MARK 2 - Bibəl ta Sar̄

Jeju rāā adə̄ deē kógə̄ḿ kə́ lígə̄rī ənge rɔ̄ ngáā

¹ Rāā ndɔ̄ ngá̰ý aĺ gō tə́ anī, Jeju tél reē Kapernaum adə̄ de gə̄ oōn̄ na ni i kújú,

² anī de gə̄ ngá̰ý kánə̄n̄ naā noó, adə̄ ta róbə́ kújə́ tə́ ndágá gə̄gē loo ndi asədə́ to̰ alé. Ni ɔjədə́ najə̄.

³ De gə̄ reēn̄ kə deē kógə̄ḿ kə́ lígə̄rī kə́ de gə̄ sɔ́ ətōnən̄.

⁴ De gə̄ ní asən̄ kənīn no Jeju tə́ alé, tām̄ kósə de gə̄ i ngá̰ý. Anī nin̄-tútən̄ dɔ kújə, adə̄ sɔɔ̄ dɔ Jeju. Loo ń nin̄-tútən̄ kum loo oy anī, əlan̄ waá ń nge lígə̄rī to kemeé ní kə̄ nang tə́.

⁵ Dan ń Jeju a̰a̰ taā kem yādə́ anī, əda nge lígə̄rī na: Ngōnə̄ḿ, yá̰á̰ kə́ majaĺ gə̄ ń ī-rāā ní i kə́ mā̰ȳ rɔ̄ dɔ tə́ kɔ̄ɔ́.

⁶ Banī ngé ndóō de gə̄ ndū najə̄ kə́rēý gə̄ ń ndin̄ noó ní gírə̄n̄ kemdə́ tə́ ədan̄ na:

⁷ I ba̰ý á deē ń toō a ɔr̄ najə̄ beé? Ni a gán̄g i Nə́ɓā. I náā n asə mā̰ȳ rɔ̄n dɔ yá̰á̰ kə́ majaĺ gə̄ tə́ ní? I Nə́ɓā ngóy aĺ a?

⁸ Kə̄ ta jī tə́ beé Jeju ger̄ yá̰á̰ ń nin̄-gírə̄n̄ kemdə́ tə́ ní, adə̄ ədadə́ na: I tām̄ rí tə́ á ī-gírī yá̰a̰ gə̄ ń toō kemsí tə́ beé?

⁹ Ni kə́ rá n i kə́ ngan̄g alé ní, i kadə̄ deē ə́da de kə́ lígə̄rī na majaĺ yān gə̄ i kə́ mā̰ȳ rɔ̄ dɔ tə́ kɔ̄ɔ́, aké i kadə̄ deē ə́dan na kə ḭḭ dɔɔ́, un waá yān, ba kə njə̄rā ḿ?

¹⁰ Yā kadə̄ ī-gerīneé kadə̄ Ngōn̄ Deē i kə tɔ́gə mā̰ȳ rɔ̄n dɔ majaĺ gə̄ tə́ dɔ nang tə́ ní. Dan ń ni-əda tītə̄ ń noō ní anī, tél tūr̄ tan, əda de kə́ lígə̄rī ní na:

¹¹ Ḭ̄, m-ə́daī, ḭ́ḭ dɔɔ́, ún waá yāí ba ī-tél āw̄ ɓēé looí.

¹² Kə̄ ta jī tə́ noō ni-ḭḭ dɔɔ́, un waá yān ba teē ndágá ta kumdə́ tə́ malang. Loo ń noō tə́ ɔr kumdə́ ngá̰ý, ba gō tə́ anī, nin̄-ɔsən̄ gɔn Nə́ɓā, ədan̄ na n-a̰a̰n̄ yá̰á̰ kə́ beé nja kógə̄ḿ aĺ ɓáý.

Jeju ɓāŕ Lebi

¹³ Jeju teē aw̄ kadə bā bo tə́ ɓáý to̰. Kósə de gə̄ malang reēn̄ rɔ̄n tə́ anī ni-ndóōdə́ yá̰a̰.

¹⁴ Dan ń ni a mān̄ róbó anī, a̰a̰ Lebi ngōn̄ Alpe, ndi loo taā lambóó tə́, anī ədan na kə un gōn. Loo ń noō tə́ Lebi ḭḭ un gōn.

¹⁵ Dan ń Jeju ndi ta yá̰a̰ kəsa tə́ kem kújə yān tə́ ní, ngé taā lambóo gə̄ ngá̰ý ō, ngé rāā majaĺ gə̄ ngá̰ý ō, ndin̄ ta yá̰a̰ kəsa tə́ seneé, naā tə́ kə ngé ndóō yá̰a̰ yān gēé, tɔdɔ̄ nin̄ i ngá̰ý n a unən̄ gōn ní.

¹⁶ Ngé ndóō de gə̄ ndū najə̄ yā Parijiyḛ gə̄ a̰ā̰n̄ kadə̄ Jeju a əsa yá̰a̰ kə ngé rāā majaĺ gə̄ ō, kə ngé taā lambóo gə̄ ō anī, dəjen̄ ngé ndóō yá̰a̰ yān gə̄ na ké i tām̄ rí tə́ á a əsa yá̰a̰ kə ngé taā lambóo gə̄ ō, ngé rāā majaĺ gə̄ ō ní wa.

¹⁷ Loo ń Jeju oō beé anī ədadə́ na: I ngé rɔ̄ ngan̄g gə̄ n a sāān̄ nja doktór ní alé, ba i ngé rɔ̄ ngan̄g aĺ gə̄ n a sāān̄ njan ní.

Jeju ɔr̄ najə̄ kə́ dɔ ndi ɓō tə́ tām̄ yā Nə́ɓā tə́

¹⁸ Ndɔ̄ kógə̄ḿ tə́ anī ngé ndóō yá̰a̰ yā Ja̰a̰ gə̄ ō, Parijiyḛ gə̄ ō ń a ndin̄ ɓō tām̄ yā Nə́ɓā tə́ ní, reēn̄ rɔ̄ Jeju tə́ ədanən̄ na: I tām̄ rí tə́ á ngé ndóō yá̰a̰ yā Ja̰a̰ gə̄ ō, yā Parijiyḛ gə̄ ō, ndin̄ ɓō tām̄ yā Nə́ɓā tə́, ba ngé ndóō yá̰a̰ yāí gə̄ ndin̄ ɓō tām̄ yā Nə́ɓā tə́ aĺ ní?

¹⁹ Jeju tél ədadə́ na: Dan ń nga dəyá̰ ndiń kə madə̄n gēé ɓáý ní, a əya̰ madə̄n gə̄ ní kə ɓōó a? Ndɔ̄ gə̄ malang ń nga dəyá̰ i sedə́ ɓáý ní, nin̄ a asən̄ ndi ɓō tām̄ yā Nə́ɓā tə́ alé.

²⁰ Ndɔ̄ gə̄ a reēn̄ kadə̄ a ɔrə̄n̄ nga dəyá̰ dandə́ tə́ kɔ̄ɔ́ anī, dan ń noō tə́ ní nin̄ a ndin̄ ɓō tām̄ yā Nə́ɓā tə́ kem ndɔ̄ ń noō tə́ ɓáý.

²¹ De kə́ yā kənī kum ngísə kūbə̄ kə ta kūbə̄ kə́ kijií gətóo. Ré i beé anī, ta kūbə̄ kə́ kijə ń ənīn̄neé kum kə́ ngísə́ ní a rāā kadə̄ kum kūbə̄ a rə̄yā̰ mān̄ kə́ kété ɓáý.

²² Tá deē a ɓōkə́ kasə nduú kə́ tām̄ ngōn̄ kem sɔl kə́ lōō kɔ̄kə́ gə̄ tə́ aĺ ō. Ré ī-rāā beé anī, kasə a rāā sɔl gə̄ kadə̄ a ndūbə̄n̄ kɔ̄ɔ́, adə̄ loo ń noō tə́ ní, kasə ní ō, sɔl gə̄ ní ō, i yá̰á̰ kə́ ta tḭ̄ḭ̄ kɔ̄ɔ́ gə̄. Ba kasə nduú kə́ ngōn̄ tām̄ ní, majə kadə̄ ā ī-tūr̄ i kem sɔl kə́ kijə gə̄ tə́.

Jeju ō, ndɔ̄ Sabat ō

²³ Ndɔ̄ sabat kógə̄ḿ tə́ anī, Jeju a gān̄g kem ndɔr̄ nin̄ kə ngé ndóō yá̰a̰ yān gēé, ba dan ń a mānə̄n̄ ní anī ngé ndóō yá̰a̰ yān gə̄ tétə̄n̄ dɔ kōō dɔɔ́ dɔɔ́.

²⁴ Loo ń noō tə́ Parijiyḛ gə̄ ədan̄ Jeju na: Á̰a̰ā̰ tá, i tām̄ rí tə́ á nin̄ a rāān̄ yá̰á̰ ń ndū najə̄ yā Nə́ɓā ɔgə̄ rāā ndɔ̄ sabat tə́ ní?

²⁵ Anī Jeju ədadə́ na: Yá̰á̰ ń Dabid rāā dan ń ndoō ō, ɓō ō, rāānən̄ nin̄ kə madə̄n gēé ní, ī-tə́daī kem makətūbūú yḛtə aĺ bátə́ a?

²⁶ Ni udə kújə yā Nə́ɓā tə́, dan ń Abiatar i ngol ngé tun̄ yá̰a̰ gə̄ ní, anī ɔy mápa gə̄ ń ndējə̄n̄ Nə́ɓā ní əsa ō, adə̄ ngé gə̄ ń i seneé ní kadə̄ əsan̄ ō. Ba ni-rāā i yá̰á̰ kə́ i de kə́ nge tun̄ yá̰á̰ ngóy n asə rāā ní.

²⁷ Jeju tél ədadə́ ɓáý to̰ na: Nə́ɓā rāā ndɔ̄ sabat i tām̄ yā deē tə́, ba rāā deē i tām̄ yā ndɔ̄ sabat tə́ alé,

²⁸ adə̄ i tām̄ ń toō tə́ n Ngōn̄ Deē i kɔ́ɔ̄ ndɔ̄ sabat gə̄gē ní.