KOHELET 3 - Bibəl ta Sar̄

Yá̰a̰ malang a rāā yá̰a̰ i kə kum mbangneé

¹ Yá̰a̰ malang a rāā yá̰a̰ i kə kum mbangneé dɔ nang tə́ laā.

² Kum mbang kə́ yā kadə̄ ojən̄neé deē i noó ō, kum mbang kə́ yā kadə̄ deē oyń i noó ō. Kum mbang kəhɔ kāgə̄ i noó ō, ní kə́ yā kɔr̄ń kɔ̄ɔ́ i noó ō.

³ Kum mbang tɔ̄l̄ deē i noó ō, kum mbang kajə deē i noó ō. Kum mbang tɔ̄ɔ̄ kújə i noó ō, kum mbang kəndā kújə i noó ō.

⁴ Kum mbang kə́ yā kadə̄ deē nōoń i noó ō, ni kə́ yā kadə̄ deē əgōń i noó ō. Kum mbang kə́ yā kadə̄ deē nōoń rɔ̄n i noó ō, ni kə́ yā kadə̄ deē ndāməń i noó ō.

⁵ Kum mbang kə́ yā kadə̄ deē tə́nań mbal̄ gə̄ kɔ̄ɔ́ i noó ō, ni kə́ yā kɔyńdə́ i noó ō. Kum mbang kə́ yā kadə̄ deē əhɔń madə̄n kə̄ rɔ̄n tə́ ɓirə̄n dagə i noó ō, ni kə́ yā kadə̄ deē əhɔń madə̄n kə̄ rɔ̄n tə́ aĺ i noó ō.

⁶ Kum mbang kə́ yā kadə̄ deē sāań yá̰a̰ i noó ō, ni kə́ yā kadə̄ tḭ̄ḭń ta yá̰a̰ kɔ̄ɔ́ i noó ō.

⁷ Kum mbang kə́ yā kadə̄ deē rə̄ya̰ń kūbə̄ i noó ō, ni kə́ yā kadə̄ deē urə̄ń i noó ō. Kum mbang kə́ yā kadə̄ deē ndiń tan mbóo i noó ō, ni kə́ yā kadə̄ deē ɔrə̄ń najə̄ i noó ō.

⁸ Kum mbang kə́ yā tárəń naā i noó ō, ni kə́ yā kimə̄ń naā i noó ō. Kum mbang kə́ yā rɔ̄ɔń i noó ō, ni kə́ yā ndiń kə lápə́yaá i noó ō.

⁹ I yá̰á̰ rí n nge rāā kəla ənge gír tápə̄ tə́ loo rāā kəla tə́ ní?

¹⁰ Kəla ń Nə́ɓā adə̄ ngán deē ndul gə̄ kadə̄ rāān̄ ní m-á̰a̰ā̰.

¹¹ Nə́ɓā ɔjə kum mbang ń kadə̄ yá̰a̰ gə̄ a rāān̄neé yá̰á̰ ní kógə̄ḿ kógə̄ḿ kə gō naá. Ni-əndā ɓō ger̄ gír yá̰á̰ kə́ mān̄ kɔ̄ɔ́ ō, kə́ a reē ɓáý ō kem de gə̄ tə́. Banī j-asiī ger̄ kum kəla rāā Nə́ɓā kə ta njaá malang alé.

¹² Mā m̄-ger̄ kadə̄ yá̰á̰ kə́ majə tām̄ yā deē tə́, dan ń ni ndiń kə kumneé ní, i kadə̄ rɔ̄n nelə̄n ō, ndi majə ō ngóy.

¹³ Loo ń ré deē əsa ō a̰ȳ ō, ger̄ yá̰á̰ kə́ teē tū kəla yān tə́ ō anī, nge ń noō i kadə̄ karī yā Nə́ɓā.

¹⁴ Mā m̄-gír̄ kadə̄ yá̰a̰ malang ń Nə́ɓā rāā ní a to ngándáńg. Yá̰á̰ kə́ kadə̄ deē ənī ta tə́ gətóo ō, yá̰á̰ kə́ tū tə́ kə́ kadə̄ deē ɔr̄ kɔ̄ɔ́ gətóo ō. Nə́ɓā rāā tītə̄ ń noō yā kadə̄ deē ɓōlə́nń ndílən dan ń deē ra ta kumən tə́ ní.

¹⁵ Yá̰á̰ ń to ɓōólaā ní to kété ō, yá̰á̰ ń a to ndɔ̄ń tə́ ɓáý ní to kété kɔ̄ɔ́ ō, yá̰á̰ ń gətóo kɔ̄ɔ́ ní Nə́ɓā a sāā nja ō.

Yo i ta tɔ̄l̄ ta yá̰a̰ malang

¹⁶ Yá̰á̰ ń m-ə̄ndā ma̰ȳ m-á̰a̰ā̰ dɔ nang tə́ ɓáý to̰ ní n toó: Kem ndul taā loo jī yá̰á̰ kə́ súmūú tə́ ō jī yá̰á̰ kə́ gōtə́ tə́ ō.

¹⁷ Loo ń noō tə́ m-ə́da kə̄ kemḿ tə́ m-ə́da na Nə́ɓā a rāā sarya kə nge kem nduluú ō, kə de kə́ súmūú ō. Tɔdɔ̄ yá̰á̰ malang a ugə̄ i kə kum mbangneé ō, yá̰a̰ rāājí gə̄ kógə̄ḿ kógə̄ḿ ní a gāngə̄n̄ sarya dɔ tə́ ō.

¹⁸ Kə́ tām̄ yā ngán deē ndul gə̄ tə́ ní, mā m̄-gír̄ m-ə́da na Nə́ɓā ndigə i nāādə́. Loo ń noō tə́ deē a a̰ā̰ kadə nin̄ ton̄ i tītə̄ dā̰ gə̄ beé.

¹⁹ Tɔdɔ̄ ta tɔ̄l̄ ta deē to i tītə̄ ta tɔ̄l̄ ta dā̰ beé. Yá̰á̰ ń rāādə́ ní i yá̰á̰ kə́ kógə̄ḿ beē. Koy dā̰ i tītə̄ loo koy deē ndul. Koō ndi kə kumuú yādə́ to tītə̄ naā. Deē ndul tɔȳ dā̰ alé, tɔdɔ̄ yá̰a̰ malang i kə́ kumən gətóo.

²⁰ Yá̰a̰ malang a aw̄ i kə̄ loo kə́ kógə̄ḿ beē tə́. Yá̰a̰ malang teē i dɔ nang tə́ ō, a tél i kə̄ gogə́ dɔ nang tə́ ō.

²¹ I náā n ger̄ kadə̄ koō ndi kə kumuú yā de gə̄ a ḭḭ i kum kə̄ dɔɔ́, ba yā dā̰ gə̄ a risə i kum kə̄ nang tə́ ní?

²² Loo ń noō tə́ m-ə̄ndā ma̰ȳ m-á̰a̰ kadə̄ yá̰á̰ kə́ só tə́ yā deē i ger̄ yá̰á̰ kə́ teē tū kəla yān tə́. Núsən yān ń kadə̄ rāā rɔ̄nelə̄n ní n noó. Tɔdɔ̄ yá̰á̰ ń a to gotən tə́ ní i náā n a aw̄ seneé yā kadə̄ a̰ā̰ ní?