MARK 7 - Bibəl ta Sar̄

Yá̰a̰ kāgə̄ ɓē yā ngán Israel gə̄ tə́

¹ Parijiyḛ gə̄ kə ngé ndóō de gə̄ ndū najə̄ kə́rēý gə̄ kə́ ḭḭn̄ Jerusalem kánə̄n̄ naā rɔ̄ Jeju tə́.

² Nin̄-a̰a̰n̄ ngé ndóō yá̰a̰ yān kə́rēý gə̄ əsan̄ yá̰a̰ i kə jīdə́ kə́ yḛr gēé, tām̄ tə́gon̄ jīdə́ alé.

³ Tɔdɔ̄ Parijiyḛ gə̄ kə Jipə gə̄ malang a əsan̄ yá̰a̰ kanjə̄ tə́go jīdə́ kadə̄ unjə̄ majə alé. Nin̄-əhɔn̄ i gō yá̰a̰ kāgə̄ ɓē yā kaadə́ gə̄.

⁴ Loo ń télən̄ súkūú anī, a tə́gon̄ rɔ̄də́ pá tá a əsan̄ yá̰á̰ ɓáý. Ba yá̰a̰ kāgə̄ ɓē kə́ rang gə̄ ń nin̄-unən̄ gō ní i ngá̰ý, tītə̄ tə́go kópə gə̄, kə jóo gə̄, kə səmbē gə̄, kə tə̄rá gə̄, kadə̄ unjə̄.

⁵ Adə̄ Parijiyḛ gə̄ kə ngé ndóō de gə̄ ndū najə̄ gə̄ dəjen̄ Jeju na ké i tām̄ rí tə́ n ngé ndóō yá̰a̰ yān gə̄ unən̄ gō yá̰a̰ kāgə̄ ɓē yā kaadə́ gə̄ alé, ba əsan̄ yá̰a̰ i kə jīdə́ kə́ yḛr ní wa.

⁶ Jeju tél ədadə́ na: Sḭḭ̄ ń i ngé gól̄ kum de gə̄ ní, dan ń Ijai ɔr̄ najə̄ kə́ Nə́ɓā əndā tan tə́ ní, əda i najə̄ yāsí rɔ̄kum. Ndangən̄ makətūbūú i tītə̄ ń toō beé: Gír de gə̄ ń toō rɔȳmə̄n̄ i kə tadə́ karī, ba kemdə́ əya̰m̄ sa̰y.

⁷ Nin̄-rāān̄ kəla yāḿ i ndāńg karī, tɔdɔ̄ yá̰a̰ gə̄ ń nin̄-ndóōn̄ de gə̄ ní i yá̰a̰ gə̄ ń de gə̄ ran̄ kə de gēé ta rāā ní ngóy.

⁸ Sḭḭ̄ ə́ya̰ī gō míndə́ Nə́ɓā kɔ̄ɔ́, ba úniī i gō kāgə̄ najə̄ yā de gə̄.

⁹ Jeju ədadə́ ɓáý to̰ na: Ī-gírī kadə̄ ī-rāāī majə ngá̰ý loo ń ī-mbātíī gō míndə́ Nə́ɓā ba úniī gō yá̰a̰ kāgə̄ ɓē yāsí ní.

¹⁰ Tɔdɔ̄ Moijə əda na kə ī-rɔȳ bɔbí ō, kó̰ó̰í ō, tá əda ɓáý to̰ na deē ń ndɔ̄ĺ bɔbə̄n aláa kó̰o̰n ɓáa, kə tɔ̄l̄nən̄ kɔ̄ɔ́.

¹¹ Ba sḭḭ̄, ré deē əda bɔbə̄n aláa kó̰o̰n na yá̰a̰ kənge yān gə̄ ń kadə̄ n ngɔ̄məńdə́ ní na i korban, kumən n a i yá̰á̰ kə́ na n-ndējə̄ Nə́ɓā kɔ̄ɔ́ ní anī,

¹² ə́ya̰ī deē ń noō kadə̄ rāā yá̰á̰ kógə̄ḿ tām̄ yā bɔbə̄n tə́ aké i kó̰o̰n tə́ to̰ alé,

¹³ adə̄ tītə̄ ń toō beé ní, sḭḭ̄ ī-nujiī najə̄ yā Nə́ɓā kɔ̄ɔ́ kə gō yá̰a̰ kāgə̄ ɓē yāsí gə̄ ń ī-nə̄ɓōī naā ní, ba ī-rāāī yá̰á̰ kə́ rang gə̄ ngá̰ý kə́ tītə̄ ń noō ɓáý to̰.

Yá̰a̰ gə̄ ń a rāān̄ deē kadə̄ tél de kə́ yḛr ní

¹⁴ Tá Jeju ɓāŕ kósə de gə̄ kə̄ rɔ̄n tə́ to̰, ba ədadə́ na: Sḭḭ̄ malang, ōōī najə̄ yāḿ, ba ī-gerī kum:

¹⁵ Yá̰á̰ kógə̄ḿ kə́ ndágá kə́ aw̄ kem deē tə́, ba rāān adə̄ a tél de kə́ yḛr ní gətóo. Banī i yá̰a̰ gə̄ ń teēn̄ kem deē tə́ kə̄ ndágá ní n a rāān̄ deē kadə̄ tél de kə́ yḛr ní.

¹⁶ Ré āwī kə mbīsí kə́ kadə̄ ōōiń najə̄ anī, ōōī majə.

¹⁷ Loo ń Jeju əya̰ kósə de gə̄ ba aw̄ kújú anī, ngé ndóō yá̰a̰ yān gə̄ dəjenən̄ gír najə̄ ngeé ń toō.

¹⁸ Anī ni-ədadə́ na: Sḭḭ̄ nəkɔ́ ń ī-ndiī toó, ī-gerī kum yá̰a̰ aĺ bátə́ a? Ī-gerī kadə̄ yá̰á̰ kə́ ndágá kə́ udə kem deē tə́ kadə̄ rāān adə̄ tél de kə́ yḛr gətóo aĺ a?

¹⁹ Tɔdɔ̄ ni ń toō udə i ngarān̄g kemən tə́ alé, ba aw̄ i jɔdəbon tə́, tá kadə̄ teē kɔ̄ɔ́ ta wa tə́. Dan ń Jeju əda beé ní, ɔjə kadə̄ yá̰a̰ kəsa malang i yá̰á̰ kə́ unjə̄ njáý njáý.

²⁰ Ni-əda ɓáý to̰ na: I yá̰á̰ ń teē ngarān̄g kem deē tə́ ní n a rāān kadə̄ tél de kə́ yḛr ní.

²¹ Tɔdɔ̄ yá̰a̰ gə̄ ń a teēn̄ ngarān̄g kem de gə̄ tə́ ní, i gír̄ kə́ majaĺ gə̄ ō, i sāā naā loo kaya tə́ ō, ɓogə ō, tɔ̄l̄ deē ō,

²² rāȳ ō, kum ndaa yá̰a̰ ō, kem ndul ō, ngam ō, ngur rāā yá̰á̰ kə́ majaĺ gə̄ ō, ndə̄ngā yá̰a̰ ō, ngonjə̄ ō, kɔjə rɔ̄ ō, mbóo najə̄ gə̄ ō.

²³ Yá̰á̰ kə́ majaĺ gə̄ ń noō teēn̄ i ngarān̄g kem deē tə́, ba i nin̄ n a rāān̄ deē kadə̄ tél de kə́ yḛr ní.

Dəyá̰ tə̄rā kógə̄ḿ taā kem Jeju

²⁴ Jeju ḭḭ loo ń noō tə́ aw̄ gō nang kə́ Tir tə́ anī, udə kem kújə́ kógə̄ḿ tə́. Ni ndigə kadə̄ deē ger̄ gōn alé.

²⁵ Banī dəyá̰ kógə̄ḿ oō kōōn. Dəyá̰ ní aw̄ kə ngōnən kə́ dəyá̰ kógə̄ḿ kə́ ndíĺ kə́ yḛr gə̄ i kemən tə́. Dan ń ni-oō kōō Jeju anī, kə̄ ta jī tə́ noō reē əsō kə̄ njan tə́.

²⁶ Dəyá̰ ní i Gərek, ba gír kaan i Penisi kə́ Siri. Ni-rāā Jeju ɓɔ́ kadə̄ tə̄ɓā ndíĺ kə́ majaĺ dɔ ngōnən tə́ kɔ̄ɔ́.

²⁷ Jeju ədan na: Ādə̄ ngán gə̄ əsan̄ ndānə̄n̄ kété pá tá, tɔdɔ̄ kadə̄ deē taā yá̰a̰ kəsa yā ngán gə̄ ba tə́nī adə̄ ngáń bísə gə̄ i yá̰á̰ kə́ gō tə́ alé.

²⁸ Dəyá̰ ní ədan na: A̰ýyē, i gō tə́, Kɔ́ɔ̄ɓē, banī ngáń bísə gə̄ ń ran̄ gíŕ tábəl tə́ ní gə̄gē a əsan̄ butə̄ yá̰a̰ kəsa yā ngán gə̄.

²⁹ Anī Jeju ədan na: Tām̄ najə̄ ń toō tə́ ní āw̄, na ndíĺ kə́ majaĺ teē kem ngōnīí tə́ kɔ̄ɔ́.

³⁰ Loo ń dəyá̰ tél ugə̄ ɓēé anī, ənge ngōnən to dɔ tə̄ráá ba ndíĺ kə́ majaĺ ní teē kemən tə́ kɔ̄ɔ́.

Jeju rāā adə̄ de kə́ mbíkī oō loo ō, ɔr̄ najə̄ ō

³¹ Jeju əya̰ gō nang kə́ Tir, ba əndā ɓē kə́ Sidon gān̄g. Ni-aw̄ kumən sɔɔ̄ bā bo kə́ Galile. Ni mān̄ gō nang kə́ Dekapol tə́.

³² De gə̄ reēn̄ rɔ̄n tə́ kə mbíkī kógə̄ḿ kə́ ngan̄g seneé ngá̰ý kadə̄ ɔr̄ najə̄. Nin̄-rāān̄ Jeju ɓɔ́ kadə̄ əndā jīn dɔn tə́.

³³ Ni-aw̄ seneé sa̰y kɔ̄ɔ́ rɔ̄ de gə̄ tə́, adə̄ nin̄ i kə kéŕdə́. Ni tə́la ta ngán jīn gə̄ mbīn tə́ ō, tībə̄ hōr̄ ta ngōn̄ jīn tə́ ɔdəń ta ndo̰n ō.

³⁴ Gō tə́ anī, ənī kumən kə̄ dɔɔ́ dɔ rā̰ tə́ ō, tetə koō pḭḭ ō, ba əda na: Epata, kumən na ī-teē taí.

³⁵ Kə̄ ta jī tə́ noō mbīn gə̄ oōn̄ loo ō, kəla ndo̰n tútə ō, adə̄ əla gír kɔr̄ najə̄ kə́ kum unjə̄ wáńg wáńg.

³⁶ Jeju tāādə́ ngá̰ý kadə̄ ədan̄ deē kógə̄ḿ gotə yá̰á̰ ní alé. Ba dan ń ni tāādə́ ngá̰ý anī, nin̄-ənīn̄ mbēr̄ ngá̰ý dɔ tə́.

³⁷ Ɔr kumdə́ ngá̰ý al̄ naā adə̄ ədan̄ na: Ni-rāā yá̰a̰ malang majə ngá̰ý. Ni ra mbíkī gə̄ adə̄ oōn̄ loo ō, ngé kɔr̄ najə̄ aĺ gə̄ adə̄ ɔrə̄n̄ najə̄ ō.