Najə̄ kə́ Majə yā Jeju ń Luk ndang ní 10 - Bibəl ta Sar̄

Jeju əla ngé kə́ kutə sīrí gidə i jōó gə̄

¹ Gō yá̰a̰ gə̄ ń noō tə́ anī, Kɔ́ɔ̄ɓē gə̄rā de kə́ rang gə̄ kutə sīrí gidə i jōó, ba əladə́ jōó jōó kété non tə́ kem ɓē gə̄ malang ō, kə gō loo gə̄ ō ń nəkɔ́ a rāā yā kaw̄ tū tə́ ní.

² Ni ədadə́ na: Kōō kə́ yā kəja əla loo kə̄ nang tə́ tā, banī de kə́ ngé kəjan gə̄ i ngá̰ý aĺ ní, ī-dəjeī kɔ́ɔ̄ kōō ní adə̄ əla kə de gēé kadə̄ əjan̄ kōō yān.

³ Āwī! M-ə́lásí i tītə̄ ngán batə̄ gə̄ beé kə̄ dan soó gə̄ tə́.

⁴ Ī-lōōī kun ngong nar, aláa sángá, aláa sākə̄rā jīsí tə́ ō, ī-rāāī deē lápə́ya róbó aĺ ō.

⁵ Ré ā ī-rāāī yā kudə kə̄ kem kújə́ kə́rēý tə́ anī, ə́daī na kadə̄ kem sɔl̄ kə i kem kújə́ ń noō tə́, pá tá údiī ɓáý.

⁶ Ré deē kógə̄ḿ kə́ nge ndigə kem sɔl̄ lɔm yā Nə́ɓā i kem kújə́ ní tə́ anī, lápə́ya yāsí a adə̄n kem sɔl̄. Ba ré i beé aĺ anī kem sɔl̄ yāsí a tél yā reē rɔ̄sí tə́ gogə́.

⁷ Ī-ndiī kem kújə́ ní tə́. Yá̰a̰ kəsa ń a adə̄n̄sí kemeé ní ə́saī ō, yá̰á̰ kə́ yā ka̰ȳ ń a adə̄n̄sí kemeé ní ā̰yī ō. Tɔdɔ̄ majə kadə̄ de kə́ nge rāā kəla ənge yá̰a̰ kəndā nja yān. Ī-lōōī rāā ɓē mbā jōó.

⁸ Ré údiī kem ɓē kə́rēý tə́ ba əhɔn̄sí kə̄ rɔ̄də́ tə́ anī, ə́saī yá̰á̰ ń a adə̄n̄sí ní.

⁹ Ī-tɔ̄lī mo̰y dɔ de kə́ kemeé gə̄ tə́ ba ə́daīdə́ na: Ɓē ko̰o̰ yā Nə́ɓā reē bátə́ ugə̄ rɔ̄də́ tə́.

¹⁰ Ba ɓē ń údiī kemeé banī de kə́ tū tə́ gə̄ əhɔn̄sí kə̄ rɔ̄də́ tə́ aĺ ní, ī-teēī, āw̄ ī-raī ndágə loo kə́ kem ɓē ní tə́ ba ə́daī na:

¹¹ Bumbə́rú kə́ kem ɓē yāsí tə́ gə̄gē ń əhɔ njají ní jə-*gógə̄ j-adə̄sí gogə́. Ba yá̰á̰ ń kadə̄ ī-gerī ní n toó: Ɓē ko̰o̰ yā Nə́ɓā reē ugə̄ rɔ̄sí tə́.

¹² Ādə̄ m-ə́dásí, ndɔ̄ń tə́ anī yá̰á̰ ń a reē dɔ ɓē ń noō tə́ ní, yā ɓē kə́ Sodom i só tə́ ngá̰ý tɔȳ yān.

Ɓē gə̄ ń mbātə́n̄ taā kem ní

¹³ M-ə́da na rɔ̄ ndoō i kə de kə́ Korajḛḛ gə̄ ō, rɔ̄ ndoō i kə de kə́ Betsaida gə̄ ō! Tɔdɔ̄ yá̰á̰ kə́ yáā gə̄ ń rāān̄ yá̰a̰ loodə́ ní, nə́ngētə́ rāān̄ yá̰a̰ i Tir ō Sidon ō anī, de kə́ kemeé gə̄ a o̰ō̰n̄ kūbə̄ kəhɔ ndoō ō, a ndin̄ kum bū hor tə́ ō i jóó ngá̰ý yā kɔjəń kadə̄ na n-gḛyn̄ tūr̄ háĺdə́.

¹⁴ Adə̄ ndɔ̄ sarya tə́ ɓá anī yā de kə́ Tir gə̄ ō, de kə́ Sidon gə̄ ō a to só tə́ ngá̰ý tɔȳ yādə́.

¹⁵ Ba ḭ̄, Kapernaum, ɔ́jəń na ā ḭ́ḭ kum kə̄ dɔɔ́ yā kugə̄ no rā̰ tə́ a? A télən̄ seí kə̄ nang tə́ bátə́ yā kəlaī ɓádá.

¹⁶ Jeju əda ngé ndóō yá̰a̰ yān gə̄ ɓáý to̰ na: Deē ń oō najə̄ tasí tə́ ní kɔ́ɔ̄ oō najə̄ i taḿ mā tə́ ō, deē ń mbātə́sí ní kɔ́ɔ̄ mbātə́m̄ i mā ō. Ba deē ń mbātə́m̄ mā ní kɔ́ɔ̄ mbātə́ i deē ń əlam̄ mā ní.

Ngé kə́ kutə sīrí gidə i jōó gə̄ tél reē ugə̄n̄

¹⁷ Ngé kə́ kutə sīrí gidə i jōó gə̄ ní tél reē ugə̄n̄. Rɔ̄də́ nel̄də́ ngá̰ý adə̄ ədan̄ Jeju na: Kɔ́ɔ̄ɓē, dan ń j-əda rīí anī, ndíĺ kə́ majaĺ gə̄ gə̄gē oōn̄ tají ba rāān̄ yá̰á̰ ń j-ədadə́ ní.

¹⁸ Anī Jeju tél ədadə́ na: M-á̰a̰ Sətan ḭḭ dɔ rā̰ tə́ əsō tītə̄ man̄ kə́ tel̄ beé.

¹⁹ Ōōī, m-ādə̄sí tɔ́gə kadə̄ ī-tə́ɓāīneé dɔ lī gə̄ ō dɔ kókə́rang gə̄ ō, kadə̄ ī-tetiīneé tɔ́gə Sətan malang rɔ̄ɔ̄ kɔ̄ɔ́ ō, yá̰á̰ kógə̄ḿ a rāāsí aĺ ō.

²⁰ Ī-lōōī rāā rɔ̄nel̄ tām̄ koō kə́ ndíĺ kə́ majaĺ gə̄ oōn̄ tasí tə́, banī ī-rāāī rɔ̄nel̄ tām̄ yā rīsí gə̄ ń i kə́ ndang kɔ̄ɔ́ dɔ rā̰ tə́ ní.

Jeju rāā rɔ̄nel̄

²¹ Ndíĺ kə́ Táĺ adə̄ Jeju rɔ̄nel̄ kə́ ngá̰ý kemən tə́ kum mbang nəkɔ́ ń noō tə́, adə̄ Jeju əda na: Bɔbə́ḿ, ḭ̄ ń i Kɔ́ɔ̄ɓē dɔ rā̰ tə́ ō, dɔ nang tə́ ō ní, m̄-tɔ̄yī tām̄ teē ń i teē kum ngé kə́ dūú gə̄ dɔ yá̰á̰ ń ī-mundə̄ ngé kum kedə̄ gə̄ ō, ngé ger̄ yá̰a̰ gə̄ ō ní tə́. Rɔ̄kum, Bɔbə́ḿ, i kem ndaa yāí n rāā adə̄ ī-gḛyń kadə̄ to i tītə̄ ń noō ní.

²² Bɔbə́ḿ tél kə yá̰a̰ malang adə̄m̄. Deē kógə̄ḿ kə́ ger̄ Ngōn̄ gətóo ba i Bɔbə́ḿ nəkɔ́ tá ngóy ō, deē kógə̄ḿ kə́ ger̄ Bɔbə́ḿ gətóo ba i mā Ngōnən nəkɔ́ tá ngóy ō, i ngé gə̄ ń m̄-ndigə kɔjədə́ kə Bɔbə́ḿ ní tá ngóy ō.

²³ Gō tə́ anī Jeju tūr̄ rɔ̄n kə̄ rɔ̄ ngé ndóō yá̰a̰ yān gə̄ tə́ ba ədadə́ kə́ kéŕdə́ na: Yāsí i rɔ̄nel̄ tām̄ yá̰á̰ ń toō ń á̰a̰ī ní tə́!

²⁴ Tɔdɔ̄ ādə̄ m-ə́dásí, ngé koō ta gə̄ ngá̰ý ō, mban̄g gə̄ ngá̰ý ō, sāān̄ ka̰a̰ yá̰á̰ ń sḭḭ̄ á̰a̰ī toó banī a̰a̰n̄ aĺ ō, sāān̄ koō yá̰á̰ ń sḭḭ̄ ōōī toó banī oōn̄ aĺ ō.

Kūjə́ najə̄ yā de kə́ Samari kə́ nge rāā kem ndaa

²⁵ Deē kógə̄ḿ kə́ nge ndóō de gə̄ ndū najə̄ gə̄ ḭḭ dɔɔ́ ba dəje Jeju najə̄ yā nāānneé, əda na: Ngoləḿ, yá̰á̰ ń kadə̄ m̄-rāā tá m̄-ndiń kə kumḿ ngándáńg ní i rí?

²⁶ Anī Jeju dəjen najə̄ əda na: Ndangən̄ kem makətūbə̄ ndū najə̄ gə̄ tə́ na i rí? Ḭ̄ ī-tə́da i ba̰ý?

²⁷ Anī dəngam ní tél ədan na: Ā ī-táŕ Kɔ́ɔ̄ɓē Nə́ɓā yāí kə kemií malang ō, kə dā̰ rɔ̄í malang ō, kə tɔ́gí malang ō, kə gíŕ kə́ kemií tə́ malang ō, ā ī-tár deē madí tītə̄ ngarān̄g kum rɔ̄í īkɔ́ beé ō.

²⁸ Loo ń noō tə́ Jeju ədan na: Ī-tūr̄ najə̄ ní i gō tə́ bang. Ī-rāā yá̰a̰ gə̄ ń noō, anī ā ī-ndi kə kumií.

²⁹ Banī nge ndóō de gə̄ ndū najə̄ gə̄ ní sāā kɔjə kadə̄ najə̄ i yān, adə̄ ni-dəje Jeju na ké i náā n i madə̄n ní wa?

³⁰ Anī Jeju tél ədan na: Deē kógə̄ḿ ḭḭ Jerusalem a aw̄ kə̄ Jeriko. Ni-əsō jī ngé ɓogə gə̄ tə́ adə̄ ɔyn̄ yá̰a̰ yān malang ō, əndanən̄ ngá̰ý ō, ba ɔtə aw̄n̄ kɔ̄ɔ́. Nin̄-əya̰nən̄ adə̄ to i kə ta yo tə́.

³¹ Nge tun̄ yá̰á̰ kógə̄ḿ un róbə ngeé ń noō ō. Ni-reē teē dɔ deē ní tə́, ba dan ń a̰a̰n anī əndā tīl̄ ba mān̄ aw̄ loo yān.

³² Ngōn̄ Lebi kógə̄ḿ, reē ugə̄ loo ní tə́ ō, ba dan ń á̰a̰ deē ní anī ə̄ndā tīl̄ ba mān̄ aw̄ loo yān ō.

³³ Banī deē kógə̄ḿ kə́ Samari kə́ a aw̄ kə̄ mbā tə́ reē, ugə̄ rɔ̄ deē ní tə́ anī kumən o̰o̰n seneé,

³⁴ adə̄ aw̄ rɔ̄n tə́, ɓōkə́ yibə̄ ō kasə nduú ō ta don tə́ ba do̰ō̰ ta. Gō tə́ anī un əndān gidə kərō yān tə́, aw̄ seneé kújə ɓīī mbā gə̄ tə́ ō, a̰a̰ gōn majə ō.

³⁵ Teē kə ndɔ̄ kə́ noō anī ɔr̄ sə́lē arjā̰a̰ jōó adə̄ kɔ́ɔ̄ kújə́ ní ba ədan na: Á̰a̰ gōn majə, ba gúrsə ń ā ī-rāań yá̰a̰ tām̄ yān tə́ gotəḿ tə́ ní, ta télə́ḿ anī, m-ā m-ə̄gāī kə̄rān.

³⁶ Ní, dan de kə́ mətá gə̄ ń noō tə́ ní, i náā n ī-gír̄ kadə̄ i ni n i madə̄ dəngam ń əsō jī ngé ɓogə gə̄ tə́ ní?

³⁷ Nge ndóō de gə̄ ndū najə̄ gə̄ ní tél əda Jeju na: I nge ń rāā kem majə seneé noō n i madə̄n ní. Anī Jeju ədan na: Āw̄ ba ī-rāā tītə̄ ń noō ō.

Jeju i ɓē Martə nin̄ kə Mari

³⁸ Dan ń Jeju nin̄ kə ngé ndóō yá̰a̰ yān gēé i róbó ní, Jeju udə kem ɓē kógə̄ḿ tə́. Anī dəyá̰ kógə̄ḿ kə́ rīn na i Martə əhɔn mbā ɓēé looneé.

³⁹ Dəyá̰ ní aw̄ kə ngōkó̰o̰n kógə̄ḿ kə́ dəyá̰ kə́ rīn na i Mari. Ni kə́ Mari ngeé ń toō ndi nang tə́ nja Kɔ́ɔ̄ɓē tə́ a oōń najə̄ kɔrə̄n.

⁴⁰ Kəla kə́ kem kújú i ngá̰ý dɔ Martə tə́. Ni teē kə̄ dɔdə́ tə́ ba əda na: Kɔ́ɔ̄ɓē, kadə̄ ngōkó̰ó̰ḿ əya̰m̄ ta kəla tə́ kə kérə́ḿ ní usiī aĺ a? Ədan ādə̄ reē rāā seḿ sḛ́ý!

⁴¹ Banī Kɔ́ɔ̄ɓē tél ədan na: Martə, Martə, ḭ̄ ī-sōl̄ ō, ī-ndebə jak jak ō tām̄ yā yá̰á̰ kə́ gíŕdə́ i kósə́ ngá̰ý gə̄ tə́.

⁴² Banī yá̰á̰ ń i yá̰á̰ kə́ yā rāā gáŕ ní gír i kógə̄ḿ beē ngóy. I Mari n gə̄rā dāmə̄n kə́ majə tɔȳ madə̄ gə̄ ní, adə̄ deē a taā jīn tə́ alé.