Najə̄ kə́ Majə yā Jeju ń Luk ndang ní 16 - Bibəl ta Sar̄

Nge ngɔ̄m̄ yá̰á̰ kə́ sew aĺ

¹ Jeju əda ngé ndóō yá̰a̰ yān gə̄ ɓáý to̰ na: Deē kógə̄ḿ kə́ ənge yá̰á̰ ngá̰ý əndā deē kógə̄ḿ dɔ yá̰a̰ yān gə̄ tə́ kadə̄ ngɔ̄m̄. Anī sə̄lān̄ gír deē ngeé ń toō rɔ̄n tə́ na nujə yá̰a̰ yān gə̄ ngá̰ý.

² Ni ɓārə́n ba dəjen na: I najə̄ kə́ ba̰ý n m-ōō dɔí tə́ toō? Ī-tə́da kɔ̄r̄ yá̰a̰ yāí gə̄ ń ī-ngɔ̄m̄ ní ādə̄ m-á̰a̰ā̰, tɔdɔ̄ ngɔlaā ní gír gān̄g tā, ḭ̄ ā ī-ngɔ̄m̄ yá̰a̰ yāḿ to̰ alé.

³ Deē ní əda kə̄ kemən tə́ na: Ń toō ní, kɔ́ɔ̄ḿ a ɔrə̄m̄ kɔ̄ɔ́ kem ngɔ̄m̄ yá̰a̰ gə̄ tə́ ní, kə m̄-rāā i rí tā? Kə m̄-ndɔr̄ i mbée a? Mā tɔ́gə́ḿ kə́ yā ndɔrə̄ń gətóo ō. Kə m̄-gəde i yá̰a̰ a? Rɔ̄ḿ sɔlə̄m̄ ngá̰ý loon tə́ ō.

⁴ Yá̰á̰ ń kadə̄ m̄-rāā tá kadə̄ ré ɔr̄mə̄n̄ kəlaá anī, m-ə́ngeń de gə̄ kə́ kadə̄ əhɔmə̄n̄ kə̄ rɔ̄də́ tə́ kem kújə yādə́ gə̄ tə́ ní, m̄-ger̄ tā!

⁵ Ni ɓāŕ de gə̄ ń kə̄rā yā kɔ́ɔ̄n i dɔdə́ tə́ ní adə̄ reēn̄ kógə̄ḿ kógə̄ḿ, ba əda nge kə́ ta kəga dɔ na: Kə̄rā yā kɔ́ɔ̄ḿ kə́ dɔí tə́ i kóndóńg?

⁶ Deē ní əda na: Kū yibə̄ ɓú. Anī ni-tél ədan na: Ī-taā makətūbə̄ kə̄rā yāí ní ń toō, ba ī-ndi nang tə́, ī-ndang láẃ tū tə́ na i kutə mí.

⁷ Gō tə́ anī əda nge kə́ rang na: Ba ḭ̄, kə́ dɔí tə́ i kóndóńg? Deē ní əda na: I mbɔr̄ gémē ɓú. Anī tél ədan na: Ī-taā makətūbə̄ kə̄rā yāí ní ń toō ba ī-ndang kemeé na i kutə sɔ́sɔ́.

⁸ Anī kɔ́ɔ̄ nge kəla kə́ sew aĺ ngeé ń toō tɔ̄yn, tɔdɔ̄ ni-rāā yá̰a̰ yān ní i kə kum kedēé ngá̰ý. Tām̄ ngáń kə́ dɔ nang tə́ laā gə̄ ní, kumdə́ edə̄ kə madə̄də́ gēé mān̄ yā ngán kə́ kum loo kə́ unjə̄ kow tə́ gə̄.

⁹ Ba mā, ādə̄ m-ə́dásí: Ī-rāāī madə̄ naā kə gúrsə ń i yá̰a̰ yā de kə́ sew aĺ gə̄ ní, yā kadə̄ ré ndɔ̄ ń gətóo jīsí tə́ anī, madə̄sí gə̄ əhɔn̄sí kə̄ rɔ̄də́ tə́ gíŕ kújə tandā gə̄ ń a ton̄ ngándáńg tə́ ní.

¹⁰ Deē ń ni i de kə́ sew loo ngɔ̄m̄ yá̰á̰ kə́ sḛ́ý beē gə̄ tə́ ní, ni a tél de kə́ sew loo ngɔ̄m̄ yá̰á̰ kə́ ngá̰ý gə̄ tə́ ō. Ba deē ń ni i de kə́ sew alé loo ngɔ̄m̄ yá̰á̰ kə́ sḛ́ý beē gə̄ tə́ ní, ni a tél de kə́ sew alé loo ngɔ̄m̄ yá̰á̰ kə́ ngá̰ý gə̄ tə́ ō.

¹¹ Ré sḭḭ̄ ī-téliī de kə́ sew gə̄ loo ngɔ̄m̄ gúrsə ń i yá̰a̰ yā de kə́ sew aĺ gə̄ tə́ ní anī, i náā ɓáý n a adə̄sí yāsí sḭḭ̄ kɔ́ gə̄ ní?

¹² Yá̰a̰ kənge gə̄ ń rāān̄ rɔ̄də́ i mbā tə́ ní, ré sḭḭ̄ ī-téliī de kə́ sew gə̄ loo ngɔ̄m̄də́ tə́ aĺ anī, i náā ɓáý n a adə̄sí yāsí sḭḭ̄ kɔ́ gə̄ ní?

¹³ De kə́ nge rāā kəla kə́ kem kújú kə́ asə rāā kəla yā kɔ́ɔ̄n gə̄ jōó gətóo. Ré ni-im̄ kə́ kógə̄ḿ ba táŕ kə́rēý aĺ ɓáa, a əhɔ gō nge kógə̄ḿ ba a kídə̄ kə́rēý. Sḭḭ̄ ásiī rāā kəla yā Nə́ɓā ō, yā nar ō naā tə́ mbak alé.

Najə̄ kə́ dɔ Ɓē ko̰o̰ yā Nə́ɓā tə́ ō, ndū najə̄ kə́ dɔ tə́ ō

¹⁴ Parijiyḛ gə̄ nel̄də́ nar ngá̰ý, adə̄ dan ń nin̄-oōn̄ najə̄ gə̄ ń toō anī, lurən̄ Jeju.

¹⁵ Ba Jeju ədadə́ na: Sḭḭ̄ i ngé kɔjə rɔ̄sí gə̄ ta kum de gə̄ tə́, kadə̄ sḭḭ̄ na i de kə́ súmūú gə̄, ba Nə́ɓā ger̄ kemsí, tɔdɔ̄ yá̰á̰ ń de gə̄ ɔsən̄ kə̄ dɔɔ́ ní i yá̰á̰ kə́ to yḛr kum ngá̰ý ta kum Nə́ɓā tə́.

¹⁶ Ndū najə̄ yā Moijə ō, makətūbə̄ yā ngé koō ta gə̄ ō, ton̄ bátə́ ugə̄ń ɓāl̄ yā Ja̰a̰ tə́. Ba əla gír ndɔ̄ nəkɔ́ ń noō tə́ ní, ənīn̄ mbēr̄ Najə̄ kə́ Majə kə́ dɔ Ɓē ko̰o̰ yā Nə́ɓā tə́, adə̄ i ngé gə̄ ń a rɔ̄ɔ̄n̄ kə ngangāá ngá̰ý ní n a taān̄ ní.

¹⁷ Kadə̄ dɔ rā̰ ō, dɔ nang ō mānə̄n̄ ní, nge ń noō i yá̰á̰ kə́ ngan̄g aĺ bátə́ tɔȳ kadə̄ kal ndə̄já makətūbə̄ ndū najə̄ yā Nə́ɓā kə́ kógə̄ḿ udə kɔ̄ɔ́.

¹⁸ Deē ń mbātə́ nə̄yá̰n ba taāń kə́ rang ní, rāȳ i mbée ō, tá deē ń taā dəyá̰ kə́ ngaan mbātə́n ní, rāȳ i mbée ō.

Nge kənge yá̰á̰ ngá̰ý ō, Lajar kə́ nge rɔ̄ ndoō ō

¹⁹ Dəngam kógə̄ḿ kə́ ənge yá̰á̰ ngá̰ý ō, o̰ō̰ kūbə̄ kə́ kərē ning ō, sɔl̄ lɔ́ḿ lɔ́ḿ gə̄ ō, a əsa i yá̰á̰ kə́ majə majə gə̄ kə dɔ ndɔ̄ gə̄ ō, ndi kem ɓē kógə̄ḿ tə́ noō.

²⁰ Deē kógə̄ḿ kə́ nge ndoō kə́ rīn na i Lajar, rɔ̄n bə́gā do malang, to ta róbə́ tə́ ndágá tan tə́.

²¹ Ndɔ̄ kumən kəsa yá̰a̰ gə̄ ń a tə́sōn̄ kɔ̄ɔ́ ta kār̄ kəsa yā nge kənge yá̰á̰ tə́ ní tā, ba loon gə̄ tóo, adə̄ bísə gə̄ reē tɔ̄nə́n̄ kum don gə̄ ní.

²² Gō tə́ anī, nge ndoō ní oy, adə̄ de kə́ dɔ rā̰ tə́ gə̄ un aw̄n̄ seneé, əndānən̄ kadə Abəraham tə́ ngɔr. Nge kənge yá̰á̰ ní oy yān ō, adə̄ dubə̄nən̄.

²³ Dan ń nge kənge yá̰a̰ ngeé ń toō a̰a̰ tápə̄ ngá̰ý loo kə́ ɓádá tə́ ní a, ənī kumən kə̄ dɔɔ́ anī, a̰a̰ Abəraham sa̰y ō, Lajar kə́ ndi kadən tə́ ngɔr ō.

²⁴ Loo ń noō tə́ ní un ndūn kə̄ dɔɔ́ ngá̰ý, ədań na: Bɔbə́ḿ Abəraham, á̰a̰ kum tō ndoō yāḿ, ba ə́la Lajar kadə̄ əla ta ngōn̄ jīn kum man̄ tə́, reē sɔlə̄ń ta ndo̰ḿ, tɔdɔ̄ rɔ̄ḿ tōrə̄m̄ ngá̰ý kum hor ń toō tə́.

²⁵ Anī Abəraham tél ədan na: Ngōnə̄ḿ, ādə̄ əga kemií na, dan ń ḭ̄ ī-ndi dɔ nang tə́ ɓáý ní, ḭ̄ ə́ngé yá̰á̰ kə́ majə yāí gə̄ ō, Lajar ní ənge i yá̰á̰ kə́ majaĺ gə̄ ō. Ngɔlaā ní ni-ənge kem sɔl̄ banī yāí i kadə̄ ə́ngé yá̰á̰ kə́ tōr̄.

²⁶ Banī yá̰á̰ kə́ rang ɓáý to̰ ní, bəlo kə́ bo ngá̰ý i mbo̰ō̰jí jḭḭ tə́ ō sḭḭ̄ tə́ ō, adə̄ ngé gə̄ ń gḛyn̄ kḭḭ laā kaw̄ kə̄ rɔ̄sí tə́ ní a asən̄ kaw̄ aĺ ō, deē kə ḭḭ rɔ̄sí tə́ nú reē rɔ̄jí tə́ laā aĺ ō.

²⁷ Anī əda na: Ré i beé anī, m̄-rāāī ɓɔ́ kadə̄ ə́la Lajar kem kújə yā bɔbə́ḿ tə́,

²⁸ tɔdɔ̄ m-āw̄ kə ngákó̰ó̰ḿ gə̄ noó i mí ní, ādə̄ tāādə́ ɓang ɓang kadə̄ reēn̄ kem loo rɔ̄ tōr̄ ń toō tə́ ɓáý to̰ alé.

²⁹ Anī Abəraham ədan na: Najə̄ń Moijə ō, ngé koō ta gə̄ ō ndangən̄ ní i jīdə́ tə́ noō, ādə̄ nin̄-rāān̄ yá̰á̰ ń əda ní!

³⁰ Anī əda na: A oōn̄ alé, bɔbə́ḿ Abəraham, ba ré i de kə́ teē ɓádá aw̄ rɔ̄də́ tə́ ní anī, a tūrə̄n̄ háĺdə́.

³¹ Banī Abəraham tél ədan ɓáý to̰ na: Ré nin̄-oōn̄ ta Moijə ō, ngé koō ta gə̄ ō aĺ anī, de kə́ rang, ká i kə́ ndól̄ dan de kə́ koy gə̄ tə́ gə̄gē anī, nin̄ a taān̄ kemən alé.