MARK 14 - Bibəl ta Sar̄

Ngār gə̄ oōn̄ naā dɔ Jeju tə́ yā tɔ̄lə̄n

¹ Na̰y ndɔ̄ jōó kadə̄ i nāā Pákə ō, nāā kəsa mápa kanjə̄ kaa mápa ō. Ngol gə̄ kə́ dɔ ngé tun̄ yá̰a̰ gə̄ tə́ kə ngé ndóō de gə̄ ndū najə̄ gə̄

² sāān̄ kəhɔ Jeju kə ngamaá yā tɔ̄lən. Tɔdɔ̄ nin̄-ədan̄ na kə n-əhɔnən̄ ndɔ̄ rāā nāā tə́ alé, na sōgə́ kɔ̄l̄ naā ḭḭ dan de gə̄ tə́.

Dəyá̰ kógə̄ḿ rāā ítər dɔ Jeju tə́

³ Jeju i Betani kem kújə yā Simo̰ nge bānjə̄ tə́. Ba dan ń ndi ta yá̰a̰ kəsa tə́ anī, dəyá̰ kógə̄ḿ reē kə ítər kə́ rāān̄ kə mu náŕ kə́ unjə̄ njáý njáý, kə́ gātə̄n i ngá̰ý, kem kū mbal̄ albatər tə́. Ni tɔ̄ɔ̄ ta kū ní ba kəjā ítər ní dɔ Jeju tə́.

⁴ Banī wōn̄g rāā de kə́rēý gə̄ ń ndin̄ noó ní, adə̄ ɔrə̄n̄ najə̄ dɔ dáńdə́ tə́, ədan̄ na: I tām̄ rí tə́ á a nujə ítər ń toō beé ní?

⁵ Nə́ngētə́ igən̄ ítər ń toō anī, a əngen̄ narən asə gúrsə dūbú kutə yā rāań kə ngé ndoō gēé. Adə̄ wōn̄g rāādə́ seneé ngá̰ý.

⁶ Banī Jeju ədadə́ na: Əya̰niī. Ā ī-njə́ɓāniī i tām̄ rí tə́? Ni-rāā i kəla kə́ majə tām̄ yāḿ tə́.

⁷ Tɔdɔ̄ ngé ndoō gə̄ i sesí kə ndɔ̄ gə̄, adə̄ sḭḭ̄ ā ásiī rāā majə sedə́ dan ń kemsí ndigə ní, ba mā i sesí kə ndɔ̄ gə̄ alé.

⁸ Dəyá̰ ń toō rāā i yá̰á̰ ń ni-asə rāā ní, kəjā ítər rɔ̄ḿ tə́ kété ta kadə̄ dubə̄mə̄n̄.

⁹ Ādə̄ m-ə́dásí najə̄ kə́ bo ngá̰ý, loo malang ń a ənīn̄ mbēr̄ Najə̄ kə́ Majə tū tə́ dɔ nang tə́ laā ní, a ɔrə̄n̄ najə̄ yá̰á̰ ń dəyá̰ ń toō rāā ní ō, kadə̄ əgań kem de gə̄ dɔn tə́.

Judas ndigə kəla Jeju jī ngol ngé tun̄ yá̰a̰ gə̄ tə́

¹⁰ Anī Judas Iskariot ń i nge kə́ kógə̄ḿ kə́ dan ngé kə́ kutə gidə i jōó gə̄ tə́ ní, aw̄ rɔ̄ ngol gə̄ kə́ dɔ ngé tun̄ yá̰a̰ gə̄ tə́ tə́ kadə̄ əla Jeju jīdə́ tə́.

¹¹ Dan ń nin̄-oōn̄ beé anī, rɔ̄də́ nel̄də́ ngá̰ý dɔ tə́, ba ənīn̄ míndə́də́ yā kadə̄n nar. Ba ni sāā ndɔ̄ kə́ majə yā kəlań Jeju jīdə́ tə́.

Jeju əsa yá̰á̰ Pákə naā tə́ kə ngé ndóō yá̰a̰ yān gēé

¹² Ndɔ̄ kə́ ta kəga dɔ yā mápa kə́ kanjə̄ kaa mápá ń kadə̄ a ɔlən̄neé míndə ngōn̄ batə̄ Pákə ní, ngé ndóō yá̰a̰ yān gə̄ ədanən̄ na: Ī-gḛy kadə̄ j-aw̄ jə-rāā loo i rá n kadə̄ ə́sań yá̰a̰ yā nāā Pákə ní?

¹³ Ni-əla ngé ndóō yá̰a̰ yān gə̄ jōó, ba ədadə́ na: Āwī kem ɓēé, dəngam kógə̄ḿ kə́ ətō jóo man̄ bɔ̄gə̄n tə́ a dərāsí róbó.

¹⁴ Úniī gōn, ba loo ń ni a udə tū tə́ ní anī, ə́daī kɔ́ɔ̄ kújə na ngolsí na kə ī-dəjeniī ké kújə yān ń kadə̄ na n-əsa yá̰a̰ Pákə tū tə́ kə ngé ndóō yá̰a̰ yān gēé ní ké i rá wa.

¹⁵ Anī kɔ́ɔ̄ kújə ní a ɔjəsí kem kújə́ kə́ dɔɔ́ kógə̄ḿ kə́ bo, kə́ tə́nīn̄ yá̰a̰ taā gír dɔ gə̄ kemeé, kə́ rāān̄ kə yá̰a̰ gə̄ malang kɔ̄ɔ́. Ī-rāāī loo yá̰a̰ nāā Pákə gə̄ kemeé tām̄ yājí tə́.

¹⁶ Ngé ndóō yá̰a̰ gə̄ ní aw̄n̄, ugə̄n̄ kem ɓēé, anī əngen̄ yá̰a̰ malang tītə̄ ń ni-ədańdə́ ní, adə̄ rāān̄ loo yá̰a̰ nāā Pákə tū tə́.

¹⁷ Loo sɔlí anī Jeju reē kə ngé kə́ kutə gidə i jōó gə̄ ní.

¹⁸ Dan ń nin̄-ndin̄ ta yá̰a̰ kəsa tə́ ba əsan̄ yá̰á̰ anī, Jeju əda na: Ādə̄ m-ə́dásí najə̄ kə́ bo ngá̰ý, deē kógə̄ḿ dansí tə́ kə́ əsa yá̰a̰ seḿ a əlam̄ jī de gə̄ tə́.

¹⁹ Najə̄ ní tōr̄ kemdə́, adə̄ nin̄-dəjen̄ kə dɔdə́ gēé na: I mā a?

²⁰ Ni ədadə́ na: I kə́ kógə̄ḿ dan kə́ kutə gidə i jōó gə̄ tə́, i nge ń əla jīn kārāá seḿ ní.

²¹ Ngōn̄ Deē a aw̄ tītə̄ ń ndangən̄neé dɔn tə́ kem makətūbūú ní, ba deē ń a əla Ngōn̄ Deē jī de gə̄ tə́ ní tá, rɔ̄ tō ndoō i yān. Kojə deē ń noō aĺ i só tə́.

Yá̰a̰ kəsa kə́ táĺ

²² Dan ń a əsan̄ yá̰á̰ anī Jeju un mápa, ndadə̄ Nə́ɓā dɔ tə́ ō, tétə̄ naā tə́ ō, ba adə̄də́, əda na: Ī-taāī, nge ń toō i rɔ̄ḿ.

²³ Gō tə́ anī un kópə, ndadə̄ Nə́ɓā dɔ tə́, ba adə̄də́, adə̄ nin̄ malang a̰ȳn̄.

²⁴ Ni ədadə́ na: Nge ń toō i mósə́ḿ, i mósə madə̄ naā ń Nə́ɓā əhɔ sesí ní. I mósə́ kə́ ɓōkə́ nang tə́ tām̄ yā kósə de kə́ ngá̰ý gə̄ tə́ ō.

²⁵ Ādə̄ m-ə́dásí najə̄ kə́ bo ngá̰ý, m-ā m-ā̰ȳ kasə nduú to̰ aĺ bátə́ ndɔ̄ ń m-ā m-ā̰ȳ kə́ kijə kem Ɓē ko̰o̰ yā Nə́ɓā tə́ ní.

²⁶ Ənīn̄ pā gə̄ kə́ yā tɔ̄yń Nə́ɓā, pá tá teē aw̄n̄ dɔ mbal̄ kāgə̄ olibə gə̄ tə́.

Jeju tāā Piyer na a nējə̄ najə̄

²⁷ Jeju ədadə́ na: Sḭḭ̄ malang ā ə́ya̰mī kɔ̄ɔ́, tɔdɔ̄ i kə́ ndang kem makətūbūú na: M-ā m-ə́nda nge kul̄ batə̄ gə̄, anī ɓūtə̄ batə̄ gə̄ a tḭ̄ḭ̄n̄ naā kə̄ loo gə̄ tə́.

²⁸ Ba gō tə́ dan ń m̄-ndól̄ anī, m-ā m-āw̄ Galile kété nosí tə́.

²⁹ Piyer ədan: Ré nin̄ malang a əsōn̄ gə̄gē anī, mā m-ā m-ə̄sō alé.

³⁰ Ba Jeju tél ədan na: Ādə̄ m-ə́daī najə̄ kə́ bo ngá̰ý, ndɔ̄ɔ́ ɓōólaā nəkɔ́ ń toō, kété pá tá kadə̄ kə́ra kə̄njá nōō nja jōó ní, ā ī-nējə̄ nja mətá ə́da na ī-gerə̄m̄ alé.

³¹ Banī Piyer əda kə tɔ́gəneé tɔȳ kə́ kété, əda na: Ré i kadə̄ m-óy seí gə̄gē anī, m-ā m̄-nējə̄ m-ə́da na m̄-gerī aĺ aĺ bátə́! Nin̄ malang ədan̄ tītə̄ ń noō ō.

Jeju ndɔ̄ȳ kem ndɔr̄ kə́ Jetəsemani tə́

³² Ba nin̄-aw̄n̄ kem ndɔr̄ kógə̄ḿ kə́ rīn na i Jetəsemani tə́. Jeju əda ngé ndóō yá̰a̰ yān gə̄ na: Ī-ndiī laā dan ń m-ā m̄-ndɔ̄ȳ ní.

³³ Ni ɓār̄ Piyer ō, Jakə ō, Ja̰a̰ ō, kadə̄ aw̄n̄ seneé.

³⁴ Anī ɓōĺ əla gír rāān ō, ni-sōl̄ ō, ba ni-ədadə́ na: Rɔ̄ḿ nelə̄m̄ aĺ tītə̄ kə́ yā kadə̄ m-óy kɔ̄ɔ́ beē, ī-ndiī laā kə kumsí njáý njáý.

³⁵ Ni-aw̄ dan sa̰y sḛ́ý anī, ɔsə non nang tə́ ba ndɔ̄ȳ kadə̄ kum mbang yá̰á̰ kə́ tōr̄ ń noō teē dɔn tə́ alé.

³⁶ Ni-əda na: Aba, Bɔbə́ḿ, ḭ̄ ásə rāā yá̰a̰ malang, úń kópə́ ń toō dɔḿ tə́ kɔ̄ɔ́. Banī kadə̄ i kə gō kem ndigə yāḿ alé, ba kadə̄ i kə gō kem ndigə yāí ḭ̄ kɔ́ tá.

³⁷ Ni-reē kə̄ rɔ̄ ngé kə́ mətá gə̄ tə́ ba əngedə́ a ɓīīn̄ i mbée anī, əda Piyer na: Simo̰, ī-ɓīī a? Ásə ndi kə kumií njáý njáý mbang kógə̄ḿ aĺ a?

³⁸ Ī-lōōī ɓīī, ba ī-ndɔ̄yī tá kadə̄ údiīneé dan yá̰a̰ gə̄ ń a nāān̄sí kadə̄ ə̄sōī tə́ ní alé. Tɔdɔ̄ ndíl deē ndigə rāā yá̰á̰ kə́ majə, ba dā̰ rɔ̄ deē ngan̄g alé.

³⁹ Ni-tél ɔr̄ rɔ̄n kə̄ gogə́ sa̰y, ba ndɔ̄ȳ, əda najə̄ gə̄ nəkɔ́ ń kété ní ɓáý.

⁴⁰ Ni-tél reē rɔ̄də́ tə́ ɓáý to̰, ba əngedə́ a ɓīīn̄ i mbée, tɔdɔ̄ kumdə́ i kə ɓīí likəti ngá̰ý, adə̄ gerə̄n̄ najə̄ kə́ yā kədan alé.

⁴¹ Ni-tél reē nja kə́ nge ko̰ mətá, ba ədadə́ na: Ngɔlaā ní ī-ɓīī ō, ī-taāī koō ō! Asə tā! Kum mbang asə kɔ̄ɔ́. Á̰a̰ī, a əlan̄ Ngōn̄ Deē jī de kə́ ngé rāā yá̰a̰ majaĺ gə̄ tə́.

⁴² Ḭ́ḭī dɔɔ́, j-awī! Á̰a̰ī nge kəlam̄ jī de gə̄ tə́ ugə̄ kɔ̄ɔ́.

Əhɔn̄ Jeju

⁴³ Kə̄ ta jī tə́ noō, dan ń ni a ɔr̄ najə̄ kə̄ tan tə́ ɓáý anī, Judas ń i nge kə́ kógə̄ḿ kə́ dan ngé kə́ kutə gidə i jōó gə̄ tə́ ní, ugə̄ kə kósə de gə̄ kə́ ngá̰ý, kə́ ngol gə̄ kə́ dɔ ngé tun̄ yá̰a̰ gə̄ tə́ ō, ngé ndóō de gə̄ ndū najə̄ gə̄ ō, kum kɔɔ̄ gə̄ ō, əlan̄də́. Reēn̄ kə kaskar gə̄ ō, kə sálang gə̄ ō.

⁴⁴ Nge ń a rāā yā kəla Jeju jīdə́ tə́ ní ɔjədə́ yá̰á̰ kógə̄ḿ kadə̄ ger̄nən̄neé, əda na: Deē ń m-ā m̄-ɓírən kə̄ rɔ̄ḿ tə́ dagə ní i deē ń noō bang, adə̄ ə́hɔniī ba ə̄ndāī kumsí gōn tə́ majə āwī seneé.

⁴⁵ Loo ń ni-ugə̄ ní, ni-mān̄ gandang kə̄ rɔ̄ Jeju tə́, ba ədan na: Ngoljí! Ba ni-ɓirə̄n kə̄ rɔ̄n tə́ dagə.

⁴⁶ Adə̄ de gə̄ ń Judas reē sedə́ ní tetən̄ jīdə́ dɔn tə́ əhɔnən̄.

⁴⁷ Deē kógə̄ḿ dan ngé gə̄ ń ran̄ noō tə́ ní ɔr̄ kaskar yān, əgań mbī pajā yā ngol ngé tun̄ yá̰a̰ gə̄ gān̄g.

⁴⁸ Jeju ədadə́ na: Ī-reēī kə kaskar gə̄ ō, kə sálang gə̄ ō, yā kəhɔm̄ń tītə̄ loo kəhɔ nge gān̄g róbə́ kógə̄ḿ.

⁴⁹ Kə ndɔ̄ gə̄ m̄-ndi dansí tə́ kem kújə yā Kɔ́ɔ̄ɓē tə́, m̄-ndóoń de gə̄ yá̰a̰, ba ə́hɔmī alé. Banī gáŕ kadə̄ najə̄ gə̄ ń ndangən̄ kem makətūbə̄ yā Nə́ɓā tə́ ní reē udən̄ gírí.

⁵⁰ Dan ń noō tə́ ní, deē yān gə̄ əya̰nən̄ ba a̰ȳn̄ naā malang kɔ̄ɔ́.

⁵¹ Balsáá kógə̄ḿ un gōn, rɔ̄n i karī ba ni-seĺ i kūbə̄ ngóy dɔn tə́.

⁵² Əhɔnən̄ anī ni-əya̰ kūbə̄ ní kə̄ jīdə́ tə́, ba ɔtə a̰ȳ rɔ̄n karī.

Aw̄n̄ kə Jeju no ngé sarya kə́ bo gə̄ tə́

⁵³ Tā anī, aw̄n̄ kə Jeju rɔ̄ ngol ngé tun̄ yá̰a̰ gə̄ tə́. Ngol gə̄ kə́ dɔ ngé tun̄ yá̰a̰ gə̄ tə́ malang ō, kum kɔɔ̄ gə̄ ō, ngé ndóō de gə̄ ndū najə̄ gə̄ ō, kánə̄n̄ naā loo ní tə́.

⁵⁴ Piyer un gōn, ba dandə́ gə̄lā sḛ́ý. Ni udə ndogó ɓē ngol ngé tun̄ yá̰a̰ gēé, ba ndi nang tə́ kə pajā gēé ta hor tə́ a ndíbə̄ hor.

⁵⁵ Ngol gə̄ kə́ dɔ ngé tun̄ yá̰a̰ gə̄ tə́ ō, ngé sarya kə́ bo gə̄ malang ō, sāān̄ najə̄ kə́ kum tə́ dɔ Jeju tə́ yā tɔ̄l̄nəń, ba əngen̄ alé.

⁵⁶ Tɔdɔ̄ de gə̄ ngá̰ý tə́dan̄ najə̄ kə́ kum tə́ kə́ sor̄ gə̄ dɔn tə́, ba najə̄ kə́ kum tə́ yādə́ gə̄ əsō gō naā tə́ alé.

⁵⁷ Banī de kə́rēý gə̄ ḭḭn̄ dɔɔ́, ədan̄ najə̄ kə́ sor̄ dɔn tə́ ədan̄ na:

⁵⁸ Jḭḭ j-oō kadə̄ əda na kújə yā Kɔ́ɔ̄ɓē ń toō ń de gə̄ rāān̄ kə jīdə́ ní, n-a n-tɔ̄ɔ̄ kɔ̄ɔ́ ba kem ndɔ̄ mətá anī, n-a n-rāā kə́ rang kə́ deē rāā kə jīneé alé.

⁵⁹ Ɓá tā ba najə̄ kə́ kum tə́ yādə́ əsō gō naā tə́ alé.

⁶⁰ Anī ngol ngé tun̄ yá̰a̰ gə̄ ḭḭ ra dɔɔ́ dɔ dáń ngé kán̄ naā gə̄ tə́, ba dəje Jeju na: Najə̄ ń de kə́ kum yá̰á̰ tə́ gə̄ ədan̄ dɔí tə́ toō ā ī-dal aĺ a?

⁶¹ Jeju tél ədadə́ najə̄ alé, ba ndi kə tan kə́ mbóó. Anī ngol ngé tun̄ yá̰a̰ gə̄ dəjen najə̄ ɓáý to̰, ədan na: Ḭ̄ i Kərist, Ngōn̄ Nge ń de gə̄ a rɔȳnən̄ ní a?

⁶² Jeju tél ədan na: Mā i ni, ba sḭḭ̄ ā á̰a̰ī Ngōn̄ Deē a ndi dɔ jī ko̰ Nə́ɓā kə́ bo kə́ tɔ́gən i ngá̰ý tə́ ō, a reē kə kil̄ man̄ kə́ no rā̰ tə́ ō.

⁶³ Anī ngol ngé tun̄ yá̰a̰ gə̄ rə̄yā̰ kūbə̄ rɔ̄n tə́ kɔ̄ɔ́, ba əda na: Kə jə-sāāī najə̄ yā de kə́ kum tə́ gə̄ ɓáý a?

⁶⁴ Sḭḭ̄ ōōī najə̄ ń ni-əda ní: I najə̄ kə́ to ngonjə̄ dɔ Nge ń de gə̄ a rɔȳnən̄ ní. Ta kumsí tə́ ní najə̄ ń noō to i ba̰ý? Nin̄ malang gāngə̄n̄ sarya dɔn tə́ ədan̄ na asə kadə̄ oy.

⁶⁵ Anī de kə́rēý gə̄ əlan̄ gír tībə̄ hōr̄ dɔn tə́, ənīn̄ kūbə̄ kumən tə́, tɔ́sə̄n̄ mbɔ́rən, ba ədanən̄ na ḭ̄ na i nge koō ta ní, ə́da dɔ deē ń rāāī yá̰á̰ ń noō ní!

Piyer nējə̄ nja mətá na n-ger̄ Jeju alé

⁶⁶ Piyer ndi ndágá kem ndogó anī, nge kəla kə́ dəyá̰ kógə̄ḿ yā ngol ngé tun̄ yá̰a̰ gə̄ reē.

⁶⁷ Ni-a̰a̰ Piyer ndi a ndíbə̄ hor anī, əndā kumən dɔn tə́ ba əda na: Ḭ̄ i kə Jeju kə́ Najaret ō!

⁶⁸ Ba ni-nējə̄, əda na: m̄-ger̄ alé, m̄-ger̄ kum najə̄ ń ə́da toó alé. Ba ni-teē aw̄ ta ɓē tə́ ndágá, anī kə́ra kə̄njá nōō.

⁶⁹ Nge kəla ní a̰a̰n, ba əda de gə̄ ń ndin̄ rɔ̄n tə́ ní ɓáý to̰ na: Deē ń noō i kógə̄ḿ yādə́!

⁷⁰ Ba ni-nējə̄ ɓáý to̰. Gō tə́ sḛ́ý anī, de gə̄ ń ndin̄ rɔ̄ Piyer tə́ ní ədanən̄ to̰ na: Ḭ̄ i deē kógə̄ḿ kə́ dandə́ tə́ rɔ̄kum, tɔdɔ̄ ḭ̄ i de kə́ Galile!

⁷¹ Anī Piyer əla gíŕ tə́da najə̄ kə́ ngan̄g ngan̄g gə̄ túbəń kə rɔ̄neé ba əda na n-ger̄ deē ń ɔrə̄n̄ najə̄ yān noó alé.

⁷² Kə̄ ta jī tə́ noō kə́ra kə̄njá nōō nja kə́ nge ko̰ jōó. Loo ń noō tə́ əga kem Piyer dɔ najə̄ ń Jeju ədan kété tə́ ní, ədan na: Ḭ̄ ā ī-nējə̄ najə̄, ā ə́da na ī-gerə̄m̄ aĺ nja mətá pá tá kə́ra kə̄njá a nōō nja jōó ní. Anī ni-teē ndágá láẃ ba nōō.