Najə̄ kə́ Majə yā Jeju ń Luk ndang ní 17 - Bibəl ta Sar̄

Majaĺ kə́ rāā ō, māȳ rɔ̄ ō

¹ Gō tə́ anī, Jeju əda ngé ndóō yá̰a̰ yān gə̄ na: Loo kadə̄ de kə́rēý gə̄ kə tə́sōn̄ kə gō hál madə̄də́ gə̄ ō, najə̄ kə́ tadə́ tə́ ō, aĺ ní gətóo i kə́ bátə́ gə̄ tə́, ba rɔ̄ tō ndoō i kə nge ń madə̄n gə̄ tə́sōn̄ sɔɔ̄ ń gō hálən kə́ majaĺ ō, gō najə̄ kə́ tan tə́ ō ní.

² I só tə́ ngá̰ý tām̄ yān tə́ kadə̄ do̰ō̰n̄ mbal̄ riī yá̰á̰ kə́ bo míndən tə́, ba bḭ́ḭ̄ ənīnən̄ kum bā bo tə́ kɔ̄ɔ́, tɔȳ kadə̄ ni-rāā adə̄ de kə́ kógə̄ḿ beē kə́ dan de kə́ dūú gə̄ ń toō tə́ əsō sɔɔ̄ ń dɔ hálən ō, najə̄ kə́ tan tə́ ō.

³ Sḭḭ̄ kɔ́ gə̄ ī-ndiī dɔ rɔ̄sí tə́ majə. Ré ngōkó̰ó̰í rāā yá̰á̰ kə́ majaĺ seí anī ī-ɓārə́n ba ɔ́jən kum ba ré ni-gḛy tūr̄ hálən anī, ī-māȳ rɔ̄í dɔn tə́.

⁴ Ba ré ni-rāā yá̰á̰ kə́ majaĺ seí nja sīrí ndɔ̄ mbang kógə̄ḿ tə́, ba tél reē ədaī nja sīrí ədaī na n-gḛy tūr̄ hálən anī, ī-māȳ rɔ̄í dɔn tə́.

Taā kem

⁵ Ngámbang kəla gə̄ ədan̄ Kɔ́ɔ̄ɓē na: Ādə̄jí taā kem dɔ madə̄ tə́ ɓáý to̰!

⁶ Kɔ́ɔ̄ɓē tél ədadə́ na: Ré taā kem yāsí bo asə kə kum mutardə gə̄gē anī, sḭḭ̄ ə́daī kāgə̄ kótə̄ ń ra noó najə̄, ə́daniī na kə ī-ɓə̄ngā kə gír ngəraí ba āw̄ ī-ra kum bā bo tə́ nú anī, a oō tasí.

Nge kəla a rāā i yá̰á̰ ń sɔɔ̄ dɔn ní ngóy

⁷ I náā dansí tə́ n, ré aw̄ kə nge kəla kə́ a ndɔr̄ adə̄n, aláa a ngɔ̄m̄ yá̰a̰ kul̄ yān gə̄, ba tél ndɔrɔ́ anī, a əda nge kəla ní na kə aw̄ láẃ, kə ndi nang tə́, kə əsa yá̰á̰ ní?

⁸ Najə̄ ń a ədan ní i kadə̄ rāā loo yá̰a̰ kəsa adə̄n ō, kə əla kūbə̄ kəla yān rɔ̄n tə́ ō, ba kə ətō yá̰a̰ kəsa kə̄ rɔ̄n tə́ bátə́ kadə̄ kə n-əsań yá̰a̰ ō, kə n-a̰ȳń ō oy tá, gogə́ anī kə nge kəla ní kə əsa yān ō a̰ȳ yān ō ɓáý aĺ a?

⁹ Ké ni-ndadə̄ nge kəla ń toō tām̄ yá̰a̰ gə̄ ń əndā dɔn tə́ kadə̄ rāā á rāā malang toó wa?

¹⁰ Yāsí sḭḭ̄ i tītə̄ ń noō ō, adə̄ dan ń ī-rāāī yá̰a̰ gə̄ ń Nə́ɓā əndā dɔsí tə́ kadə̄ ī-rāāī ní malang oy anī, majə kadə̄ ə́daī tītə̄ ń toō na: Jḭḭ̄ i ngáń ngé kəla gə̄ karī, adə̄ jə-rāāī i yá̰á̰ ń sɔɔ̄ kadə̄ jə-rāāī ní ngóy.

Jeju tɔ̄l̄ bānjə̄ dɔ de gə̄ tə́ kutə kógə̄ḿ

¹¹ Dan ń noō tə́ ní Jeju a un róbə mbā yān ta kaw̄ Jerusalem, aw̄ mān̄ dɔ nin̄ nang kə́ Samari nin̄ kə Galile tə́.

¹² Ni a udə kə̄ kem ɓē kógə̄ḿ tə́ anī, ngé bānjə̄ gə̄ kutə teē a ɔjən̄ non. Nin̄-ndan̄ sa̰y,

¹³ ba ədan̄ Jeju najə̄ kə ndūdə́ kə́ boó na: Jeju, ngoljí, á̰a̰ kum tō ndoō yājí!

¹⁴ Dan ń Jeju a̰a̰də́ tītə̄ ń noō ní a, tél ədadə́ na: Āw̄ ɔ́jiī rɔ̄sí ngé tun̄ yá̰a̰ gə̄. Ba dan ń nin̄-aw̄n̄ ɓáý á a njə̄rān̄ róbó ní a, bānjə̄ kə́ rɔ̄də́ tə́ ur̄ kɔ̄ɔ́.

¹⁵ Dan ń nge kógə̄ḿ dandə́ tə́ a̰a̰ kadə̄ bānjə̄ ur̄ rɔ̄n tə́ kɔ̄ɔ́ anī, tél dɔ njan tə́, a ɔsə gɔn Nə́ɓā dɔɔ́ dɔɔ́ kə ndūn kə́ boó,

¹⁶ reē ɔsə non nang tə́ nja Jeju tə́ ba ndadə̄n, ba deē ngeé ń noō i de kə́ Samari.

¹⁷ Anī Jeju un najə̄ əda na: Adə̄ ngé bānjə̄ kə́ kutə gə̄ ní, bānjə̄ ur̄ rɔ̄də́ tə́ kɔ̄ɔ́ malang aĺ i mbée a? Ngé kə́ ndōhó gə̄ ní, nin̄ i rá?

¹⁸ Deē a̰a̰ de kə́ rang sḛ́ý kə́ tél dɔ njan tə́ reē ɔsəń gɔn Nə́ɓā aĺ ní, ba i nge kə́ tə̄rā ń toō tá ngóy a?

¹⁹ Gō tə́ anī ədan na: Ḭ́ḭ dɔɔ́ ba āw̄ loo yāí, taā kem yāí ajiī.

Najə̄ kə́ dɔ ta reē Ɓē ko̰o̰ yā Nə́ɓā tə́

²⁰ Parijiyḛ gə̄ dəjen̄ Jeju najə̄ dɔ ndɔ̄ ń Ɓē ko̰o̰ yā Nə́ɓā a reēń tə́ ní anī, ni-tél ədadə́ na: Ta reē Ɓē ko̰o̰ yā Nə́ɓā i yá̰á̰ kə́ to kadə̄ á̰a̰ī kə kumsí njóý njóý alé,

²¹ tá ā ásiī kəda na i ni n to toó aláa i ni n to nú noō alé. Tɔdɔ̄ á̰a̰ī, Ɓē ko̰o̰ yā Nə́ɓā i dɔ dáńsí tə́ kɔ̄ɔ́ ɓá.

²² Ni-əda ngé ndóō yá̰a̰ yān gə̄ ɓáý to̰ na: Ndɔ̄ gə̄ a reēn̄ noó kadə̄ sḭḭ̄ ā ī-ndə̄ngāī ka̰a̰ ndɔ̄ kə́ kal kógə̄ḿ beē dan ndɔ̄ gə̄ yā Ngōn̄ Deē tə́, ba ā á̰a̰ī ndɔ̄ ní alé.

²³ A ədan̄sí na i ni n toó, aláa ni n nú noō. Ba ī-lōōī kaw̄ sōn̄g gō.

²⁴ Tɔdɔ̄ tītə̄ ń man̄ tel̄ dām̄ dɔ rā̰ kógə̄ḿ tə́ a a unjə̄ loo bátə́ yā gān̄g dāmə̄n kə́ rang tə́ ní, ndɔ̄ reē Ngōn̄ Deē tə́ a to i tītə̄ ń noō ō.

²⁵ Banī i gáŕ kadə̄ ni a a̰a̰ tápə̄ ngá̰ý ō, kadə̄ de kə́ ɓāl̄ ń toō tə́ gə̄ a mbātə́nən̄ ō pá tá.

²⁶ Ndɔ̄ gə̄ yā Ngōn̄ Deē tə́ anī, a to i tītə̄ nəkɔ́ kə́ ndɔ̄ gə̄ yā Noe tə́ ō.

²⁷ De gə̄ əsan̄ yá̰a̰ ō, a̰ȳn̄ ō, táān̄ naā ō, bátə́ kadə̄ ugə̄ń ndɔ̄ ń Noe udəń kem to bo tə́ á man̄ kaw̄ tɔ̄l̄ńdə́ malang kɔ̄ɔ́ ní.

²⁸ A to i tītə̄ kə́ ndɔ̄ gə̄ yā Lot tə́ ō. De gə̄ əsan̄ ō, a̰ȳn̄ ō, mangən̄ yá̰a̰ gə̄ ō, igən̄ yá̰a̰ gə̄ ō, əndān̄ kāgə̄ gə̄ ō, rāān̄ kújə gə̄ ō.

²⁹ Ba ndɔ̄ ń Lot teēń kem ɓē kə́ Sodom tə́ ní, Nə́ɓā rāā adə̄ hor ō, hor bursu ō ḭḭn̄ dɔ rā̰ tə́ edən̄ man̄ tə́ kə̄ dɔdə́ tə́, adə̄ nin̄ malang oyn̄ kɔ̄ɔ́.

³⁰ Ndɔ̄ ń kadə̄ Ngōn̄ Deē a teēń hɔy tə́ ní a to i tītə̄ ń noō ō.

³¹ Ndɔ̄ ń noō tə́ ní, deē ń ndi dɔ kújú dɔɔ́ ba yá̰a̰ yān gə̄ i kem kújú ní, ādə̄ kɔ́ɔ̄ risə yā kɔydə́ alé, deē ń ndi ndɔrɔ́ ní, ādə̄ kɔ́ɔ̄ tél reē ɓēé gogə́ aĺ ō.

³² Ādə̄ əga kemsí dɔ nə̄yá̰ Lot tə́.

³³ Deē ń o̰o̰n ta rɔ̄n ngá̰ý kadə̄ kə n-tḭ̄ḭ̄ ta aĺ ní a tḭ̄ḭ̄ ta rɔ̄n. Ba deē ń tḭ̄ḭ̄ ta rɔ̄n ní kɔ́ɔ̄ a ajə rɔ̄n.

³⁴ Ādə̄ m-ə́dásí, dan ndɔ̄ɔ́ ndɔ̄ ń noō tə́ ní, ré de gə̄ i jōó n ton̄ dɔ tə̄rá kə́ kógə̄ḿ beē tə́ anī, a unən̄ nge kə́ kógə̄ḿ, ba a əya̰n̄ nge kə́rēý kɔ̄ɔ́.

³⁵ Ré de kə́ dəyá̰ gə̄ jōó ra a urən̄ yá̰a̰ anī, a unən̄ nge kógə̄ḿ ba əya̰n̄ nge kə́rēý.

³⁶ Ré de kə́ dəngam gə̄ jōó ran̄ ta ndɔr̄ tə́ anī, a unən̄ nge kə́ kógə̄ḿ ba a əya̰n̄ nge kə́rēý.

³⁷ Anī loo ń noō tə́ ngé ndóō yá̰a̰ yān gə̄ dəjenən̄ ədan na: Ba i rá bang Kɔ́ɔ̄ɓē? Anī ədadə́ na: Loo ń nīń i tū tə́ ní, māl̄ gə̄ a kánə̄n̄ naā tū tə́ ō.