LEBI GƏ̄ 8 - Bibəl ta Sar̄

Ɔrə̄n̄ kam̄ ngé tun̄ yá̰á̰ kə́ ta kəga dɔ gə̄

¹ Kɔ́ɔ̄ɓē əda Moijə na:

² Ī-ɓāŕ Aaro̰ nin̄ kə ngánən̄ gēé ō, ɔ́y kūbə̄ gə̄ ō, ún yibə̄ kə́ táĺ ō, ə́hɔ man̄g kə́ bəra kə́ tun̄ tām̄ yā majaĺ tə́ ō, bal batə̄ kə́ jōó gə̄ ō, ún keē ń mápá kə́ kanjə̄ kaa mápa gə̄ i kemeé ní ō,

³ ba ī-ɓāŕ ngán Israel gə̄ malang adə̄ kánə̄n̄ naā ta kújə kənge naā tə́.

⁴ Moijə rāā yá̰a̰ n Kɔ́ɔ̄ɓē ədan ní, adə̄ ngán Israel gə̄ kánə̄n̄ naā malang ta kújə kənge naā tə́.

⁵ Loo ń noō tə́ ni ədadə́ yá̰á̰ ń Kɔ́ɔ̄ɓē əda kadə̄ yā rāā ní.

⁶ Gō tə́ anī aw̄ reē kə Aaro̰ nin̄ kə ngánən gēé, ndogə̄də́ man̄.

⁷ Əla kūbə̄ kə́ ngāl̄ rɔ̄ Aaro̰ tə́ ō, do̰ō̰ ɓōdə̄n kə kəlaá ō. Əla kūbə̄ kə́ ngāl̄ kə́ rang kə́ gində̄ gō madə̄ tə́ dɔ tə́ ō, əla epod dɔ tə́ ō, ba do̰ō̰ ta kəlān gidən tə́.

⁸ Əla pekətoral gɔgərɔn tə́ ba tə́la urim ō, tumim ō, kemeé.

⁹ Ənda dɔn kə kūbə̄ kənda dɔɔ́ ō, əla yá̰á̰ súū rɔ̄ kə́ to tītə̄ hútə̄ kāgə̄ kə́ rāā kə lɔ́rɔ́ no kūbə̄ ní tə́ ō, tītə̄ ń Kɔ́ɔ̄ɓē ədanəń kadə̄ rāā ní.

¹⁰ Moijə ún yibə̄ kə́ táĺ, ur dɔ kújə ndi yā Kɔ́ɔ̄ɓē tə́ ō, dɔ yá̰á̰ kə́ kemeé tə́ malang ō, ɔrə̄ń kam̄də́ tām̄ yā Kɔ́ɔ̄ɓē tə́.

¹¹ Ni-sə̄kā yibə̄ ní dɔ loo tun̄ yá̰á̰ tə́ nja sīrí ō, sə̄kā dɔ ngán gájə́ yá̰a̰ rāā kəla gə̄ kə́ dɔ loo tun̄ tun̄ yá̰á̰ tə́ malang ō, sə̄kā dɔ bay kə́ yā ɓōkə́neé man̄ tə́go rɔ̄ tə́ ō, dɔ njabay ní tə́ ō, yā kɔrə̄ń kamdə́ tām̄ yā Kɔ́ɔ̄ɓē tə́.

¹² Ni-ur yibə̄ ní dɔ Aaro̰ tə́ ɔrə̄ń kamə̄n tām̄ yā Kɔ́ɔ̄ɓē tə́.

¹³ Gō tə́ anī Moijə əda ngán Aaro̰ gə̄ kadə̄ ndɔ́tə̄n̄ kə̄ rɔ̄n tə́ ngɔr, ba tə́la kūbə̄ kə́ ngāl̄ gə̄ rɔ̄də́ tə́ ō, tə́la jākā gə̄ dɔdə́ tə́ ō, tītə̄ ń Kɔ́ɔ̄ɓē ədań ní.

¹⁴ Moijə reē kə man̄g kə́ bəra kə́ yā tun̄ tām̄ yā majaĺ tə́ ní, adə̄ Aaro̰ nin̄ kə ngánən gēé əndān̄ jīdə́ dɔ tə́.

¹⁵ Moijə əja kɔ́ɔn. Ni-taā mósən ba ɔdə kə ta ngōn̄ jīneé rāā ta gajə gə̄ kə́ dɔ loo tun̄ yá̰á̰ tə́ yā kunəń majaĺ kə́ dɔ tə́ kɔ̄ɔ́. Gō tə́ anī, ni-tél kə gotə mósə́ ní ɓōkə́ nja loo tun̄ yá̰á̰ tə́. I tītə̄ ń noō n ni-ɔr̄ə̄ń kam̄ loo tun̄ yá̰a̰ yā tunə̄ń yá̰á̰ kə́ tām̄ yā majaĺ tə́ ní.

¹⁶ Moijə ɔr̄ yibə̄ man̄g ní kə́ dɔ tiīn gə̄ tə́ malang ō, wurən ō, mənjon kə́ jōó gə̄ naā tə́ kə yibə̄ ké gidədə́ tə́ ō, róōdə́ horoó dɔ loo tun̄ yá̰á̰ tə́.

¹⁷ Ba gotə man̄g kə́ bəra ń nay ní, ngə̄rān ō, dā̰n ō, tiīn gə̄ ō ní, róōndə́ horoó gidə ɓē tə́ ndágá tītə̄ ń Kɔ́ɔ̄ɓē ədan ní.

¹⁸ Gō tə́ anī Moijə reē kə bal batə̄ kə́ yā róō horoó kadə̄ Kɔ́ɔ̄ɓē ní, adə̄ Aaro̰ nin̄ kə ngánən gēé əndān jīdə́ dɔ tə́.

¹⁹ Moijə əja kɔ́ɔn ba rāā mósən dɔ loo tun̄ yá̰á̰ tə́ gīr̄ gidə.

²⁰ Ni-gór̄yō dā̰n gə̄ ba róō horoó naā tə́ kə dɔn gə̄ kə yibə̄n gə̄.

²¹ Ni-tə́go tiīn gə̄ ō, njan gə̄ ō, kə maná, ba róōdə́ horoó naā tə́ kə gotə dā̰ batə̄ ní malang dɔ loo tun̄ yá̰á̰ tə́ tītə̄ ń Kɔ́ɔ̄ɓē ədań ní. Nge ń noō i yá̰á̰ kə́ tun̄ kadə̄ Kɔ́ɔ̄ɓē kə́ sēēn nelə̄n.

²² Moijə reē kə bal batə̄ kə́ nge ko̰ jōó ń i bal batə̄ kə́ yā kəndāń deē kem kəla tun̄ yá̰á̰ tə́ ní, adə̄ Aaro̰ nin̄ kə ngánən gēé əndān̄ jīdə́ dɔ tə́.

²³ Ni-əja kɔ́ɔn ba taā mósən rāā ta mbī Aaro̰ kə́ ko̰ó̰ tə́ ō, dɔ bo jīn kə́ ko̰ó̰ tə́ ō, dɔ bo njan kə́ ko̰ó̰ tə́ ō.

²⁴ Gō tə́ anī adə̄ ngán Aaro̰ gə̄ reēn̄ rɔ̄n tə́, ni-rāā mósə́ ní ta mbīdə́ kə́ ko̰ó̰ tə́ ō, dɔ bo jīdə́ kə́ ko̰ó̰ tə́ ō, dɔ bo njadə́ kə́ ko̰ó̰ tə́ ō, ba ɓōkə́ gotə mósə́ ní dɔ loo tun̄ yá̰á̰ tə́ adə̄ gīr̄ gidə.

²⁵ Moijə ɔy loo bal batə̄ ní kə́ to yibə̄ gə̄: Kə̄lán ō, yibə̄n kə́ gidə tiīn gə̄ tə́ ō, wurən ō, mənjon kə́ jōó gə̄ naā tə́ kə yibə̄də́ kə́ gidədə́ tə́ ō, un ɓúrən kə́ ko̰ó̰ ō,

²⁶ Ni-un mápá kə́ rāā kanjə̄ kaa mápa kógə̄ḿ ō, makəla kógə̄ḿ ō, kem keē mápá kə́ rāā kanjə̄ kaa mápa ń ndi no Kɔ́ɔ̄ɓē tə́ ní, ba ɓōkə́də́ dɔ yibə̄ bal batə̄ ní tə́ ō, dɔ ɓúrən kə́ ko̰ó̰ tə́ ō.

²⁷ Ni-ɓōkə́ yá̰a̰ gə̄ ń noō malang kem jī Aaro̰ nin̄ kə ngánən gēé tə́, adə̄ ndējə̄n̄ Kɔ́ɔ̄ɓē kə gō looneé.

²⁸ Gō tə́ anī tél taā jīdə́ tə́ kɔ̄ɔ́, róō horoó dɔ loo tun̄ yá̰á̰ tə́ naā tə́ kə dā̰ kə́ yā róō kadə̄ Kɔ́ɔ̄ɓē. Nge ń noō i yá̰a̰ tun̄ kə́ yā kəndāń deē kem kəla tun̄ yá̰á̰ tə́, adə̄ sēēn nel̄ Kɔ́ɔ̄ɓē.

²⁹ Moijə un nganjə bal batə̄ ní ndējə̄ Kɔ́ɔ̄ɓē kə gō looneé. Nganjən ní i tām̄ yān nəkɔ́ Moijə tə́, tītə̄ ń Kɔ́ɔ̄ɓē ədanəń ní.

³⁰ Moijə ɔdə yibə̄ kə́ táĺ ō, ɔdə mósə́ kə́ dɔ loo tun̄ yá̰á̰ tə́ ō, sə̄kā dɔ Aaro̰ tə́ ō, tū kūbə̄ kə́ rɔ̄n tə́ ō. Ni-sə̄kā dɔ ngán Aaro̰ gə̄ tə́ ō, tū kūbə̄ yādə́ gə̄ tə́ ō. I tītə̄ ń noō n ni ɔrə̄ń kam̄ Aaro̰ nin̄ kə ngánən gēé ō, ɔrə̄ń kam̄ kūbə̄ yādə́ gə̄ ō ní.

³¹ Moijə əda Aaro̰ nin̄ kə ngánən gēé na: Ī-ndīrī dā̰ bal batə̄ kə́ nge ko̰ jōó ní ta kújə kənge naā tə́. Ā ə́saī i loo ń noō tə́ kə mápá kə́ rāā tām̄ yā kəndāńsí kem kəla tun̄ yá̰á̰ tə́ ń to kem keé ní. Ā ə́saī i loo ń noō tə́ tītə̄ ń m-ə́dańsí m-ə́da na i Aaro̰ nin̄ kə ngánən gēé n a əsan̄ ní.

³² Ā ī-róōī gotə dā̰ ō, gotə mápá ń a nay ní ō, horoó kɔ̄ɔ́.

³³ Ā ī-ndiī ta kújə kənge naā tə́ ndɔ̄ sīrí kanjə̄ kaw̄ loo tə́, bátə́ kadə̄ ndɔ̄ gə̄ ń kadə̄ əndānəńsí kem kəla tun̄ yá̰á̰ tə́ ní təgān kɔ̄ɔ́ pá tá. Tɔdɔ̄ ndɔ̄ gə̄ kə́ yā kəndāńsí kem kəla tun̄ yá̰á̰ tə́ i ndɔ̄ sīrí.

³⁴ Kɔ́ɔ̄ɓē nəkɔ́ əda kadə̄ yā rāā tītə̄ ń jə-rāāiń ɓōólaā toó, yā kutə̄ń dɔ majaĺ yāsí gə̄.

³⁵ Ā ī-ndiī ta kújə kənge naā tə́ ndɔ̄ɔ́ ō, kadaá ō, ndɔ̄ sīrí yā rāań yá̰á̰ ń Kɔ́ɔ̄ɓē əda ní na sōgə́ óyiī. Yá̰á̰ ń Kɔ́ɔ̄ɓē ədam̄ ní n noó.

³⁶ Aaro̰ nin̄ kə ngánən gēé rāān̄ yá̰a̰ malang ń Kɔ́ɔ̄ɓē əndā ta Moijə tə́ adə̄ ədadə́ ní.