LEBI GƏ̄ 9 - Bibəl ta Sar̄

Aaro̰ ō, ngánən gə̄ ō, əlan̄ gír kəla tun̄ yá̰a̰

¹ Ké ndɔ̄ kə́ nge ko̰ sɔ́sɔ́ anī, Moijə ɓāŕ Aaro̰ nin̄ kə ngánən gēé ō, ɓāŕ kum kɔɔ̄ gə̄ yā ngán Israel gə̄ ō,

² ba əda Aaro̰ na: Kə əhɔ duĺ man̄g kə́ yá̰a̰ rāā alé kadə̄ i yá̰a̰ tun̄ ké tām̄ yā majaĺ tə́ ō, bal batə̄ kə́ loon kógə̄ḿ nujə aĺ kə́ kadə̄ róōn̄ tām̄ yā Kɔ́ɔ̄ɓē tə́ ō, kə reē sedə́ ta kum Kɔ́ɔ̄ɓē tə́.

³ Gō tə́ anī kə əda ngán Israel gə̄ kadə̄ reēn̄ kə bal bə̄yā̰ kə́ yā tun̄ tām̄ yā majaĺ tə́ ō, kə duĺ man̄g kə́ ɓāl̄ kógə̄ḿ kə́ loon kógə̄ḿ nujə aĺ ō, ngōn̄ batə̄ kə́ ɓāl̄ kógə̄ḿ kə́ yá̰a̰ rāā aĺ ō, yā róōdə́ horoó kadə̄ Kɔ́ɔ̄ɓē.

⁴ Kə reēn̄ kə man̄g kə́ bəra kógə̄ḿ ō, bal batə̄ kógə̄ḿ ō, yā tun̄ tām̄ yā kem kógə̄ḿ tə́ ta kum Kɔ́ɔ̄ɓē tə́ ō, kə ndujə̄ kə́ lóȳ kə yibīí yā ndējə̄ ō, tɔdɔ̄ ɓōólaā Kɔ́ɔ̄ɓē na a ndɔ̄bə̄də́ kadə̄ a a̰a̰nən̄.

⁵ Dan ń reēn̄ kə yá̰a̰ gə̄ ń Moijə tə́dá ní ta kújə kənge naā tə́ oy anī, ngán Israel gə̄ malang ndɔ́tə̄n̄ kə̄ ngɔr ba reē ran̄ ta kum Kɔ́ɔ̄ɓē tə́.

⁶ Moijə əda na: N-ā n-ɔ́jə́ yá̰á̰ ń Kɔ́ɔ̄ɓē əda kadə̄ rāān̄ tá kɔsə gɔn yān na a ndɔ̄bəńdə́ ní.

⁷ Gō tə́ anī Moijə əda Aaro̰ na kə ndɔ́tə́ ngɔr kə́ rɔ̄ loo tun̄ yá̰á̰ tə́ ba kə tun̄ yá̰á̰ kə́ tām̄ majaĺ yān nəkɔ́ Aaro̰ tə́ ō, yá̰á̰ kə yā róō horoó kadə̄ Kɔ́ɔ̄ɓē tām̄ yān nəkɔ́ Aaro̰ tə́ ō. Kə rāań yá̰á̰ kə́ yā kutə̄ń dɔ majaĺ yān ō, yā ngán Israel gə̄ ō. Gō tə́ anī kə ndējə̄ yá̰a̰ yādə́ kə́ yā kutə̄ń dɔ majaĺ yādə́ ō, tītə̄ ń Kɔ́ɔ̄ɓē ədań ní.

⁸ Aaro̰ ndɔ́tə̄ kə̄ rɔ̄ loo tun̄ yá̰á̰ tə́ ba əja kɔ́ɔ duĺ man̄g kə́ tām̄ yā majaĺ yān nəkɔ́ tə́.

⁹ Ngánən gə̄ reēn̄ kə mósəneé adə̄ əla ta ngōn̄ jīn kum tə́ ɔdəń rāā ta gajə gə̄ kə́ dɔ loo tun̄ yá̰á̰ tə́ ō, ɓōkə́ gotə mósə́ ní nja loo tun̄ yá̰á̰ tə́ ō.

¹⁰ Ni-róō yibə̄ dā̰ ní ō, mənjon gə̄ ō, wurən ō, dɔ loo tun̄ yá̰á̰ tə́ tītə̄ ń Kɔ́ɔ̄ɓē ədań Moijə ní.

¹¹ Banī róō dā̰n ō, ngə̄rān ō, horoó gidə ɓē tə́ ndágá.

¹² Ni-əja kɔ́ɔ bal batə̄ kə́ yā róō horoó kadə̄ Kɔ́ɔ̄ɓē ní ō, ngánən gə̄ reēn̄ kə mósəneé, adə̄ sə̄kā girəń gidə loo tun̄ yá̰a̰ ō.

¹³ Adə̄nən̄ dā̰n kə́ gór̄yō gə̄ ō, dɔn ō, adə̄ róōdə́ horoó dɔ loo tun̄ yá̰á̰ tə́.

¹⁴ Ni-tə́go tiīn gə̄ ō, njan gə̄ ō, ba róōdə́ horoó naā tə́ kə dā̰n gə̄ ní dɔ loo tun̄ yá̰á̰ tə́.

¹⁵ Gō tə́ anī Aaro̰ ndējə̄ Kɔ́ɔ̄ɓē yá̰a̰ yā ngán Israel gə̄. Ni-əhɔ bal bə̄yā̰ kə́ tām̄ yā majaĺ yādə́ tə́ ní əja kɔ́ɔ ba tun̄ tītə̄ ń tunə̄ń duĺ man̄g ní.

¹⁶ Ni-ndējə̄ dā̰ kə́ jōó gə̄ yā róō horoó ní ō, tun̄ kə gō ń Kɔ́ɔ̄ɓē ədań ní ō.

¹⁷ Aaro̰ ndējə̄ ndujə̄. Ni-ndégə̄ dɔ ndujə̄ ní adə̄ rosə kem jīn, ba ɓōkə́ horoó dɔ yá̰a̰ tun̄ kə́ dəloí kə́ yā róō horoó kadə̄ Kɔ́ɔ̄ɓē tə́ adə̄ hor o̰o̰.

¹⁸ Ni-əja kɔ́ɔ man̄g kə́ bəra ō, kɔ́ɔ bal batə̄ ō ń ngán Israel gə̄ reēnəń yā tun̄ tām̄ yā kem kógə̄ḿ tə́ ní. Ngánən gə̄ reēn̄ kə mósə́də́ adə̄nən̄. Ni-taā mósə́ ní sə̄kā adə̄ gīr̄ gidə loo tun̄ yá̰a̰.

¹⁹ Nin̄ adə̄nən̄ loo man̄g kə́ bəra kə́ to yibə̄ gə̄ ō, loo batə̄ kə́ to yibə̄ gə̄ ō, adə̄ i kə̄lán ō, yibə̄n kə́ gidə tiīn gə̄ tə́ ō, mənjon gə̄ ō, wurən ō.

²⁰ Ngán Aaro̰ gə̄ ɓōkə́n̄ loo dā̰ gə̄ ń noō dɔ nganjə̄ dā̰ gə̄ ní tə́, ba gō tə́ anī Aaro̰ róōdə́ dɔ loo tun̄ yá̰á̰ tə́.

²¹ Aaro̰ ndējə̄ Kɔ́ɔ̄ɓē nganjə̄ dā̰ gə̄ ní ō, ɓúŕdə́ kə́ ko̰ó̰ gə̄ ō, kə gō looneé tītə̄ ń Moijə ədań ní.

²² Dan ń Aaro̰ tun̄ yá̰á̰ kə́ tām̄ yā majaĺ tə́ ō, róō yá̰a̰ horoó adə̄ Kɔ́ɔ̄ɓē ō, tun̄ yá̰á̰ kə́ tām̄ yā kem kógə̄ḿ tə́ ō, oy anī ni ɔy jīn kə̄ dɔɔ́ ō, tɔ́r̄ tan dɔ ngán Israel gə̄ tə́ ō, ba ɔtə ta loo tun̄ yá̰á̰ tə́.

²³ Moijə nin̄ kə Aaro̰ udən̄ kem kújə kənge naā tə́. Ba tél teēn̄ ndágá tɔ̄rə̄n̄ tadə́ dɔ de gə̄ tə́. Loo ń noō tə́ kɔsə gɔn yā Kɔ́ɔ̄ɓē ndɔ̄bə̄ ngán Israel gə̄ malang.

²⁴ Hor teē rɔ̄ Kɔ́ɔ̄ɓē tə́ o̰o̰ dā̰ kə́ yā róō horoó kadə̄ Kɔ́ɔ̄ɓē ō, yibə̄ dā̰ gə̄ ō ń ton̄ dɔ loo tun̄ yá̰á̰ tə́ ní adə̄ ngán Israel gə̄ malang a̰a̰n̄. Nin̄-əgan̄ kɔŕ rɔ̄nel̄ ba ɔsən̄ nodə́ nang tə́ rɔȳnəń Kɔ́ɔ̄ɓē.