LEBI GƏ̄ 1 - Bibəl ta Sar̄

Ndū najə̄ dɔ yá̰á̰ kə́ tun̄ kadə̄ Nə́ɓā tə́ ( 1—7 ) Yá̰a̰ tun̄ kə́ róō horoó kadə̄ Nə́ɓā

¹ Kɔ́ɔ̄ɓē ndi kem kújə kənge nāā tə́ ɓár̄əń Moijə, ɔr̄ najə̄ seneé ədan na

² kə əda ngán Israel gə̄ najə̄ ń toō: Ré deē kógə̄ḿ dansí tə́ gḛy ndējə̄ Kɔ́ɔ̄ɓē yá̰a̰, adə̄ i man̄g, aláa i batə̄, aláa i bə̄yā̰ tá ní ndējə̄ Kɔ́ɔ̄ɓē.

³ Ré yá̰a̰ ndējə̄ yā deē ní i man̄g kə́ yā róō horoó, adə̄ i man̄g kə́ bəra kə́ loon kógə̄ḿ nujə alé. Ni a aw̄ seneé ta kújə kənge naā tə́ kadə̄ Kɔ́ɔ̄ɓē ndigə dā̰ ní pá tá,

⁴ gō tə́ anī ni a əndā jīn dɔ dā̰ ń Kɔ́ɔ̄ɓē ndigə tə́ ní, yā rāań yá̰á̰ kə́ yā kutəń dɔ majaĺ yān.

⁵ Ni a əja kɔ́ɔ dā̰ ní ta kum Kɔ́ɔ̄ɓē tə́. Ngé tun̄ yá̰a̰ gə̄ ń ngán Aaro̰ gə̄ ní a ndējə̄n̄ Kɔ́ɔ̄ɓē mósə dā̰ ní pá tá a sə̄kān̄ kadə̄ gīr̄ gidə loo tun̄ yá̰á̰ ń ra ta kújə kənge naā tə́ ní.

⁶ Ni a tóon ba a ɔr̄ ngə̄rān ō, a tɔ́r̄ dā̰n ō.

⁷ Ngé tun̄ yá̰a̰ gə̄ a rāān̄ hor dɔ loo tun̄ yá̰á̰ tə́ ō, a tə́nīn̄ kīr̄ horoó ō.

⁸ A tə́nīn̄ dā̰ kə́ tɔ́r̄ gə̄ ní ō, yibə̄n ō kum hor tə́.

⁹ Nge ndējə̄ yá̰á̰ ní a tə́go tiīn gə̄ njan gə̄ ō kə maná. Go tə́ anī nge tun̄ yá̰á̰ kógə̄ḿ a róō yá̰a̰ gə̄ ń noō malang horoó dɔ loo tun̄ yá̰á̰ tə́. I yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n.

¹⁰ Ré i batə̄ aláa i bə̄yā̰ n deē a ndējə̄ róōn̄ tām̄ yā Kɔ́ɔ̄ɓē tə́ anī, ādə̄ i kə́ bal kə́ loon kógə̄ḿ nujə aĺ tá.

¹¹ Ni a ra i dām̄ loo tun̄ yá̰á̰ kə́ dām̄ mbɔ́r ɓē kə́ ko̰ó̰ tə́ n a əjań kɔ́ɔn ta kum Kɔ́ɔ̄ɓē tə́ ní. Ngé tun̄ yá̰a̰ gə̄ a sə̄kān̄ mósən dɔ loo tun̄ yá̰á̰ tə́ kadə̄ gīr̄ gidə.

¹² Ni a tɔ́r̄ dā̰n ō, gān̄g dɔn ō, a ɔr̄ yibə̄n ō. Gō tə́ anī nge tun̄ yá̰á̰ kógə̄ḿ a tə́nī dā̰ kə́ tɔ́r̄ gə̄ ní ō, dɔn ō, yibə̄n ō, kīr̄ tə́.

¹³ Nge ndējə̄ yá̰á̰ ní a tə́go tiīn gə̄ ō, njan gə̄ ō kə maná. Gō tə́ anī nge tun̄ yá̰a̰ a ɔjə Kɔ́ɔ̄ɓē pá tá a róō yá̰a̰ gə̄ ń noō malang horoó dɔ loo tun̄ yá̰á̰ tə́. I yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n.

¹⁴ Ré i yel̄ n deē ní a ndējə̄ kadə̄ róōn̄ tām̄ yā Kɔ́ɔ̄ɓē tə́ anī, ādə̄ i dér gutə aláa i dér dum tá.

¹⁵ Nge tun̄ yá̰á̰ a aw̄ kə yel̄ ní ta loo tun̄ yá̰á̰ tə́. Ni a gān̄g dɔ yā róō dɔ tə́. Gō tə́ anī ni a kə̄rā mósə yel̄ ní kadə̄ loo tun̄ yá̰á̰ tə́.

¹⁶ Ni a ɔr̄ jɔdəbon kə yá̰á̰ kə́ kemeé gēé yā kənī kadə̄ loo tun̄ yá̰á̰ tə́, dām̄ kə́ gír ɓē tə́, loo ń a ɓōkə́n̄ kúl dā̰ kə́ róō gə̄ tū tə́ ní tə́.

¹⁷ Ni a njar yel̄ ní danaá ba a gān̄g naā tə́ alé. Gō tə́ anī nge tun̄ yá̰a̰ a róō yel̄ ní horoó dɔ kīr̄ gə̄ ń i ɓōkə́ dɔ loo tun̄ yá̰á̰ tə́ ní. Nge ń noō i yá̰á̰ kə́ róō horoó kadə̄ Kɔ́ɔ̄ɓē kə́ sēēn nelə̄n.