MARK 5 - Bibəl ta Sar̄

Jeju tə̄ɓā ndíĺ kə́ majaĺ kə́ ngá̰ý gə̄ kem deē kógə̄ḿ tə́ kɔ̄ɔ́

¹ Nin̄-ugə̄n̄ gidə bā bo kə́rēý tə́ gō nang yā Gadara gə̄ tə́.

² Ba dan ń Jeju risə kem toó kə̄ nang tə́ anī, kə̄ ta jī tə́ noō deē kógə̄ḿ kə́ ndíĺ kə́ yḛr i kemən tə́ teē bāá yo tə́, ba a ɔjə non.

³ Loo ndi deē ngeé ń noō i dɔ ɓádə gə̄ tə́, ba deē kógə̄ḿ kə́ asə do̰ō̰n gətóo, ká i kə súlú gə̄gē ní.

⁴ Tɔdɔ̄ nja i ngá̰ý rákə̄n̄ njan gə̄ kə kángə́lá gə̄ kɔ̄ɔ́ ō, adə̄ de kə́ asə tetən gətóo.

⁵ Kə dɔ ndɔ̄ gə̄ ní, ndɔ̄ɔ́ ō kadaá ō, ni a njə̄rā i dɔ ɓádə gə̄ tə́, aláa i dɔ mbal̄ gə̄ tə́. Ni a gán̄g kɔŕ ō, a tə́jā rɔ̄n kə gájə mbal̄ gēé ō.

⁶ Ni-a̰a̰ Jeju kə̄ sa̰y anī, a̰ȳ ngɔ̄də̄, reē ɔsə non nang tə́ non tə́,

⁷ ba əga kɔŕ ngá̰ý əda na: Jeju, Ngōn̄ Nə́ɓā kə́ dɔɔ́, yāí i rí seḿ? m̄-rāāī ɓɔ́, m̄-dəjeī kə rī Nə́ɓāá kadə̄ ī-rāām̄ yá̰á̰ kə́ tōr̄ alé.

⁸ I tɔdɔ̄ Jeju ədan na: Ndíĺ kə́ yḛr ī-teē kem deē ń toō tə́ kɔ̄ɔ́.

⁹ Jeju dəjen na ké rīn na i rí wa. Anī ni-tél ədan na rīn na i dūbú ngá̰ý, tɔdɔ̄ nin̄ na i ngá̰ý.

¹⁰ Ba ni-rāā Jeju ɓɔ́ ngá̰ý kadə̄ tə̄ɓādə́ ndágá kɔ̄ɔ́ nang ń noō tə́ alé.

¹¹ Ba ɓūtə̄ kosong kə́ ɓēé kə́ ngá̰ý gə̄ ran̄ a əsan̄ yá̰a̰ loo ngeé ń noō tə́ kadə mbal̄ tə́.

¹² Anī ndíl kə́ yḛr gə̄ ní rāān̄ Jeju ɓɔ́, ba ədanən̄ na: Əlájí kem kosong gə̄ ń noō tə́ ādə̄ j-udə kemdə́ tə́.

¹³ Jeju ndigə. Adə̄ ndíĺ kə́ majaĺ gə̄ ní teēn̄ ba aw̄ udən̄ kem kosong gə̄ ní tə́. Anī kosong gə̄ ní ɓə̄ngān̄ naā ɓuk, ḭḭn̄ ta kóongó mbal̄ tə́ kə̄ kum bā bo tə́ kə̄ kum bā bo tə́. Asən̄ dūbú jōó, ba a̰ȳn̄ man̄ oyn̄ malang.

¹⁴ Ngé ngɔ̄m̄ bor̄ gə̄ a̰ȳn̄ naā aw̄ ɔjən̄ gotə kem ɓē bo tə́ ō, kem ngán ɓē gə̄ tə́ ō, adə̄ de gə̄ teē reēn̄ ka̰a̰ yá̰a̰ nəkɔ́ ń rāā yá̰á̰ tə́ ní.

¹⁵ Dan ń reē ugə̄n̄ rɔ̄ Jeju tə́ anī, a̰ā̰n̄ deē ń ndíĺ kə́ majaĺ gə̄ i kemən tə́ ní ndi nang tə́ kə kūbūú rɔ̄n tə́. Ni ń ndíĺ kə́ majaĺ gə̄ i ngá̰ý kemən tə́ ní, tél ndi i kə́ de kə́ karī gə̄ tə́, adə̄ ɓōĺ rāādə́ ngá̰ý.

¹⁶ Ngé gə̄ ń a̰ā̰n̄ yá̰a̰ gə̄ ń noō kə kumdə́ ní ɔjən̄də́ gíŕ yá̰á̰ ń rāā nge ń ndíĺ kə́ majaĺ gə̄ i kemən tə́ ní ō, najə̄ yā kosong gə̄ ō.

¹⁷ Anī nin̄-rāān̄ Jeju ɓɔ́ kadə̄ əya̰ gō nang yādə́.

¹⁸ Dan ń Jeju tél al̄ kem toó anī, nge ń ndíĺ kə́ majaĺ gə̄ i kemən tə́ kété ní rāān ɓɔ́ kadə̄ kə n-aw̄ seneé.

¹⁹ Ba Jeju ɔdə alé, adə̄ ədan na: Ī-tél āw̄ ɓēé looí dan ngééí gə̄ tə́, ba ɔ́jə́də́ gotə yá̰a̰ malang ń Kɔ́ɔ̄ɓē rāā tām̄ yāí tə́ ní, kə gō ko̰o̰ ń o̰o̰n tɔdɔ̄í ní.

²⁰ Anī ni-aw̄, ba əla gír kənī mbēr̄ gō nang kə́ Dekapol tə́, ɔjə gotə yá̰a̰ malang ń Jeju rāā tām̄ yān tə́ ní. Adə̄ de gə̄ malang ní ɔr kumdə́ ngá̰ý.

Ngōn̄ Jairus ō, dəyá̰ kə́ mósə teēn ō

²¹ Jeju teē man̄ kə toó kə̄ gidə kə́rēý tə́, anī kósə de kə́ ngá̰ý gə̄ kánə̄n̄ naā rɔ̄n tə́, banī ni-ndi ta bā bo tə́.

²² Tā anī ngār kújə kán̄ naā kógə̄ḿ kə́ rīn na i Jairus reē. Loo ń ni-a̰a̰ Jeju anī, əsō kə̄ nang tə́ njan tə́,

²³ ba rāān ɓɔ́ ngá̰ý, ədan na: Ngōnə̄ḿ kə́ dəyá̰ a rāā yā kəhɔ tan kə̄ naā tə́, ba ī-reē, ə̄ndā jīí dɔn tə́ ādə̄ ajə ba ndi kə kumneé.

²⁴ Jeju aw̄ seneé, anī kósə de gə̄ ngá̰ý unən̄ gōn ba mbə́rēnən̄.

²⁵ Anī dəyá̰ kógə̄ḿ kə́ mósə teēn, rāā ɓāl̄ kutə gidə i jōó, i noó.

²⁶ A̰a̰ tápə̄ ngá̰ý jī doktór kə́ gə̄ tə́ ō, əgādə́ kə yá̰a̰ kənge yānneé malang kɔ̄ɔ́ ō, banī mo̰y yān ní i só tə́ alé, a aw̄ i kum kə̄ kété kété ɓáý.

²⁷ Dan ń ni-oō najə̄ ń de gə̄ ɔrə̄n̄ dɔ Jeju tə́ ní anī, reē gidən tə́ dan kósə de gə̄ tə́, ba ɔdə kūbə̄ yān.

²⁸ Tɔdɔ̄ ni-əda na ré i kūbə̄ yān ngóy gə̄gē n n-ɔdə anī, rɔ̄n na a ngáā.

²⁹ Kə̄ ta jī tə́ noō mósə́ ní dəba kɔ̄ɔ́ ō, ba dəyá̰ ní ger̄ gō rɔ̄n kə́ ngáā ō.

³⁰ Kə̄ ta jī tə́ noō Jeju ger̄ gō kadə̄ tɔ́gə́ kógə̄ḿ teē rɔ̄n tə́, adə̄ tūr̄ rɔ̄n kə̄ rɔ̄ kósə de gə̄ tə́, ba dəjedə́ na ké i náā n ɔdə kūbə̄ yān ní wa.

³¹ Ngé ndóō yá̰a̰ yān gə̄ ədanən̄ na: Á̰á̰ kósə gə̄ ń a mbə́rēnī ní aĺ á ī-tél ī-dəje na ké i náā n ɔdiī wa a.

³² Ba ni-gó̰ō̰ loo yā ka̰a̰ deē ń rāā yá̰á̰ ní.

³³ Anī ɓōĺ rāā dəyá̰ ní, adə̄ ndew yakə yakə, tām̄ ni-ger̄ yá̰á̰ ń rāā yá̰a̰ kem rɔ̄n tə́ ní, adə̄ reē əsō kə̄ nang tə́ njan tə́, ba ədan najə̄ kə́ rɔ̄kum malang.

³⁴ Banī Jeju ədan na: Ngōnə̄ḿ, taā kem yāí ajiī. Āw̄ kə kem sɔl̄ lɔmɔɔ́, ba ādə̄ ḭ̄ i de kə́ gír mo̰y yāí gān̄g kɔ̄ɔ́.

³⁵ Jeju a ɔr̄ najə̄ kə̄ tan tə́ ɓáý anī, de kə́rēý gə̄ teēn̄ ɓē ngār kújə́ kán̄ naá reē ədan̄ ngār kújə kán̄ naā na ngōnən ní na oy kɔ̄ɔ́ ō ba ké a njə́ɓā ngoldə́ karī na i rí wa.

³⁶ Ba loo ń Jeju oō najə̄ ń nin̄-ədan̄ ní anī, əda ngār kújə́ kán̄ naā na kə lōō ɓōĺ, ba kə taā kem ngóy.

³⁷ Ni-adə̄ de kə́ rang aw̄ seneé alé, banī i Piyer ō Jakə ō Ja̰a̰ kə́ ngōkó̰o̰ Jakə ō ta ngóy.

³⁸ Loo ń ugə̄n̄ ta kújə yā ngār kújə́ kán̄ naā tə́ anī, Jeju a̰a̰ kósə de gə̄ kə́ kōōdə́ ɓār̄ mbiti, i ngé nōō gə̄ ō ngé gán̄g kɔŕ gə̄ ō.

³⁹ Ni udə kújú anī, ədadə́ na: I tām̄ rí tə́ á kōōsí ɓār̄ mbiti ō, ī-nōōī beé ō ní? Ngōn̄ ní oy alé, ba a ɓīī i mbée.

⁴⁰ Ba nin̄-lurnən̄. Tā anī Jeju tə̄ɓādə́ ndágá malang, ba ɓāŕ bɔbə̄ ngōn̄ ní ō, kó̰o̰n ō, naā tə́ kə ngé gə̄ ń seneé ní, nin̄-udən̄ loo ń ngōn̄ to tū tə́ ní tə́.

⁴¹ Ni-əhɔ jī ngōn̄ ní ba ədan na: Talita kum! Kumən na i ngōn̄ kə́ dəyá̰, m-ə́daī na kə ḭ́ḭ dɔɔ́!

⁴² Kə̄ tajī tə́ noō ngōn̄ kə́ dəyá̰ ní ḭḭ dɔɔ́ a njə̄rā, tɔdɔ̄ ɓālə̄n i kutə gidə i jōó. Kə̄ ta jī tə́ noō nin̄ malang ɔr kumdə́ ngá̰ý.

⁴³ Jeju tāādə́ ngá̰ý kadə̄ deē kógə̄ḿ kə ger̄ gō yá̰á̰ ní alé. Ba ni-ədadə́ na kə adə̄n̄ ngōn̄ kə́ dəyá̰ ní yá̰a̰ kadə̄ əsa.