Najə̄ kə́ Majə yā Jeju ń Luk ndang ní 15 - Bibəl ta Sar̄

Kūjə́ najə̄ yā batə̄ kə́ ta tḭ̄ḭ̄

¹ Ngé taā lambóo gə̄ kə ngé rāā majaĺ gə̄ reēn̄ rɔ̄ Jeju tə́ malang yā koō najə̄ kɔrə̄n.

² Anī Parijiyḛ gə̄, kə ngé ndóō de gə̄ ndū najə̄ gə̄ a yṵ́rə̄n̄ najə̄ dɔ Jeju tə́ ədan̄ na: Deē ngeé ń toō ní a əhɔ ngé rāā majaĺ gə̄ kə̄ rɔ̄n tə́ ō, a əsa yá̰a̰ sedə́ ō wa!

³ Anī Jeju ədadə́ kūjə́ najə̄ ń toō na:

⁴ I náā dansí tə́ laā n ré kɔ́ɔ̄ aw̄ kə batə̄ gə̄ ɓú, ba tḭ̄ḭ̄ ta kógə̄ḿ anī, a əya̰ madə̄ kə́ kutə ndōhó gidə i ndōhó gə̄ dan bembeé yā kaw̄ń sāāń nja nge ń tan tḭ̄ḭ̄ ní bátə́ kadə̄ ré əngen tá tél aĺ ní.

⁵ Dan ń ni-aw̄ ba əngen ní anī, a unən kə rɔ̄nelēé yā kəgan dɔ bɔ̄gə̄n tə́.

⁶ Ba dan ń tél reē ugə̄ ɓēé looneé anī, a ɔsə dɔ madə̄n gə̄ ō, madə̄ ɓēn gə̄ ō naā tə́, yā kədadə́ na kə rāān̄ rɔ̄nel̄ seneé, tɔdɔ̄ na n-ənge batə̄ yān ń tan tḭ̄ḭ̄ ní kɔ̄ɔ́.

⁷ Ādə̄ m-ə́dásí na rɔ̄nel̄ a to dɔ rā̰ tə́ ngá̰ý tītə̄ ń noō ō tām̄ yā nge rāā majaĺ kə́ kógə̄ḿ beē kə́ tūr̄ hálən tə́ tɔȳ yā de kə́ súmūú kə́ kutə ndōhó gidə i ndōhó gə̄ kə́ ɓō tūr̄ háĺdə́ rāādə́ aĺ tə́.

Kūjə́ najə̄ yā njáŕ sə́lē arjā̰a̰ kə́ ta tḭ̄ḭ̄

⁸ Aláa i dəyá̰ kə́ rá n, ré aw̄ kə sə́lē gində̄ arjā̰a̰ kutə ba tḭ̄ḭ̄ ta kə́ kógə̄ḿ anī, a əndā hor tū lámba tə́ ō, a ɔy kem kújə ō, yā sāāń mer mer bátə́ kadə̄ ənge tá aĺ ní?

⁹ Ba dan ń ənge anī, a ɔsə dɔ madə̄n gə̄ ō, madə̄ ɓēn kə́ dəyá̰ gə̄ ō naā tə́, ba a ədadə́ na: Ī-rāāī rɔ̄nel̄ seḿ tɔdɔ̄ m-ə́ngé njáŕ sə́lē arjā̰a̰ yāḿ kə́ kógə̄ḿ ń m̄-tḭ̄ ta ní kɔ̄ɔ́.

¹⁰ Ādə̄ m-ə́dásí, de kə́ dɔ rā̰ tə́ gə̄ yā Nə́ɓā a rāān̄ rɔ̄nel̄ kə́ ngá̰ý tītə̄ ń noō ō, tām̄ yā nge rāā majaĺ kə́ kal kógə̄ḿ beē kə́ tūr̄ hálən tə́.

Kūjə́ najə̄ yā ngōn̄ kə́ tan tḭ̄ḭ̄

¹¹ Jeju ədadə́ ɓáý to̰ na: Deē kógə̄ḿ aw̄ kə ngáń kə́ dəngam gə̄ jōó.

¹² Nge kə́ dūú əda bɔbə̄n na: Bɔbə́ḿ, ādə̄m̄ núsə́ yá̰a̰ kənge ń sɔɔ̄ dɔḿ mā ní. Anī bɔbə̄də́ kēgə̄də́ yá̰a̰ yān gə̄ ní naā tə́.

¹³ Ba gō tə́ ndɔ̄ ngá̰ý aĺ ɓá anī, nge kə́ dūú ní kán̄ yá̰a̰ yān malang, ba aw̄ gō nang kógə̄ḿ kə́ sa̰y ngá̰ý tə́, aw̄ nujəń kɔ̄ɔ́ loo rāā kaya tə́.

¹⁴ Dan ń ni-nujəń malang kɔ̄ɔ́ anī ɓō əsō gō nang ngeé ń noō tə́, adə̄ ndoō əla gír rāān.

¹⁵ Ni-aw̄ nam̄ kə dəngam kógə̄ḿ kə́ gō nang ní tə́, adə̄ dəngam ní əlan bembeé ngɔ̄m̄ kosong yān gə̄ tə́.

¹⁶ Əndā kumən kəsa yá̰á̰ ń kosong gə̄ a əsan̄ ní tə́ gə̄gē, banī deē adə̄n alé.

¹⁷ Loo ń noō tə́ tél a gír̄ najə̄, əda na: Ngé gə̄ ń bɔbə́ḿ ɔydə́ kəlaá ní i kóndóńg, kə́ yá̰a̰ kəsa yādə́ əla loo kə̄ nang tə́ ō, mā m̄-to adə̄ ɓō a tɔ̄lə̄m̄ kɔ̄ɔ́ ō ní?

¹⁸ m̄-gḛy tél kaw̄ gogə́ rɔ̄ bɔbə́ḿ tə́ kədan na: Bɔbə́ḿ, m̄-rāā yá̰á̰ kə́ majaĺ kə Nə́ɓāá ō, seí ḭ̄ḭ́ ō.

¹⁹ Mā m̄-ndetə kadə̄ ā ī-ɓārə́m̄ ngōn̄ kemií to̰ alé, ba ī-rāām̄ deē kógə̄ḿ kə́ dan ngé kəla yāí gə̄ tə́ tə́ ní.

²⁰ Anī ni-ḭḭ dɔɔ́, aw̄ ta kaw̄ gogə́ rɔ̄ bɔbə̄n tə́. Dan ń ni i sa̰y ɓáý á bɔbə̄n a̰a̰ dɔn, anī kumən o̰o̰n seneé. Bɔbə̄n a̰ȳ ngɔ̄də̄ ɔjə non, əhɔn kə̄ rɔ̄n tə́ ɓirə̄n dagə.

²¹ Loo ń noō tə́ ngōn̄ ní əda bɔbə̄n na: Bɔbə́ḿ, m̄-rāā yá̰á̰ kə́ majaĺ kə Nə́ɓāá ō, seí ḭ̄ḭ́ ō. Adə̄ m̄-ndetə kadə̄ ā ī-ɓārə́m̄ ngōn̄ kemií to̰ alé.

²² Banī bɔbə̄n əda ngé kəla yān gə̄ na: Ī-reēī kə kūbə̄ kə́ majə mān̄ madə̄ gēé láẃ, ə́laī rɔ̄n tə́ ō, ə́laī kulūm̄ ta ngōn̄ jīn tə́ ō, ī-tə́laī sākə̄rā njan tə́ ō.

²³ Ī-reēī kə duĺ man̄g kə́ bo majə, ī-tɔ̄lī ādə̄ j-əsaī, ba jə-rāāī rɔ̄nel̄ ō,

²⁴ tɔdɔ̄ ngōnə̄ḿ ń toō oy i mbée, ba ngɔlaā ni-tél ajə gogə́, tan tḭ̄ḭ̄ i mbée ba j-əngeniī kɔ̄ɔ́ tā. Loo ń noō tə́ nin̄-əlan̄ gír rāā rɔ̄nel̄.

²⁵ Ba ngōn̄ hágən i ndɔrɔ́, adə̄ dan ń tél a reē kə̄ ɓēé ba ugə̄ gidə ɓēé ngɔr anī, oō ká̰ yá̰a̰ gə̄ kə́ a əndan̄ ō, oō kōō de gə̄ kə́ a ndāmə̄n̄ naā ō.

²⁶ Ni ɓāŕ nge kəla kógə̄ḿ ba dəjen kum, anī nge kəla ní ədan na:

²⁷ I ngōkó̰ó̰í kə́ dūú ní n tél reē á bɔbí tɔ̄l̄ duĺ man̄g kə́ bo majə ní, tɔdɔ̄ ni-tél əngen i kə rɔ̄ ngangāá.

²⁸ Loo ń noō tə́ ni-əsō wōn̄g kɔ̄ɔ́ ba mbātə́ kudə ndogó.

²⁹ Bɔbə̄n teē aw̄ rāān ɓɔ́, banī ni-tél əda bɔbə̄n na: Á̰a̰ā̰, i ɓāl̄ kóndóńg n mā m̄-rāań kəla seí ō, m̄-rāań yá̰a̰ malang ń ɔ́jəm̄ ní kanjə̄ kadə̄ m̄-mbātə́ taí tə́ ō ní, ba ngōn̄ bə̄yā̰ kógə̄ḿ gə̄gē ādə̄m̄ kadə̄ m̄-tɔ̄l̄ m̄-rāań rɔ̄nel̄ kə madə́ḿ gēé alé.

³⁰ Ba ngōnīí ń toō ń aw̄ nujə yá̰a̰ yāí malang kɔ̄ɔ́ kə ájə́ba gēé ní, tá ré tél reē, ādə̄ tɔ̄lə̄n̄ duĺ man̄g kə́ bo tām̄ yān tə́?

³¹ Anī bɔbə̄n ədan na: Ngōnə̄ḿ, ḭ̄ ī-ndi i seḿ ngándáńg, adə̄ yá̰a̰ yāḿ malang i yá̰a̰ yāí.

³² Ba majə ngá̰ý kadə̄ jə-rāāī yá̰á̰ kə́ to rɔ̄nel̄ gə̄, jə-rāāīneé rɔ̄nel̄, tɔdɔ̄ ngōkó̰ó̰í ń toō ní oy i mbée, ba tél ajə gogə́, ni-tan tḭ̄ḭ̄, ba ngɔlaā j-əngeniī kɔ̄ɔ́ tā.