LEBI GƏ̄ 6 - Bibəl ta Sar̄

Ndū najə̄ kə́ tām̄ yā ngé tun̄ yá̰a̰ gə̄ tə́: 1 Yá̰a̰ tun̄ kə́ róō horoó kadə̄ Kɔ́ɔ̄ɓē

¹ Kɔ́ɔ̄ɓē mēr̄ Moijə

² kəda Aaro̰ nin̄ kə ngánən gēé najə̄ ń toō: Ndū najə̄ kə́ dɔ dā̰ kə́ yā tɔ̄l̄ ba róō horoó kadə̄ Kɔ́ɔ̄ɓē tə́ n toó: Dā̰ ní a to dɔ loo tun̄ yá̰á̰ tə́ ndɔ̄ɔ́ bátə́ kadə̄ loo tīī ō, a rāān̄ hor gírí kadə̄ hor a oy aĺ ō.

³ Nge tun̄ yá̰a̰ a əla kūbə̄ lḛ́ḛ́ kə́ ngāl̄ rɔ̄n tə́ ō, kə́ gīndə̄ gírən tə́ ō, ba a ɔy kúl dā̰ kə́ róō gə̄ kə́ dɔ loo tun̄ yá̰á̰ tə́ yā ɓōkə́ nang tə́ kadə̄ loo tun̄ yá̰á̰ tə́.

⁴ Gō tə́ anī, a ɔr̄ kūbə̄ gə̄ kə́ rɔ̄n tə́ kɔ̄ɔ́, ba a əla kə́ rang gə̄ yā kaw̄ń kə kúl dā̰ kə́ tun̄ ní yā ɓōkə́ gidə ɓē tə́ ndágá loo kə́ kɔr̄ kam̄ tə́.

⁵ Hor kə́ dɔ loo tun̄ yá̰á̰ tə́ a oy alé, tɔdɔ̄ nge tun̄ yá̰a̰ a ɓōkə́ kīr̄ gə̄ kum tə́ dəloí kə dɔ ndɔ̄ gə̄ ō, a tə́nī dā̰ kə́ yā róō kadə̄ Kɔ́ɔ̄ɓē kum tə́ ō, a róō yibə̄ dā̰ kə́ tɔ̄l̄ ba tun̄ tām̄ yā kem kógə̄ḿ tə́ ō.

⁶ Hor a unjə̄ dɔ loo tun̄ yá̰á̰ tə́ ngándáńg kanjə̄ koy.

2 Kōō kə́ ndējə̄ Nə́ɓā

⁷ Ndū najə̄ kə́ dɔ kōō kə́ ndējə̄ tə́ n toó: I ngán Aaro̰ gə̄ n a ran̄ ta loo tun̄ yá̰á̰ tə́ yā ndējə̄ Kɔ́ɔ̄ɓē kōō ní.

⁸ Nge tun̄ yá̰a̰ a ɔdə dɔ ndujə̄ kə́ kə yibīí ní ō, kajaja kə́ dɔ tə́ malang ō, yā róō horoó dɔ loo tun̄ yá̰á̰ tə́. Nge ń noō i yá̰á̰ kə́ ɔjə kadə̄ yá̰a̰ ndējə̄ ní, i kə́ kadə̄ kə taá malang. I yá̰á̰ kə́ sēēn nel̄ Kɔ́ɔ̄ɓē.

⁹ Gotə yá̰a̰ ndējə̄ ń a nay ní, Aaro̰ nin̄ kə ngánən gēé a əsan̄, ba a əsan̄ i kanjə̄ kaa mápa kem loo kə́ táĺ kógə̄ḿ tə́, adə̄ i kem ndogə̄ kūbə̄ kə́ kəga dɔ kújə kənga naā tə́.

¹⁰ Deē a lá̰ȳ kə kaa mápá yā kəla horoó alé. Nge ń noō i núsə́ yá̰á̰ kə́ ndējə̄ kə́ Kɔ́ɔ̄ɓē adə̄də́. I yá̰á̰ kə́ táĺ ngá̰ý tītə̄ gotə yá̰á̰ kə́ tun̄ tām̄ yā majaĺ kə́ deē rāā tə́ ō, i tītə̄ gotə yá̰á̰ kə́ tun̄ yā kəgāń kə̄rā yá̰á̰ kə́ gōtə́ aĺ kə́ deē rāā ō.

¹¹ I de kə́ dəngam gə̄ malang kə́ gír kaa yā Aaro̰ tə́ n a əsan̄ ní. Nge ń noō i dɔ yá̰á̰ kə́ yā tīr̄ ngándáńg tām̄ yādə́ tə́ tū yá̰á̰ kə́ yā róō horoó kadə̄ Kɔ́ɔ̄ɓē tə́ tə́. Yá̰a̰ malang ń a ɔdə rɔ̄ ní a tél yá̰á̰ kə́ kɔr̄ kam̄ tayā tām̄ yā Kɔ́ɔ̄ɓē tə́.

¹² Kɔ́ɔ̄ɓē əda Moijə na:

¹³ Yá̰á̰ ń ré urə̄n̄ yibə̄ dɔ Aaro̰ tə́, nin̄ kə ngánən kə́ dəngam gēé oy anī a rāān̄ ní n toó: Kə ndɔ̄ gə̄ nin̄ a reēn̄ kə ndujú kem langá mətá yā kadə̄ Kɔ́ɔ̄ɓē. A adə̄n̄ núsən kə́rēý dəloí ō, núsən kə́rēý loo sɔlí ō.

¹⁴ A ló̰ȳn̄ ndujə̄ ní kə yibīí, ba a ɔbə̄n̄ kem gajoó kadə̄ edə̄. Gō tə́ anī a gángə̄n̄ naā tə́ pá tá a ndējə̄n̄ Kɔ́ɔ̄ɓē kadə̄ sēēn nelə̄n.

¹⁵ Ngōn̄ kaa Aaro̰ ń a urən̄ yibə̄ dɔn tə́ kadə̄ ndi ngol ngé tun̄ yá̰a̰ gə̄ gotə bɔbə̄n tə́ ní, a ndējə̄ Kɔ́ɔ̄ɓē yá̰á̰ kə́ rāā kə kōó ní tītə̄ noō ō. Nge ń noō i yá̰á̰ kə́ yā tīr̄ ngándáńg yā róō horoó kadə̄ Kɔ́ɔ̄ɓē.

¹⁶ Tɔdɔ̄ yá̰a̰ ndējə̄ kə́ rāā kə kōó ń nge tun̄ yá̰a̰ ndējə̄ Kɔ́ɔ̄ɓē ní, deē a əsa alé. A róōn̄ horoó i malang.

Yá̰á̰ kə́ tun̄ kadə̄ Nə́ɓā tām̄ yā majaĺ tə́

¹⁷ Kɔ́ɔ̄ɓē mēr̄ Moijə

¹⁸ kəda Aaro̰ nin̄ kə ngánən gēé na: Ndū najə̄ kə́ dɔ dā̰ kə́ yā tun̄ tām̄ yā majaĺ tə́ n toó: A əjan̄ kɔ́ɔ dā̰ kə́ yā tun̄ tām̄ yā majaĺ tə́ i ta kum Kɔ́ɔ̄ɓē tə́, loo ń a əjan̄ kɔ́ɔ dā̰ kə́ yā róō horoó kadə̄ Kɔ́ɔ̄ɓē tū tə́ ní. Nge ń noō i yá̰á̰ kə́ táĺ ngá̰ý.

¹⁹ Nge tun̄ yá̰á̰ ń a rāā kəla tun̄ yá̰á̰ ń noō ní a əsa dā̰ ní i kem loo kógə̄ḿ kə́ táĺ tə́, adə̄ i kem ndogə̄ kūbə̄ ń əgan̄ dɔ kújə kənge naā tə́ ní.

²⁰ Yá̰a̰ malang ń a ɔdə rɔ̄ dā̰ ń noō ní a tél yá̰á̰ kə́ kɔr̄ kam̄ tayā tām̄ yā Kɔ́ɔ̄ɓē tə́. Ré mósən kə̄rā tū kūbə̄ tə́ anī, a tə́gon̄ loo kūbə̄ ń mósə kə̄rā tū tə́ ní i kem loo kógə̄ḿ kə́ táĺ tə́.

²¹ Jóó nánjə́ ń ndīr̄nəń dā̰ ní, a tɔ̄ɔ̄n̄ kɔ̄ɔ́. Ba ré ndīrə̄n̄ i kə jóo gində̄ nə̄ngá kasaá anī, a kūsə́n̄ no jóo gində̄ ní pá tá a tə́gon̄ kə maná ɓáý.

²² Adə̄ i de kə́ dəngam gə̄ malang ń nin̄ i ngé tun̄ yá̰a̰ gə̄ ní ngóy n a asən̄ kəsa ní. I yá̰á̰ kə́ táĺ ngá̰ý.

²³ Banī dā̰ kə́ tun̄ tām̄ yā majaĺ ń aw̄n̄ kə mósəneé loo kə́ tə́ kem kújə kənge naā tə́ yā kutə̄ń dɔ majaĺ ní, deē a əsa alé, a róōn i mbée.