yá̰a̰ gə̄ aĺ ō, de kə́ bo gə̄ aĺ ō, nge rāā sarya gə̄ aĺ ō, gotə de kə́ rang gə̄ kə́ ngé kəndā kumdə́ gír kəla gə̄ tə́ aĺ ō.

¹⁷ Tā anī m-ə́dádə́ na: Á̰a̰ī yá̰á̰ kə́ to kum kaȳ aĺ ń jə-ndiīneé toō: Jerusalem i kə́ nujə sák sák kɔ̄ɔ́, bápə́ kə́ ta tə́ gə̄ i kə́ hor o̰o̰ kɔ̄ɔ́! J-aw̄ jə-rāāī ndogə̄ mbal̄ kə́ Jerusalem jə-tɔ̄līneé ta rɔ̄sɔl̄ ń toō kɔ̄ɔ́.

¹⁸ M-ɔ́jə́də́ loo kəndā ń Nə́ɓā yāḿ əndā jīn kə́ majə dɔḿ tə́ ní ō, m-ə́dádə́ yá̰á̰ ń mban̄g ədam̄ ní ō. Anī nin̄ ədan̄ na: Ḭ́ḭī dɔɔ́ jə-rāāī ɓē gogə́ rang! Adə̄ nin̄ əhɔn̄ rɔ̄də́ tɔgə rāān̄neé kəla kə́ majə ń toō.

¹⁹ Dan ń Sanbalat kə́ Horon ō, Tobia kə́ Amon nge kɔsə kílən kem kəlaá ō, Gesem ń i Arabə ní ō, oōn̄ gotə najə̄ ní anī əgōn̄jí ō, idən̄ tadə́ gíŕjí tə́ ō, ba dəjen̄jí na ké j-a jə-rāā ké i rí n noó wa, ké j-a jə-sāā i mbātə́ najə̄ ta mban̄g tə́ wa.

²⁰ m̄-téĺ m-ə́dádə́ na: I Nə́ɓā kə́ dɔ rā̰ tə́ nəkɔ́ n a rāā kadə̄ kəla yājí a majə ní. Jḭḭ ngé kəla yān gə̄ j-a j-ḭḭ dɔɔ́ yā rāā ɓē. Banī kə́ tām̄ yāsí sḭḭ̄ tə́ ní ta róbə kənge yá̰a̰ aké ta róbə ko̰o̰ ɓē ní sḭḭ̄ ā ə́ngeī kem ɓē kə́ Jerusalem tə́ aĺ ō, a əga kem deē dɔsí tə́ aĺ ō!