Najə̄ kə́ Majə yā Jeju ń Luk ndang ní 5 - Bibəl ta Sar̄

Jeju ɓāŕ ngé ndóō yá̰a̰ yān kə́ ta kəga dɔ gə̄

¹ Ndɔ̄ kógə̄ḿ tə́ Jeju ra kadə bā kə́ Jenejaret tə́, anī kósə de gə̄ reēn̄ rɔ̄n tə́ koō najə̄ yā Nə́ɓā tə́. Nin̄-ndan̄ dɔn tə́ jululu.

² Ni-a̰a̰ to gə̄ jōó kə́ əhɔn̄də́ kum kā̰ā̰ tə́. Ngé ndo̰o̰ gə̄ risən̄ kemeé kɔ̄ɔ́ ba a tə́gon̄ i réng yādə́ gə̄.

³ Anī ni-al̄ kem toó kə́ kógə̄ḿ ń i yā Simo̰ ní tə́, ba əda Simo̰ na kə ɔsə to ní kə̄ gogə́ sḛ́ý kum kə̄ ɓūlūú. Gō tə́ anī ndi nang tə́ kem toó a ndóoń kósə de gə̄ yá̰a̰.

⁴ Dan ń ɔr̄ najə̄ oy anī əda Simo̰ na kə ɔsə to kə aw̄ń dan ɓūlūú ba kə ɓōkə́n̄ réng yādə́ kə əhɔn̄neé kānjə̄.

⁵ Banī Simo̰ tél ədan na: Ngoljí, j-a̰a̰ tápə̄ ndɔ̄ɔ́ laā bátə́ loo tīī dɔ jí tə́ kanjə̄ kəhɔ yá̰á̰ kógə̄ḿ. Ba dan ń i ḭ̄ n ə́da najə̄ ní, m-ā m-ə̄nā réng maná.

⁶ Nin̄-ənīn̄ réng maná əhɔn̄neé kānjə̄ ngá̰ý adə̄ réng yādə́ a sāā i gán̄g.

⁷ Nin̄-kɔryɔ̄n̄ madə̄ ndo̰o̰də́ gə̄ kem to kə́ rang tə́ kadə̄ reē dḭḭ̄n̄də́. Madə̄də́ gə̄ ní reēn̄ adə̄ nin̄-əhɔn̄ kānjə̄ rosə kem to gə̄ ní jōó mbak, adə̄ to gə̄ ní a rāān̄ i loo nduȳ.

⁸ Dan ń Simo̰ Piyer a̰ā̰ tītə̄ ń noō anī əsō nang tə́ nja Jeju tə́ ba ədan na: Kɔ́ɔ̄ɓē, ī-tél kə̄ gogə́ na mā i nge rāā majaĺ.

⁹ Ɓōĺ rāā Simo̰ ō, de gə̄ malang ń seneé ní ō najə̄ yā kānjə̄ ń nin̄-əhɔn̄ ngá̰ý tə́ ní.

¹⁰ Madə̄ Simo̰ gə̄ kə́ ngán Jebede gə̄ ń i Jakə nin̄ kə Ja̰a̰ ní ɓōĺ rāādə́ ō. Banī Jeju əda Simo̰ na: Ī-lōō ɓōĺ, tām̄ əla gír ɓōólaā ní bátə́ kə no tə́ ḭ̄ i nge ndo̰ de gə̄.

¹¹ Loo ń noō tə́ Simo̰ ō madə̄n gə̄ ō, tél reēn̄ kə to yādə́ gēé gogə́ ta gógə́ tə́. Nin̄-əya̰n̄ yá̰a̰ yādə́ malang ba unən gō Jeju.

Jeju rāā adə̄ bānjə̄ kə́ rɔ̄ dəngam kógə̄ḿ tə́ ur̄

¹² Tā anī Jeju ugə̄ kem ɓē kə́rēý tə́. Deē kógə̄ḿ kə́ rɔ̄n i bānjə̄ malang i tū tə́ noō ō. Dan ni-a̰a̰ Jeju anī əsō ɔsə non nang tə́ non tə́ ba rāān ɓɔ́ əda na: Kɔ́ɔ̄ɓē, ré ī-ndigə anī ásə rāā kadə̄ rɔ̄ḿ unjə̄ njáý njáý.

¹³ Jeju əla jīn ɔdənəń ba əda na: m̄-ndigə, ādə̄ rɔ̄í unjə̄ njáý njáý! Anī kə̄ ta jī tə́ noō bānjə̄ ur̄ rɔ̄ deē ní tə́ kɔ̄ɔ́.

¹⁴ Anī Jeju ɔgə̄n kəda gotə, ba kə aw̄ kə ɔjə nge tun̄ yá̰a̰ rɔ̄n kadə̄ a̰ā̰ ō, kə adə̄ yá̰a̰ ndējə̄ kə́ tām̄ yā majaĺ kə́ kun dɔn tə́ kɔ̄ɔ́ ń Moijə əda najə̄n ní ō kadə̄ yá̰á̰ ń rāā yá̰a̰ toó téləń kə́ kum tə́ yāḿ tām̄ yādə́ tə́.

¹⁵ Rī Jeju ɓār̄ ba tél ɓār̄ ɓáý to̰, adə̄ kósə de gə̄ ngá̰ý kánə̄n̄ naā yā koō najə̄ kɔrə̄n ō, yā kadə̄ ni-rāādə́ kadə̄ rɔ̄də́ ngáā ō.

¹⁶ Ba Jeju a ɔr̄ rɔ̄n i kə kérneé i kem loo gə̄ kə́ ɓē gətóo tū tə́ n a ndɔ̄ȳń ní.

Jeju rāā adə̄ rɔ̄ deē kógə̄ḿ kə́ lígə̄rī ngáā.

¹⁷ Ndɔ̄ kógə̄ḿ tə́ Jeju a ndóō de gə̄ yá̰a̰ anī, Parijiyḛ kə ngé ndóō de gə̄ ndū najə̄ gə̄ i dan de gə̄ ní tə́. Nin̄-ḭḭn̄ i kə̄ ngán ɓē gə̄ malang kə gō nang kə́ Galile tə́ ō, kə́ Jude tə́ ō, ḭḭn̄ i Jerusalem ō n reēn̄ ní. Tɔ́gə yā Kɔ́ɔ̄ɓē i naā tə́ kə Jeju. Tɔ́gə́ ní rāā adə̄ kə ta kūl̄ Jeju de gə̄ ngá̰ý rɔ̄də́ ngáā.

¹⁸ Anī de kə́rēý gə̄ teēn̄ tū tə́ noō kə de kə́ lígə̄rīí reēn̄ seneé, ətōnən̄ i kə waá. Sāān̄ kudə seneé kújú yā kaw̄ kəndān no Jeju tə́,

¹⁹ banī əngen̄ ta róbə alé, tɔdɔ̄ kósə de gə̄ i ngá̰ý. Anī nin̄-tútən̄ dɔ kújə ba əlanən̄ tū tə́ kə̄ nang tə́ kə waá gēé, adə̄ ugə̄ dan de gə̄ tə́, no Jeju tə́ bang.

²⁰ Dan ń Jeju a̰a̰ taā kem yādə́ anī əda na: Madə́ḿ, yá̰á̰ kə́ majaĺ gə̄ ń ī-rāā ní mā̰ȳn̄ rɔ̄də́ dɔ tə́ kɔ̄ɔ́ kadī.

²¹ Ngé ndóō de gə̄ ndū najə̄ gə̄ ō, Parijiyḛ gə̄ ō, ədan̄ kə̄ kemdə́ tə́ na: Deē nəkɔ́ ń toō i náā á a tə́da najə̄ kə́ to ngonjə̄ gə̄ dɔ Nə́ɓā tə́ beē? De kə́ asə mā̰ȳ rɔ̄n dɔ yá̰a̰ rāā kə́ majaĺ tə́ i náā, má i Nə́ɓā ngóy aĺ a?

²² Jeju ń ger̄ gír̄ yādə́ ní tél ədadə́ na: Āwī kə gír kə́ beé kemsí tə́ i tām̄ rí tə́.

²³ I nge kə́ rá n i kə́ ngan̄g aĺ ngá̰ý ní? I kəda na: Majaĺ ń ī-rāā ní mā̰ȳn̄ rɔ̄də́ dɔ tə́ kadī, aké i kəda na: Ḭ́ḭ dɔɔ́ ī-njə̄rā ḿ?

²⁴ Ba m̄-sāā kadə̄ ī-gerī na Ngōn̄ deē i kə tɔ́gə mā̰ȳ rɔ̄n dɔ majaĺ gə̄ tə́ dɔ nang tə́. Loo ń ni-əda beé anī tūr̄ tan əda nge lígə̄rī ní na: Ḭ́ḭ dɔɔ́ ún waá yāí ba āw̄ ɓēé!

²⁵ Dəngam ní ḭḭ dɔɔ́ kə̄ ta jī tə́ noō ta kum de gə̄ tə́ malang, un yá̰a̰ ton ba aw̄ ta kaw̄ ɓēé. Ni-ɔsə gɔn Nə́ɓā dɔɔ́ dɔɔ́.

²⁶ Ɔr kum de gə̄ malang ō, nin̄-tél a ɔsən̄ i gɔn Nə́ɓā ō, ɓōĺ rāādə́ ngá̰ý adə̄ ədan̄ na n-a̰a̰n̄ yá̰á̰ kə́ jákə́ ngá̰ý ɓōólaā.

Jeju ɓāŕ Lebi

²⁷ Gō tə́ ɓáa Jeju teē ndágá, anī ni-a̰a̰ nge taā lambóó kógə̄ḿ kə́ rīn na i Lebi ndi loo taā lambóó tə́. Ni ədan na: Ún gōḿ.

²⁸ Lebi ḭḭ dɔɔ́, əya̰ yá̰a̰ malang ba un gōn.

²⁹ Gō tə́ anī Lebi mēr̄ rāā yá̰a̰ kəsa kə́ ngá̰ý adə̄ Jeju əsa ɓēé looneé. Ngé taā lambóo gə̄ ngá̰ý ō, de kə́ rang gə̄ ō, əsan̄ yá̰a̰ sedə́.

³⁰ Anī Parijiyḛ gə̄ ō, ngé ndóō de gə̄ ndū najə̄ gə̄ ń nin̄ i gír yā Parijiyḛ gə̄ tə́ ō ní, yṵ́rə̄n̄ najə̄ ba ədan̄ ngé ndóō yá̰a̰ yā Jeju gə̄ na: I tām̄ rí tə́ á ə́saī yá̰a̰ ō, ā̰yī ō naā tə́ kə ngé taā lambóo gə̄ ō, ngé rāā majaĺ gə̄ ō ní?

³¹ Jeju tūr̄ ədadə́ na: I ngé rɔ̄ ngan̄g gə̄ n i ngé sāā nja doktóŕ ní alé, banī i ngé mo̰y gə̄ n i ngé sāān gə̄ ní.

³² m̄-reē i ɓāŕ de kə́ súmūú gə̄ tə́ alé, ba i ɓāŕ ngé rāā majaĺ gə̄ tə́ kadə̄ tūrə̄n̄ háĺdə́.

Najə̄ kə́ dɔ ndi ɓō tām̄ yā Nə́ɓā tə́

³³ Nin̄-ədan̄ Jeju na: Ngé ndóō yá̰a̰ yā Ja̰a̰ gə̄ a ndin̄ ɓō tām̄ yā Nə́ɓā tə́ dejə ō, a ndɔ̄ȳn̄ ō, ngé yā Parijiyḛ gə̄ rāān tītə̄ ń noō ō, ba i ba̰ý á ngé yāí gə̄ ran̄ i dan kəsa yá̰á̰ kə́ njɔ́ḿ gə̄ tə́ ō, ka̰ȳ yá̰a̰ ō ní?

³⁴ Jeju tūr̄ ədadə́ na: Dan ń ngaa dəyá̰ kijə ndiń kə madə̄n gə̄ ń ni-ɓāŕdə́ ta kəsa yá̰a̰ yā rɔ̄nel̄ taā naā tə́ ní, tɔ́gə́sí asə ra sedə́ ta ndi ɓō tām̄ yā Nə́ɓā tə́ a?

³⁵ Banī ndɔ̄ gə̄ a reēn̄ noó, kem ndɔ̄ gə̄ ngeé ń noō tə́ ní a unən̄ ngaa dəyá̰ tadə́ tə́ kɔ̄ɔ́. Loo ń noō tə́ nin̄ a ndin̄ ɓō tām̄ yā Nə́ɓā tə́ tā.

³⁶ Ni-ɔr̄ najə̄ kə kūjə́ najá sedə́ ɓáý to̰, ədadə́ na: Deē a gān̄g ta kūbə̄ kə́ kijə yā kənīń kum ngísə kūbə̄ alé. Ré ḭ̄ deē ī-rāā beé anī kūbə̄ kə́ kijə ní tan i kə́ gān̄g kɔ̄ɔ́ ō, tan kə́ gān̄g ní a əhɔn̄ ta naā kə ngísə kūbə̄ ní aĺ ō.

³⁷ Tá deē a tūr̄ kasə kə́ tām̄ ngōn̄ kem sɔl kə́ lōō kōkə̄ gə̄ tə́ aĺ ō. Ré i beé aĺ anī kasə kə́ tām̄ ngōn̄ ní a rāā kadə̄ sɔl gə̄ ní a ndūbə̄n̄ yā kadə̄, kasə ní a aw̄ nang tə́ kɔ̄ɔ́ ō, sɔl gə̄ ní a nujən̄ kɔ̄ɔ́ ō.

³⁸ Banī a tūrə̄n̄ kasə kə́ tām̄ ngōn̄ i kem sɔl kə́ kijə gə̄ tə́.

³⁹ Deē ń a̰ȳ kasə kə́ tɔgə ní a sāā nge kə́ tām̄ ngōn̄ alé, tɔdɔ̄ ni a əda na kasə kə́ tɔgə na nel̄ tɔȳ nge kə́ tām̄ ngōn̄.