MARK 1 - Bibəl ta Sar̄

Najə̄ ń Ja̰a̰ Batistə ɔjə ní

¹ Ta kəla gír Najə̄ kə́ Majə yā Jeju Kərist Ngōn̄ Nə́ɓā.

² Ndangən̄ kem makətūbə̄ yā Ijai nge koō ta tə́ ədan̄ na: Á̰a̰, m-ə́la nge kəla yāḿ kété noí tə́ kadə̄ rāā gō róbə yāí əndāī.

³ Ndū deē kógə̄ḿ ɓār̄ kem dəla loo tə́ əda na: Ī-rāāī gō róbə yā Kɔ́ɔ̄ɓē əndāniī ō, ī-rāāī róbə yān gə̄ adə̄ ran̄ súmūú ō.

⁴ Ja̰a̰ Batistə teē hɔy kem dəla loo tə́. Ni-ənī mbēr̄ batéḿ kə́ kadə̄ de gə̄ tūrə̄nń háĺdə́ ō, rāān̄də́ batém ō, yā kadə̄ Nə́ɓā mā̰ȳń rɔ̄n dɔ majaĺ yādə́ tə́.

⁵ De gə̄ kə́ dɔ nang kə́ Jude tə́ malang ō, ngé kə́ Jerusalem tə́ malang gə̄gē ō, aw̄n̄ rɔ̄n tə́, adə̄ Ja̰a̰ rāādə́ batém kum bā Jurdḛ tə́, dan ń nin̄-ədan̄ majaĺ yādə́ gə̄ kə̄ ndágá ní.

⁶ Ja̰a̰ o̰ō̰ i kūbə̄ bḭḭ̄ jámbal ō, əhɔ ɓōdə̄n i kə ndārá ō. Yá̰a̰ kəsa yān i yim̄ gə̄ ō, mbar̄ tejə kə́ bembeé gə̄ ō.

⁷ Ni-ənī mbēr̄, əda na: Nge ń tɔ́gən tɔȳ yāḿ mā ní a reē gōḿ tə́ noō. Mā m-ásə rugə kə̄ nang tə́ tútə kəlā sākə̄rā kə́ njan tə́ gə̄gē alé.

⁸ Mā m̄-rāāsí batém i kə maná, ba ni a rāāsí batém i kə Ndíĺ kə́ Tálá.

Rāān̄ Jeju batém ō Sətan nāān ō

⁹ Dan ń noō tə́ ní, Jeju ḭḭ Najaret, gō nang kə́ Galile tə́, ba reē rɔ̄ Ja̰a̰ tə́ adə̄ rāān batém kum bā Jurdḛ tə́.

¹⁰ Ni a teē kum man̄ tə́ kə̄ ndágá anī, kə̄ tajī tə́ noō ni-a̰a̰ dɔ rā̰ njar ō, Ndíĺ kə́ Táĺ jə̄ngā kə̄ dɔn tə́ tītə̄ dér ndaa ō.

¹¹ Loo ń noō tə́, ndū deē kógə̄ḿ ɓār̄ dɔ rā̰ tə́, əda na: Ḭ̄ i Ngōn̄ kó tár yāḿ ń nelə̄m̄ seí ngá̰ý ní.

¹² Kə̄ tajī tə́ noō ní Ndíĺ kə́ Táĺ ɔsə kə Jejuú adə̄ aw̄ kem dəla loo tə́.

¹³ Ni-ndi noó ndɔ̄ kutə sɔ́, adə̄ Sətan nāān. Ni-ndi naā tə́ kə dā̰ kə́ bembeé gə̄, ba de kə́ dɔ rā̰ tə́ gə̄ rāān̄ seneé.

Jeju ɓāŕ de gə̄ sɔ́ kadə̄ unən̄ gōn

¹⁴ Kutə̄ gō ń əlan̄ Ja̰a̰ jī de gə̄ tə́ ní, Jeju reē Galile.

¹⁵ Ni ɔjə Najə̄ kə́ Majə yā Nə́ɓā, əda na: Ndɔ̄ asə kɔ̄ɔ́, adə̄ Ɓē ko̰o̰ yā Nə́ɓā i ngɔr. Ī-tūrī háĺsí, ba ī-taāī kem Najə̄ kə́ Majə.

¹⁶ Dan ń Jeju a un ta bā bo kə́ Galile tə́ ní anī, ni-a̰a̰ Simo̰ nin̄ kə ngōkó̰o̰n Andəre a ənīn̄ réng kum bā bo tə́, tɔdɔ̄ nin̄ i ngé ndo̰ kānjə̄ gə̄.

¹⁷ Jeju ədadə́ na: Ī-reēī gōḿ tə́, anī m-ā m̄-rāāsí kadə̄ a ī-téliī ngé ndo̰ de gə̄.

¹⁸ Kə̄ ta jī tə́ beé nin̄-əya̰n̄ réng yādə́ gə̄, ba unən̄ gōn.

¹⁹ Ni ɔtə kə̄ kété sḛ́ý ɓáa a̰a̰ Jakə ngōn̄ Jebede, nin̄ kə ngōkó̰o̰n Ja̰a̰. Ndin̄ kem toó ba a tṵ́ṵ̄n̄ i kum réng.

²⁰ Kə̄ ta jī tə́ noō ni-ɓāŕdə́. Anī əya̰n̄ bɔbə̄də́ kə ngé rāā kəla gēé kem toó, ba aw̄n̄ gōn tə́.

Ndíĺ kə́ majaĺ kógə̄ḿ rāā kum deē kógə̄ḿ ndoō tə́

²¹ Jeju nin̄ kə ngé ndóō yá̰a̰ yān gēé aw̄n̄ kem ɓē kə́ Kapernaum tə́, i ndɔ̄ sabat tə́, adə̄ ni udə kem kújə́ kán̄ naā tə́ ba əla gíŕ ndóō de gə̄ yá̰a̰.

²² Loo ndóō deē yá̰a̰ yān ɔr kumdə́ ngá̰ý, tɔdɔ̄ ni-ndóōdə́ yá̰a̰ i kə tɔ́gɔ́, ba i tītə̄ yā ngé ndóō de gə̄ ndū najə̄ gə̄ alé.

²³ Dan ń noō tə́ ní deē kógə̄ḿ kə́ ndíĺ kə́ yḛr i kemən tə́ i kem kújə́ kán̄ naā yādə́ tə́, deē ní əga kɔŕ əda na:

²⁴ Jeju kə́ Najaret, yāí i rí sejí? Ī-reē i nujəjí tə́ a? m̄-ger̄ majə kadə̄ ḭ̄ i nge kə́ táĺ yā Nə́ɓā.

²⁵ Jeju ndángən əda na: Ī-ndi taí mbóo, ba ī-teē kɔ̄ɔ́ kem deē ń toō tə́.

²⁶ Tā anī ndíĺ kə́ yḛr ní jənga deē ní rik rik ō, əga kɔŕ ngá̰ý ō, ba teē kemən tə́ kɔ̄ɔ́.

²⁷ Ɓōĺ rāādə́ malang, adə̄ dəjen̄ naā dɔ dáńdə́ tə́ na: I rí kə́ beē? I yá̰á̰ ndóō kə́ kijə, i kə tɔ́gɔ́! Ndíĺ kə́ yḛr gə̄ gə̄gē ni-ɔr̄ najə̄ sedə́ kə tɔ́gɔ́, anī nin̄-oōn̄ tan.

²⁸ Ba kə̄ ta jī tə́ noō rī Jeju ɓār̄ taā gō loo malang kə́ Galile.

Jeju rāā adə̄ rɔ̄ ngé mo̰y gə̄ ngá̰ý ngáā

²⁹ Jeju teē kem kújə́ kán̄ naā tə́, ba kə̄ ta jī tə́ noō, aw̄n̄ kem kújə yā Simo̰ nin̄ kə Andəre tə́, ba Jakə ō Ja̰a̰ ō i sedə́.

³⁰ Um Simo̰ kə́ dəyá̰ to kə mo̰y gajaá. Kə̄ ta jī tə́ noō nin̄-ədan̄ Jeju najə̄n.

³¹ Jeju aw̄ rɔ̄n tə́, əhɔ ta jīn, ba unən dɔɔ́, anī mo̰y gajə ní əya̰n, adə̄ dəyá̰ ní rāā loo yá̰a̰ kəsa adə̄də́.

³² Loo sɔlí, loo ń mbang udə kɔ̄ɔ́ ní, de gə̄ reēn̄ kə ngé mo̰y gə̄ malang ō, kə ngé gə̄ ń ndíĺ kə́ majaĺ gə̄ i kemdə́ tə́ ní ō.

³³ De kə́ kem ɓēé gə̄ malang kánə̄n̄ naā kə̄ ta róbə́ kújə́ tə́.

³⁴ Jeju rāā adə̄ rɔ̄ ngé mo̰y gə̄ kə́ gír ngá̰ý gə̄ ngáā. Ni-tə̄ɓā ndíĺ kə́ majaĺ gə̄ ngá̰ý ō, əya̰də́ adə̄ ɔrə̄n̄ najə̄ aĺ ō, tɔdɔ̄ nin̄-ger̄nən̄.

Jeju aw̄ gō nang kə́ Galile tə́

³⁵ Dəloí ɓatə, kété tá kadə̄ loo gán̄g ní, Jeju ndól̄, ba teē ndágá aw̄ loo kə́ deē gətóo tū tə́ tə́ ndi a ndɔ̄ȳ loo ngeé ń noō tə́.

³⁶ Simo̰ nin̄ kə ngé gə̄ ń seneé ní aw̄n̄ ndəlen tə́.

³⁷ Ba loo ń əngenən̄ anī, nin̄-ədanən̄ na de gə̄ malang na a ndəlenən̄.

³⁸ Ni-tél ədadə́ na: J-awī kem ɓē kə́ rang kə́ ngɔr gə̄ tə́ ādə̄ m-ə̄nā mbēr̄ Najə̄ kə́ Majə kemdə́ gə̄ tə́ ō, tɔdɔ̄ m̄-teē i tāmən tə́.

³⁹ Ba ni-aw̄, ɔjə najə̄ kem kújə́ kán̄ naā yādə́ gə̄ tə́ gō nang malang kə́ Galile tə́ ō, ba ni-tə̄ɓā ndíĺ kə́ majaĺ gə̄ kɔ̄ɔ́ ō.

Jeju rāā adə̄ bānjə̄ kə́ rɔ̄ deē kógə̄ḿ tə́ ur̄

⁴⁰ Nge bānjə̄ kógə̄ḿ reē rɔ̄ Jeju tə́, ɔsə kejən nang tə́, rāān ɓɔ́, ba ədan na: Ré ī-ndigə anī, ī-rāām̄ ādə̄ m-ūnjə̄ njáý njáý.

⁴¹ Jeju a̰a̰ kum tō ndoō yān, adə̄ əla jīn ɔdənneé, ba ədan na: m̄-ndigə kadə̄ rɔ̄í ūnjə̄ njáý njáý.

⁴² Anī kə̄ ta jī tə́ noō bānjə̄ ur̄ rɔ̄n tə́ kɔ̄ɔ́, adə̄ rɔ̄n ūnjə̄ njáý njáý.

⁴³ Jeju tāān ɓang ɓang, ba kə̄ ta jī tə́ noō ɔsə seneé kadə̄ ɔtə kɔ̄ɔ́.

⁴⁴ Ədan na: Ōō majə, ī-lōō kɔr̄ najə̄ kə deē kógə̄ḿ, ba āw̄ ɔ́jə nge tun̄ yá̰a̰ rɔ̄í ō, ī-ndējə̄ yá̰a̰ tām̄ rɔ̄í ń ūnjə̄ njáý njáý tə́ toō kə gō ndū ń Moijə əda ní ō, kadə̄ kumdə́ teē dɔ tə́.

⁴⁵ Banī, loo ń deē ní teē ndágá anī, əla gír kənī mbēr̄ dɔ yá̰á̰ ní tə́ kə̄ dɔɔ́ ngá̰ý ō, rāā adə̄ de gə̄ oōn̄ kə̄ loo gə̄ tə́ ō, adə̄ Jeju asə kudə kem ɓē bo kógə̄ḿ tə́ wáńg to̰ alé. Ni-ndi ndágá ndágə loo ń de gə̄ ndin̄ tū tə́ aĺ tə́ ní ba de gə̄ ḭḭn̄ kə̄ loo gə̄ tə́ malang, reēn̄ rɔ̄n tə́.