MARK 12 - Bibəl ta Sar̄

Kūjə́ najə̄ yā ngé rāā kəla kāgə̄ nduú gə̄ kə́ ngé kem ndul gə̄

¹ Gō tə́ anī Jeju ɔr̄ najə̄ sedə́ kə kūjə́ najá əda na: Deē kógə̄ḿ əndā kāgə̄ nduú gə̄ kem ndɔr̄ yān tə́ ba əndā ndogə̄ mbal̄ gīrəń gidə ō, ndēr̄ bəlo kadə̄ mbə́reń kan̄ kāgə̄ nduú ō, rāā kújə ngɔm̄ kə́ ngāl̄ ɓururu kum kə̄ dɔɔ́ ta ndɔr̄ ní tə́ ō, əndā ngé ndɔr̄ gə̄ ta tə́ kadə̄ a̰a̰n̄ gō ō, adə̄nən̄ kan̄ nduú ō, ba aw̄ mbā tə́.

² Loo ń nāā sāā kan̄ kāgə̄ nduú asə anī, ni-əla nge kəla yān kógə̄ḿ rɔ̄ ngé ndɔr̄ gə̄ ní tə́ taā kan̄ nduú kə́ tām̄ yān tə́ jīdə́ tə́.

³ Banī nin̄-əhɔ əndanən̄ ō, tə̄ɓānən̄ adə̄ tél aw̄ jīn karī ō.

⁴ Ni-əla nge kəla yān kə́ rang ɓáý to̰ rɔ̄də́ tə́, ba nin̄-adə̄nən̄ do dɔn tə́ ō, tájə̄nən̄ ō.

⁵ Ni-tél əla nge kəla yān kə́ rang ɓáý to̰, anī nin̄-tɔ̄l̄nən̄. Tá anī tél əla ngé kəla yān kə́ rang gə̄ ɓáý to̰ anī, nin̄-tə̄ndān̄ kə́rēý gə̄ ō, tɔ̄lə̄n̄ kə́rēý gə̄ ō.

⁶ Ba na̰y i deē kógə̄ḿ ɓáý rɔ̄n tə́, i ngōn̄ kó tár yān kə́ dəngam, adə̄ dan ń nin̄-təgān̄ malang ní, ni əlan rɔ̄də́ tə́. Əda na nin̄ a ɓōlə́n̄ ndíĺ ngōnən ń toō.

⁷ Banī ngé ndɔr̄ gə̄ ní ədan̄ naā dɔ dáńdə́ tə́ na: Á̰a̰ī nge kán̄ ta yá̰a̰ gotə yo ní n toó. Ī-reēī, jə-tɔ̄līin̄ ɓáa, yá̰a̰ gotə yo ní a tél yá̰a̰ yājí.

⁸ Anī əhɔ tɔ̄l̄nən̄ kɔ̄ɔ́, ba ənīnən̄ gidə ndɔr̄ ní tə́ ndágá.

⁹ Kɔ́ɔ̄ ndɔr̄ ní a rāā i ba̰ý? Ni a reē yā tɔ̄l̄ ngé ndɔr̄ gə̄ ní, ba a əndā de kə́ rang gə̄ ta ndɔr̄ yān tə́.

^10-11 Najə̄ ń ndangən̄ na: I mbal̄ ń ngé kəndā kújə gə̄ mbātə́n̄ kété ní n tél mbal̄ kíĺ kújə́ ní, nge ń noō i kəla rāā Kɔ́ɔ̄ɓē adə̄ i yá̰á̰ kə́ majə to ɓōĺ ngá̰ý ta kumjí tə́ ní, á̰a̰ī kem makətūbə̄ tə́ aĺ a?

¹² Nin̄-sāān̄ kəhɔn, banī ɓōlə́n̄ kósə de gə̄. Tɔdɔ̄ nin̄-gerə̄n̄ kadə̄ Jeju əda kūjə́ najə̄ ní i tām̄ yādə́ nin̄ tə́. Adə̄ nin̄-əya̰nən̄ ba aw̄n̄ loo yādə́.

Najə̄ kə́ dɔ lambóó kə́ yā kadə̄ nge ko̰o̰ ɓē tə́

¹³ Əlan̄ de kə́rēý gə̄ kə́ dan Parijiyḛ gə̄ tə́ ō, dan ngé yā Herod gə̄ tə́ ō, rɔ̄ Jeju tə́, kadə̄ ré Jeju əda najə̄ kə́ gō tə́ aĺ anī, kə n-əhɔnən̄ dɔ tə́.

¹⁴ Nin̄-reē ədanən̄ na: Ngoljí, jə-ger̄ kadə̄ ḭ̄ i de kə́ nge kɔr̄ najə̄ kə́ rɔ̄kum ngándáńg ō, ī-ɓōĺ kum deē aĺ ō, tɔdɔ̄ ḭ̄ ā ī-rāā yá̰a̰ tām̄ ger̄ ta kum deē tə́ alé, banī a ī-ndóō de gə̄ gō róbə yā Nə́ɓā i kə gō najə̄ kə́ rɔ̄kum. Ní ə́dájí: Ndū najə̄ yājí adə̄jí ta róbə kəgā lambóo yā nge ko̰o̰ ɓē kə́ Rom, aké ɔgə̄jí wa? Ní, kə j-adə̄, aké kə j-adə̄ aĺ wa?

¹⁵ Ba Jeju ger̄ kadə̄ nin̄ i ngé gól̄ kum de gə̄, adə̄ ədadə́ na ké a nāānən̄ i tām̄ rí tə́ wa, kə reēn̄ kə njáŕ sə́lē arjā̰a̰ kə́ kum madə̄ kutə jōó kógə̄ḿ kadə̄ n-a̰ā̰.

¹⁶ Nin̄-reēn̄ kə sə́lē ní anī Jeju dəjedə́ na ké i dɔ náā n i tū tə́ toō wa, ké najə̄ ń ndangən̄ tū tə́ toō ɔjə i dɔ náā wa. Nin̄-ədanən̄ na i dɔ Sejar.

¹⁷ Anī Jeju ədadə́ na kə tél adə̄n̄ Sejar yá̰á̰ ń i yā Sejar ní ō, kə tél adə̄n̄ Nə́ɓā yá̰á̰ ń i yā Nə́ɓā ní ō. Adə̄ ɔr kumdə́ seneé ngá̰ý.

Najə̄ kə́ dɔ ndól̄ yā de kə́ koy gə̄ tə́

¹⁸ Anī Sadusiyḛ gə̄ ń ədan̄ na de kə́ koy gə̄ na a ndólə̄n̄ aĺ ní, reēn̄ rɔ̄ Jeju tə́, dəjenən̄ najə̄ ədan̄ na:

¹⁹ Ngoljí, Moijə ndang makətūbə̄ adə̄jí, əda na: Ré deē kógə̄ḿ taā dəyá̰ ba oy kanjə̄ kojə ngōn̄ anī, kə ngōkó̰o̰n kə taā dəyá̰ ní kə ojəń ngōn̄ kadə̄ ra kum gotən.

²⁰ Ba kété jóo ngákó̰o̰ naā kə́ dəngam gə̄ i sīrí. Kə́ nga tɔ́gə taā dəyá̰, ba oy kanjə̄ kojə ngōn̄ kógə̄ḿ.

²¹ Anī nge kə́ nge ko̰ jōó taā dəyá̰ ní, ba oy kanjə̄ kojə ngōn̄ ō, nge kə́ ko̰ mətá rāā beé ō.

²² Ba nin̄ sīrí ní, kógə̄ḿ kə́ ojə ngōn̄ kə dəyá̰ ní gətóo. Ba kutə̄ gōdə́ malang anī, dəyá̰ ní oy ō.

²³ Dan ń de gə̄ ń oyn̄ á a ndólə̄n̄ ní, nin̄ a ndólə̄n̄ ō. Ba dəyá̰ ní, i náā dan ngákó̰o̰ naā gə̄ ń toō tə́ n ni i nə̄yá̰n ní? Tɔdɔ̄ nin̄ sīrí mbak ní taānən̄ kə́ nə̄yá̰də́ tə́.

²⁴ Jeju tél ədadə́ na: Sḭḭ̄ ī-ndúmī i tɔdɔ̄ ī-gerī makətūbə̄ yā Nə́ɓā aĺ ō, tɔ́gə yān aĺ ō.

²⁵ Tɔdɔ̄ loo ń de gə̄ a ndólə̄n̄ dan de kə́ koy gə̄ tə́ ní, a taān̄ naā alé, ba a ton̄ i tītə̄ de kə́ dɔ rā̰ tə́ gə̄.

²⁶ Tá najə̄ kə́ dɔ de gə̄ ń oyn̄ á kadə̄ a ndólə̄n̄ tə́ ní, ī-tə́daī kem makətūbə̄ yā Moijə tə́, dan ń ɔrə̄n̄sí gotə najə̄ yā Nə́ɓā ń ndɔ̄bə̄ n dan bɔkə́ kámbə́ tə́ ní aĺ a? Ni-əda na ni i Nə́ɓā yā Abəraham ō, yā Isaak ō, yā Jakob ō.

²⁷ Nə́ɓā ní i Nə́ɓā yā de kə́ koy gə̄ alé, ba i Nə́ɓā yā de gə̄ kə́ ndin̄ kə kumdə́ gə̄. Sḭḭ̄ ī-ndúmī ngá̰ý.

Gō míndə́ kə́ bo tɔȳ madə̄ gə̄ malang

²⁸ Nge ndóō de gə̄ ndū najə̄ kógə̄ḿ oō najə̄ ń Sadusiyḛ gə̄ ō Jeju ō nējə̄n̄ naā najə̄ dɔ tə́ ní. Dan ń a̰a̰ kadə̄ Jeju tél ədadə́ i kə gōó majə ní anī, ndɔ́tə̄ kə̄ rɔ̄n tə́ ba dəjen na: Dan gō míndə gə̄ tə́ malang ní, nge kə́ rá n i kə́ kété bang ní?

²⁹ Jeju tél ədan na, kə́ kété bang n toó: Israel gə̄ ōōī, i Kɔ́ɔ̄ɓē Nə́ɓā yājí n i Kɔ́ɔ̄ɓē kógə̄ḿ beē,

³⁰ ādə̄ ā ī-táriī Kɔ́ɔ̄ɓē Nə́ɓā yāsí kə kemsí malang ō, kə dā̰ rɔ̄sí malang ō, kə gír̄ kə́ kemsí tə́ malang ō, kə tɔ́gə́sí malang ō.

³¹ Ba kə́ nge ko̰ jōó n toó: Ā ī-tár deē madí tītə̄ ngarān̄g kum rɔ̄í īkɔ́ beē. Gō míndə́ kə́ rang kə́ bo tɔȳ ngé ń toō gətóo.

³² Nge ndóō de gə̄ ndū najə̄ ní ədan na: Majə, Ngoljí, əda rɔ̄kum na Nə́ɓā i kal kógə̄ḿ beē, ba kə́ rang gətóo, i ni ngóy.

³³ Ba kadə̄ deē tárən kə kemənneé malang ō, kə gír kə́ kemən tə́ malang ō, kə tɔ́gəneé malang ō, kadə̄ ni-tár madə̄n tītə̄ ngarān̄g kum rɔ̄n nəkɔ́ ō, ń toō tɔȳ yá̰a̰ tun̄ kə́ róōn̄ horó kə yá̰a̰ tun̄ gə̄ malang.

³⁴ Ba loo ń Jeju a̰a̰ kadə̄ deē ní tél əda najə̄ ní majə kə kum kedēé ní anī, ədan na: Ḭ̄ i sa̰y rɔ̄ Ɓē ko̰o̰ yā Nə́ɓā tə́ alé. Gō najə̄ ń noō tə́ ní, nin̄ malang ɓōlə́n̄ dəjen najə̄ dɔ yá̰á̰ kə́ rang tə́ kɔ̄ɔ́.

Kərist ō, Dabid ō

³⁵ Dan ń Jeju a ndóō de gə̄ yá̰a̰ kem kújə yā Kɔ́ɔ̄ɓē tə́ anī, ni-dəje na: I ba̰ý á ngé ndóō de gə̄ ndū najə̄ gə̄ ədan̄ na Kərist i ngōn̄ kaa Dabid ní?

³⁶ Dabid nəkɔ́ loo ń ɔr̄ najə̄ kə ta kūl̄ Ndíĺ kə́ Táĺ ní əda na, Kɔ́ɔ̄ɓē əda Kɔ́ɔ̄ɓē gə̄ yāḿ na kə ndi dɔ jī ko̰n tə́, bátə́ kadə̄ n-ənīń ngé ba̰ā̰n gə̄ gír njan tə́.

³⁷ Ní, dan ń Dabid ɓārə́n na i Kɔ́ɔ̄ɓē ní, loo kadə̄ ni ngōn̄ kaan ɓáý to̰ ní i ba̰ý? Anī kósə de gə̄ ngá̰ý oōn̄ najə̄ yān ní kə rɔ̄nelēé.

Jeju tāā kósə de gə̄ najə̄ yā ngé ndóō de gə̄ ndū najə̄ gə̄ tə́

³⁸ Dan ń Jeju a ndóō de gə̄ yá̰á̰ ní anī, ni-əda na: Ə̄ndāī kum kedə̄ dɔ rɔ̄sí tə́ kə ngé ndóō de gə̄ ndū najə̄ gēé. Nel̄də́ dáȳ kə kūbə̄ kə́ ngāl̄ gēé ō, nel̄də́ kadə̄ de gə̄ rāān̄də́ lápə́ya ndágə loo kə́ bo gə̄ tə́ ō.

³⁹ A nel̄də́ ndi loo kə́ to ngol tə́ gíŕ kújə́ kán̄ naā gə̄ tə́ ō, loo kəsa yá̰a̰ gə̄ tə́ ō.

⁴⁰ A əsan̄ jī dəyá̰ kə́ ngaa koy gə̄ yā təgā ō, a ilə̄n̄ gidə rɔ̄də́ karī ba na n-ndɔ̄ȳn̄ na i ngá̰ý ō. Nin̄ ní sarya kə́ bo ngá̰ý a əsō dɔdə́ tə́.

Yá̰a̰ ndējə̄ yā dəyá̰ kə́ ngaa koy

⁴¹ Jeju ndi kumən sɔɔ̄ loo ń a ɓōkə́n̄ nar tū tə́ kem kújə yā Kɔ́ɔ̄ɓē tə́ ní, yā ka̰a̰ loo ɓōkə́ ń kósə de gə̄ a ɓōkə́n̄ nar tū tə́ ní. Ngé yá̰a̰ kal̄ loo gə̄ ɓōkə́n̄ ngá̰ý tū tə́.

⁴² Dəyá̰ kógə̄ḿ kə́ ngaa koy kə́ nge rɔ̄ tō ndoō reē ō. Ni-ɓōkə́ súū kə́ kum mbutə gə̄ jōó tū tə́. Na̰y i nja mətá tá kadə̄ rāā sísi kógə̄ḿ.

⁴³ Tā anī Jeju ɓāŕ ngé ndóō yá̰a̰ yān gə̄, ədadə́ na: Ādə̄ m-ə́dásí najə̄ kə́ bo ngá̰ý, dəyá̰ kə́ ngaa koy kə́ nge ndoō ń toō ɓōkə́ nar kem loo ń a ɓōkə́n̄ tū tə́ ní tɔȳ gotə gə̄ malang.

⁴⁴ Tɔdɔ̄ nin̄ malang ní ɔrə̄n̄ i ta yādə́ kə́ na̰y kə̄ ndágá gə̄ n ənīn̄ tū tə́ ní. Banī dəyá̰ ń toō ni ɓōkə́ i yá̰a̰ ndoō yān malang kə yá̰á̰ ɓáā ta yān ń kadə̄ əsań yá̰á̰ tá ndiń kə kumneé ní.