KOHELET 6 - Bibəl ta Sar̄

¹ M-á̰á̰ yá̰á̰ kógə̄ḿ kə́ majaĺ dɔ nang tə́ ɓáý to̰, i yá̰á̰ kə́ majaĺ ngá̰ý tām̄ yā deē ndul tə́.

² Tītə̄ ń toō Nə́ɓā adə̄ deē kógə̄ḿ yá̰á̰ ngá̰ý ō, adə̄n yá̰a̰ kənge gə̄ ō, kɔsə gɔn ō, yá̰a̰ malang ń kemən gḛy ní ənge ō, banī Nə́ɓā əya̰n adə̄ əsa yá̰a̰ yān ní alé, ba i de kə́ rang n i nge kəsa ní. Nge ń noō i yá̰á̰ kə́ kanjə̄ kumən ō, i yá̰á̰ kə́ majaĺ kə́ tōr̄ ngá̰ý ō,

³ De kógə̄ḿ asə kojə ngán gə̄ nja ɓú ō, ndi kə kumneé ɓāl̄ ngá̰ý ō. Ba ré rɔ̄n nelə̄n kem ɓāl̄ kə́ ngá̰ý gə̄ noō tə́ aĺ ō, deē dubə̄n kə gōó aĺ ō ní, kumən na i rí? Mā m-ə́da na yā ngōn̄ kə́ teē nīń i só tə́ tɔȳ yān.

⁴ Tɔdɔ̄ ngōn̄ ni-reē i reē kə́ kanjə̄ kumən ō, hində̄ lim kanjə̄ kəya̰ gō tóon ō, əga kem deē dɔn tə́ aĺ ō.

⁵ A̰a̰ mbang aĺ ō, gerə̄n aĺ ō. Ni-ɔr̄ koō tɔȳ madə̄n ń ndi kə kumneé rāā ɓāl̄ ngá̰ý ní.

⁶ Ká ré deē ngeé ń toō ndiń kə kumneé ɓāl̄ dūbú nja jōó gə̄gē, a ger̄ yá̰á̰ ń i ndi dan majaá ní alé. Tɔdɔ̄ yá̰a̰ malang ń ndi kə kumneé ní ta tɔ̄l̄ tan i yo.

⁷ Kəla malang ń deē rāā ní i yā kəngeń yá̰a̰ kəsa kə́ tan tə́, ɓá tā ba tɔ̄l̄ ɓō yá̰á̰ kə́ kemən tə́ alé.

⁸ Tɔdɔ̄ yá̰á̰ ń de kə́ ngáā ənge tɔȳ yā de kə́ mbóó ní i rí? Ger̄ ń de kə́ nge rɔ̄ tō ndoō ger̄ ngatə́rā dɔ rɔ̄n tə́ dɔ nang tə́ ní teēn i rí?

⁹ Ka̰a̰ kə kumuú i só tə́ tɔȳ ɓō yá̰á̰ kə́ rāā deē: Nge ń noō i yá̰á̰ kə́ kanjə̄ kumən kə́ to tītə̄ loo ngɔ̄də̄ gō nél yā kəhɔn beé.

Kɔjə̄ gə̄ yā de kə́ nge kum kedə̄

¹⁰ Yá̰á̰ ń to kété ní əndān̄ rī dɔ tə́ kɔ̄ɔ́ ɓá ō, gerə̄n̄ yá̰á̰ ní kɔ̄ɔ́ ō, adə̄ i deē. Banī deē asə rāā sarya kə de kə́ ngan̄g tɔȳneé alé.

¹¹ Dan ń najə̄ i ngá̰ý anī, yá̰á̰ kə́ kanjə̄ kumən i ngá̰ý ō. I rí kə́ tɔȳ nge ń noō n deē ənge ní?

¹² Tɔdɔ̄ i náā n ger̄ yá̰á̰ kə́ só tə́ tām̄ yā deē tə́ dan ń deē ndiń kə kumneé ní, dan ń deē ndiń ndɔ̄ ngá̰ý kanjə̄ kumən ní? Deē a mān̄ tītə̄ ndíl kāgə̄ beé. I beé ní i náā n a ɔjə deē yá̰á̰ ń ndɔ̄ń tə́ a to gotən tə́ dɔ nang tə́ ní?