MATIYE 1 - Bibəl ta Sar̄

Gír kaa Jeju

¹ Makətūbə̄ gír kaa Jeju Kərist n toó: Ni i ngōn̄ kaa Dabid kə́ ngōn̄ kaa Abəraham.

² Abəraham ojə Isaak, Isaak ojə Jakob, Jakob ojə Juda nin̄ kə ngákó̰o̰n gēé.

³ Juda nin̄ kə Tamar ojən̄ Peres ō Jera ō. Peres ojə Hesəron, Hesəron ojə Aram.

⁴ Aram ojə Aminadab, Aminadab ojə Naason, Naason ojə Salmon.

⁵ Salmon nin̄ kə Rahab ojən̄ Boj. Boj nin̄ kə Rutə ojən̄ Obed, Obed ojə Jese.

⁶ Jese ojə mban̄g Dabid, Dabid nin̄ kə nə̄yá̰ Uri ojən̄ Salomo̰.

⁷ Salomo̰ ojə Roboam, Roboam ojə Abia, Abia ojə Asa.

⁸ Asa ojə Josapat, Josapat ojə Joram, Joram ojə Ojias.

⁹ Ojias ojə Yotam, Yotam ojə Akaj, Akaj ojə Ejekias.

¹⁰ Ejekias ojə Manase, Manase ojə Amon, Amon ojə Josias.

¹¹ Josias ojə Jekonia ō, ngákó̰o̰n gə̄ ō. Loo ń noō tə́ əhɔn̄ de gə̄, aw̄n̄ sedə́ Babilon.

¹² Gō kaw̄ kə de gēé Babilon tə́ ní, Jekonia ojə Salatiel, Salatiel ojə Jorobabel.

¹³ Jorobabel ojə Abihud, Abihud ojə Eliakim, Eliakim ojə Ajor.

¹⁴ Ajor ojə Sadok, Sadok ojə Akim, Akim ojə Eliud.

¹⁵ Eliud ojə Eleajar, Eleajar ojə Matan, Matan ojə Jakob.

¹⁶ Jakob ojə Jəjep kə́ ngaa Mari, ba Mari ojə Jeju ń a ɓāŕnən̄ na i Kərist ní.

¹⁷ Adə̄ əla gír dɔ Abəraham tə́ bátə́ ugə̄ń dɔ Dabid tə́ ní, gír kojə gə̄ malang i kutə gidə i sɔ́. Ba ḭḭ dɔ Dabid tə́ bátə́ ugə̄ ɓāl̄ ń əhɔn̄neé de gə̄ aw̄n̄ sedə́ Babilon tə́ ní, gír kojə gə̄ i kutə gidə i sɔ́ ō, əla gír dɔ ɓāl̄ ń aw̄n̄neé kə de gēé Babilon tə́ ní bátə́ ugə̄ń dɔ Kərist tə́ ní, gír kojə gə̄ i kutə gidə i sɔ́ ō.

Kojə Jeju Kərist

¹⁸ Ojən̄ Jeju Kərist i tītə̄ ń toō beé: Kó̰o̰n Mari i dəyá̰ nong yā Jəjep. Banī loo ń nin̄-taān̄ naā aĺ ɓáý anī, ni ndān̄ ngōn̄ kə ta kūl̄ Ndíĺ kə́ Táĺ.

¹⁹ Ngaan Jəjep ń i dəngam kə́ súmūú ní, ndigə ndaan dan de gə̄ tə́ alé. Adə̄ gír̄ kəya̰n kɔ̄ɔ́ jəke.

²⁰ Dan ń ni a gír̄ najə̄ ń toō kemən tə́ ɓáý anī, de kə́ dɔ rā̰ tə́ yā Kɔ́ɔ̄ɓē rāān kə nīí, ədan na: Jəjep, ngōn̄ kaa Dabid, ī-lōō ɓōĺ kaw̄ kə nə̄yá̰í Mari kújú. Tɔdɔ̄ ngōn̄ ń ni-ndān̄ ní i kə ta kūl̄ Ndíĺ kə́ Táĺ.

²¹ Ni a ojə ngōn̄ kə́ dəngam, ba ḭ̄ ā ə̄ndā rīn na i Jeju, tɔdɔ̄ i ni n a ajə gír deē yān gə̄ kum majaĺ yādə́ gə̄ tə́ ní.

²² Yá̰á̰ gə̄ ń noō malang a rāān̄ yá̰a̰ i yā kadə̄ najə̄ ń Kɔ́ɔ̄ɓē əndā ta nge koō ta tə́ adə̄ əda kété ní reē udəń gírí. Najə̄ ní n toó:

²³ Á̰a̰ī, ngōmandə a ndān̄ ngōn̄, ba a ojə ngōn̄ kə́ dəngam, a əndān̄ rīn na i Emanuel. Kum Emanuel na i Nə́ɓā i sejí.

²⁴ Loo ń Jəjep ndól̄ dɔ ɓīī tə́ anī, rāā yá̰á̰ ń de kə́ dɔ rā̰ tə́ yā Kɔ́ɔ̄ɓē ədan ní, adə̄ reē kə nə̄yá̰neé kújú.

²⁵ Banī ni-ɓīī seneé alé bátə́ kadə̄ ojəń ngōn̄ ní. Mari ojə i ngōn̄ kə́ dəngam, anī Jəjep əndā rīn na i Jeju.