MISE 4 - Bibəl ta Sar̄

Jerusalem i ɓē bo kə́ kem sɔl̄ i tū tə́

¹ Kem ndɔ̄ gə̄ ń a reēn̄ tə́ noō ní, ndɔ̄ kógə̄ḿ tə́ anī, mbal̄ bo ń kújə yā Kɔ́ɔ̄ɓē i dɔ tə́ ní, a tél mbal̄ bo kə́ ngāl̄ tɔȳ madə̄ gə̄ malang rɔ̄kum. Ni a ngāl̄ mān̄ ngán mbal̄ gə̄ kum kə̄ dɔɔ́. Loo ń noō tə́ gír de kə́ ngá̰ý gə̄ a reēn̄ kə̄ rɔ̄n tə́.

² Nápar de kə́ ngá̰ý gə̄ kə́ dɔ nang kə́ rang tə́ a əsōn̄ róbó yā reē. Nin̄ a ədan̄ na: Ī-reē j-awī dɔ mbal̄ yā Kɔ́ɔ̄ɓē tə́, j-awī kújə yā Nə́ɓā yā Jakob tə́. Ni a ndóōjí yá̰á̰ ń a sāā rɔ̄jí tə́ ní ō, j-a j-uniī róbə́ ń ni ɔjəjí ní ō. Tɔdɔ̄ yá̰á̰ ndóō yā Kɔ́ɔ̄ɓē teē i Siyo̰. A̰á̰ā̰, najə̄ yān teē i Jerusalem n reē ugə̄ rɔ̄jí tə́ ní.

³ Ni a gān̄g sarya kə́ dɔ dáń gír de kə́ ngá̰ý gə̄ tə́, ni a tél i nge ra mbənā tə́ tām̄ yā nápar de gə̄ kə́ tɔ́gə́də́ i ngá̰ý tə́ ō, ndin̄ i sa̰y tə́ ō. Nin̄ a ɔyn̄ kaskar yādə́ gə̄ yā rāań kɔsə man̄g gə̄ ō, a ɔyn̄ nənga yādə́ gə̄ yā rāań ngorong gə̄ ō. Ɓē kógə̄ḿ a ənī ɓē kə́ rang rɔ̄ɔ̄ aĺ ō, de gə̄ a ndóōn̄ naā rɔ̄ɔ̄ to̰ aĺ ō.

⁴ Náā nəkɔ́ ɓáa a ndɔr̄ i kāgə̄ nduú yān, aláa i kāgə̄ kótə̄ yān, kanjə̄ kadə̄ deē njə́ɓān. Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda kadə̄ i rɔ̄kum ní n noó.

⁵ Gotə́ gír de kə́ rang gə̄ malang ní, de gə̄ kógə̄ḿ kógə̄ḿ kə́ dandə́ tə́ a oōn̄ i ta nə́ɓā yādə́ gə̄. Banī jḭḭ j-oō i ta Kɔ́ɔ̄ɓē Nə́ɓā yājí kə́ njɔ́ḿ gə̄ tə́.

Kɔ́ɔ̄ɓē i mban̄g kə́ Jerusalem

⁶ Kɔ́ɔ̄ɓē əda kə̄ ndágá wáńg na: Ndɔ̄ ń noō tə́ ní, ngé gə̄ ń əngen̄ do ní, m-ā m-ɔ́sə dɔdə́ naā tə́ ō, ngé gə̄ ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ ní ō, ngé gə̄ ń m̄-rāādə́ yá̰á̰ kə́ ngan̄g ní ō, m-ā m̄-kán̄də́ kə ɓūtə̄də́ gēé.

⁷ Ngé gə̄ ń əngen̄ do ní, m-ā m̄-rāādə́ kadə̄ a télən̄ i gír de gə̄ kə́ a ndin̄ kə kumdə́. A̰á̰ā̰, ngé gə̄ ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ ní, m-ā m̄-rāādə́ kadə̄ a télən̄ i nápar de gə̄ kə́ tɔ́gə́də́ i ngá̰ý. Loo ń noō tə́ mā Kɔ́ɔ̄ɓē m-ā m̄-tél i mban̄g yādə́, dɔ mbal̄ bo kə́ Siyo̰ tə́, i kum mbang ngeé ń noō tə́ ō, i kə́ njɔ́ḿ gə̄ tə́ ō.

⁸ Ba ḭ̄ ngōn̄ mbal̄ kə́ Jerusalem, ə̄ndā kumií gō gír de gə̄ tə́ tītə̄ nge ngɔ̄m̄ yá̰a̰ kul̄ gə̄ beé. Ī-ra i loo kógə̄ḿ kə́ ḭḭ kə̄ dɔɔ́ tə́. Sḛ́ý laā anī, ā ī-tél yā kənge tɔ́gə yāí kə́ kété ní gogə́. Ā ī-tél ɓē bo kə́ kem ɓē ko̰o̰ tə́ gogə́.

Yá̰a̰ nāā teē dɔ ɓē kə́ Jerusalem tə́ ō, gāngə̄n̄ dɔn ō

⁹ Sḭḭ̄ de kə́ Jerusalem gə̄, ngɔlaā ə́gaī kɔŕ i najə̄ rí tə́? Rɔ̄sí tōr̄sí tītə̄ dəyá̰ kə́ a ojə ngōn̄ beé i tām̄ rí tə́? Mban̄g yāsí gətóo i mbée a? Ngé kadə̄sí kɔjə̄ gə̄ oyn̄ i mbée kɔ̄ɔ́ a?

¹⁰ Ādə̄ rɔ̄sí tōr̄sí ō, ī-nōōī ō, tītə̄ dəyá̰ kə́ a ojə ngōn̄ beé. Tɔdɔ̄ ngɔlaā ní, ā ī-teēī kem ɓēé yā kaw̄ ndi bembeé ō, ā āwī bátə́ yā kugə̄ Babilon ō. A əya̰n̄sí dɔɔ́ loo ń noō tə́, Kɔ́ɔ̄ɓē a taāsí jī madə̄ ba̰ā̰sí gə̄ tə́ loo ń noō tə́.

¹¹ Ba ngɔlaā ní, de gə̄ ngá̰ý ɔsən̄ dɔdə́ naā tə́ yā rɔ̄ɔ̄sí. Nin̄ ədan̄ na: Ādə̄ j-ɔrī kɔsə gɔn yā ɓē yādə́ kɔ̄ɔ́, ādə̄ j-a̰ā̰ī Jerusalem ń nujənə̄ń kɔ̄ɔ́ ní kə rɔ̄nelēé.

¹² De gə̄ ngeé ń noō ní, nin̄ gerə̄n̄ yá̰a̰ gə̄ ń Kɔ́ɔ̄ɓē ɔjə rāā ní alé. Yá̰a̰ gə̄ ń ni gír̄ rāā ní, nin̄ gerə̄n̄ kum alé. Ni gḛy kɔsə njadə́ kə̄ naā tə́ tītə̄ loo kɔsə dɔ do̰ō̰ kōō gémē kə̄ naā tə́ beē, ndágə loo kənda kōō gémē tə́ tə́.

¹³ Kɔ́ɔ̄ɓē əda na: Sḭḭ̄ de kə́ Jerusalem gə̄, ḭ́ḭī dɔɔ́ ə́ndaī kōō gémē! M-ā m̄-rāāsí kadə̄ ā ī-ngangī tītə̄ man̄g kə́ gajən i gində̄ ō, hēl̄ njan gə̄ i gində̄ nə̄ngá kasə ō. Sḭḭ̄ ā ī-rējī gír de gə̄ ngá̰ý. Yá̰a̰ kənge yādə́ gə̄ ń ā ī-taāī jīdə́ tə́ ní ā ī-gɔ̄mī tām̄ yāḿ mā Kɔ́ɔ̄ɓē ń i kɔ́ɔ̄ dɔ nang malang ní tə́.

¹⁴ Ngɔlaā ní, sḭḭ̄ de kə́ Jerusalem gə̄, ī-tə́jā rɔ̄sí kə doó ɔ́jiīń kadə̄ ə́hɔī ndoó, sḭḭ̄ ń ɔ́siī dɔ áskar yāsí gə̄ kə̄ naā tə́ ní. Madə̄ ba̰ā̰sí gə̄ gīrə̄n̄ gidəsí yā kənīńsí rɔ̄ɔ̄. Nin̄ əndan̄ dan kum ngār kə́ dɔ gír de gə̄ yā Israel tə́ kə sálang kāgāá.