MARK 9 - Bibəl ta Sar̄

¹ Ni ədadə́ ɓáý to̰ na: Ādə̄ m-ə́dásí najə̄ kə́ bo ngá̰ý, de kə́rēý gə̄ kə́ dáńsí sḭḭ̄ ń ī-ndiī toō tə́ ní, a a̰a̰n̄ Ɓē ko̰o̰ yā Nə́ɓā kə́ a reē kə tɔ́gɔ́ pá tá kadə̄ a oyn̄ ɓáý.

Rɔ̄ Jeju tūr̄ kə́ rang

² Ndɔ̄ mehḛ́ gō tə́ anī, Jeju un Piyer ō Jakə ō Ja̰a̰ ō, ba aw̄ sedə́ kə kéŕdə́ dɔ mbal̄ kógə̄ḿ kə́ ngāl̄ tə́. Ɓáa anī rɔ̄n tūr̄ kə́ rang kɔ̄ɔ́ ta kumdə́ tə́.

³ Kūbə̄ yān gə̄ ndə́lēn̄ ngá̰ý ō, ndaan̄ ndaa kə́ de kə́ dɔ nang tə́ kə́ asə tə́go kūbə̄ kadə̄ ndaa beé gətóo ō.

⁴ Tā anī Eli nin̄ kə Moijə teēn̄ hɔy kə̄ rɔ̄də́ tə́, ran̄ a ɔrə̄n̄ najə̄ kə Jejuú.

⁵ Anī Piyer əda Jeju na: Ngoljí, majə kadə̄ jə-ndiī laā. Ādə̄ jə-rāā kújə́ kámbə gə̄ mətá, kógə̄ḿ yāí ō, kógə̄ḿ yā Moijə ō, kógə̄ḿ yā Eli ō.

⁶ Ni-əda beé i tɔdɔ̄ ɓōĺ asədə́ nák adə̄ ni-ger̄ najə̄ kə́ yā kədan alé.

⁷ Tā anī kil̄ man̄ kógə̄ḿ teē, ra ndíĺ tə́ dɔdə́ tə́, nin̄-oōn̄ ndū deē kógə̄ḿ teē dan kil̄ man̄ ní tə́, a əda na: Nge ń toō i Ngōn̄ kó tár yāḿ. Ōōī najə̄ yān.

⁸ Kə̄ ta jī tə́ noō ngé ndóō yá̰a̰ yān gə̄ go̰ō̰n̄ loo anī, a̰a̰n̄ de kə́ rang to̰ alé, banī i Jeju kə kérneé ngóy n i sedə́ ní.

⁹ Dan ń a risən̄ dɔ mbalá kə̄ nang tə́ anī, Jeju ɔgə̄də́ kəda deē kógə̄ḿ gotə yá̰á̰ ń a̰a̰n̄ ní, bátə́ kadə̄ Ngōn̄ Deē ndól̄ dan de kə́ koy gə̄ tə́ tá.

¹⁰ Nin̄-ngɔ̄mə̄n̄ najə̄ ní, ba dəjen̄ naā dɔ dáńdə́ tə́ na najə̄ ń na n-a n-oy tá n-a n-ndól̄ dan de kə́ koy gə̄ tə́ ní ké kumən na i rí wa.

¹¹ Nin̄-dəjenən̄ ədan̄ na ké i tām̄ rí tə́ á ngé ndóō de gə̄ ndū najə̄ gə̄ ədan̄ na i gáŕ kadə̄ Eli na a reē ta kəga dɔ ní wa.

¹² Ni-tél ədadə́ na: Eli ń a reē ta kəga dɔ ní a tél yā tə́ndā yá̰a̰ gə̄ malang kə gō loodə́ gēé gogə́ rang. Ba i ba̰ý á ndangən̄ kem makətūbə̄ tə́ sɔɔ̄ń dɔ Ngōn̄ Deē na a a̰a̰ tápə̄ ngá̰ý ō, a kídə̄nən̄ ō ní?

¹³ Banī ādə̄ m-ə́dásí, Eli reē kɔ̄ɔ́ ɓá, ba de gə̄ rāānən̄ yá̰a̰ malang ń kemdə́ ndigə ní, tītə̄ ń ndangən̄neé dɔn tə́ ní.

Jeju rāā adə̄ ngōn̄ kə́ ndíĺ kə́ majaĺ i kemən tə́ ənge rɔ̄ ngáā

¹⁴ Dan ń nin̄-reē ugə̄n̄ rɔ̄ ngé ndóō yá̰a̰ yān gə̄ tə́ anī, a̰a̰n̄ kósə de gə̄ ngá̰ý gīrə̄n̄ gidədə́ ō, ngé ndóō de gə̄ ndū najə̄ gə̄ ran̄ a nējə̄n̄ najə̄ sedə́ ō.

¹⁵ Kə̄ ta jī tə́ noō, loo ń kósə de gə̄ a̰a̰n̄ Jeju ní anī, ɔr̄ kumdə́ malang, ba nin̄-ndɔ́tə̄n̄ kə̄ rɔ̄n tə́, rāānən̄ lápə́ya.

¹⁶ Ni-dəje ngé ndóō yá̰a̰ yān gə̄ na ké nējə̄n̄ naā najə̄ sedə́ i dɔ rí tə́ wa.

¹⁷ Anī deē kógə̄ḿ kə́ dan kósə de gə̄ tə́ tél ədan na: Ngoljí, m̄-reē i kə ngōnə̄ḿ rɔ̄í tə́. Ni i kə ndíĺ kógə̄ḿ kemən tə́ kə́ rāān adə̄ ɔr̄ najə̄ alé,

¹⁸ ba dan ń ndíĺ ní əhɔn i kə̄ rá gə̄gē anī, ənīn tul nang tə́, ba tan əɓa húūlú mbuk mbuk ō, a ngor gɔgən mur mur ō, rɔ̄n tutə njárárá kɔ̄ɔ́ ō. m̄-dəje ngé ndóō yá̰a̰ yāí gə̄ kadə̄ kə tə̄ɓān̄ ndíĺ ní kɔ̄ɔ́, banī tɔ́gə́də́ asə alé.

¹⁹ Anī Jeju tél ədadə́ na nin̄ i gír kojə kə́ taā kem aĺ gə̄, ké i bátə́ ta kə́ rə́ngáý tə́ n kadə̄ n-ndiń sedə́ ō, kə n-tə́gań tan dɔdə́ tə́ ō ní wa. Əda na kə reēn̄ kə ngōn̄ ní rɔ̄n tə́ laā.

²⁰ Nin̄-reēn̄ seneé kə̄ rɔ̄n tə́ anī, kə̄ ta jī tə́ noō dan ń ngōn̄ a̰a̰ Jeju ní, ndíĺ jəngan rik rik, adə̄ teē əsō nang tə́, ba wángə̄lā ō, tan əɓa húūlú ō.

²¹ Jeju dəje bɔbə̄ ngōn̄ ní na ké yá̰á̰ ní əla gír seneé i rə́ngáý tə́ wa. Anī bɔbə̄ ngōn̄ ní tél ədan na: I kə ngōn̄ dūúneé.

²² Nja ngá̰ý ndíĺ ní a ənīn kum hor tə́ ō, kum man̄ tə́ ō, yā kudən kɔ̄ɔ́. Banī ré ḭ̄ ásə rāā yá̰á̰ kógə̄ḿ anī, á̰a̰ kum tō ndoō yājí tə́ ba ī-rāā sejí.

²³ Jeju əda na: I najə̄ rí tə́ á ə́dam̄ na. Ré m-ásə rāā ní! De kə́ nge taā kem asə rāā yá̰a̰ malang.

²⁴ Kə̄ ta jī tə́ noō bɔbə̄ ngōn̄ əda na: m̄-taā kem, ba ī-rāā seḿ, loo ń taā kem yāḿ i kə́ ngan̄g aĺ ní.

²⁵ Dan ń Jeju a̰a̰ kósə de gə̄ ń a reēn̄ kə ngɔ̄dɔ̄ɔ́ yā kán̄ naā ní anī, əda ndíĺ kə́ yḛr ngeé ń toō najə̄ kə ngangāá, əda na: Ḭ̄ ndíĺ kə́ nge rāā de gə̄ kadə̄ ɔrə̄n̄ najə̄ aĺ ō, oōn̄ najə̄ aĺ ō, m-ə́daī wáńg, ī-teē kemən tə́ kɔ̄ɔ́, ba údə gogə́ to̰ alé.

²⁶ Ndíĺ ní əga kɔŕ ō, jəngan rik rik ō, ba teē kemən tə́ kɔ̄ɔ́, anī ngōn̄ ní to tītə̄ kə́ oy kɔ̄ɔ́ beē, adə̄ de kə́rēý gə̄ ngá̰ý ədan̄ na ni-oy kɔ̄ɔ́ tā.

²⁷ Ba Jeju əhɔ jīn, unən kə̄ dɔɔ́, anī ni-ḭḭ ra dɔɔ́.

²⁸ Loo ń Jeju udə kújú á ngé ndóō yá̰a̰ yān gə̄ ndin̄ seneé kə kéŕdə́ ní anī, nin̄-dəjenən̄ na ké i tām̄ rí tə́ áké nin̄ n-asən̄ tə̄ɓā ndíĺ ń noō aĺ ní wa.

²⁹ Jeju tél ədadə́ na ndíĺ kə́ tītə̄ ń noō gə̄ ní na asən̄ teē karī alé, ba ré i kə ndɔ̄yɔ̄ɔ́ tá ngóy.

Jeju tél tāā najə̄ yon ō, ndólən ō

³⁰ Nin̄-ḭḭn̄ loo ngeé ń noō tə́, ba gāngə̄n̄ gō nang kə́ Galile tə́ anī, Jeju ndigə kadə̄ deē kógə̄ḿ kə ger̄ gōn alé,

³¹ tɔdɔ̄ ni-ndóō ngé ndóō yá̰a̰ yān gə̄ yá̰a̰, ədadə́ na: A əlan̄ Ngōn̄ Deē jī de gə̄ tə́, a tɔ̄l̄nən̄. Ba ré tɔ̄l̄nən̄ oy anī, kə ndɔ̄ kə́ nge ko̰ mətá anī, ni a ndól̄.

³² Ba nin̄ tá gerə̄n̄ kum najə̄ ní aĺ ō, ɓōlə́n̄ dəje gír kɔ̄ɔ́ ō.

I náā n i de kə́ bo tɔȳ madə̄n gə̄ ní

³³ Nin̄-ugə̄n̄ Kapernaum, ba dan ń Jeju ndi kújú anī, dəjedə́ na ké nējə̄n̄ naā najə̄ i dɔ rí tə́ róbó wa.

³⁴ Banī nin̄-ndin̄ kə tadə́ kə́ mbóó, tɔdɔ̄ nējə̄n̄ naā róbó na ké i náā n i de kə́ bo ngá̰ý dan madə̄n gə̄ tə́ ní wa.

³⁵ Anī Jeju ndi nang tə́ ō, ɓāŕ ngé kə́ kutə gidə i jōó gə̄ ō, ba ədadə́ na: Ré deē kógə̄ḿ gḛy kadə̄ ni i de kə́ kété no de gə̄ tə́ anī, ni a tél de kə́ ta ngóy de gə̄ tə́ malang ō, nge kəla yā de gə̄ malang ō.

³⁶ Ni un ngōn̄ kógə̄ḿ kə́ dūú, əndān dɔ dáńdə́ tə́ ō, ɓirə̄n kə̄ rɔ̄n tə́ ō, ba ədadə́ na:

³⁷ Náā nəkɔ́ ń a əhɔ ngōn̄ kə́ tītə̄ nge ń toō kə̄ rɔ̄n tə́ najə̄ yāḿ tə́ anī, i ngarān̄g kumḿ mā nəkɔ́ ń əhɔ kə̄ rɔ̄n tə́ noō. Tá deē ń əhɔm̄ kə̄ rɔ̄n tə́ ní, əhɔm̄ i mā alé, banī i nge ń əlam̄ ní n kɔ́ɔ̄ əhɔn kə̄ rɔ̄n tə́ ní.

Deē ń mbātə́jí aĺ anī ni i sejí

³⁸ Ja̰a̰ əda Jeju na: Ngoljí, j-a̰a̰ deē kógə̄ḿ a tə̄ɓā ndíĺ kə́ majaĺ gə̄ kə rīí anī, jə-gḛy kɔgə̄n, tɔdɔ̄ ni-un gōjí alé.

³⁹ Ba Jeju tél ədan na: Ī-lōōī kɔgə̄n rāā, tɔdɔ̄ de kə́ a rāā yá̰á̰ kə́ yáā kə rīḿ, ba kə̄ ta jī tə́ noō a asə kəda najə̄ kə́ majaĺ dɔḿ tə́ ní a gətóo.

⁴⁰ Tɔdɔ̄ deē ń ni i madə̄ ba̰ā̰jí alé ní, kɔ́ɔ̄ i sejí.

⁴¹ Tām̄ náā nəkɔ́ ń a adə̄sí man̄ kem kɔ̄yɔ́ kadə̄ ā̰yī tām̄ sḭḭ̄ i yā Kərist gə̄ ní, ādə̄ m-ə́dásí najə̄ kə́ bo ngá̰ý, a nal̄ yá̰a̰ kəndā nja yān aĺ bátə́.

Rāā majaĺ yā nge taā kem i yá̰á̰ kə́ majaĺ ngá̰ý

⁴² Ba deē ń a rāā kadə̄ nge kógə̄ḿ kə́ dan de kə́ dūú gə̄ ń toō ń taān̄ kemḿ tə́ ní əsō ní, kə́ só tə́ ngá̰ý tām̄ yān tə́ i kadə̄ do̰ō̰n̄ mbal̄ kusə yá̰á̰ kə́ bo kɔ́ɔn tə́, ba kadə̄ ənīnən̄ kum bā bo tə́ kɔ̄ɔ́.

⁴³ Ré jīí a rāāī kadə̄ ə̄sō anī, ī-gāngə̄n kɔ̄ɔ́. I só tə́ kadə̄ údə kem loo kə́ ndi kə kumuú i tū tə́ kanjə̄ jīí kógə̄ḿ, tɔȳ kadə̄ ənīnī kə jīí kə́ jōó gə̄ kum hor Gehen tə́.

⁴⁴ Loo ń kəde a oy tū tə́ aĺ ō, hor a oy tū tə́ aĺ ō ní.

⁴⁵ Ba ré njaí a rāāī kadə̄ ə̄sō anī, ī-gāngə̄n kɔ̄ɔ́. I só tə́ kadə̄ údə kem loo kə́ ndi kə kumuú i tū tə́ kanjə̄ njaí kógə̄ḿ, tɔȳ kadə̄ ənīnī kə njaí kə́ jōó gə̄ kum hor Gehen tə́,

⁴⁶ loo ń kəde a oy tū tə́ aĺ ō, hor a oy tū tə́ aĺ ō ní tə́.

⁴⁷ Ba ré kumií a rāāī kadə̄ ə̄sō anī, ɔ̄rə̄n kɔ̄ɔ́. I só tə́ kadə̄ údə kə kumií kə́ kógə̄ḿ beē kem Ɓē ko̰o̰ yā Nə́ɓā tə́, tɔȳ kadə̄ ənīnī kə kumií kə́ jōó gə̄ kum hor Gehen tə́,

⁴⁸ loo ń kəde a oy tū tə́ aĺ ō, hor a oy tū tə́ aĺ ō ní tə́.

⁴⁹ Tɔdɔ̄ a selə́n̄ hor dɔ de gə̄ tə́ mbak tītə̄ ń selə́n̄ katə̄ tū yá̰a̰ gə̄ tə́ ní.

⁵⁰ Katə̄ i yá̰á̰ kə́ majə, banī ré nel̄ katə̄ teē kɔ̄ɔ́ anī, i yá̰á̰ rí n a ɓōkə́n̄ gotoó kadə̄ tél nelə̄ń ní? Ī-ndiī kə katāá kemsí tə́ ō, ba ī-ndiī kə kem sɔl̄ lɔmɔɔ́ kə naá ō.