NAHUM 3 - Bibəl ta Sar̄

Tɔ̄lə̄n̄ de gə̄ ngá̰ý kem ɓē kə́ nge tɔ̄l̄ de gə̄ tə́

¹ Yá̰á̰ kə́ to kum kaȳ aĺ kə́ ba̰ý beē tām̄ yā Ninibə tə́, Ninibə ń i ɓē ń mósə a̰ȳ kemeé ní! Sor̄ ō, yá̰a̰ rāā kə́ kə dɔ́nɔ́ ō, taān̄ loo kem ɓēé ō, gír kɔy yá̰a̰ yā de gə̄ dɔ gúú tə́ gān̄g aĺ ō!

² Kōō ndéy gə̄ ɓārə̄n̄ kem ɓēé ō, nja púsə gə̄ ɔsən̄ naā ō, sə́nda gə̄ a̰ȳn̄ ngɔ̄də̄ ō, púsə rɔ̄ɔ̄ gə̄ tḭ́ḭ̄n̄ bal ō.

³ Ngé kal̄ sə́nda gə̄ ɔrə̄n̄ rɔ̄də́ dɔɔ́. Yá̰a̰ rɔ̄ɔ̄ gə̄ ndə́lēn̄ pipir tītə̄ ta ndo̰o̰ hor gə̄ beé. Nənga gə̄ ndə́lēn̄ pipir tītə̄ hor kə́ kə́rā beé. Loo malang i nīń. Nīń de gə̄ to kə̄ dɔ naā tə́. De kə́ asə tə́da kutədə́ gətóo. Nīń de gə̄ tə́gā nja áskar gə̄!

Rɔ̄ ɓē kə́ Ninibə sɔlə̄n ngá̰ý

⁴ Ninibə rāā ájə́ba nja dūbú ngá̰ý. Kété ní, ni mandə ō, nel̄ de gə̄ seneé ngá̰ý ō. Ni un majə ń rɔ̄n majə deē ní rāań yá̰a̰ tītə̄ nge rāā mbōlí kə́ dəyá̰ beé. Ni-rāā nápar de kə́ ngá̰ý gə̄ ɓəlo tə́ kə rāā ájə́ba yānneé ō, kə majə ń rɔ̄n majə deē ní ō.

⁵ Kɔ́ɔ̄ɓē kə́ bo kə́ tɔ́gən i ngá̰ý ədan wáńg na: M-ā m̄-rāā yá̰á̰ kə́ tōr̄ seí. M-ā m̄-sa̰ā̰ kūbə̄ yāí yā reēń ta kumií tə́ dɔɔ́, m-ā m-ɔ́jə́ nápar de gə̄ gírí kə́ karī kadə̄ a̰a̰n̄. I beé n gotə ɓē ko̰o̰ kə́ rang gə̄ a a̰a̰nə̄ń rɔ̄sɔl̄ yāí ní.

⁶ M-ā m̄-kán̄ loo kə́ yḛr gə̄ kə̄ dɔí tə́, yā kɔrə̄ń hɔ̄r̄mɔ̄ yāí kɔ̄ɔ́. M-ā m̄-rāāī kadə̄ ā ī-tél yá̰á̰ kə́ kadə̄ de gə̄ a̰ā̰n̄ anī nin̄ ɓōlə́n̄.

⁷ Loo ń noō tə́ de gə̄ malang ń a a̰a̰īn̄ ní, a a̰ȳn̄ naā kə kɔrɔ́ tadə́ tə́: Nujən̄ ɓē kə́ Ninibə kɔ̄ɔ́! I náā ń kumən a o̰o̰n tām̄ yān tə́ ní? Ɓē kə́ Ninibə, ngé kəla go̰ kemií tə́ gə̄ ní, deē a əngedə́ i rá tām̄ yāí tə́?

Yá̰á̰ ń rāā ɓē kə́ Tebə ní a rāā ɓē kə́ Ninibə ō

⁸ Ḭ̄ ɓē kə́ Ninibə, ī-majə ī-tɔȳ ɓē kə́ Tebə a? Əndān̄ ɓē ní i dɔ gɔ́sə bā Nil tə́. Man̄ gīr̄ gidən. Bā Nil ngɔ̄mə̄n kə ngangá ngá̰ý tītə̄ ń ndogə̄ mbal̄ kə́ yā rɔ̄ɔń dɔ ɓē tə́ a ngɔ̄məń ɓē ní.

⁹ Tɔ́gən kə́ ngá̰ý i ɓē kə́ Etiopi ō, i ɓē kə́ Ejiptə ō. De kə́ Put gə̄ kə de kə́ Libi gə̄ i ngé ɓoo rɔ̄də́ tū yān tə́ gə̄.

¹⁰ Ɓá tā ba əhɔn̄ de kə́ Tebə gə̄ aw̄n̄ sedə́ dɔ ɓē kə́ rang tə́ dɔ gúú tə́, tītə̄ dəngáy gə̄ beé ō. Ngáń kə́ dūú ngá̰ý kə́ kem ɓēé gə̄ gə̄gē ní, madə̄ ba̰ā̰də́ gə̄ réjēn̄də́ dɔ gajə róbə gə̄ tə́ malang. Nin̄ túgə̄n̄ wə̄lā dɔ ngār yān gə̄ tə́ malang ō, tṵ́ṵ̄n̄ de kə́ bo yān gə̄ malang kə súĺ ō.

¹¹ Ɓē kə́ Ninibə, ta i dɔí tə́ tā. Ka̰a̰ tápə̄ a rāāī kə́ kasə tə́ ō, ā ī-ɓɔ̄ɔ̄ rɔ̄í tām̄ rɔ̄í kə́ sɔlī tə́ ō. Ta i dɔí tə́ kadə̄ ī-sāā loo kə́ yā ɓɔ̄ɔń rɔ̄í najə̄ yā madə̄ ba̰ā̰í gə̄ tə́.

Ninibə a dum̄ alé

¹² Ndogə̄ mbal̄ yāí gə̄ malang ń ā ī-rɔ̄ɔń dɔ rɔ̄í tə́ ní, ton̄ i tītə̄ kan̄ kótə̄ kə́ kərē ta kəga dɔ gə̄ beé. Dan ń deē yéȳ kāgə̄ kótə̄ anī, nin̄-tə́sōn̄ i kem ta deē ń sāā kəsadə́ tə́ ní.

¹³ Ngé rɔ̄ɔ̄ yāí gə̄ ton̄ i tītə̄ dəyá̰ gə̄ kə́ tɔ́gə́də́ gətóo beé. Ta róbə gə̄ kə́ yā kudəń kə̄ kem ɓē yāí tə́ gə̄ teē ran̄ i kə wōyōó no madə̄ ba̰ā̰í gə̄ tə́. Tɔdɔ̄ hor nujə kāgə̄ gə̄ kə́ yā rákəń tadə́ gə̄ kɔ̄ɔ́.

¹⁴ Sḭḭ̄ de kə́ Ninibə gə̄, ɔ́diī man̄ ī-rāāī sádə̄ tə́, kadə̄ ī-tə́gāīń tasí dan ń a ənīn̄sí rɔ̄ɔ̄ tə́ ní. Ī-ngɔ̄mī ndogə̄ mbal̄ yāsí gə̄ kə́ yā rɔ̄ɔń dɔ ɓē yāsí tə́. Ī-mbə̄sāī bɔr kə njasí ō, ə̄ndāī dɔ yá̰a̰ kɔr̄ derngēl̄ gə̄ danaá ō.

¹⁵ Banī ā óyiī yo hor kə́ o̰o̰sí, aláa yo tɔ̄l̄ kə́ tɔ̄lə̄n̄sí ta rɔ̄ɔ̄ tə́. Madə̄ ba̰ā̰sí gə̄ a əsan̄sí tītə̄ yim̄ gə̄ kə́ əsan̄ yá̰a̰ malang kɔ̄ɔ́ beé. Ḭ̄ ɓē kə́ Ninibə, de kə́ kemií tə́ gə̄ ton̄ i tītə̄ yim̄ gə̄ beé, kutədə́ i ngá̰ý.

De kə́ kem ɓēé gə̄ malang gətóon̄ kɔ̄ɔ́

¹⁶ Kété ní, kutə ngé rāā gātə̄ kə́ looí gə̄ tɔȳ kutə tə́yō̰ gə̄ kə́ dɔ rā̰ tə́. Ngɔlaā nin̄ hində̄n̄ lim kɔ̄ɔ́, tītə̄ yim̄ gə̄ kə́ ḭḭn̄ bɔ̄gə̄ aw̄n̄ kɔ̄ɔ́ beē.

¹⁷ Ngé ngɔ̄m̄sí gə̄ i ngá̰ý tītə̄ yim̄ gə̄ beé ō, ngé rāā kəla yāsí gə̄ ton̄ tītə̄ ngán kur̄ kə́ ngá̰ý gə̄ kə́ ton̄ tītə̄ kil̄ man̄ beé ō. Ngán kur̄ gə̄ ní əhɔn̄ loo dɔ túpə́ kámbə gə̄ tə́, dan ń kūl̄ o̰o̰ ní. Dan nəkɔ́ ń mbang ɔsə anī, nin̄ malang ḭḭn̄ bɔ̄gə̄ aw̄n̄ kɔ̄ɔ́, loo kə́ de ger̄ aĺ tə́. Nin̄ i rá?

Loo kə́ nujə sák sák kə́ deē asə rāā gogə́ kadə̄ majə to̰ alé

¹⁸ Ḭ̄ mban̄g kə́ Asiri, ngé ko̰o̰ ɓē yāí gə̄ ɓīīn̄ i ɓīī kə́ njɔ́ḿ gə̄ tə́ ō, go̰ rɔ̄ɔ̄ yāí gə̄ ɔrən̄ rɔ̄də́ mer to̰ aĺ ō. Gír deē yāí gə̄ tə̄ndān̄ naā tḭ̄ḭ̄n̄ kə̄ dɔ mbal̄ bo gə̄ tə́ ō, de kə́ yā kɔsə njadə́ kə̄ naā tə́ gətóo ō.

¹⁹ Rɔ̄ɔ̄ ń tetiī ní i kə́ njɔ́ḿ gə̄ tə́ ō, do gə̄ ń ə́ngé ní, a asən̄ kedə̄ aĺ ō. De gə̄ malang ń oōn̄ kōōí ní, əndan̄ jīdə́ gíŕ yá̰á̰ kə́ to kum kaȳ aĺ ń teē dɔí tə́ ní. Tām̄ i náā n a̰a̰ tápə̄ najə̄ yá̰a̰ rāāí gə̄ kə́ kumií o̰o̰ī loo rāā tə́ aĺ alé ní? Yá̰a̰ rāāí gə̄ ní, loo dəba tadə́ gətóo!