KOHELET 11 - Bibəl ta Sar̄

Nāā yá̰a̰

¹ Ə̄nī yá̰a̰ kəsa yāí dɔ man̄ tə́, tɔdɔ̄ bátə́ gə̄gē anī ā ī-tél yā kənge gogə́.

² Ī-kēgə̄ ādə̄ de gə̄ sīrí aláa de gə̄ sɔ́sɔ́, tɔdɔ̄ yá̰á̰ kə́ to kum kaȳ aĺ ń a reē kə̄ dɔ dɔ nang tə́ ní ḭ̄ ī-ger̄ alé.

³ Dan ń man̄ il nding anī a edə̄. Ré kāgə̄ əsō i kum kə̄ dām̄ mbɔ́r ɓē kə́ geleé tə́, aláa ko̰ó̰ tə́ anī, loo ń n i əsō tū tə́ ní, ni to i kə̄ tū tə́ noō.

⁴ De kə́ nge kəndā ma̰ȳ nél i nge dubə̄ kōō aĺ ō, de kə́ nge ka̰a̰ kil̄ man̄ i nge kəja kōō aĺ ō.

⁵ Tītə̄ ń ī-ger̄ loo kəndā ń ngōn̄ a əndā rɔ̄n kem dəyá̰ kə́ nge ndān̄ ngōn̄ tə́ aĺ ní, Nə́ɓā ń i nge rāā yá̰a̰ malang ní, ḭ̄ ásə ger̄ kəla rāān aĺ ō.

⁶ Ādə̄ dəloí anī ī-dubə̄ kum kōō yāí, loo sɔlí anī ī-lōō kəya̰ jīí kadə̄ taā koō ō. Tɔdɔ̄ kəla gə̄ ń gír j ōó noō nge ń i kə́ majə ní ī-ger̄ alé. Majanī majən̄ jōó mbak.

⁷ Loo kə́ unjə̄ kow i yá̰á̰ kə́ majə ō, ka̰a̰ mbang i yá̰á̰ kə́ nel̄ deē ō.

⁸ Ré deē ndi kə kumneé ɓāl̄ ngá̰ý anī, ādə̄ rāā rɔ̄nel̄ kem ɓāl̄ gə̄ ń noō tə́ malang, banī ādə̄ əga kemən dɔ tə́ na ndɔ̄ kə́ majaĺ gə̄ i ngá̰ý ō, yá̰a̰ malang kə́ a reē ɓáý i yá̰á̰ kə́ kanjə̄ kumən ō.

Ādə̄ jə-rāāī rɔ̄nel̄

⁹ Balsáa, dan ń ḭ̄ i ngōn̄ ɓáý ní ī-rāā rɔ̄nel̄. Ādə̄ kemií i kə rɔ̄nelēé kem ndɔ̄ gə̄ ń dɔí dūúń ɓáý tə́ ní. Ī-rāā yá̰a̰ malang ń kemií gḛy ní, yá̰a̰ malang ń nelī ní. Banī majə kadə̄ ī-ger̄ káý káý kadə̄ Nə́ɓā a gān̄g sarya dɔ yá̰a̰ rāāí gə̄ tə́ kógə̄ḿ kógə̄ḿ malang.

¹⁰ Ī-gōn̄g yá̰á̰ kə́ a ojə wōn̄g aláa mo̰y kɔ̄ɔ́. Tɔdɔ̄ ɓāl̄ balsáa yā deē ō, ɓāl̄ ngangə̄n ō, i yá̰a̰ gə̄ kə́ a mānə̄n̄ láẃ ngá̰ý.