MARK 13 - Bibəl ta Sar̄

Jeju əda na a nujən̄ kújə yā Kɔ́ɔ̄ɓē

¹ Dan ń Jeju teē kɔ̄ɔ́ kem kújə yā Kɔ́ɔ̄ɓē tə́ anī, nge ndóō yá̰a̰ yān kógə̄ḿ ədan na: Ngoljí, á̰a̰ mbal̄ gə̄ ń de gə̄ tə́ndān̄ dɔ naā tə́ toō ō, kújə gə̄ ń nin̄-rāān̄ ní ō, majən̄ ngá̰ý aĺ a?

² Jeju tél ədan na: Á̰á̰ kújə́ kə́ bo gə̄ ń toō a? A tɔ̄ɔ̄n̄də́ malang nang tə́ kɔ̄ɔ́, mbal̄ kógə̄ḿ kə́ a ndi dɔ madə̄ tə́ a gətóo.

Yá̰á̰ kə́ to rɔ̄ ndoō gə̄ ō, rāā naā ndoō tə́ ō

³ Loo ń ni-ndi dɔ mbal̄ kāgə̄ olibə gə̄ tə́ kumən sɔɔ̄ kújə yā Kɔ́ɔ̄ɓē anī, Piyer ō Jakə ō Ja̰a̰ ō Andəre ō ń i nin̄ ngóy n i seneé ní, dəjenən̄ na:

⁴ Ə́dájí i ndɔ̄ kə́ rá tə́ n yá̰a̰ gə̄ ń noō a reēn̄neé ní? I yá̰á̰ kɔjə kə́ ba̰ý n a ɔjə kadə̄ yá̰a̰ gə̄ ń noō malang a reēn̄ ní?

⁵ Anī Jeju əla gír kədadə́ na: Ādə̄ kumsí ngan̄g, ba ī-lōōī kadə̄ deē gól̄sí.

⁶ Tɔdɔ̄ de gə̄ ngá̰ý a unən̄ rīḿ yā reēń ba kəda na i mā, adə̄ a gólə̄n̄ de gə̄ ngá̰ý.

⁷ Loo ń ā ōōī kōō de gə̄ kə́ a rɔ̄ɔ̄n̄ naā ō, kə́ a sāān̄ rɔ̄ɔ̄ naā ɓáý ō anī, ādə̄ ɓōĺ rāāsí alé, tām̄ i gáŕ kadə̄ yá̰a̰ gə̄ ń noō rāān̄ yá̰a̰, banī i ta ngóy ndɔ̄ gə̄ aĺ ɓáý.

⁸ Tɔdɔ̄ nápar de gə̄ a ḭḭn̄ rɔ̄ɔ̄ dɔɔ́ kə nápar de kə́ rang gēé ō, gír ɓē ko̰o̰ gə̄ a ḭḭn̄ rɔ̄ɔ̄ dɔɔ́ kə gír ɓē ko̰o̰ kə́ rang gēé ō, dɔ nang a yéȳ kə̄ loo gə̄ tə́ ō, ɓō a əsō loo tə́ ō. I tītə̄ ta kəla gír ko̰y yā dəyá̰ kə́ nge rāā kem.

⁹ Banī ādə̄ kumsí ngan̄g tɔdɔ̄ de gə̄ a əlan̄sí jī ngé rāā sarya gə̄ tə́ ō, a tə̄ndān̄sí kem kújə́ kán̄ naā gə̄ tə́ ō, a aw̄n̄ sesí kadə̄ ī-raī no ngé ko̰o̰ ɓē gə̄ tə́ ō, najə̄ yāḿ mā tə́. Loo ń noō tə́ ā ə́daī najə̄ kə́ kum tə́ kadə̄ oōn̄.

¹⁰ I gáŕ kadə̄ a ənīn̄ mbēr̄ Najə̄ kə́ Majə ədan̄ nápar de gə̄ malang kété pá tá.

¹¹ Loo ń a aw̄n̄ sesí yā kəlasí jī ngé sarya gə̄ tə́ anī, ī-lōōī sōl̄ kəda kemsí tə́ kété na ké ā ə́daī na i rí wa. Kum mbang nəkɔ́ ń noō tə́ ní, i sḭḭ̄ n ā ɔ̄rī najə̄ alé, banī i Ndíĺ kə́ Táĺ.

¹² De kə́rēý gə̄ a əlan̄ ngákó̰ó̰də́ gə̄ ta yo tə́ ō, bɔbə̄ ngán gə̄ a rāān̄ beé kə ngáńdə́ gēé ō. Ngé kə́rēý gə̄ a ḭḭn̄ yā mbātə́ bɔbə̄də́ gə̄ kə kó̰ó̰də́ gə̄ ō, a əlan̄də́ ta yo tə́ ō.

¹³ De gə̄ malang a imə̄n̄sí tām̄ yā rīḿ tə́, banī deē n a əhɔ sásáp mbóńg ta tɔ̄l̄ ta tə́ ní, a ajə.

Yá̰á̰ kə́ majaĺ ngá̰ý ń a reē ní

¹⁴ Dan ń ā á̰a̰ī yá̰á̰ kə́ majaĺ kə́ to yḛr kum ndi loo ń sɔɔ̄ kadə̄ ni-ndi tū tə́ aĺ ní anī, ādə̄ nge ń tə́da najə̄ kə́ kem makətūbə̄ ń toō tə́ ní ger̄ kum. Ndɔ̄ ń noō tə́ ní, ādə̄ ngé gə̄ ń nin̄ i gō nang kə́ Jude tə́ ní, a̰ȳn̄ naā kə̄ dɔ mbal̄ gə̄ tə́ kɔ̄ɔ́ ō,

¹⁵ nge ń ndi dɔ kújú dɔɔ́ ní, ādə̄ kə risə yā kudə kun yá̰á̰ kógə̄ḿ kem kújə yān tə́ aĺ ō,

¹⁶ nge ń ndi ndɔrɔ́ ní, ādə̄ tél aw̄ ɓēé gogə́ kun kūbə̄ yān tə́ aĺ ō.

¹⁷ Kem ndɔ̄ gə̄ ngeé ń noō tə́ ní, rɔ̄ ndoō i kə kó kem gēé ō, kə dəyá̰ gə̄ ń ngáń kə́ ta mba tə́ gə̄ i jīdə́ tə́ ō ní.

¹⁸ Ī-ndɔ̄yī tá kadə̄ yá̰a̰ gə̄ ń noō ugə̄n̄ nāā kūl̄ tə́ alé.

¹⁹ Tɔdɔ̄ wur de gə̄ a ɔldə́ ngá̰ý, wur kɔl kə́ tītə̄ń noō gətóo ta kəla gír dɔ rā̰ ō dɔ nang ō, dan ń Nə́ɓā əlań gír kəndā yá̰a̰ gə̄ malang ní tə́, bátə́ ngɔlaā ń toō tə́ ō, a to gogə́ to̰ aĺ ō.

²⁰ Ba ré Kɔ́ɔ̄ɓē gān̄g ta ndɔ̄ gə̄ ní aĺ anī, de kə́ yā kajə a gətóo. Banī i tām̄ yā ngé gə̄ ń ni-gə̄rādə́ tə́ ní n ni a gāngəń ta ndɔ̄ gə̄ ń noō ní.

²¹ Kem ndɔ̄ gə̄ ngeé ń noō tə́ ní, ré de kə́rēý ədasí na Kərist na i laā, aláa ni na i nú anī, ī-lōōī taā kemən.

²² Tām̄ Kərist kə́ rɔ̄kum aĺ gə̄ ō, ngé koō ta kə́ rɔ̄kum aĺ gə̄ ō, a ḭḭn̄, ba a rāān̄ yá̰á̰ kə́ to kɔr kum gə̄ ō, yá̰á̰ kə́ yáā gə̄ ō, yā góləń ngé gə̄ ń Nə́ɓā gə̄rādə́ ní gə̄gē.

²³ Banī sḭḭ̄ ə̄ndāī kum kedə̄ dɔ rɔ̄sí tə́, tɔdɔ̄ yá̰a̰ malang ń a reē ní, m̄-tāāsí kété kɔ̄ɔ́.

Ta reē Ngōn̄ Deē

²⁴ Banī kem ndɔ̄ gə̄ ngeé ń noō tə́ ní, gō wur kɔl ń noō tə́ ní, mbang a ndul ō, nāā a ndaa to̰ aĺ ō,

²⁵ tə́yō̰ kə́ dɔ rā̰ tə́ gə̄ a tə́sōn̄ dɔ nang tə́ ō, ngé tɔ́gə́ kə́ dɔ rā̰ tə́ gə̄ a ndewn̄ ō.

²⁶ Loo ń noō tə́ tā a, a a̰ā̰n̄ Ngōn̄ Deē loo reē tə́ dan kil̄ man̄ tə́ kə tɔ́gə́ kə́ ngá̰ý ō, kə kɔsə gɔn kə́ ngá̰ý ō.

²⁷ Loo ń noō tə́ tā a, a əla de kə́ dɔ rā̰ tə́ gə̄ kíl dɔ nang kə́ sɔ́ gə̄ tə́ yā kán̄ ngé gə̄ ń Nə́ɓā gə̄rādə́ ní. A əlan̄ gír i ta ngóy dɔ nang kə́ dām̄ kə́rēý tə́ bátə́ ugə̄ń ta ngóyn kə́ dām̄ kə́ rang tə́.

Kum najə̄ yā kāgə̄ kótə̄

²⁸ Majə kadə̄ ī-gerī kum najə̄ yā kāgə̄ kótə̄ ń toō: Loo ń ta jīn gə̄ ton̄ mbōl̄ adə̄ mbīn a sitə ní anī, ī-gerī kadə̄ dɔ ɓar i ngɔr.

²⁹ Adə̄ ré á̰a̰ī yá̰a̰ gə̄ ń noō rāān̄ yá̰a̰ anī, ī-gerī kadə̄ Ngōn̄ Deē a reē ngɔr.

³⁰ Ādə̄ m-ə́dásí najə̄ kə́ bo ngá̰ý, de kə́ ngɔlaā gə̄ ń toō a oyn̄ malang alé n yá̰a̰ gə̄ ń noō malang a rāān̄neé yá̰á̰ ní.

³¹ Dɔ rā̰ ō, dɔ nang ō, a mānə̄n̄, ba najə̄ yāḿ gə̄ a mānə̄n̄ alé.

I Nə́ɓā ngóy n ger̄ kum mbang kə́ ta tɔ̄l̄ ta tə́

³² Banī najə̄ kə́ dɔ ndɔ̄ ní tə́ ō, dɔ kum mbang ní tə́ ō ní, deē kógə̄ḿ kə́ ger̄ gətóo. I de kə́ dɔ rā̰ tə́ gə̄ aĺ ō, i Ngōn̄ Nə́ɓā nəkɔ́ aĺ ō, banī i Bɔbə̄n tá ngóy.

³³ Ə̄ndāī kum kedə̄ dɔ rɔ̄sí tə́ ō, á̰a̰ī já̰já̰ ō, tɔdɔ̄ ī-gerī kum mbang ń yá̰a̰ gə̄ a reēn̄neé ní alé.

³⁴ A to tītə̄ deē kógə̄ḿ kə́ aw̄ mbā tə́. Ni əya̰ kújə yān, ba adə̄ ngé kəla yān gə̄ ndūn. Ni-gán̄g kəla adə̄də́ kə dɔdə́ gēé. Ni-əndā dɔ nge ngɔ̄m̄ ta kújə́ tə́ kadə̄ ndi dɔ rɔ̄n tə́.

³⁵ I tām̄ najə̄ ń noō tə́ n majə kadə̄ á̰a̰ī já̰já̰ ní, tɔdɔ̄ sḭḭ̄ ī-gerī kum mbang ń kɔ́ɔ̄ kújə a téləń ní alé: I loo tíbí, aké i dan ndɔ̄ tɔyɔ́, aké i kə́ra kə̄njá nōō tə́, aké i dəloí,

³⁶ na sōgə́ ni-teē rétə́ anī, a əngesí dɔ ɓīī tə́.

³⁷ Ba yá̰á̰ ń m-ə́dásí toō, m-ə́da i de gə̄ malang: Ī-ndiī já̰já̰ dɔ rɔ̄sí tə́.