KOHELET 5 - Bibəl ta Sar̄

¹ Ī-lōō teē taí kədań najə̄ láẃ ō, tebəle kənī míndí kadə̄ Nə́ɓā ō. Tɔdɔ̄ Nə́ɓā ndi i dɔ rā̰ tə́ ō, ḭ̄ ī-ndi i dɔ nang tə́ ō. I beé ní ādə̄ najə̄ yāí i ngá̰ý alé!

² Tɔdɔ̄ sōl̄ kə́ ngá̰ý a reē kə nī kə́ majaĺ gə̄ ō, najə̄ kə́ kɔr̄ ngá̰ý a rāā kadə̄ ḭ̄ deē ɔ̄r̄ najə̄ kə́ to mbóo gə̄ ō.

³ Ré ə̄nī míndí ādə̄ Nə́ɓā anī, ī-lōō kɔr bā̰ā̰ loo rāā yá̰á̰ ń ə̄nī míndí yā rāā kadə̄n tə́ ní. Tɔdɔ̄ ni gḛy mbóo gə̄ alé. Adə̄ ī-rāā yá̰á̰ ń ə̄nī míndí yā rāā kadə̄n ní.

⁴ Ə̄nī ndūí aĺ i só tə́ tɔȳ kadə̄ ə̄nī Ndūí kanjə̄ rāā yá̰á̰ ní.

⁵ Əhɔ taí dɔ najə̄ wál̄ kə́ kadə̄ tél ənī najə̄ dɔ rɔ̄í tə́ malang kə taá tə́ ō, ī-lōō kaw̄ kəda nge tun̄ yá̰a̰ yā Nə́ɓā na ī-ger̄ aĺ na i mbée ō. Na sōgə́ wōn̄g rāā Nə́ɓā dɔ najə̄ kɔrīí tə́ ō, ni nujə kəla ń ā ī-rāā ní ō.

⁶ Najə̄ kə́ kɔr̄ ngá̰ý ō, nī kə́ ngá̰ý ō i yá̰á̰ kə́ kanjə̄ kumən gə̄. I beé ní, ī-ɓōĺ ndíĺ Nə́ɓā.

Ngé ko̰o̰ ɓē gə̄ rāān̄ yá̰a̰ gōtə́ alé

⁷ Ré á̰a̰ā̰ kadə̄ rāān̄ kum de kə́ nge rɔ̄ tō ndoō ndoō tə́ ō, rāān̄ yá̰á̰ kə́ súmūú aĺ ō, yá̰á̰ kə́ gōtə́ aĺ ō, kem ɓēé anī, ādə̄ ɔr kumií alé. Tɔdɔ̄ deē ń ndi loo kə́ bo tə́ ní, əndān̄ de kə́ rang kə́ bo tɔȳn dɔn tə́. Nin̄ jōó mbak ní tə́ndān̄ de kə́ rang kə́ bo tɔȳdə́ gə̄ dɔdə́ tə́ kadə̄ əndān̄ kumdə́ gíŕdə́ tə́ ō.

⁸ Banī nin̄ malang ní dɔ nang rāā majə sedə́ mbak. Mban̄g ndi i kə ta kūl̄ ndɔrɔ́.

Yá̰a̰ kənge i yá̰á̰ kə́ karī

⁹ Deē ń gḛy nar ngá̰ý ní nar asən aĺ ō, deē ń gḛy yá̰a̰ kənge ngá̰ý ní ger̄ nelən aĺ ō. Nge ń noō i yá̰á̰ kə́ kanjə̄ kumən ō.

¹⁰ Loo ń yá̰a̰ kənge i ngá̰ý anī, ngé kəsan gə̄ i ngá̰ý ō. Yá̰á̰ ń kɔ́ɔ̄n a ənge gírí ní i ka̰a̰ yá̰a̰ kənge yā n kə kumneé ngóy aĺ a?

¹¹ De kə́ nge rāā kəla ní ká əsań yá̰á̰ ngá̰ý a̰á̰ā̰ əsań yá̰á̰ ngá̰ý aĺ a̰á̰ā̰ ni to ɓīī majə. Banī yá̰a̰ kənge kə́ ngá̰ý yā nge yá̰a̰ kal̄ loo ɔgə̄n ɓīī.

¹² M-á̰á̰ yá̰á̰ kógə̄ḿ kə́ majaĺ kə́ a rāā adə̄ kem deē tōrə̄n dɔ nang tə́ laā: I de kə́ ənge yá̰á̰ ngá̰ý kə́ ngɔ̄m̄ yá̰a̰ kənge yān kadə̄ reē kə yá̰á̰ kə́ to kum kaȳ aĺ dɔn tə́.

¹³ Yá̰a̰ kənge yān ní udə lim gíŕ yá̰á̰ kə́ majaĺ tə́. Ré ni ojə ngōn̄ anī yá̰á̰ sḛ́ý kə́ tām̄ yā ngōn̄ tə́ gətóo.

¹⁴ Ni a əya̰ dɔ nang ń toō ba a tél yā kaw̄ gogə́ i rɔ̄n karī tītə̄ ń teēń kem kó̰o̰n tə́ ní. Ni a ənge yá̰á̰ kógə̄ḿ tū kəla ń ni-rāā tə́ ní yā kəhɔ jīn tə́ kaw̄ń alé.

¹⁵ Kadə̄ ni əya̰ dɔ nang ń toō ba tél aw̄ tītə̄ ta reēń ní i yá̰á̰ kógə̄ḿ kə́ to rɔ̄ ndoō ngá̰ý. Kəla ń ni-rāā ní ənge i rí gírí? Ni-rāā i kəla kə́ kem wōȳ karī.

¹⁶ Tá ɓáý to̰ ní rɔ̄n nelə̄n aĺ ō, wōn̄g rāān ō, a̰a̰ tápə̄ ō, kə dɔ ndɔ̄ gə̄ malang ń ni ndiń kə kumneé ní.

¹⁷ Yá̰á̰ kə́ majə ń mā m̄-ger̄ ní n toó: I kadə̄ deē əsa ō a̰ȳ ō, ənge rɔ̄nel̄ tū kəla malang ń ni-rāā dɔ nang tə́ ní ō, kem ndɔ̄ gə̄ ń Nə́ɓā adə̄n kadə̄ ndiń kə kumneé tə́ ní, tɔdɔ̄ nge ń noō i núsən yān ń i kə́ sɔɔ̄ dɔn.

¹⁸ Dan kə́ madə̄ gə̄ tə́ anī Nə́ɓā adə̄ deē kógə̄ḿ a ənge yá̰a̰ ō, a rāā kadə̄ kɔ́ɔ̄ rāā rɔ̄nel̄ yá̰á̰ ń ɔsə dɔ naā tə́ ní ō. Ni asə kun núsə́ yá̰á̰ ń i kə sɔɔ̄ dɔn ní ō, rāań rɔ̄nel̄ ō, tɔdɔ̄ i tətōn nəkɔ́. Nge ń noō i kadə̄ karī yā Nə́ɓā.

¹⁹ Loo ń noō tə́ dɔ deē ndígə̄nal dɔ ndɔ̄n ń i yá̰á̰ kə́ gīndə̄ rogəro ní, tɔdɔ̄ Nə́ɓā adə̄n rɔ̄nel̄ ngarā̰ kemən tə́.