MARK 8 - Bibəl ta Sar̄

Jeju adə̄ de gə̄ dūbú sɔ́ yá̰a̰ kəsa

¹ Ndɔ̄ ngeé ń noō tə́ ní, kósə de gə̄ ngá̰ý kánə̄n̄ naā to̰, ba yá̰a̰ kəsa yādə́ gətóo. Anī Jeju ɓāŕ ngé ndóō yá̰a̰ yān gə̄, ba ədadə́ na:

² Kumḿ o̰ō̰m̄ kə kósə de gə̄ ń toō tɔdɔ̄ nin̄-ndin̄ seḿ laā i ndɔ̄ mətá kɔ̄ɔ́, tá yá̰a̰ kəsa yādə́ gətóó ɓáý to̰.

³ Ré m-ə́yá̰də́ adə̄ aw̄n̄ kə̄ ɓē yādə́ gə̄ tə́ kanjə̄ kəsa yá̰a̰ anī, tɔ́gə́də́ a gətóó róbó, tɔdɔ̄ de kə́rēý gə̄ dandə́ tə́ ḭḭn̄ i sa̰y.

⁴ Ngé ndóō yá̰a̰ yān gə̄ tél ədanən̄ na: Loo ń toō i loo kə́ ɓē gətóo tū tə́, ba deē a rāā i ba̰ý n a əngeń yá̰a̰ kəsa kə́ asə kadə̄ kósə de gə̄ ń toō əsan̄ ndānə̄n̄ ní?

⁵ Jeju dəjedə́ na ké mápa i kóndóńg jīdə́ tə́ wa. Nin̄-ədanən̄ na i sīrí.

⁶ Anī Jeju əda kósə de gə̄ kadə̄ ndin̄ nang tə́, ba ni-taā mápá kə́ sīrí gə̄ ní ndadə̄ Nə́ɓā dɔ tə́, tétə̄ naā tə́, ba adə̄ ngé ndóō yá̰a̰ yān gə̄ kadə̄ nə̄ɓōn̄ de gə̄ ní.

⁷ Ngán kānjə̄ gə̄ sḛ́ý i jīdə́ tə́ ō. Ni ndadə̄ Nə́ɓā dɔ tə́, ba əda kadə̄ nə̄ɓōn̄ kósə de gə̄ ō.

⁸ Nin̄-əsan̄ ndānə̄n̄, ba kánə̄n̄ gotə mápá ń na̰y ní, rosə kem dōbə̄ sīrí aw̄n̄neé.

⁹ Nin̄ ń əsan̄ yá̰á̰ ní asən̄ deē dūbú sɔ́ ń noō. Jeju ɔsə sedə́ adə̄ aw̄n̄ kə̄ ɓē gə̄ tə́,

¹⁰ ba kə̄ ta jī tə́ noō ni-al̄ kem toó kə ngé ndóō yá̰a̰ yān gēé, aw̄ ta kə́ gō nang kə́ Dalmanuta tə́.

Parijiyḛ gə̄ gḛyn̄ kadə̄ Jeju rāā yá̰á̰ kə́ to kɔr kum

¹¹ Parijiyḛ gə̄ teē reēn̄ ba əlan̄ gír a nējə̄n̄ naā najə̄ kə Jeju. Nin̄ nāānən̄, dəjenən̄ kadə̄ rāā yá̰á̰ kə́ to kɔr kum kə́ ḭḭ dɔ rā̰ tə́, kə́ ɔjə kadə̄ ni i nge ń Nə́ɓā əlan ní kadə̄ kə n-a̰a̰n̄.

¹² Jeju tetə koō pḭḭ, ba ədadə́ na: I tām̄ rí tə́ á gír de kə́ ngɔlaā gə̄ ń toō a sāān̄ yá̰á̰ kə́ to kɔr kum kə́ ɔjə kadə̄ i Nə́ɓā n əlam̄ kadə̄ kə n-a̰a̰n̄ ní? Ādə̄ m-ə́dásí najə̄ kə́ bo ngá̰ý, Nə́ɓā a adə̄ gír de kə́ ngɔlaā gə̄ ń toō yá̰á̰ kə́ to kɔr kum kə́ ɔjə kadə̄ i ni n əlam̄ kadə̄ a̰a̰n̄ alé.

¹³ Gō tə́ anī ni-əya̰də́, ba tél al̄ kem toó kadə̄ gāngə̄n̄ bā kə̄ gidə kə́rēý tə́.

Kaa mápa yā Parijiyḛ gə̄ ō, yā Herod ō

¹⁴ Dɔ ngé ndóō yá̰a̰ yā Jeju gə̄ ndígə̄nal kun mápa sḛ́ý jīdə́ tə́ kɔ̄ɔ́. Nin̄ i kə mápa kógə̄ḿ beē ngóy kem toó.

¹⁵ Jeju tāādə́, ədadə́ na kə əndān̄ kum kedə̄ dɔ rɔ̄də́ tə́ majə najə̄ yā kaa mápa yā Parijiyḛ gə̄ tə́ ō, yā Herod tə́ ō.

¹⁶ Ngé ndóō yá̰a̰ yān gə̄ nējə̄n̄ naā najə̄ dɔ dáńdə́ tə́ tām̄ mápá ń gətóo jīdə́ tə́ ní.

¹⁷ Jeju ger̄ ba ədadə́ na: I tām̄ rí tə́ á ī-nējī naā najə̄ tām̄ yā mápá kə́ gətóo jīsí tə́ ní? Ī-gerī kum aĺ ɓáý a? Dɔsí un yá̰a̰ aĺ ɓáý a? Kemsí i kə́ ngan̄g ngóróró a?

¹⁸ Sḭḭ̄ i kə kumsí ba á̰a̰ī loo aĺ a? Sḭḭ̄ i kə mbīsí ba ōōī loo aĺ a? Əga kemsí dɔ tə́ aĺ a?

¹⁹ Dan ń m̄-tétə̄ mápá kə́ mí gə̄ tām̄ yā de kə́ dūbú mí gə̄ tə́ ní, ī-kánī gotə rosə dōbə̄ i kóndóńg? Nin̄-ədanən̄ na: I kutə gidə i jōó.

²⁰ Ba dan ń m̄-tétə̄ mápa kə́ sīrí gə̄ tām̄ yā de kə́ dūbú sɔ́ gə̄ tə́ ní, i kánī gotə rosə dōbə̄ i kóndóńg? Nin̄-ədan̄ na i sīrí.

²¹ Ni ədadə́ na: Ī-gerī kum aĺ ɓáý a?

Jeju rāā adə̄ nge kum tɔ̄ɔ̄ a̰a̰ loo

²² Nin̄-ugə̄n̄ Betsaida anī, reēn̄ kə deē kógə̄ḿ kə́ kumən tɔ̄ɔ̄ kɔ̄ɔ́ rɔ̄ Jeju tə́, ba rāānən̄ ɓɔ́ kadə̄ ɔdən.

²³ Ni-əhɔ jī nge kum tɔ̄ɔ̄ ní, ndɔ́rə̄n, aw̄ seneé gidə ɓē tə́. Ni-rāā hōr̄ tan kumən tə́ ō, əndā jīn dɔn tə́ ō, ba dəjen na ké a̰a̰ yá̰á̰ kə́rēý wa.

²⁴ Ni teē kumən ba əda na: M-á̰a̰ de gə̄ ton̄ tītə̄ kāgə̄ gə̄, ba a njə̄rān̄ i mbée.

²⁵ Jeju əndā jīn kumən tə́ ɓáý to̰, adə̄ ni-a̰a̰ loo unjə̄ wáńg wáńg. Kumən tél to kə gōó gogə́ adə̄ a̰a̰ yá̰a̰ malang unjə̄ ráý ráý.

²⁶ Anī Jeju əya̰n kadə̄ tél aw̄ ɓē yān tə́ ba ədan na kə lōō kaw̄ kem ɓēé.

Piyer əda na Jeju i Kərist

²⁷ Jeju aw̄ kə ngé ndóō yá̰a̰ yān gēé kumdə́ sɔɔ̄ ɓē gə̄ kə́ gō nang kə́ Sejare kə́ Pilipə tə́. Dan ń njə̄rān̄ róbó ní, ni-dəje ngé ndóō yá̰a̰ yān gə̄ na ké de gə̄ ədan̄ na ni i náā wa.

²⁸ Nin̄-tél ədanən̄ na: De gə̄ ədan̄ na ḭ̄ na i Ja̰a̰ Batistə, ba de kə́rēý gə̄ ədan̄ na ḭ̄ na i Eli, kə́ rang gə̄ ɓáý to̰ ədan̄ na ḭ̄ na i nge koō ta kógə̄ḿ kə́ dan madə̄ gə̄ tə́.

²⁹ Ba Jeju dəjedə́ na: Ba síī kɔ́ gə̄ ədaī na mā i náā. Loo ń noō tə́ Piyer tél ədan na: Ḭ̄ Kərist.

³⁰ Banī Jeju ədadə́ kə tɔ́gɔ́ na kə lōōn̄ kəda deē kógə̄ḿ gotə najə̄ yān.

Jeju əda najə̄ koyn ō, ndólə̄n ō

³¹ Tá əla gíŕ ndóōdə́ yá̰a̰ əda na: I gáŕ kadə̄ Ngōn̄ Deē a a̰a̰ tápə̄ ngá̰ý ō, kum kɔɔ̄ gə̄, kə ngol gə̄ kə́ dɔ ngé tun̄ yá̰a̰ gə̄ tə́, kə ngé ndóō de gə̄ ndū najə̄ gə̄, na a mbātə́nən̄ ō, de gə̄ a tɔ̄l̄nən̄ ō, ba ndɔ̄ mətá gō tə́ anī a ndól̄.

³² Ni ədadə́ yá̰a̰ gə̄ ń toō wáńg, adə̄ Piyer əhɔn kə gogə́, a gɔŕyɔ̄n najə̄.

³³ Ba Jeju mbel, a̰a̰ ngé ndóō yá̰a̰ yān gēé ba ndán̄g Piyer, ədan na: Ī-tél gōḿ tə́ kɔ̄ɔ́ Sətan, tɔdɔ̄ gír̄ kə́ kemií tə́ i gír̄ yā Nə́ɓā alé, ba i gír̄ yā de gə̄.

³⁴ Gō tə́ anī, ni-ɓāŕ kósə de gə̄ kə ngé ndóō yá̰a̰ yān gə̄, ba ədadə́ na: Ré deē kógə̄ḿ gḛy reē gōḿ tə́ anī, ādə̄ kɔ́ɔ̄ un kumən kɔ̄ɔ́ gíŕ yá̰á̰ kə́ to kɔsən kə̄ dɔɔ́ gə̄ tə́ ō, ādə̄ əla dɔn gír kāgə̄ kə́ dēsə́ yān tə́ ō, tá kə un gōḿ.

³⁵ Tɔdɔ̄ deē ń a sāā kajə rɔ̄n ní, kɔ́ɔ̄ a tḭ̄ḭ̄ ta. Banī nge ń ndigə tḭ̄ḭ̄ ta rɔ̄n kɔ̄ɔ́ tām̄ yāḿ tə́ ō, tām̄ Najə̄ kə́ Majə ń toō tə́ ō ní, kɔ́ɔ̄ a ajən.

³⁶ Ədadə́ na ké i rí bang n a teēī, ḭ̄ deē yá̰á̰ tə́, dan ń ə́ngé yá̰á̰ kə́ dɔ nang tə́ malang, ba ī-tḭ̄ḭ̄ ta rɔ̄í kɔ̄ɔ́ ní wa.

³⁷ Ké i rí n ḭ̄ deē, ā ādə̄ yā mbéləń gír rɔ̄í ní wa.

³⁸ Tɔdɔ̄ deē ń rɔ̄n sɔlə̄n tām̄ yāḿ tə́ ō, tām̄ najə̄ yāḿ gə̄ tə́ ō, dan gír de kə́ ɓāl̄ ń toō tə́ gə̄ kə́ nin̄ i ngé rāā rāȳ gə̄ ō, kə́ ngé kəhɔ ta Nə́ɓā aĺ gə̄ ō ní anī, rɔ̄ Ngōn̄ Deē a sɔlə̄n tām̄ yān tə́, dan ń a tél yā reē dan kɔsə gɔn yā Bɔbə̄n tə́ naā tə́ kə de kə́ dɔ rā̰ tə́ kə́ táĺ gə̄ ní.