MISE 3 - Bibəl ta Sar̄

Tāān̄ ngé kɔr no de gə̄

¹ Ba mā m-ə́dásí na: I beé ɓá ní, sḭḭ̄ ngār gə̄ kə́ dɔ kojə yā Jakob tə́, sḭḭ̄ ń i ngé gān̄g sarya yā gír de gə̄ yā Israel ní, ōōī. Yá̰á̰ ń i yá̰á̰ kə́ gōtə́ ní, i sḭḭ̄ n i ngé ger̄ gə̄ ní wa ḿ?

² Banī yá̰á̰ kə́ majə nel̄sí sḭḭ̄ aĺ ngá̰ý ō, yá̰á̰ kə́ majaĺ nel̄sí ō. Sḭḭ̄ ɔ̄rī ndāŕ madə̄sí gə̄ ō, ī-ngḭ̄ḭ̄ dā̰də́ gidə kə̄ngādə́ gə̄ tə́ kɔ̄ɔ́ ō.

³ A̰á̰ā̰, de gə̄ ngeé ń noō əsan̄ gír deē yāḿ gə̄. Nin̄ ɔrə̄n̄ ndāŕdə́ ō, tétə̄n̄ kə̄ngādə́ gə̄ ō. Nin̄-gór̄yōn̄də́ dugəju dugəju tītə̄ dā̰ kə́ gór̄yō kə́ to kem jóó beē.

⁴ I tām̄ najə̄ ń noō tə́ n dan ń nin̄ a əgan̄ kɔŕ kə̄ dɔ Kɔ́ɔ̄ɓē tə́ anī, ni a daldə́ aĺ ní. Kum mbang ngeé ń noō tə́ ní, ni a ɓɔ̄ɔ̄ ta kumən kɔ̄ɔ́ adə̄ nin̄ a a̰ā̰n̄ alé, najə̄ yá̰á̰ kə́ majaĺ gə̄ ń nin̄ rāān̄ tə́ ní.

Najə̄ kə́ majaĺ kə́ ədan̄ dɔ ngé koō ta gə̄ kə́ ngé gól̄ Israel tə́

⁵ Najə̄ ń Kɔ́ɔ̄ɓē əda dɔ ngé koō ta gə̄ kə́ ngé ngól̄ gír deē yāḿ gə̄ tə́ ní n toó: Ré deē ul̄də́ majanī, nin̄-ənīn̄ mbēr̄ lɔm. Ba ngé kəla yá̰a̰ tadə́ tə́ aĺ gə̄ ɓáa nin̄ rɔ̄ɔ̄n̄də́.

⁶ I tām̄ najə̄ ń noō tə́ n tām̄ yāsí sḭḭ̄ ngé koō ta gə̄ ɓáa, loo ndɔ̄ kɔ̄ɔ́ ní. Sḭḭ̄ ā á̰a̰ī yá̰á̰ kógə̄ḿ to̰ alé. Tām̄ yāsí sḭḭ̄ tə́ ɓáa, loo risə til nding. Dɔsí a ədasí yá̰á̰ kógə̄ḿ to̰ alé. Mbang a udə kɔ̄ɔ́ tām̄ yāsí tə́, loo kə kadaá a risə til.

⁷ Rɔ̄ ngé ka̰a̰ yá̰a̰ gə̄ ō, rɔ̄ kɔdə̄ sāā gə̄ ō, a sɔl̄də́. Nin̄ malang a utə̄n̄ ta kumdə́ kɔ̄ɔ́, tɔdɔ̄ Nə́ɓā daldə́ to̰ alé.

⁸ Ba mā ɓáa, kə ta kūl̄ ndíĺ Kɔ́ɔ̄ɓēé ní, tɔ́gə́ḿ i ngá̰ý ō, m̄-ger̄ yá̰á̰ kə́ gōtə́ ō, m-ə́hɔ rɔ̄ḿ tɔgə ngá̰ý ō. Adə̄ de gə̄ kə́ kem kojə yā Jakob tə́, ń i gír de gə̄ yā Israel ní, m-ásə kɔjədə́ kəsō wōn̄g yādə́ ō, mān̄ dɔ ndū najə̄ yādə́ ō, kadə̄ gerə̄n̄.

Mise əda najə̄ nujə kə́ Jerusalem a nujə sák sák

⁹ I beé ní, sḭḭ̄ ngār gə̄ kə́ dɔ kojə yā Jakob tə́, sḭḭ̄ ngé gān̄g sarya gə̄ yā gír de gə̄ yā Israel, ōōī. Yá̰á̰ kə́ gōtə́ nel̄sí aĺ gá̰ý ō, sḭḭ̄ ī-rāāī yá̰á̰ kə́ súmūú adə̄ rugə ō.

¹⁰ Sḭḭ̄ ə̄ndāī yá̰a̰ kənge kə́ Siyo̰ i dɔ tɔ̄l̄ de gə̄ tə́. A̰á̰ā̰, sḭḭ̄ ə̄ndāī ɓē kə́ Jerusalem i dɔ yá̰a̰ rāā kə́ gōtə́ aĺ tə́.

¹¹ Ngé rāā sarya gə̄ a gāngə̄n̄ sarya i gíŕ yá̰á̰ kə́ kadə̄də́ karī tə́ tə́ ō, ngé tun̄ yá̰a̰ gə̄ a ndóōn̄ de gə̄ ndū najə̄ i gíŕ yá̰a̰ kəngeé ō, ngé koō ta gə̄ a ədan̄ yá̰á̰ kə́ ndɔ̄ń tə́ i gír naraá ō. Nin̄ əndān̄ tɔ́gə́də́ dɔ Kɔ́ɔ̄ɓē tə́, ba ədan̄ na: Kɔ́ɔ̄ɓē i sejí, adə̄ yá̰á̰ kə́ to kum kaȳ aĺ a teē dɔjí tə́ alé.

¹² Ɓá tā banī Siyo̰ a tél ndɔr̄ kə́ de gə̄ ndɔrə̄n̄ kɔ̄ɔ́, i tām̄ yāsí sḭḭ̄ tə́. A̰á̰ā̰, Jerusalem a nujə sák sák kɔ̄ɔ́ ō, mbal̄ bo ń kújə yā Kɔ́ɔ̄ɓē i dɔ tə́ ní, túpə kō̰n̄ gə̄ a taān̄ loo dɔ tə́ kɔ̄ɔ́ ō.