MALASI 2 - Bibəl ta Sar̄

Tāān̄ ngé tun̄ yá̰a̰ gə̄

^1-2 Mā Kɔ́ɔ̄ɓē kə́ bo kə́ tɔ́gə́ḿ i ngá̰ý m̄-tāāsí sḭḭ̄ ngé tun̄ yá̰a̰ gə̄: Ōōī najə̄ yāḿ ō, ī-rāāī yá̰a̰ gə̄ yá̰a̰ ngōn̄ ndām̄ tə́ aĺ ō, yā kadə̄ ī-rɔȳmīneé tītə̄ ń majə kadə̄ ī-rāāī ní. Ré i beé aĺ anī, m-ā m̄-rāā kadə̄ ndɔ̄ĺ reē dɔsí tə́ ō, m-ā m̄-rāā kadə̄ tɔ́r̄ ta a tél i ndɔ̄ĺ ō. A̰á̰ā̰, m-ā m̄-rāā yá̰á̰ ń noō, tām̄ de kə́ dansí tə́ kə́ rāā yá̰a̰ yá̰a̰ ngōn̄ ndām̄ tə́ aĺ gətóo.

³ M-ɔ̄r̄ najə̄ m-ə́lań ɓōĺ kem de gə̄ kə́ gír kaasí tə́ kɔ̄ɔ́ ɓá. Yedə̄ dā̰ gə̄ ń ā ī-ndējī ndɔ̄ rāā nāā yāsí gə̄ tə́ ní, m-ā -m̄-ɓōkə́ kumsí tə́ ō, a ɔyn̄sí naā tə́ kə yedə̄ dā̰ gēé ō.

⁴ Loo ń noō tə́ ā ī-gerī yá̰á̰ ń toō: I Kɔ́ɔ̄ɓē kə́ bo kə́ tɔ́gən i ngá̰ý n m̄-tāāsí toō. Madə̄ naā ń m-ə́hɔ kə ngán Lebi gēé ní, m̄-ndigə ngɔ̄m̄.

⁵ m̄-rāā ādə̄ ndi kə kumuú ō, ndi lɔm ō, kə ta kūl̄ madə̄ naā ngeé ń toō, i yā kadə̄ nin̄ ɓōlə́n̄ ndílə́ḿ. Adə̄ nin̄ ɓōlə́n̄ ndílə́ḿ ō, ndewn̄ noḿ tə́ ō.

⁶ Nin̄ ndóōn̄ de gə̄ najə̄ kə́ rɔ̄kum ō, sorə̄n̄ aĺ ō. Nin̄ rāān̄ háĺ kə́ súmūú, tām̄ ndigən̄ najə̄ gōḿ tə́ ō, rāān̄ adə̄ de gə̄ ngá̰ý tūrə̄n̄ gidədə́ kɔ̄ɔ́ ta yá̰á̰ kə́ majaĺ tə́ ō.

⁷ A̰á̰ā̰, kəla yā nge tun̄ yá̰a̰ i ndóō de gə̄ kadə̄ gerə̄n̄ Nə́ɓā ō, i nge tun̄ yá̰a̰ n de gə̄ a oōn̄ najə̄ kə́ tan tə́, yā gerə̄ń ndū najə̄ ní ō. Tām̄ ni i ngōmbang kəla yā Kɔ́ɔ̄ɓē kə́ bo kə́ tɔ́gən i ngá̰ý.

⁸ Mā Kɔ́ɔ̄ɓē kə́ bo kə́ tɔ́gə́ḿ i ngá̰ý, m-ə́da najə̄ ń toō: Banī sḭḭ̄ ngé tun̄ yá̰a̰ gə̄ ī-rāāī yá̰á̰ ń noō alé, sḭḭ̄ ə́ya̰ī róbə kɔ̄ɔ́ ba āwī sa̰y. Ī-gólī de gə̄ ngá̰ý kə ta kūl̄ yá̰á̰ ndóō yāsí gə̄ ō, ī-gāngī madə̄ naā ń m-ə́hɔ kə ngán Lebi gēé ní kɔ̄ɔ́ ō.

⁹ I beé ní, ta i dɔḿ tə́ kadə̄ m̄-sə̄lā ngán Israel gə̄ dɔsí tə́, kadə̄ kídə̄n̄sí ō, télən̄ sesí kə̄ nang tə́ ō. Tām̄ sḭḭ̄ ōōī taḿ aĺ ō, dan ń úniī ndū najə̄ yā rāań kəla anī, ɔ̄rī kam̄ de gə̄ naā tə́ ō.

Loo nujə madə̄ naā gír jōó

¹⁰ Jiḭ̄ malang ní, bɔbə̄jí i kógə̄ḿ beē aĺ a? I Nə́ɓā kə́ kógə̄ḿ beē n rāājí ní aĺ a? Ɓá tā ba jə-raī dɔ ndūjí tə́ kə naā alé. I beé n jə-ɓōlíiń gidə madə̄ naā ń to dɔ dáń Nə́ɓā tə́ kə kaají gēé ní aĺ ní. Ní, i tām̄ rí tə́?

¹¹ De kə́ Juda gə̄ ran̄ dɔ míndə́də́ kə́ ənīn̄ tə́ alé. Nin̄ rāān̄ yá̰á̰ kə́ majaĺ ngá̰ý gə̄ kem ɓē kə́ Jerusalem tə́ ō, kem ɓēé kə taá malang ō. Tām̄ nin̄ kídə̄n̄ loo kə́ táĺ ń nel̄ Kɔ́ɔ̄ɓē ní. Nin̄ táān̄ dəyá̰ kə́ ngé rɔȳ nə́ɓā kə́ mbā gə̄.

¹² Ré deē kógə̄ḿ rāā yá̰á̰ kə́ tītə̄ ń noō anī, ādə̄ Kɔ́ɔ̄ɓē rāā adə̄ gír kojə yān malang gətóo kɔ̄ɔ́, dan ngán Israel gə̄ tə́! Ādə̄ de kə́ nge kadə̄ Kɔ́ɔ̄ɓē kə́ bo kə́ tɔ́gən i ngá̰ý yá̰a̰ ndējə̄ gə̄ kə rīneé to̰ gətóo!

¹³ Yá̰á̰ kə́ rang ń ī-rāāī ɓáý to̰ ní n toó: Sḭḭ̄ ī-nōōī adə̄ man̄ kumsí taā loo dɔ loo tun̄ yá̰a̰ yā Kɔ́ɔ̄ɓē tə́. Sḭḭ̄ ī-nōōī kə man̄ kumsí ō, ī-nōōī rɔ̄sí ō, tɔdɔ̄ yá̰a̰ ndējə̄ yāsí gə̄ ní, usə Kɔ́ɔ̄ɓē dɔ tə́ to̰ aĺ ō, ni ndigədə́ to̰ aĺ ō.

¹⁴ Sḭḭ̄ ī-dəjeī rɔ̄sí najə̄ ə́daī na ké i tām̄ rí tə́ wa. I tɔdɔ̄ sḭḭ̄ ə̄nī ndūsí ta kumən tə́ yā ra dɔ ndūsí tə́ kə dəyá̰ ń sḭḭ̄ ī-gə̄rāī dan balsáásí tə́ ní. Banī sḭḭ̄ ī-raī dɔ ndūsí tə́ kə dəyá̰ ní alé! Kété ní dəyá̰ ní ndi sesí ō, sḭḭ̄ ə̄nīī ndūsí ādīin̄ ō.

¹⁵ Kɔ́ɔ̄ɓē rāāsí adə̄ ī-téliī de kə́ kógə̄ḿ beē kə dəyá̰ ní aĺ a? I rɔ̄ kə́ kógə̄ḿ beē, kə́ i koō kə́ kógə̄ḿ beē kə́ nge rāā deē kadə̄ ndi kə́ kumneé n i kemeé ní aĺ a? Ba yá̰á̰ ń de kə́ kal kógə̄ḿ beē ngeé ń toō ndigə ní i rí? I ngán gə̄ ń Nə́ɓā a adə̄ ní n ni ndigə kənge ní wa ḿ? Á̰a̰ī rɔ̄sí sḭḭ̄ kɔ́ gə̄ majə! Dəyá̰ ń sḭḭ̄ ī-gə̄rāī dan balsáásí tə́ ní, ī-lōōī gólən!

¹⁶ Tɔdɔ̄ yá̰á̰ ń Kɔ́ɔ̄ɓē Nə́ɓā yā Israel əda ní n i toó: Ré deē kógə̄ḿ tə̄ɓā nə̄yá̰n, tām̄ nelə̄n seneé aĺ ngá̰ý anī, ni-rāā yá̰a̰ i kə dɔ́nɔ́, adə̄ najə̄ i dɔn tə́. I Kɔ́ɔ̄ɓē kə́ bo kə́ tɔ́gən i ngá̰ý n ɔr̄ najə̄ toó. I beé ní, á̰a̰ī rɔ̄sí sḭḭ̄ kɔ́ gə̄ majə! Míndə́sí ń ə̄nī ní, ī-lōōī téĺ róbó gō tə́!

Kɔ́ɔ̄ɓē a əla nge kəla yān

¹⁷ Ī-rāāī Kɔ́ɔ̄ɓē kə najə̄ kɔr̄sí gēé adə̄ ni ɔr. Sḭḭ̄ ə́daī na ké ī-rāāī i ba̰ý n ni ɔrəń ní wa. Sḭḭ̄ ī-rāāin̄ adə̄ ni ɔr, i dan ń ə́daī na ni na a̰a̰ ngé rāā yá̰á̰ kə́ majaĺ gə̄ na i kə kemən kə́ majaá ní, ni na ndigə najə̄ gō de gə̄ ngeé gə̄ ń noō tə́ ní. Sḭḭ̄ ə́daī ɓáý to̰ na: Ké Nə́ɓā kə́ nge gān̄g sarya kə́ gōtə́ ndi a rāā i rí wa.