KOLOSƏ 1 - Bibəl ta Sar̄

Pol rāā Kolosə gə̄ lápə́ya

¹ I mā Pol ń i ngōmbang kəla yā Jeju Kərist kə gō kem ndigə yā Nə́ɓāá ní, naā tə́ kə ngōkó̰ó̰jí Timote n,

² j-əla kə makətūbə̄ ń toō j-adə̄ ngákó̰ó̰jí kə́ de gə̄ yā Nə́ɓā ń ndin̄ Kolosə tə́ ní. Nin̄-taān̄ kem Kərist ō. Ādə̄ Bɔbə̄jí Nə́ɓā rāā kem majə sesí ō, sɔl̄ kemsí ō.

Jə-ndadə̄ Nə́ɓā

³ Jə-ndadə̄ Nə́ɓā, Bɔbə̄ Kɔ́ɔ̄ɓē yājí Jeju Kərist kə dɔ ndɔ̄ gə̄, dan ń j-a jə-ndɔ̄yń tām̄ yāsí tə́ ní.

⁴ Tɔdɔ̄ j-oō kōō taā ń ī-taāī kem Jeju Kərist ní ō, táŕ ń ī-táriī de gə̄ yā Nə́ɓā malang ní ō.

⁵ Dan ń najə̄ kə́ rɔ̄kum, adə̄ i Najə̄ kə́ Majə, ugə̄ loosí ta kəga dɔ ɓáý ní, ōōī najə̄ yā yá̰a̰ kəndā kem dɔ tə́ ń Nə́ɓā ngɔ̄m̄ dɔ rā̰ tə́ tām̄ yāsí tə́ ní: Yá̰á̰ ní i ndi kə kumuú. Adə̄ taā kem yāsí ō, tár yāsí ō ní, ngəran ra i dɔ tə́.

⁶ Najə̄ kə́ Majə aw̄ kum kə̄ kété ō, ojə yá̰á̰ kə́ majə ō, kə̄ loo gə̄ tə́ malang dɔ nang tə́ tītə̄ ń rāań yá̰a̰ dɔ dáńsí tə́ ní. Əla gír rāā yá̰á̰ ní i ndɔ̄ kə́ ta kəga dɔ ń sḭḭ̄ ōōīneé najə̄ rajə ń Nə́ɓā rajəsí tə́ ní ō, ndɔ̄ ń kumsí teēń dɔ tə́ kə́ rɔ̄kum tə́ ní ō.

⁷ I Epapəras kó tár yājí kə́ nge kəla madə̄jí n ndóōsí yá̰a̰ ngeé ń toō ní. Ni-rāā kəla yāsí i kə́ loo de kə́ bo kə́ nge ra dɔ ndūn tə́ yā Kərist tə́.

⁸ Nəkɔ́ ədají najə̄ táŕ ń Ndíl adə̄sí ní ō.

⁹ I tām̄ najə̄ ń toō tə́ n əla gír ndɔ̄ ń j-oōń najə̄ ń toō tə́ ní, jə-lōō ndɔ̄ȳ tām̄ yāsí tə́ aĺ ní. Jə-dəje Nə́ɓā kadə̄ rāā sesí, kadə̄ ī-gerī yá̰a̰ malang ń kemən ndigə ní, kə ta kūl̄ Ndíl ń i nge rāā kadə̄ kumsí edə̄ ō, kemsí ger̄ yá̰á̰ ō ní.

¹⁰ I beé n háĺsí a rɔȳń Kɔ́ɔ̄ɓē ō, ā ī-rāāiń yá̰á̰ kə́ nelə̄n ō ní. Ā ī-rāāī yá̰a̰ malang kə́ majə ō, ā ī-gerī Nə́ɓā kum kə̄ kété kété ō.

¹¹ Tɔ́gə yān kə́ to kɔsə gɔn a rāā sesí kə ngangāá ngá̰ý kadə̄ ə́hɔīń rɔ̄sí tɔgə ō, ī-tə́gāiń tasí ō, tū yá̰a̰ gə̄ tə́ malang.

¹² Ā ī-ndadī Bɔbə̄jí Nə́ɓā kə rɔ̄nelēé, tɔdɔ̄ ni-rāā adə̄ ásiī kənge yá̰a̰ naā tə́ kə ngé yān gēé kem Ɓē ko̰o̰ yān kə́ loo unjə̄ kow tū tə́ tə́.

¹³ Nə́ɓā ɔr̄jí kɔ̄ɔ́ gíŕ tɔ́gə yā til tə́, ba əndājí kem Ɓē ko̰o̰ yā Ngōn̄ kó tár yān tə́.

¹⁴ Nə́ɓā gān̄g dɔjí ō, māȳ rɔ̄n dɔ majaĺ yājí tə́ ō, i kə ta kūl̄ ɓoojí naā kə Ngōnə̄neé.

Kərist ō kəla rāān ō

¹⁵ Ngōn̄ ní i kum gotə Nə́ɓā ń j-a̰a̰in̄ kə kumjí aĺ ní. I ni n i hágə́ yá̰a̰ malang ń Nə́ɓā rāā ní.

¹⁶ Nə́ɓā rāā yá̰a̰ malang kə́ dɔ rā̰ tə́ gə̄gē, dɔ nang tə́ gə̄gē, i kə ta kūl̄ Ngōnən. Ni-rāā yá̰á̰ kə́ deē asə ka̰a̰ kə kumneé ō, kə́ deē asə ka̰a̰ kə kumneé aĺ ō. I kɔ́ɔ̄ ɓē gə̄ ō, ngé ko̰o̰ ɓē gə̄ ō, kōr̄ kāgə̄ mbang yādə́ gə̄ ō. Nə́ɓā rāā yá̰a̰ malang i kə ta kūl̄neé ō, i tām̄ yān tə́ ō.

¹⁷ Ni-ndi kété no yá̰a̰ gə̄ tə́ malang ō, yá̰a̰ malang to i kə ta kūl̄neé ō.

¹⁸ I ni ɓáý to̰ n i dɔm dɔ Egəlijə ń rāā rɔ̄n i gotə rɔ̄n gə̄ tə́ ní. Ni i ta kəla gír yá̰a̰ malang ō, i ni n ndól̄ kété dan de kə́ koy gə̄ tə́ ní ō, yā kadə̄ ni i kété tū yá̰a̰ gə̄ tə́ malang.

¹⁹ Tɔdɔ̄ nel̄ Nə́ɓā ndi kemən tə́ kə taá malang,

²⁰ yā kadə̄ yá̰a̰ malang kə́ dɔ rā̰ tə́ gə̄gē, dɔ nang tə́ gə̄gē, tél ndin̄ naā tə́ seneé kə ta kūl̄ Ngōnə̄neé ō, tām̄ yā Ngōnən tə́ ō. Loo ń noō tə́ ni-rāā adə̄ lɔm to kə ta kūl̄ mósə Ngōnən ń a̰ȳ tū kāgə̄ kə́ dēsə́ tə́ ní.

²¹ Sḭḭ̄ ń kété sḭḭ̄ i sa̰y rɔ̄ Nə́ɓā tə́ ō, sḭḭ̄ i madə̄ ba̰ā̰n gə̄ ō, sɔɔ̄ń gír̄ yāsí ō, yá̰a̰ rāāsí kə́ majaĺ gə̄ ō ní,

²² ngɔlaā lɔm to dɔ dáńsí tə́ kə Nə́ɓāá, sɔɔ̄ń koy ń Kərist oy ní. Adə̄ sḭḭ̄ i deē yān kə́ táĺ gə̄ kə́ najə̄ gətóo dɔsí tə́ ō, yá̰a̰ rāāsí kə́ majaĺ gətóo ō.

²³ Ba majə kadə̄ ī-raī ngan̄g dɔ taā kem tə́ ō, ādī tɔ́gə́sí to ō. Ī-lōōī kəya̰ najə̄ kə́ majə kɔ̄ɔ́. I ni n i yá̰a̰ kəndā kem dɔ tə́ yājí ní. Najə̄ kə́ Majə ngeé ń toō ń ōōī ní, ɔjən̄ de gə̄ kə̄ loo gə̄ tə́ malang dɔ nang tə́ laā ō, ba i mā Pol n m̄-tél nge rāā kəlan ní.

Kəla yā Pol

²⁴ Ngɔlaā m̄-rāā rɔ̄nel̄ tɔdɔ̄ wur kɔl ń kadə̄ əsō dɔ Kərist tə́ ní, əsō dɔḿ tə́ tām̄ yā rɔ̄n tə́ i tītə̄ noō. Rɔ̄n ní i Egəlijə.

²⁵ Mā m̄-tél nge kəla yā ngé kán̄ naā gə̄, i kadə̄ m̄-rāā kəla ń Nə́ɓā mērə̄m̄ rāā ní. I kadə̄ m-ɔ́jə́sí najə̄ yā Nə́ɓā malang kə taá.

²⁶ Yá̰a̰ kə́ to loo mundə̄ tə́ gə̄ ń Nə́ɓā ngɔ̄m̄də́ loo mundə̄ tə́ kə dɔ ɓāl̄ gə̄ ɓāl̄ gə̄ ní, ngɔlaā ni-rāā adə̄ kum ngé yān gə̄ teē dɔ tə́.

²⁷ Tɔdɔ̄ Nə́ɓā gḛy kɔjədə́ najə̄ yā yá̰á̰ kə́ to kɔsə gɔn kə́ to loo mundə̄ tə́ ń ni-rāā kə ta kūl̄ Kərist tām̄ yājí tə́ ní, kadə̄ gerə̄n̄. Dan de gə̄ ń nin̄ i Jipə aĺ gə̄ tə́ ní, yá̰á̰ kə́ to loo mundə̄ tə́ ngeé ń toō i Kərist. J-əndāī kemjí dɔ kɔsə gɔn yā Nə́ɓā tə́ i kə ta kūl̄neé.

²⁸ I Kərist ngeé ń toō n j-ɔjə de gə̄ malang najə̄ yān ní. Jə-tāādə́ kógə̄ḿ kógə̄ḿ ō, j-ɔjədə́ yá̰a̰ kə kum kedēé ō, kadə̄ de gə̄ kógə̄ḿ kógə̄ḿ télən̄ de kə́ majə ɔtə̄ kə taá gə̄ kə gō ɓoo naā yādə́ kə Kərist.

²⁹ I tām̄ ń toō tə́ n m̄-rāā kəla ō, m̄-rɔ̄ɔ̄ ō kə ta kūl̄ tɔ́gə yā Kərist ní. Tɔ́gə́ ní rāā kəla kə ngangāá kemḿ tə́.