NAHUM 1 - Bibəl ta Sar̄

¹ Najə̄ kə́ dɔ ɓē kə́ Ninibə tə́ i kem makətūbə̄ ń toō tə́. Nə́ɓā ɔjə Nahum nge koō ta kə́ kem ɓē kə́ Elkos tə́ adə̄ ger̄, i kə ta kūl̄ yá̰á̰ kə́ Nahum a̰ā̰.

Kɔ́ɔ̄ɓē i Nə́ɓā kə́ to ɓōĺ ō majə ō

² Kɔ́ɔ̄ɓē i Nə́ɓā kə́ nge rāā jang. Ni ənda madə̄ ba̰ā̰n gə̄ tām̄ yá̰a̰ rāādə́ kə́ gōtə́ aĺ tə́. Wōn̄g yān to ɓōĺ ngá̰ý. Ni ənda ngé rɔ̄ɔ̄ seneé gə̄ tām̄ yá̰a̰ rāādə́ kə́ gōtə́ aĺ tə́ ō, yá̰á̰ kə́ majaĺ ń nin̄ rāān̄ ní, dɔn ndígə̄nal aĺ ō.

³ Kɔ́ɔ̄ɓē i de kə́ nge tə́gā tan ō, tɔ́gən i ngá̰ý ō. Banī deē ń najə̄ i dɔn tə́ ní, ni a əya̰n karī kanjə̄ kəndan alé. Dan ń ni a mān̄ anī, nél man̄ kə́ ngan̄g ngá̰ý əla. Kil̄ man̄ i bumbə́rú kə́ gír njan tə́.

⁴ Ni ndán̄g bā bo, anī bā bo iī. Ni-rāā adə̄ ngán man̄ gə̄ malang gətóon̄ kɔ̄ɔ́ kem kār̄də́ gə̄ tə́. Anī loo gə̄ ń a aw̄n̄ kə yá̰a̰ kul̄ gēé ko̰ó̰ tū tə́ dɔ nang kə́ Basan tə́ ō, mbal̄ bo kə́ Karmel ō ní, yá̰a̰ malang kə́ ndi kə kumneé gətóo tū tə́ kɔ̄ɔ́ ō, hútə̄ yá̰a̰ gə̄ kə́ Liban ndəlén̄ kɔ̄ɔ́ ō.

⁵ Mbal̄ bo gə̄ ndewn̄ najə̄ yān tə́ ō, ngán mbal̄ gə̄ yéȳn̄ ō. Dɔ nang ndebə ta kumən tə́, dɔ nang kə taá malang kə de kə́ tū tə́ gēé, ndebə ta kumən tə́.

⁶ I náā n asə ra ta wōn̄g yān tə́ ní? I náā n asə ndi kə kumneé dan ń wōn̄g yān o̰o̰ yá̰a̰ malang kə́ hor tə́ ní? Wōn̄g ní taā loo tītə̄ hor kə́ o̰o̰ loo beé. Mbal̄ gə̄ njárə̄n̄ non tə́.

⁷ Kɔ́ɔ̄ɓē i de kə́ majə. Ni i dabə kə́ yā ndi gírí dan wur kɔl tə́. Ngé gə̄ ń əndān̄ kemdə́ dɔn tə́ ní, ni-a̰a̰ gōdə́

⁸ dan ń yá̰á̰ kə́ to kum kaȳ aĺ mān̄ tītə̄ man̄ dɔ mbal̄ beé ní. Banī ni-nujə madə̄ ba̰ā̰n gə̄ ō, tə̄ɓādə́ aw̄ sedə́ kum loo kə́ risə til yā yo tə́ ō.

Najə̄ gə̄ tām̄ yā ɓē kə́ Juda tə́ ō Ninibə tə́ ō

⁹ Yá̰á̰ ń ī-gírī dɔ Kɔ́ɔ̄ɓē tə́ ní i rí? Ni i nge nujə madə̄ ba̰ā̰n gə̄. Nin̄ a nujən̄ sesí nja kə́ nge ko̰ jōó to̰ alé.

¹⁰ Nin̄ ń a̰ȳn̄ yá̰a̰ tītə̄ ngé kasə rāā gə̄ ní, ton̄ tītə̄ túpə kōn̄ gə̄ kə́ tə́lan̄ jīdə́ kem naā tə́ beē. Hor a o̰o̰də́ malang tītə̄ mu kə́ tutə beé.

¹¹ De kógə̄ḿ kə́ núm̄ rāā yá̰á̰ kə́ majaĺ kə Kɔ́ɔ̄ɓēé, de kə́ yá̰a̰ gə̄ ń ni-ɔjə rāā ní i nujə loo, teē kemií ḭ̄ ɓē kə́ Ninibə tə́.

¹² Yá̰á̰ ń Kɔ́ɔ̄ɓē əda de kə́ Juda gə̄ ní n toó: Ká ré kutə madə̄ ba̰ā̰sí gə̄ i ngá̰ý ō, nin̄-ngangə̄n̄ ngá̰ý ō anī, a nujən̄ sedə́ kɔ̄ɔ́, nin̄ a gətóon̄ kɔ̄ɔ́. Kété m̄-tél sesí kə̄ nang tə́, banī m-ā m̄-rāā tītə̄ ń noō to̰ alé.

¹³ Ngɔlaā ní, m̄-nujə ko̰o̰ ɓē ń taā tɔ́gə́sí kɔ̄ɔ́ ní ō, m̄-tútə́ súĺ yāsí gə̄ kɔ̄ɔ́ ō.

¹⁴ Yá̰á̰ ń Kɔ́ɔ̄ɓē gḛy rāā sesí sḭḭ̄ de kə́ Ninibə gə̄ ní n toó: Ngán gə̄ kə́ kadə̄ rīsí i dɔdə́ tə́ ní, sḭḭ̄ ā ə́ngeī to̰ alé. Ɓesə̄ kāgə̄, aláa ɓesə̄ gində̄ yāsí gə̄ ń ī-tɔ́sídə́ aláa ī-nōōīdə́ horoó, ba ī-tə́ndāīdə́ kem kújə yā nə́ɓā yāsí gə̄ tə́ ní, m-ā m̄-nujəń kɔ̄ɔ́. M-ə̄ndā dɔ bəlo yosí danaá, tām̄ sḭḭ̄ i yá̰á̰ kógə̄ḿ kə́ sáláńg alé.