LEBI GƏ̄ 2 - Bibəl ta Sar̄

Kōō kə́ ndējə̄ Kɔ́ɔ̄ɓē

¹ Ré deē kógə̄ḿ reē kə kōó yā ndējə̄ Kɔ́ɔ̄ɓē anī, ādə̄ i kōō kə́ rāā ndujə̄ kə́ lándə̄ tə́ ba ɓōkə́n̄ yibə̄ ō, kajaja ō dɔ tə́.

² Kɔ́ɔ̄ a aw̄ń rɔ̄ ngé tun̄ yá̰a̰ gə̄ ń i ngán Aaro̰ gə̄ ní tə́. Nge tun̄ yá̰a̰ a ɔdə dɔ naā tə́ kə yibīí ō, kə kajaja malang ō, kem jīn kógə̄ḿ yā róō dɔ loo tun̄ yá̰á̰ tə́. Nge ń noō i yá̰á̰ kə́ ɔjə kadə̄ yá̰a̰ ndējə̄ ní i kə́ kadə̄ kə taá malang. I yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n.

³ Gotə yá̰a̰ ndējə̄ ń nay ní i tām̄ yā Aaro̰ tə́ nin̄ kə ngánən gēé. I yá̰á̰ kə́ táĺ ngá̰ý tɔdɔ̄ i gotə yá̰á̰ kə́ róō horoó kadə̄ Kɔ́ɔ̄ɓē.

⁴ Ré ī-reē kə yá̰a̰ ndējēé ba i yá̰á̰ kə́ kəla púŕ tə́ anī, ādə̄ i mápá kə́ kanjə̄ kaa mápa kə́ ló̰ȳ kə yibīí, aláa i makəla kə́ kanjə̄ kaa mápa kə́ rāā yibə̄ dɔ tə́ tá.

⁵ Ré yá̰a̰ ndējə̄ yāí ní i ndujə̄ kə́ ló̰ȳ ba kɔbə̄ kə gajoó anī, adə̄ i ndujə̄ kə́ lándə̄ ba ló̰ȳ kə yibīí ō, kanjə̄ kaa mápa ō tá.

⁶ Báa ī-tétə̄ naā tə́ ō, ī-ɓōkə́ yibə̄ dɔ tə́ ō. Nge ń noō i kōō kə́ ndējə̄.

⁷ Ré yá̰a̰ ndējə̄ yāí i ndujə̄ kə́ ló̰ȳ tá ndīr̄ kə tawá anī, ādə̄ i ndujə̄ kə́ lándə̄ kə́ ló̰ȳ kə yibīí tá.

⁸ Ī-reē kə yá̰a̰ ndējə̄ ń toō ādə̄ nge tun̄ yá̰a̰ kadə̄ aw̄ń ta loo tun̄ yá̰á̰ tə́.

⁹ Ni a un dɔ yā róō dɔ loo tun̄ yá̰á̰ tə́. Nge ń noō i yá̰á̰ kə́ ɔjə kadə̄ yá̰a̰ ndējə̄ ní i kə́ kadə̄ kə taá malang. I yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n.

¹⁰ Gotə yá̰a̰ ndējə̄ ń nay ní i tām̄ yā Aaro̰ tə́ nin̄ kə ngánən gēé. I yá̰á̰ kə́ táĺ ngá̰ý tɔdɔ̄ i gotə yá̰á̰ kə́ róō horoó kadə̄ Kɔ́ɔ̄ɓē.

¹¹ Yá̰a̰ ndējə̄ kə́ rāā kə kōó ní, ā ī-rāāī kaa mápa tū tə́ alé. Yá̰a̰ ndējə̄ kə́ yā róō kadə̄ Kɔ́ɔ̄ɓē ní, ā ī-rāāī kaa mápa tū tə́ aĺ ō, yibə̄ tejə tū tə́ aĺ ō.

¹² A adī Kɔ́ɔ̄ɓē kaa mápa ō, yibə̄ ō, i tītə̄ loo kadə̄ dɔ kōō kə́ kijə, banī ā ī-róōīdə́ dɔ loo tun̄ yá̰á̰ tə́ tītə̄ loo róō yá̰a̰ ndējə̄ kə́ sēēn nel̄ Kɔ́ɔ̄ɓē alé.

¹³ Yá̰a̰ ndējə̄ malang kə́ rāā kə kōó ní, ā ī-seĺ katə̄ dɔ tə́. Ā ə́yá̰ yá̰a̰ ndējə̄ kə́ rāā kə kōó kanjə̄ seĺ katə̄ dɔ tə́ alé. Tɔdɔ̄ katə̄ i yá̰á̰ kə́ ɔjə dɔ madə̄ naā ń Nə́ɓā yāí əhɔ seí ní. I tām̄ najə̄ ń noō tə́ n ā ī-ɓōkə́ katə̄ dɔ yá̰a̰ ndējə̄ yāí gə̄ tə́ malang ní.

^14-15 Ré ā ī-ndējə̄ Kɔ́ɔ̄ɓē dɔ kōō kə́ kijə kə́ kem ndɔr̄ yāí tə́ anī, ī-gə́rē dɔ hor tə́ ba ɔ́sə, ī-rāā yibə̄ dɔ tə́ ō, ī-ɓōkə́ kajaja dɔ tə́ ō, pá tá ī-reēń. Nge ń noō i yá̰a̰ ndējə̄ kə́ rāā kə kōó.

¹⁶ Nge tun̄ yá̰a̰ a ɔdə dɔ kōō kə́ ló̰ȳ kə yibīí ní sḛý naā tə́ kə kajaja gēé malang yā róō horoó. Nge ń noō i yá̰á̰ kə́ ɔjə kadə̄ yá̰a̰ ndējə̄ ní i kə́ kadə̄ kə taá malang. I yá̰á̰ ndējə̄ kə́ róō horoó kadə̄ Kɔ́ɔ̄ɓē.