Makətūbə̄ yā Aje 2 - Bibəl ta Sar̄

Kújə́ kə́ bo kə́ kijə kə́ majə ngá̰ý yā Kɔ́ɔ̄ɓē

¹ Kem ɓāl̄ kə́ kógə̄ḿ beē nəkɔ́ ń noō tə́ ń i ɓāl̄ ko̰o̰ ɓē kə́ nge ko̰ jōó yā mban̄g Darius ní, kem nāā kə́ nge ko̰ sīrí tə́, kə ndɔ̄ nāā kə́ nge ko̰ kutə jōo gidə i kógə̄ḿ anī, Kɔ́ɔ̄ɓē əndā najə̄ ta Aje nge koō ta tə́ kadə̄ ɔr̄ adə̄n ɓáý to̰.

² Ni ədan na kə əda nge ko̰o̰ ɓē kə́ Juda ń i Jorobabel kə́ ngōn̄ Seyaltiel ní ō, ngol ngé tun̄ yá̰a̰ gə̄ ń i Yesua kə́ ngōn̄ Yosadak ní ō, de gə̄ malang ń ɔyn̄də́ aw̄n̄ sedə́ dɔ ɓē kə́ rang tə́ dɔ gúú tə́ á tél reēn̄ gogə́ ní ō na:

³ Dansí tə́ ní, deē kógə̄ḿ əga kemən dɔ majə yā kújə́ kə́ bo kə́ jóo yā Kɔ́ɔ̄ɓē tə́ a? Ba ngɔlaā ní, yá̰á̰ ń á̰a̰ī ní i rí? Gotə yá̰á̰ kə́ tū tə́ kə́ na̰y gətóo.

⁴ I tām̄ najə̄ ń noō tə́ n Kɔ́ɔ̄ɓē ədasí najə̄ ń toō wáńg ní: Ḭ̄ Jorobabel, ə́hɔ rɔ̄í tɔgə! Yesua kə́ ngōn̄ Yosadak, ḭ̄ ń i ngol ngé tun̄ yá̰a̰ gə̄ ní, ə́hɔ rɔ̄í tɔgə! Sḭḭ̄ de kə́ kem ɓēé gə̄ malang, ə́hɔī rɔ̄sí tɔgə! Údiī kə̄ rɔ̄ kəla tə́ ī-rāāī na ni i sesí naā tə́. I Kɔ́ɔ̄ɓē kə́ bo kə́ tɔ́gən i ngá̰ý n ədasí najə̄ ń noō ní.

⁵ Ni-ənī ndūn ń toō adə̄sí i dan ń ī-teēīneé kɔ̄ɔ́ kem ɓē kə́ Ejiptə tə́ ní. Tá ndílən i dansí tə́, adə̄ ī-lōōī ɓōĺ!

⁶ A̰á̰ā̰, yá̰á̰ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó: Na̰y kum mbang i séý beē kadə̄ a yéȳ dɔ rā̰ ō dɔ nang ō, bā bo ō dɔ nang kə́ ngan̄g ō.

⁷ Ni a sól̄yō gotə nápar de gə̄. Yá̰a̰ kənge yādə́ gə̄ kə́ ngá̰ý a reē loo ń toō tə́ laā. Ni a rāā kújə yān ń toō kadə̄ a majə ngá̰ý. I Kɔ́ɔ̄ɓē kə́ bo kə́ tɔ́gən i ngá̰ý n əda najə̄ ń toō ní.

⁸ Tɔdɔ̄ gində̄ arjā̰a̰ i yá̰a̰ yān ō, lɔ́r i yá̰a̰ yān ō. I Kɔ́ɔ̄ɓē kə́ bo kə́ tɔ́gən i ngá̰ý n əda najə̄ ń toō ní.

⁹ Tá kújə́ kə́ bo kə́ kijə yān ń toō, a majə yā mān̄ nge kə́ kété. Na n-adə̄sí lɔm loo ń toō tə́. I Kɔ́ɔ̄ɓē kə́ bo kə́ tɔ́gən i ngá̰ý n əda najə̄ ń toō ní.

Ngán Israel gə̄ télən̄ de kə́ yḛr gə̄

¹⁰ Kem ɓāl̄ ko̰o̰ ɓē yā mban̄g Darius kə́ nge ko̰ jōó nəkɔ́ ń noō tə́ ɓáý to̰, kem nāā kə́ nge ko̰ ndōhó tə́, kə ndɔ̄ nāā kə́ nge ko̰ kutə jōó gidə i sɔ́ tə́, anī Kɔ́ɔ̄ɓē kə́ bo kə́ tɔ́gən i ngá̰ý tél ɔr̄ najə̄ kə Aje nge koō taá ɓáý tó.

¹¹ Najə̄ ń ni-əda ní n toó: I-mēr̄ ngé tun̄ yá̰a̰ gə̄ gān̄g sarya ń toō:

¹² De kógə̄ḿ ndem̄ núsə dā̰ kə́ tun̄ ta kūbə̄ yān tə́. Gō tə́ anī, kūbə̄ ní ɔdə mápa, aláa mbī kámbə́ gə̄ kə́ yā ndīr̄ tá̰ tə́, aláa kasə nduú, aláa yibə̄. Ní, yá̰a̰ kəsa ń noō téĺ yá̰á̰ kə́ yā ɓōĺ gidə a? Anī ngé tun̄ yá̰a̰ gə̄ tél ədan̄ Aje na: A̰ á̰.

¹³ Aje ɔjədə́ yá̰á̰ kə́ rang ɓáý to̰, əda na: Tītə̄ ń toō deē kógə̄ḿ tél de kə́ yḛr, tām̄ ni ɔdə nīń. Gō tə́ anī, deē ní ɔdə yá̰a̰ kəsa kə́rēý. Ní, yá̰a̰ kəsa ní téĺ yá̰a̰ kəsa kə́ yḛr a? Anī nge tun̄ yá̰a̰ gə̄ tél ədan̄ na: A̰á̰ā̰.

¹⁴ Aje əda na: I beé ní, najə̄ ń Kɔ́ɔ̄ɓē əda ní n toó: I yá̰á̰ kə́ kógə̄ḿ beē tām̄ yā de gə̄ kə́ kem ɓēé ń toō tə́ ō, tām̄ yā kəla malang ń nin̄ rāān̄ tə́ ní ō. Yá̰a̰ malang ń nin̄ ndējə̄mə̄n̄ dɔ loo tun̄ yá̰á̰ tə́ ní, i yá̰á̰ kə́ yḛr.

Ə́laī gír nēl̄ mbīsí ɓōólaā nəkɔ́ ń toō

¹⁵ Kɔ́ɔ̄ɓē əda ɓáý to̰ na: Ngɔlaā ní, yá̰á̰ ń a əla gír rāā yá̰a̰ ɓōólaā ō ndɔ̄ kə́ rang tə́ ō ní, ī-gírī yá̰a̰ dɔ tə́! Kété pá tá kadə̄ ə́laī gír rāā kújə́ kə́ bo yāḿ gogə́ rang kə ta kūl̄ tə́ndā mbal̄ gə̄ kógə̄ḿ kógə̄ḿ dɔ naā tə́ ní,

¹⁶ i rí n rāā yá̰á̰ ní? Kété ní, dan ń deē kógə̄ḿ aw̄ sāā njār̄ kōō tə́ kem mō̰yō̰ó̰ kadə̄ ɔy kem kār̄ tɔ̄jə̄ yá̰a̰ kutə jōó anī, ənge i kutə kógə̄ḿ ngóy. Kété ní, dan ń deē kógə̄ḿ aw̄ kɔsə kasə nduú tə́ kem jóon tə́ kadə̄ rosə lítər kutə mí tə́ anī, ənge i kutə jōó ngóy.

¹⁷ Mā Kɔ́ɔ̄ɓē m-ə́dá wáńg na: Yá̰a̰ malang ń ī-rāāī ní, m̄-nujəń kɔ̄ɔ́: m̄-rāā adə̄ kōō gə̄ tutən̄, aláa ndumən̄ kem ndɔrɔ́ ō, m̄-rāā adə̄ kɔ̄sə̄ tə́sō ō, banī sḭḭ̄ ī-tél ī-reēī rɔ̄ḿ mā Kɔ́ɔ̄ɓē tə́ alé.

¹⁸ I beé ní, yá̰á̰ ń a rāā yá̰á̰ ní, əla gír ɓōólaā ō, ndɔ̄ kə́ rang tə́ ō ní, ī-gírī yá̰a̰ dɔ tə́! I ndɔ̄ kə́ nge ko̰ kutə jōó gidə i sɔ́ yā nāā kə́ nge ko̰ ndōhó n toó ō, əndān̄ ngəra kújə́ yā Kɔ́ɔ̄ɓē i ɓōólaā ō ní, ī-lōōī kadə̄ dɔsí ndígə̄nal.

¹⁹ Njár̄ kōō na̰y kem mō̰yō̰ó̰ to̰ alé. Kāgə̄ nduú gə̄ ō, kāgə̄ kótə̄ gə̄ ō, kāgə̄ gərenadə gə̄ ō, kāgə̄ olibə gə̄ ō, anə̄n̄ alé. I beé ní, əla gír ɓōólaā ní, m-ā m̄-rāā majə sesí ngá̰ý al̄ naā.

Kɔ́ɔ̄ɓē ənī ndūn adə̄ Jorobabel ń nəkɔ́ gə̄rān ní

²⁰ Ndɔ̄ nəkɔ́ ń noō tə́, adə̄ i kə ndɔ̄ nāā kə́ nge ko̰ kutə jōó gidə i sɔ́ ní, Kɔ́ɔ̄ɓē əndā najə̄ ta Aje tə́ nja kə́ nge ko̰ jōó.

²¹ Ni mērə̄n kɔr̄ najə̄ kə nge ko̰o̰ ɓē kə́ Juda ń i Jorobabel kə́ ngōn̄ Seyaltiel ní, kadə̄ ədan na: Mā Kɔ́ɔ̄ɓē nge rāā dɔ rā̰ ō dɔ nang ō ní, m-ā m̄-yéȳ dɔ rā̰ ō dɔ nang ō.

²² M-ā m̄-mbə́rē mban̄g gə̄ yā tə́nīdə́ ō, m-ā m̄-nujə tɔ́gə yā ɓē ko̰o̰ gə̄ kə́ dɔ nang tə́ ō, m-ā m̄-mbə́rē púsə rɔ̄ɔ̄ gə̄ kə ngé kal̄də́ gēé yā tə́nīdə́ ō. Tɔ́gə́ sə́nda gə̄ a gətóo ō, ngé kal̄də́ gə̄ a tɔ̄lə̄n̄ naā ō.

²³ Banī ndɔ̄ ń noō tə́ ní, ḭ̄ nge kəla yāḿ Jorobabel, m-ā m-úniī yā rāāī tambō̰o̰ yāḿ mə̄kɔ́ tə́. Tɔdɔ̄ i ḭ̄ n m̄-gə̄rāī tām̄ kəla yāḿ tə́ ní. Yá̰á̰ ń Kɔ́ɔ̄ɓē kə́ bo kə́ tɔ́gən i ngá̰ý əda ní n noó.