MARK 15 - Bibəl ta Sar̄

Jeju ra no Pilatə tə́

¹ Ngol gə̄ kə́ dɔ ngé tun̄ yá̰a̰ gə̄ tə́ ō, kum kɔɔ̄ gə̄ ō, ngé ndóō de gə̄ ndū najə̄ gə̄ ō, ngé sarya gə̄ malang ō, oōn̄ naā dəloí ɓatə, pá tá do̰ō̰n̄ Jeju kə kəlāá ba aw̄n̄ seneé, əlanən̄ jī Pilatə tə́.

² Pilatə dəjen najə̄ əda na: Ḭ̄ i mban̄g yā Jipə gə̄ a? Jeju tél ədan na: Īkɔ́ ə́dá ɓá.

³ Ngol gə̄ kə́ dɔ ngé tun̄ yá̰a̰ gə̄ tə́ tə́dan̄ najə̄ gə̄ ngá̰ý dɔn tə́.

⁴ Anī Pilatə dəjen ɓáý to̰ na: Ī-téĺ ə́da najə̄ kógə̄ḿ aĺ bátə́ a? Á̰a̰ najə̄ gə̄ malang ń ədan̄ dɔí tə́ ní!

⁵ Banī Jeju tél əda najə̄ to̰ alé, adə̄ ɔr kum Pilatə ngá̰ý.

Gāngə̄n̄ sarya yo dɔ Jeju tə́

⁶ Ngáńdáńg kə dɔ nāā Pákə gə̄ ní, Pilatə a ɔr̄ nge dəngáý kógə̄ḿ ń de gə̄ dəjenən̄ ní, a adə̄də́.

⁷ Deē kógə̄ḿ kə́ rīn na i Barabas to kújə dəngáyá. Əhɔnən̄ naā tə́ kə de kə́ ngé sə̄lā de gə̄ dɔ ngār tə́ gə̄ kə́ rɔ̄ɔ̄n̄ naā kem ɓēé, ba tɔ̄lə̄n̄ deē kógə̄ḿ loo rɔ̄ɔ̄ ní tə́.

⁸ Kósə de gə̄ reē dəjen̄ Pilatə yá̰á̰ ń ni a rāā tām̄ yādə́ tə́ ngándáńg ní.

⁹ Anī Pilatə tél ədadə́ na: Ī-gḛyiī kadə̄ m-ɔ̄r̄ mban̄g yā Jipə gə̄ m-ādə̄sí a?

¹⁰ Ni ger̄ majə kadə̄ ngol gə̄ kə́ dɔ ngé tun̄ yá̰a̰ gə̄ tə́ i nii n rāādə́ á nin̄-əlan̄ Jeju jīn tə́ ní.

¹¹ Banī ngol gə̄ kə́ dɔ ngé tun̄ yá̰a̰ gə̄ tə́ sə̄lān̄ kósə de gə̄ kadə̄ dəjen̄ kadə̄ Pilatə ɔr̄ Jeju dəngáyá adə̄də́ alé, ba kadə̄ ɔr̄ i Barabas tá.

¹² Pilatə un najə̄ ədadə́ ɓáý to̰ na: Tá, kə m̄-rāā i rí kə deē ń ī-ɓāŕniī na i mban̄g yā Jipə gə̄ ní?

¹³ Nin̄-əgan̄ kɔŕ ədan̄ na: Ə́ndan kə máyá̰ tū kāgə̄ kə́ dēsə́ tə́!

¹⁴ Pilatə tél ədadə́ na: Yá̰a̰ nəkɔ́ kə́ majaĺ ń ni-rāā ní i rí? Ba nin̄-əgan̄ kɔŕ tɔȳ kə́ kété ɓáý ədan̄ na: Ə́ndan kə máyá̰ tū kāgə̄ kə́ dēsə́ tə́!

¹⁵ Anī Pilatə ndigə rāā yá̰á̰ ń nel̄ kem kósə de gə̄ ní, adə̄ ɔr̄ Barabas dəngáyá adə̄də́, ba Jeju tá, adə̄ əndanən̄ kə mərawaá pá tá əlan jī de gə̄ tə́ kadə̄ əndanən̄ kə máyá̰ tū kāgə̄ kə́ dēsə́ tə́.

Áskar gə̄ lurən̄ Jeju

¹⁶ Áskar gə̄ aw̄n̄ seneé kem ndogə̄ kə́ gidə loo tə́ ń a rāān̄ sarya tū tə́ ní, ba ɓārə́n̄ ɓūtə̄ áskar gə̄ malang.

¹⁷ Əlan̄ kūbə̄ kə́ kərē ning rɔ̄n tə́ ō, sétə̄n̄ kōn̄ gə̄ rāān̄ jākā kə́ tītə̄ yā mban̄g gə̄ tə́, əlan̄ dɔn tə́ ō,

¹⁸ ba rāānən̄ lápə́ya, ədan̄ na: Lápə́ya, mban̄g yā Jipə gə̄!

¹⁹ Nin̄-əndan̄ dɔn kə tə̄ɓāá ō, tībə̄n̄ hōr̄ kumən tə́ ō, ɔsən̄ kejədə́ nang tə́ non tə́ ō, ba əlan̄ dɔdə́ nang tə́ non tə́.

²⁰ Dan ń mbóon̄ seneé oy anī, ɔrə̄n̄ kūbə̄ kə́ kərē ning ní rɔ̄n tə́ kɔ̄ɔ́, ba téĺ tə́lan̄ kūbə̄ yān gə̄ rɔ̄n tə́ gogə́. Gō tə́ anī teēn̄ seneé ndágá yā kaw̄ kəndan kə máyá̰ tū kāgə̄ kə́ dēsə́ tə́.

Əndan̄ Jeju kə máyá̰ tū kāgə̄ kə́ dēsə́ tə́

²¹ Simo̰ kə́ Siren ń, i bɔbə̄ Alekjandər ō, Rupus ō ní, ḭḭ ndɔrɔ́ a reē kə̄ ɓēé anī, ɔsən̄ seneé ta kətō kāgə̄ kə́ dēsə́ yā Jeju.

²² Aw̄n̄ kə Jejuú loo ń a ɓārə́n̄ na i Golgota ní tə́. Golgota ní, kumən na i kār̄ dɔ deē.

²³ Adə̄nən̄ kasə kə́ gurə́n̄ naā tə́ kə nō kāgə̄ mír, banī ni a̰ȳ alé.

²⁴ Əndanən̄ kə máyá̰ tū kāgə̄ kə́ dēsə́ tə́ ba túgə̄n̄ wə̄lā dɔ kūbə̄ yān gə̄ tə́ yā gerə̄ń dɔ deē ń wə̄lā əhɔ adə̄n ní, ba gō tə́ anī nin̄-nə̄ɓōn̄ naā kūbə̄ gə̄ ní.

²⁵ Dan ń əndanən̄ kə máyá̰ tū kāgə̄ kə́ dēsə́ tə́ ní i yḛŕ mbangāá.

²⁶ Ndangən̄ makətūbə̄ sarya ń gāngə̄n̄ dɔn tə́ ní əndān̄ dɔn tə́ dɔɔ́ na: I Mban̄g yā Jipə gə̄.

²⁷ Əndan̄ ngé gān̄g róbə gə̄ jōó kə máyá̰ tū kāgə̄ kə́ dēsə́ tə́ naā tə́ seneé, kógə̄ḿ i dɔ jī ko̰n tə́ ō, kógə̄ḿ i dɔ jī gelən tə́ ō.

²⁸ Najə̄ ń ndangən̄ kem makətūbə̄ yā Nə́ɓā tə́ na: Əlanən̄ dan ngé rāā yá̰a̰ majaĺ gə̄ tə́ ní, reē udə gírí i tītə̄ ń noō.

²⁹ Ngé mān̄ róbə gə̄ ɔrə̄n̄ najə̄ kə́ to ngonjə̄ gə̄ dɔn tə́ ō, tə́gān̄ dɔdə́ nek nek ō, ba ədan̄ na: Ḭ̄ ń ī-sāā tɔ̄ɔ̄ kújə́ yā Kɔ́ɔ̄ɓē kɔ̄ɔ́ ba tél rāā rang kem ndɔ̄ mətá ní,

³⁰ īkɔ́ ájə rɔ̄í, ba ī-risə kɔ̄ɔ́ dɔ kāgə̄ kə́ dēsə́ tə́ tā!

³¹ Ngol gə̄ kə́ dɔ ngé tun̄ yá̰a̰ gə̄ tə́ naā tə́ kə ngé ndóō de gə̄ ndū najə̄ gə̄ lúrnən̄ dɔn tə́ tītə̄ ń noō ō, ədan̄ na: Ee, ni-ajə de kə́ rang gə̄, banī asə kajə rɔ̄n nəkɔ́ alé!

³² Ādə̄ Kərist ń i mban̄g kə́ Israel tə́ ní risə kɔ̄ɔ́ dɔ kāgə̄ kə́ dēsə́ tə́ ngɔr ń toō tə́ ādə̄ j-a̰a̰ī ba jə-taāī kemən. Ngé gə̄ ń əndan̄də́ kə máyá̰ tū kāgə̄ kə́ dēsə́ tə́ naā tə́ seneé ní, tájə̄nən̄ ō.

Jeju oy

³³ Loo ń mbang i dan ɓēé ní, loo gān̄g tíbə ripə, adə̄ loo kə́ risə til taā loo dɔ nang tə́ malang, bátə́ ugə̄ń mbang kə́ mətá kə́ loo sɔlí tə́.

³⁴ Ugə̄ kum mbang kə́ mətá kə́ loo sɔlí tə́ anī, Jeju əga kɔŕ ngá̰ý əda na: Eloi, Eloi, lama sabaktani? Kumən na i Nə́ɓā yāḿ, Nə́ɓā yāḿ, ə́ya̰m̄ kɔ̄ɔ́ i tām̄ rí tə́?

³⁵ De kə́rēý gə̄ dan ngé gə̄ ń ran̄ noō tə́ á oōn̄ najə̄ ní ədan̄ na: Ōōī tá, ni-ɓāŕ Eli.

³⁶ Deē kógə̄ḿ a̰ȳ ngɔ̄də̄, un yá̰á̰ kə́ tītə̄ ndɔkə́rɔ, əla kum kasə kə́ masə̄ tə́, do̰ō̰ ta tə̄ɓā tə́, əla adə̄n kadə̄ njíbə̄, ba əda na: Ī-raī ɓam, ādə̄ j-a̰a̰ī ké Eli a reē yā kɔrə̄n kɔ̄ɔ́ tū kāgə̄ kə́ dēsə́ tə́ wa.

³⁷ Jeju əga kɔŕ ngá̰ý, ba əhɔ tan kə̄ naā tə́.

³⁸ Anī kūbə̄ ń gāngə̄n̄neé kem kújə́ yā Kɔ́ɔ̄ɓē ní rə̄yā̰ naā tə́ jōó, ḭḭ dɔɔ́ bátə́ ugə̄ nang tə́.

³⁹ Dan ń ngol áskar gə̄ ń ra non tə́ ní a̰ā̰ kadə̄ əhɔ tan kə̄ naā tə́ i tītə̄ ń noō anī, əda na: Deē ń toō i Ngōn̄ Nə́ɓā rɔ̄kum!

⁴⁰ Dəyá̰ kə́rēý gə̄ ran̄ dan sa̰y sḛ́ý a a̰a̰n̄neé loo. Mari kə́ Magədala ō, Mari kó̰o̰ Jakə kə́ dūú ō, Jose ō, Salome ō, i dan dəyá̰ gə̄ ní tə́.

⁴¹ Dan ń Jeju i Galile ní, nin̄-unən̄ gōn ba rāān̄ kəla adə̄nən̄ ō. Dəyá̰ kə́ rang gə̄ ngá̰ý kə́ aw̄n̄ seneé Jerusalem ran̄ noó ō.

Dubə̄n̄ Jeju

⁴² I ndɔ̄ ń a rāān̄neé loo yá̰a̰ gə̄ yā kán̄ kəndā ní, tɔdɔ̄ i ndɔ̄ kə́ kété no ndɔ̄ sabat tə́. Adə̄ dan ń loo sɔl̄ kɔ̄ɔ́ anī,

⁴³ Jəjep kə́ Arimate əre wurən njam, ba aw̄ rɔ̄ Pilatə tə́, dəjen na kə adə̄n nīń Jeju. Jəjep ní, i deē kógə̄ḿ kə́ dan ngé sarya kə́ bo gə̄ tə́, kə́ de gə̄ rɔȳnən̄. Ba ni i nge ngóō ta reē Ɓē ko̰o̰ yā Nə́ɓā ō.

⁴⁴ Loo ń Pilatə oō na Jeju oy kɔ̄ɔ́ anī, ɔr kumən ngá̰ý. Adə̄ ɓāŕ ngol áskar gə̄, dəjen na ké Jeju oy i jóo wa.

⁴⁵ Dan ń ni-oō najə̄ yā ngol áskar gə̄ anī, adə̄ Jəjep nīń Jeju.

⁴⁶ Jəjep mang kūbə̄ yo, ba ɔr̄ nīń Jeju kɔ̄ɔ́ tū kāgə̄ kə́ dēsə́ tə́, ɓírə̄n kə kūbūú, ba ənīn bəlo yo kə́ rāān̄ kem mbal̄ tə́. Gō tə́ anī ndūbə̄rū mbal̄ kógə̄ḿ, əndā ta bəlo yo ní tə́.

⁴⁷ Mari kə́ Magədala ō, Mari kə́ kó̰o̰ Jose ō, a̰a̰n̄ loo ń ənīn̄ Jeju tū tə́ ní.