MARK 4 - Bibəl ta Sar̄

Kūjə́ najə̄ yā nge kənda kōō

¹ Jeju tél a ndóō de gə̄ yá̰a̰ kadə bā bo tə́ ɓáý to̰. Kósə de gə̄ ń kánə̄n̄ naā rɔ̄n tə́ ní i ngá̰ý al̄ naā, adə̄ ni-al̄ kem to kógə̄ḿ tə́, ndi kemeé. To i kum bā bo tə́ ba kósə de gə̄ malang ndin̄ nang tə́,

² ta man̄ tə́. Ni ndóōdə́ yá̰á̰ ngá̰ý kə kūjə́ najá, ba tū yá̰á̰ ndóō yān tə́ ní, ni-ədadə́ na:

³ Ōōī, nge ndɔr̄ teē, aw̄ kənda kōó.

⁴ Dan ń a ənda kōō ní anī, kə́rēý gə̄ tə́sōn̄ bɔ̄gə̄ róbə́ tə́, adə̄ yel̄ gə̄ reē əsan̄ kɔ̄kə́.

⁵ Ngé kə́rēý gə̄ tə́sōn̄ i dɔ kɔkərɔ gə̄ tə́, i loo kə́ nán̄g i ngá̰ý tū tə́ alé, adə̄ əɓan̄ láẃ, tām̄ nang kə́ sɔl̄ to i kə̄ dɔɔ́ laā ngóy.

⁶ Banī dan ń mbang ḭḭ kə̄ dɔɔ́ anī, ndəlēn̄ adə̄ tutən̄ kɔ̄ɔ́, tɔdɔ̄ ngəradə́ aw̄ nang tə́ ngá̰ý alé.

⁷ Ngé kə́rēý gə̄ tə́sōn̄ i dan kōn̄ gə̄ tə́. Kōn̄ gə̄ ní tɔgən̄ taān̄ dɔdə́ kɔ̄ɔ́, adə̄ nin̄-a̰a̰nə̄n̄ alé.

⁸ Ngé kə́rēý gə̄ tə́sōn̄ i dɔ nang kə́ majə tə́. Adə̄ əɓan̄ ō, tɔgən̄ ō, ojən̄ ba edə̄n̄ kum ō. Adə̄ ni kə́ kógə̄ḿ teē kum madə̄ kutə mətá ō, ni kə́ rang kutə mehḛ́ ō, ni kə́ rang ɓú kógə̄ḿ ō.

⁹ Gō tə́ anī Jeju əda na: Náā nəkɔ́ ń aw̄ kə mbīneé yā koōń najə̄ anī, ādə̄ kɔ́ɔ̄ oō!

Jeju ɔr̄ najə̄ kə kūjə́ najá i tām̄ rí tə́

¹⁰ Loo ń kósə de gə̄ əya̰n̄ Jeju anī, ngé gə̄ ń gīrə̄n̄ gidən ní ō, ngé kə́ kutə gidə i jōó gə̄ ō,

¹¹ dəjenən̄ gír kūjə́ najə̄ gə̄ ní, anī ni-ədadə́ na: I sḭḭ̄ n Nə́ɓā adə̄sí ta róbə kadə̄ ī-gerī yá̰á̰ kə́ to loo mundə̄ tə́ kə́ dɔ Ɓē ko̰o̰ yā Nə́ɓā tə́, banī tām̄ yā ngé kə́ ndágá gə̄ tə́ ní, yá̰a̰ gə̄ malang reēn̄ i kə kūjə́ najá,

¹² yā kadə̄ dan ń a̰a̰n̄ anī, a̰a̰n̄ ba a̰a̰n̄ kə gōó aĺ ō, yā kadə̄ dan ń oōn̄ najə̄ anī, oōn̄ ba gerə̄n̄ kum najə̄ ń oōn̄ ní aĺ ō, na sōgə́ nin̄ a tūrə̄n̄ háĺdə́ anī, Nə́ɓā a māȳ rɔ̄n dɔdə́ tə́.

Jeju ɔjə de gə̄ kum kūjə́ najə̄ yā nge kənda kōō ní

¹³ Jeju ɔr̄ najə̄ sedə́ ɓáý to̰ ədadə́ na: Ī-gerī kum kūjə́ najə̄ gə̄ malang i ba̰ý?

¹⁴ Nge kənda kōō ní ənda i najə̄.

¹⁵ De kə́rēý gə̄ i kadə róbə́ ń najə̄ əsō tū tə́ ní. Loo ń oōn̄ najə̄ oy anī, kə̄ ta jī tə́ noō Sətan reē, ba taā najə̄ ń Nə́ɓā əndā kemdə́ tə́ ní kɔ̄ɔ́.

¹⁶ Adə̄ de kə́rēý gə̄ i tītə̄ kōō ń tə́sō dɔ kɔkərɔ tə́ ní. Dan ń oōn̄ najə̄ anī, nin̄-taān̄ kə ta jī tə́ noō kə rɔ̄nelēé ngá̰ý,

¹⁷ ba nin̄-tə́lan̄ ngəradə́ nang tə́ ngan̄g alé. Nin̄-ndigən̄ yá̰a̰ i ndigə kə́ kum ngá̰ý alé. Loo ń wur kɔl əsō dɔdə́ tə́, aláa rāān̄də́ ndóō tə́ tām̄ yā najə̄ tə́ anī, nin̄-tə́sōn̄ kɔ̄kə́.

¹⁸ De kə́rēý gə̄ i tītə̄ kōō ń tə́sō dan kōnōó ní. Nin̄ i ngé gə̄ ń oōn̄ najə̄,

¹⁹ ba sōl̄ yá̰á̰ kə́ dɔ nang tə́ gə̄ ō, gól̄ yā yá̰a̰ kənge yādə́ kə́ ngá̰ý gə̄ ō, ngur yá̰á̰ kə́ rang gə̄ ō, udən̄ kemdə́ tə́ ba taān̄ dɔ najə̄ kɔ̄ɔ́, adə̄ teēn̄ yá̰a̰ aĺ ní.

²⁰ De kə́rēý gə̄ i tītə̄ kōō ń tə́sō dɔ nang kə́ majə tə́ ní. Nin̄-oōn̄ najə̄, ba taān̄ najə̄ ní, adə̄ kumdə́ to. Kum kə́rēý gə̄ i kutə mətá ō, kə́rēý gə̄ i kutə mehḛ́ ō, kə́rēý gə̄ i ɓú ō.

Kūjə́ najə̄ yā lámba

²¹ Jeju əda ngé ndóō yá̰a̰ yān gə̄ na: Reēn̄ kə lámba i yā kəndā gír kārāá, aké i gír tə̄ráá wa? A naān̄ i tū gajə kāgə̄ tə́ aĺ a?

²² Tɔdɔ̄ yá̰á̰ kógə̄ḿ kə́ to loo ɓɔ̄ɔ̄ rɔ̄ tə́ kə́ yā kadə̄ a ɔjən̄ kə̄ ndágá aĺ ní a gətóo. Tá yá̰á̰ kógə̄ḿ kə́ rāā yá̰a̰ kadə̄ to loo mundə̄ tə́, ba kadə̄ a ɔjən̄ kə̄ ndágá aĺ ní gətóo ō.

²³ Náā náā nəkɔ́ ń i kə mbīneé yā koōń najə̄ anī, ādə̄ kɔ́ɔ̄ oō.

²⁴ Ni ədadə́ ɓáý to̰ na: Ə̄ndāī ma̰ȳ yá̰á̰ ń ā oōī ní. A mbɔ̄jə́n̄ yá̰a̰ adə̄n̄sí i kem kār̄ tɔ̄jə̄ yá̰á̰ ń sḭḭ̄ ī-mbɔ̄jíīneé yá̰a̰ ādī tə́ ní ō, tá a adə̄n̄sí dɔ tə́ ɓáý to̰ ō.

²⁵ Tɔdɔ̄ nge ń i kə yá̰á̰ ní, Nə́ɓā a adə̄n dɔ tə́, ba nge ń i kə yá̰á̰ aĺ ní, ká ré i yá̰a̰ yān gə̄gē anī, Nə́ɓā a taā jīn tə́ kɔ̄ɔ́.

Kūjə́ najə̄ yā kum kōō kə́ əɓa dɔ rɔ̄n

²⁶ Jeju əda na: Ɓē ko̰o̰ yā Nə́ɓā i tītə̄ deē kógə̄ḿ kə́ ənda kum kōō nang tə́.

²⁷ Ká ré ni-ɓīī aáā, ni-ndól̄ aáā, ndɔ̄ɔ́ ō, kadaá ō, kum kōō ní a əɓa ō a tɔgə ō, ba deē ní ger̄ loon alé.

²⁸ Dɔ nang teē yá̰a̰ dɔ rɔ̄n. Kété i mbīn gə̄, gō tə́ i dɔn, pá tá kumən teē ngá̰ý tū dɔn ní tə́.

²⁹ Dan ń kumən tutə anī, deē ní aw̄ yā kəja, tɔdɔ̄ nāā sāā kōō ugə̄ kɔ̄ɔ́.

Kūjə́ najə̄ yā kum Mutardə

³⁰ Jeju əda na: Yá̰a̰ nəkɔ́ ń kadə̄ j-ɔjiīń Ɓē ko̰o̰ yā Nə́ɓā ní i rí ō? I kūjə́ najə̄ yā rí n kadə̄ j-ɔjiīń ní ō?

³¹ Ni to i tītə̄ kum mutardə. Dan ń a dubə̄nən̄ nang tə́ ní, i kə́ dūú ngá̰ý tɔȳ kum kōō gə̄ malang kə́ dɔ nang tə́,

³² banī loo ń dubə̄n̄ ɓá ní a, əɓa ba tɔgə, adə̄ bo tɔȳ kámbə gə̄ malang ō, tɔ̄ɔ̄ ta jīn kə́ bo gə̄ ō, adə̄ yel̄ kə́ dɔɔ́ gə̄ reē rāān̄ ɓēdə́ ndílən tə́.

³³ I kə kūjə́ najə̄ gə̄ ngá̰ý kə́ tītə̄ ń noō gə̄ n Jeju ɔjəńdə́ najə̄ kə gō tɔ́gə koō ń nin̄-asən̄ koō ní.

³⁴ Ni-ɔr̄ najə̄ sedə́ kanjə̄ kūjə́ najə̄ gə̄ alé, ba ni-ɔjə ngé ndóō yá̰a̰ yān gə̄ gíŕ yá̰a̰ gə̄ ń noō malang kə kéŕdə́.

Nél balway oō ta Jeju

³⁵ Ndɔ̄ ń noō tə́, loo tíbí anī, Jeju əda ngé ndóō yá̰a̰ yān gə̄ na kə n-teēn̄ bā bo kə̄ gidə kə́ nú tə́.

³⁶ Nin̄-əya̰n̄ kósə de gə̄ ba aw̄n̄ kə Jeju kem to ń ni-ndi kemeé ní tə́, ba to kə́ rang gə̄ ndin̄ kadən tə́ ō.

³⁷ Nél kə́ bo ngá̰ý kógə̄ḿ əsō maná, rāā adə̄ bəngál man̄ aw̄ kə̄ kem toó, kem toó, adə̄ man̄ a rāā loo rosə kem to.

³⁸ Ba Jeju to a ɓīī kə̄lá to tə́ dɔ yá̰a̰ taā gír dɔ tə́. Anī nin̄-ndól̄nən̄ ba ədanən̄ na: Ngoljí, tají a tḭ̄ḭ̄ ní usiī aĺ a?

³⁹ Ni ndól̄ anī ndán̄g nél, ba əda bā bo na: Asiī, ī-ra jəke! Adə̄ nél gān̄g kɔ̄ɔ́, ba loo tél to kúkúkú.

⁴⁰ Tā anī ni-ədadə́ na: I tām̄ rí tə́ á ī-ɓōlíī beé? Ī-taāī kem aĺ ɓáý a?

⁴¹ Ɓōĺ rāādə́ ngá̰ý, adə̄ ədan̄ naā dɔ dáńdə́ tə́ na: Deē nəkɔ́ ń toō i náā á nél gə̄gē man̄ bā bo gə̄gē oōn̄ tan beé wa.