KOHELET 4 - Bibəl ta Sar̄

Yá̰á̰ kə́ gōtə́ aĺ gə̄ ō, kə́ mān̄ dɔ loon gə̄ ō kə́ de gə̄ a rāān̄

¹ M-á̰á̰ yá̰á̰ kə́ gōtə́ aĺ gə̄ malang ń de gə̄ a rāān̄ kə madə̄də́ gēé dɔ nang tə́ ní ō. Ngé gə̄ ń de gə̄ rāān̄ kumdə́ ndoō tə́ ní nōōn̄, banī de kə́ nge sɔl̄ kemdə́ gətóo. Tɔ́gə i dām̄ yā ngé rāā kumdə́ ndoō tə́ gə̄ tə́, adə̄ de kə́ nge sɔl̄ kemdə́ gətóo.

² M-á̰a̰ kadə̄ de gə̄ ń oyn̄ kɔ̄ɔ́ ní, rɔ̄də́ nel̄də́ tɔȳ yā ngé gə̄ ń ndin̄ kə kumdə́ ní.

³ Deē ń ojənən̄ aĺ ɓáý ní rɔ̄n nelə̄n tɔȳ dɔ, tām̄ ni-a̰a̰ yá̰á̰ kə́ majaĺ gə̄ ń de gə̄ a rāān̄ dɔ nang tə́ ní alé.

⁴ Mā m-á̰a̰ kadə̄ kəla malang ō, kəndā kə́ de gə̄ əndān̄ rɔ̄də́ ta kəla yādə́ tə́ rāān̄ adə̄ majə ō, i kəndā naā nii. I yá̰á̰ kə́ kanjə̄ kumən tītə̄ ngɔ̄də̄ gō nél yā kəhɔn beē.

⁵ Mbó kán̄ jīn ndi adə̄ ɓō tɔ̄lən.

⁶ Kɔr̄ koō sḛ́ý i só tə́ tɔȳ tɔ̄l̄ ta kəla kə́ kanjə̄ kumən.

⁷ M-á̰á̰ yá̰á̰ kógə̄ḿ kə́ rang kə́ kanjə̄ kumən kə́ de gə̄ a rāān̄ dɔ nang tə́.

⁸ De kógə̄ḿ kə́ nəkɔ́ i kə kérneé, madə̄ njə̄rān aĺ ō, ngōnən aĺ ō, ngōkó̰o̰n deē aĺ ō, banī rāā kəla dan gān̄g aĺ ō, yá̰a̰ kənge asən aĺ ō, banī ni-dəje rɔ̄n najə̄ əda na: Mā m̄-rāā kəla ō, m̄-mbātə́ ndi majə ō, i tām̄ yā náā tə́? Nge ń noō i yá̰á̰ kə́ kanjə̄ kumən, i yá̰á̰ kə́ majaĺ.

⁹ De kə́ jōó gə̄ ń əndān̄ rɔ̄də́ naā tə́ ní, rɔ̄də́ nel̄də́ tɔȳ yā de kə́ kógə̄ḿ beē kə́ nəkɔ́ i kə kérneé. Tā m̄ nin̄ əngen̄ yá̰a̰ majə gír kəla yādə́ tə́.

¹⁰ Tɔdɔ̄ ré əsōn̄ anī deē kógə̄ḿ a un madə̄n dɔɔ́. Banī yá̰á̰ kə́ to kum kaȳ aĺ i yā deē ń nəkɔ́ i kə kérneé ní! Ré ni-əsō anī de kə́ nge kunən dɔɔ́ gətóo.

¹¹ Ré de gə̄ jōó ton̄ naā tə́ a ɓīīn̄ anī rɔ̄də́ əɓa təngā. Ba deē ń nəkɔ́ i kə kérneé ní, a rāā i ba̰ý n rɔ̄n a təngāń ní?

¹² Ré deē kógə̄ḿ tetə de kə́ kə kérneé rɔ̄ɔ̄ anī, de gə̄ jōó a dum̄nən̄. Kəlā kə́ kənda gidə naā tə́ mətá a gān̄g láẃ alé.

¹³ Balsáá kə́ ndoō ba kumən edə̄ i só tə́, tɔȳ mban̄g kə́ tɔgə ɓə́ga ba ger̄ najə̄ aĺ ō, gḛy kadə̄ deē ɔjə̄n aĺ ō.

¹⁴ Ni ń ojənən̄ i kum ndoō tə́ kem ɓē ko̰o̰ń yān tə́ ní ká ni teē i dəngáyá yā ko̰o̰ ɓē gə̄gē anī,

¹⁵ de gə̄ malang ń a njə̄rān̄ dɔ nang tə́ ní m-á̰á̰də́ ɓoon̄ rɔ̄də́ tū yā balsáá ní tə́, ni ń i de kə́ nge ko̰ jōó kə́ yā kadə̄ un gotə madə̄n ní.

¹⁶ De gə̄ malang ń ni i ngār yādə́ ní, i kósə de gə̄ kə́ dum̄ tə́da kutədə́. Ɓá tā ba ngáńdə́ gə̄ ń a utə̄n̄ gōdə́ ní rɔ̄də́ a nel̄də́ ngá̰ý tām̄ yā ngār ní tə́ alé. Tɔdɔ̄ nge ń noō i yá̰á̰ kə́ kanjə̄ kumən kə́ tītə̄ loo ngɔ̄də̄ gō nél yā kəhɔn.

Deē lōō kɔr̄ najə̄ ta kum Nə́ɓā tə́ kadə̄ mān̄ dɔ loon

¹⁷ Loo ń ā āw̄ kə̄ kem kújə yā Nə́ɓā tə́ anī, á̰a̰ gō njaí majə. Ādə̄ gír̄ kə́ kemií tə́ ń ā āwń ní i kaw̄ koō najá. Nge ń noō i só tə́ tɔȳ kaw̄ ndējə̄ yá̰a̰ tun̄ kə́ tītə̄ yā de kə́ mbóo gə̄ ń gerə̄n̄ kadə̄ yá̰a̰ rāādə́ i kə́ majaĺ aĺ ní.