Biblia Todo Logo
Bib sou entènèt

- Piblisite -

KOHELET 8 - Bibəl ta Sar̄

1 I náā n to tītə̄ nge kum kedə̄ ō, ger̄ kum yá̰a̰ gə̄ ō ní? Kum kedə̄ yā deē rāā adə̄ ta kumən ndə́lē ō, dɔ kumən kə́ majaĺ tūr̄ ō.


Deē ń oō ta mban̄g ní i de kə́ nge kum kedə̄

2 Dan ń mban̄g əda najə̄ anī majə kadə̄ ōō tan, sɔɔ̄ń ndūí kə́ ə̄nī ta kum Nə́ɓā tə́.

3 Ī-lōō tebəle kɔr̄ rɔ̄í kɔ̄ɔ́ rɔ̄n tə́ ō, ī-lōō kəhɔ gō yá̰á̰ kə́ majaĺ kə ngan̄gá ō. Tɔdɔ̄ ni a rāā yá̰a̰ malang ń kemən gḛy ní.

4 Tām̄ najə̄ yā mban̄g i dɔɔ́ dɔ yá̰a̰ gə̄ tə́ malang ō, de kə́ yā kədan na ā ī-rāā i rí n toó wa ní gətóo ō.

5 Gō míndə ń ni-əndā dɔ de gə̄ tə́ kadə̄ rāān̄ ní, deē ń rāā anī yá̰á̰ kə́ majaĺ a əsō dɔn tə́ alé. Ba nge kum kedə̄ ger̄ kemən tə́ majə kadə̄ kum mbang kə́rēý tə́ a Nə́ɓā a gān̄g sarya.

6 A̰á̰ā̰, yá̰a̰ gə̄ kógə̄ḿ kógə̄ḿ ní kum mbang yādə́ i noó ō, sarya yādə́ i noó ō. Banī yá̰á̰ kə́ to kum kaȳ aĺ kógə̄ḿ kə́ bo ngá̰ý yā deē ndul to noó:

7 Yá̰á̰ ń a rāā yā rāā yá̰á̰ ní ni ger̄ alé. I náā n a ədan ndɔ̄ ń yá̰á̰ ní a rāań yá̰á̰ ní?

8 De kə́ asə tɔ́gə kɔgə koōn teē gətóo ō, de kə́ asə ndɔ́tə̄ kə ndɔ̄ yoneé gətóo ō. Nge ń noō i rɔ̄ɔ̄ kə́ təngā piling ō, kem ndul yā deē asə gān̄g dɔn ta tə́ aĺ ō.


Gír̄ najə̄ kə́ dɔ deē ndul tə́

9 M-á̰á̰ yá̰a̰ gə̄ ń noō malang i dan ń m-ā m-ə̄ndań ma̰ȳ yá̰á̰ malang ń de gə̄ a rāān̄ dɔ nang tə́ ní, dan ń deē əndā tɔ́gən dɔ deē madə̄n tə́ yā rāānneé yá̰á̰ kə́ majaĺ ní.

10 I beé n m-á̰a̰ń de gə̄ loo dubə̄ nīń ngé kem ndul gə̄ tə́ ní. Nin̄ ḭḭn̄ i kújə yā Kɔ́ɔ̄ɓē tə́ n reēn̄ dubə̄də́ tə́ ní ō, kem ɓēé ní dɔ de gə̄ ndígə̄nal yá̰a̰ rāādə́ kə́ majaĺ gə̄ kɔ̄ɔ́ ō. Nge ń noō i yá̰á̰ kə́ kanjə̄ kumən ō.

11 Yá̰á̰ ń gāngə̄n̄ dɔ de kə́ nge rāā yá̰a̰ majaĺ tə́ loo sarya tə́ ní rāānən̄ láẃ alé. I tām̄ najə̄ ń noō tə́ n ngur rāā yá̰á̰ kə́ majaĺ gə̄ i ngá̰ý kem de gə̄ tə́ ní.

12 Nge rāā majaĺ rāā yá̰á̰ kə́ majaĺ nja ɓú ō, ndi kə kumneé dan i ngá̰ý ō. Ɓá tā ba m̄-ger̄ kadə̄ ngé ɓōĺ ndíl Nə́ɓā gə̄ a ndin̄ majə, tɔdɔ̄ kemdə́ i kə ɓōló ta kumən tə́.

13 m̄-ger̄ ɓáý to̰ kadə̄ nge kem ndul a ndi majə aĺ ō, a mān̄ tītə̄ ndíl yá̰a̰ beé ō, adə̄ a ənī ndɔ̄n ta madə̄ tə́ kə̄ kété aĺ ō tɔdɔ̄ usən dɔ Nə́ɓā tə́ alé.

14 Yá̰á̰ kógə̄ḿ to dɔ nang tə́ noō kə́ i yá̰á̰ kə́ kanjə̄ kumən: I rāā kə́ rāān̄ de kə́ súmūú kə́rēý gə̄ yá̰á̰ kə́ gōtə́ aĺ tītə̄ kə́ nin̄ i ngé kem ndul gə̄ beé ō, i rāā kə́ rāān̄ ngé kem ndul kə́rēý gə̄ yá̰á̰ ń a rāān̄ kə de kə́ súmūú gēé ní ō. Ní m-ə́da kɔ̄ɔ́ ɓáá kadə̄ nge ń noō i yá̰á̰ kə́ kanjə̄ kumən ō.

15 Mā m-ə́da na rɔ̄nel̄ i yá̰á̰ kə́ majə. Tɔdɔ̄ yá̰á̰ kə́ dɔ nang tə́ kə́ majə tām̄ yā deē tə́ i kəsa yá̰a̰ ō, ka̰ȳ ō, rāā rɔ̄nel̄ ō ngóy, yá̰á̰ kə́ rang kə́ majə gətóo. Yá̰á̰ ń kadə̄ utə̄ gō kəla yā deē kə dɔ ndɔ̄ gə̄ ń Nə́ɓā adə̄n kadə̄ ndiń kə kumneé dɔ nang tə́ ní n noó.

16 Dan ń m-ə̄nī rɔ̄ḿ m̄-sāā ger̄ kum kum kedə̄ ō, ka̰a̰ kəla gə̄ ń de gə̄ ɔgən̄ kumdə́ ɓīī ndɔ̄ɔ́ ō, kadaá yā rāāń dɔ nang tə́ ní ō anī,

17 i loo ń noō tə́ n m-á̰a̰ kəla malang ń Nə́ɓā rāā ní. Kum deē ndul asə teē dɔ kəla ń a ra dɔ nang tə́ ní alé. Deē sāā ɓá tā ba teē dɔ tə́ alé. Ká ré nge kum kedə̄ ədań na n-ger̄ gə̄gē anī, ni a asə teē dɔ tə́ alé.

Bibəl ta Sar̄ © L'Alliance Biblique du Tchad, 2006, 2010.

Bible Society of Chad
Swiv nou:



Piblisite