Najə̄ kə́ Majə yā Jeju ń Luk ndang ní 18 - Bibəl ta Sar̄

Kūjə́ najə̄ yā dəyá̰ kə́ ngaa koy nin̄ kə nge gān̄g saryaá

¹ Jeju ədadə́ kūjə́ najə̄ kógə̄ḿ kə́ dɔ ndɔ̄ȳ kə́ majə kadə̄ nin̄ a ndɔ̄ȳn̄ ngándáńg tə́ kanjə̄ kɔr ta tə́,

² ni-ədadə́ na: Dəngam kógə̄ḿ kə́ nge gān̄g sarya kə́ ɓōĺ ndíĺ Nə́ɓā aĺ ō, usən dɔ de gə̄ tə́ aĺ ō, i kem ɓē kógə̄ḿ tə́.

³ Kem ɓē ngeé ń noō tə́ dəyá̰ kógə̄ḿ kə́ ngaa koy i tū tə́. Ni-reē rɔ̄ nge gān̄g sarya ní tə́ ba ədan na: Ɔ́jə najə̄ kə́ gōtə́ mbo̰ō̰jí tə́ kə madə̄ kɔ̄lə̄ḿ.

⁴ Ba dəngam ní ɔdə aĺ kə́ nja naā tə́ nja naā tə́ dan i ngá̰ý. Ba gō tə́ anī əda kə̄ kemən tə́ na: Ká mā na m̄-ɓōĺ ndíĺ Nə́ɓā aĺ gə̄gē ō, usəm̄ dɔ de gə̄ tə́ aĺ gə̄gē ō anī i karī.

⁵ Ba dəyá̰ kə́ ngaa koy ń toō njə́ɓām̄ ngá̰ý ní, m-ā m̄-gān̄g kum najə̄ yān kə gōó yā kadə̄n, na sōgə́ reē kə̄ naā tə́ naā tə́ tōr̄ dɔḿ.

⁶ Anī Kɔ́ɔ̄ɓē tél əda dɔ tə́ na: Ōōī najə̄ ń nge gān̄g sarya kə́ gōtə́ aĺ ń toō əda ní, ādī udə mbīsí tə́ majə.

⁷ I beé ní, ngé gə̄ ń Nə́ɓā nəkɔ́ gə̄rādə́ á nōōn̄ kə̄ dɔn tə́ ndɔ̄ɔ́ ō kadaá ō, ba ədadə́ kadə̄ ngóōn̄ tan ō, əndādə́ dɔɔ́ ō ní, tá Nə́ɓā a əda najə̄ kə́ gōtə́ dɔdə́ tə́ aĺ a?

⁸ M-ə́dásí na ni a əda najə̄ kə́ gōtə́ dɔdə́ tə́. Banī dan ń Ngōn̄ Deē a tél yā reē ní, a ənge de kə́ nge taā kem dɔ nang tə́ nəkɔ́ a?

Kūjə́ najə̄ yā Parijiyḛ nin̄ kə nge taā lambóo

⁹ Jeju əda kūjə́ najə̄ ń toō tām̄ yā de kə́rēý gə̄ ń gírə̄n̄ kemdə́ tə́ kadə̄ nin̄ i de kə́ súmūú gə̄, ba a idən̄ tadə́ gír madə̄də́ gə̄ tə́ ní.

¹⁰ De gə̄ jōó aw̄n̄ kem kújə yā Kɔ́ɔ̄ɓē tə́ yā ndɔ̄ȳ. Nge kə́ kógə̄ḿ i Parijiyḛ ō, nge kə́ noō i nge taā lambóo ō.

¹¹ Parijiyḛ ní ra dɔɔ́ ba ndɔ̄ȳ Nə́ɓā kemən tə́ tītə̄ ń toō beé, əda na: Nə́ɓā, m̄-ndadī, tɔdɔ̄ mā i tītə̄ gotə deē madə́ḿ gə̄ ń nin̄ i ngé ɓogə gə̄ ō, i de kə́ súmūú aĺ gə̄ ō, i ngé sāā naā loo kaya tə́ ō ní alé. m̄-ndadī ngá̰ý ɓáý to̰ tām̄ mā i tītə̄ nge taā lambóó ń toō aĺ ō.

¹² Dan ndɔ̄ kə́ sīrí gə̄ tə́ ní, kə́ jōó gə̄ m-ā m̄-*ndiń ɓō tām̄ yāí tə́. Tá yá̰a̰ gə̄ ń m-ə́nge malang ní, m-ɔ̄r̄ dɔ kə́ nge ko̰ kutə m-ādī ɓáý to̰.

¹³ Nge taā lambóó ní ra dan gə̄lā sa̰y. Ni gḛy kun kumən kə̄ dɔɔ́ dɔ rā̰ tə́ sḛ́ý aĺ bátə́, ba a ənda nganjən ō, a əda tītə̄ ń toō beé ō na: Nə́ɓā, ī-mā̰ȳ rɔ̄í dɔḿ mā nge rāā majaĺ ń toō tə́!

¹⁴ Ādə̄ m-ə́dásí, dan ń nge taā lambóó ń toō tél aw̄ ɓēé ní, ni-tél de kə́ súmūú, ba madə̄n tá tél de kə́ súmūú alé. Tɔdɔ̄ deē malang ń a ɔsə rɔ̄n kə̄ dɔɔ́ ní, a télən̄ seneé kə̄ nang tə́, ba deē ń a tél kə rɔ̄neé kə̄ nang tə́ ní, a ɔsənən̄ kə̄ dɔɔ́.

Jeju nin̄ kə ngáń kə́ dūú gēé

¹⁵ De gə̄ reēn̄ kə ngán gēé rɔ̄ Jeju tə́ kadə̄ ni-əndā jīn dɔdə́ tə́. Ba dan ń ngé ndóō yá̰a̰ yān gə̄ a̰a̰n̄ beé anī, ndángə̄n̄də́ kɔ̄ɔ́.

¹⁶ Banī Jeju ɓāŕ ngán gə̄ kadə̄ reēn̄ rɔ̄n tə́ ba əda na: Əya̰ī ngáń kə́ dūú gə̄ ādī reēn̄ rɔ̄ḿ tə́, ba ī-lōōī kɔgə̄də́, tɔdɔ̄ i de kə́ tītə̄də́ beē gə̄ n Ɓē ko̰o̰ yā Nə́ɓā i tām̄ yādə́ tə́ ní.

¹⁷ Ādə̄ m-ə́dásí najə̄ kə́ bo ngá̰ý: Deē ń a əhɔ Ɓē ko̰o̰ yā Nə́ɓā kə̄ rɔ̄n tə́ tītə̄ ń ngáń kə́ dūú gə̄ a rāān̄nəń ní aĺ anī, kɔ́ɔ̄ a udə kemeé aĺ bátə́.

Jeju nin̄ kə ngār kə́ ənge yá̰á̰ ngá̰ý

¹⁸ Ngār kógə̄ḿ dəje Jeju najə̄ əda na: Ngol kə́ majə, i rí n kə m-ā m̄-rāā tá yā kadə̄ m-ndiń kə kumḿ ngándáńg ní?

¹⁹ Anī Jeju ədan na: I tām̄ rí tə́ ā ī-ɓārə́m̄ de kə́ majə ní? De kə́ majə gətóo, i Nə́ɓā ngóy n i de kə́ majə ní.

²⁰ Ī-ger̄ gō míndə gə̄ ń toō: Ī-rāā rāȳ aĺ ō, ī-tɔ̄l̄ deē aĺ ō, ī-ɓogə aĺ ō, ī-tetə najə̄ dɔ deē tə́ aĺ ō, ī-rɔȳ bɔbí ō kó̰ó̰í ō ní.

²¹ Anī ngār ní əda na: Nin̄ ń noō malang ní i yá̰a̰ gə̄ kə́ m̄-rāādə́ i kə ngōn̄ dūúḿ beé.

²² Dan ń Jeju oō beé anī, tél ədan na: Na̰yiī yá̰á̰ kógə̄ḿ ɓáý: Ígə́ yá̰a̰ yāí gə̄ malang, ī-nə̄ɓō narən ngé ndoō gə̄, anī ā āw̄ kə dūbə̄ yá̰a̰ kənge gə̄ dɔ rā̰ tə́, ba gō tə́ anī, ī-reē ún gōḿ.

²³ Ba dan ń ni-oō najə̄ gə̄ ń toō beé anī, rɔ̄n nelə̄n alé, tɔdɔ̄ ni i de kə́ ənge yá̰á̰ ngá̰ý.

²⁴ Dan ń Jeju a̰a̰ beé anī, əda na: Kudə kem Ɓē ko̰o̰ yā Nə́ɓā tə́ i yá̰á̰ kə́ ngan̄g ngá̰ý tām̄ yā de kə́ ənge yá̰á̰ ngá̰ý tə́.

²⁵ Tɔdɔ̄, kadə̄ jámbal mān̄ kum bəlo líbə́ri tə́ ní, i yá̰á̰ kə́ ngan̄g, ba kadə̄ de kə́ ənge yá̰á̰ ngá̰ý udə kem Ɓē ko̰o̰ yā Nə́ɓā tə́ ní, i yá̰á̰ kə́ ngan̄g tɔȳ ɓáý.

²⁶ De gə̄ ń oōn̄ najə̄ ń noō ní tél ədan̄ na: Ba ré i beé anī, i náā n a asə kadə̄ a ajənən̄ ní?

²⁷ Anī Jeju əda na: A dum̄ de gə̄ banī yá̰á̰ kə́ dum̄ Nə́ɓā gətóo.

²⁸ Tā anī Piyer əda na: Á̰a̰ā̰, ń toō jḭḭ j-əya̰ yá̰a̰ yājí gə̄ kɔ̄ɔ́ ba j-un gōí ní?

²⁹ Anī Jeju əda na: Ādə̄ m-ə́dásí najə̄ kə́ bo ngá̰ý, reē deē kógə̄ḿ əya̰ kújə yān, aláa i nə̄yá̰n, aláa i ngákó̰o̰n gə̄, aláa i ngánən gə̄ kɔ̄ɔ́ tām̄ yā Ɓē ko̰o̰ yā Nə́ɓā tə́ anī,

³⁰ kɔ́ɔ̄ a ənge mān̄ nin̄ ń noō nja ngá̰ý kem ndɔ̄ gə̄ ń toō tə́ ō, a ndi kə kumneé ngándáńg dɔ nang kə́ kijə kə́ ndɔ̄ń tə́ ō.

Jeju tāā najə̄ koyn ō, ndólə̄n ō nja kə́ nge ko̰ mətá

³¹ Gō tə́ anī, Jeju ɔy ngé kə́ kutə gidə i jōó gə̄ ní seneé ba ədadə́ na: Á̰a̰ī, j-āwī i ta kə́ Jerusalem. Yá̰a̰ gə̄ malang ń ngé koō ta gə̄ ndangən̄ sɔɔ̄ dɔ Ngōn̄ Deē ní a reēn̄ yā kudə gírí.

³² A əlanən̄ jī de gə̄ kə́ nin̄ i Jipə aĺ gə̄ tə́. A lurnən̄ ō, a əlan̄ rɔ̄sɔl̄ dɔn tə́ ō, a tībə̄n̄ hōr̄ dɔn tə́ ō,

³³ a tə̄ndānən̄ kə mərawaá ō, tá a tɔ̄l̄nən̄ ba ndɔ̄ kə́ nge ko̰ mətá tə́ anī, a ndólə̄n.

³⁴ Ba nin̄-gerə̄n̄ kum yá̰á̰ kógə̄ḿ danaá sḛ́ý aĺ bátə́. Najə̄ ní to i yá̰á̰ kə́ mundə̄ tə́ ta kumdə́ tə́, adə̄ nin̄-gerə̄n̄ kum yá̰á̰ ń ni ədadə́ ní alé.

Nge kum tɔ̄ɔ̄ kə́ Jeriko

³⁵ Dan ngé ń noō tə́ ní, Jeju a aw̄ ta kə́ Jeriko ngɔr, anī nge kum tɔ̄ɔ̄ kógə̄ḿ ndi nang tə́ bɔ̄gə̄ róbə́ tə́ ndi a gəde yá̰a̰.

³⁶ Dan ń ni-oō kōō kósə de gə̄ kə́ a mānə̄n̄ ɓuk ɓuk anī, dəje ké i rí wa.

³⁷ Anī ədanən̄ na i Jeju kə́ Najaret n a mān̄ ní.

³⁸ Anī ni-əga kɔŕ əda na: Jeju, Ngōn̄ kaa Dabid, á̰a̰ kum tō ndoō yāḿ.

³⁹ Ngé gə̄ ń a njə̄rān̄ kété ní ndángə̄nən̄ kadə̄ utə̄ tan, ba ni-əga kɔŕ ngá̰ý tɔȳ kə́ kété ɓáý əda na: Ngōn̄ kaa Dabid, á̰a̰ kum tō ndoō yāḿ.

⁴⁰ Anī Jeju dəba, ba əda kadə̄ reēn̄ seneé rɔ̄n tə́. Dan ń reē ugə̄ ngɔr anī, Jeju dəjen na

⁴¹ ké gḛy kadə̄ kə n-rāā i rí tām̄ yān tə́ wa, anī ni-tél ədan na: Kɔ́ɔ̄ɓē, ī-rāā kadə̄ m-á̰a̰ loo!

⁴² Anī Jeju ədan na kə a̰a̰ loo, tɔdɔ̄ taā kem yān na ajən.

⁴³ Ni-a̰a̰ loo kə̄ ta jī tə́ noō, adə̄ ni-ɔtə a un gō Jeju kə kɔsə gɔn Nə́ɓā tan tə́. De gə̄ malang ń a̰ā̰n̄ yá̰á̰ ń toō ní tɔ̄ȳn̄ Nə́ɓā.