LEBI GƏ̄ 3 - Bibəl ta Sar̄

Dā̰ kə́ tɔ̄l̄ ba tun̄ kadə̄ Nə́ɓā tām̄ yā kem kógə̄ḿ tə́

¹ Ré deē kógə̄ḿ gḛ́y ndējə̄ yá̰a̰ kadə̄ tunə̄n̄ tām̄ yā kem kógə̄ḿ tə́ ba i man̄g anī, ādə̄ i man̄g kə́ bəra aláa i kə́ kó̰ó̰ kə́ loon kógə̄ḿ nujə aĺ tá reēń ndējə̄ Kɔ́ɔ̄ɓē tə́.

² Ni a əndā jīn dɔ tə́ pá tá a əja kɔ́ɔn ta kújə kənge naā tə́ ɓáý. Nge tun̄ yá̰a̰ gə̄ ń i ngán Aaro̰ gə̄ ní a sə̄kān̄ mósən kadə̄ gīr̄ gidə loo tun̄ yá̰a̰.

³ Ba man̄g ngeé ń noō ní yá̰a̰ gə̄ kə́ yā róō horoó kadə̄ Kɔ́ɔ̄ɓē i yibə̄n kə́ gidə tiīn gə̄ tə́ malang ō,

⁴ mənjon kə́ jōó gə̄ kə yibə̄də́ kə́ gidədə́ tə́ ō, yibə̄n kadə kemən gə̄ tə́ ō, wurən ō. A ɔr̄ wurən i naā tə́ kə mənjon gēé.

⁵ Ba ngé tun̄ yá̰a̰ gə̄ a róōn̄də́ horoó dɔ loo tun̄ yá̰á̰ tə́ naā tə́ kə yá̰a̰ tun̄ kə́ róō horoó kadə̄ Kɔ́ɔ̄ɓē. Nge ń noō i yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n.

⁶ Ré yá̰a̰ tun̄ yā de kə́ tām̄ yā kem kógə̄ḿ tə́ i batə̄ aláa i bə̄yā̰ anī, ādə̄ i kə́ bal aláa i kə́ kó̰ó̰ kə́ loon kógə̄ḿ nujə alé.

⁷ Ré i batə̄ anī, a aw̄ń ta kum Kɔ́ɔ̄ɓē tə́.

⁸ A əndā jīn dɔ tə́ tá a əja kɔ́ɔn ta kújə kənge naā tə́ ngé tun̄ yá̰a̰ gə̄ a sə̄kān̄ mósən gīr̄ gidə loo tun̄ yá̰a̰.

⁹ Lon kə́ to yibə̄ gə̄ ń a ɔr̄ yā róō horoó kadə̄ Kɔ́ɔ̄ɓē ní n toó: Kə̄lán kə taá malang ta kə̄ngā dūnə̄n tə́ ō, yibə̄n kə́ gidə tiīn gə̄ tə́ malang ō,

¹⁰ mənjon kə́ jōó gə̄ kə yibə̄də́ kə́ gidədə́ tə́ ō, yibə̄n kə́ kadə̄ kemən tə́ ō, wurən ō. A ɔr̄ wurən i naā tə́ kə mənjon gēé.

¹¹ Ba nge tun̄ yá̰a̰ a róō yá̰a̰ gə̄ ń noō malang dɔ loo tun̄ yá̰á̰ tə́. Nge ń noō i yá̰á̰ kə́ róō horoó kadə̄ Kɔ́ɔ̄ɓē.

¹² Ré i bə̄yā̰ n deē gḛy ndējə̄ anī, ādə̄ kɔ́ɔ̄ reēń ta kum Kɔ́ɔ̄ɓē tə́.

¹³ A əndā jīn dɔ bə̄yā̰ ní tə́ tá a əja kɔ́ɔn ta kújə kənge naā tə́. Ngé tun̄ yá̰a̰ gə̄ a sə̄kān̄ mósə kadə̄ gīr̄ gidə loo tun̄ yá̰a̰.

¹⁴ Yá̰a̰n gə̄ kə́ yā róō horoó kadə̄ Kɔ́ɔ̄ɓē i yibə̄n kə́ gidə tiīn gə̄ tə́ malang ō,

¹⁵ i mənjon kə́ jōó gə̄ kə yibə̄də́ kə́ gidədə́ tə́ ō, yibə̄n kə́ kadə̄ kemən gə̄ tə́ ō, wurən ō. A ɔrə̄n̄ wurən i naā tə́ kə mənjon gēé.

¹⁶ Nge tun̄ yá̰a̰ a róō yá̰a̰ gə̄ ń noō malang dɔ loo tun̄ yá̰á̰ tə́. Nge ń noō i yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n. Loo bə̄yā̰ ní kə́ to yibə̄ gə̄ malang i tām̄ yā Kɔ́ɔ̄ɓē tə́.

¹⁷ I tām̄ najə̄ ń toō tə́ n loo malang ń ā ī-ndiī tū tə́ ní, ā ə́saī yibə̄ dā̰ aĺ ō, mósə dā̰ aĺ ō ní. I ndū najə̄ kə́ a to ngándáńg tām̄ yāsí tə́ tām̄ yā ngánsí gə̄ tə́ ō, ngán kaasí gə̄ tə́ ō.