KOHELET 10 - Bibəl ta Sar̄

¹ Nīń kón̄g rāā adə̄ yibə̄ kə́ otə majə yā kɔdə̄ yibə̄ otə majaĺ ō, rāā adə̄ yibə̄ kə́ kem kūú nujə malang kɔ̄ɔ́ ō. Adə̄ mbóó kə́ sḛ́ý beē ɔr̄ tɔ́gə kum kedə̄ ō kɔsə gɔn ō kɔ̄ɔ́.

² Ndíl de kə́ nge kum kedə̄ rāā yá̰a̰ adə̄ majə, banī yá̰á̰ malang ń de kə́ mbóo ger̄ ní i gōtə́ alé.

³ Ká ré de kə́ mbóo njə̄rań i róbó gə̄gē a ger̄ yá̰a̰ alé, adə̄ de gə̄ malang a a̰a̰n̄ kadə̄ i de kə́ mbóo.

⁴ Ré wōn̄g rāā ngār yāí anī ī-lōō kəya̰ ta kəla yāí kɔ̄ɔ́. Tɔdɔ̄ ángal kə́ sɔl̄ lɔm ɔgə̄ kadə̄ yá̰á̰ kə́ gōtə́ aĺ ngá̰ý gə̄ rāān̄ yá̰a̰.

⁵ De kə́ nge ko̰o̰ ɓē asə rāā yá̰á̰ kə́ gōtə́ aĺ gō ger̄ aĺ tə́. I tītə̄ ń noō n m-á̰a̰ń yá̰á̰ kə́rēý kə́ gōtə́ aĺ gə̄ dɔ nang tə́ ní.

⁶ Kə́rēý gə̄ anī adə̄n̄ mbóo de gə̄ loo kəla kə́ bo gə̄, banī əhɔn̄ de kə́ bo gə̄ adə̄ ndin̄ gotə kógə̄ḿ ta ngán kəla kə́ dūú gə̄ tə́.

⁷ M-á̰a̰ ɓəlo gə̄ loo kal̄ sə́nda tə́ ō, m-á̰a̰ ngār gə̄ loo njə̄rā tə́ kə njadə́ tītə̄ ɓəlo gə̄ ō.

⁸ De kə́ nge ndēr̄ bəlo əsō kem bəlo ń ni ndēr tə́ ní ō, lī do̰ nja nge tétə̄ ndogə̄ mbal̄ nang tə́ ō.

⁹ Nge tə́gā mbal̄ a ənge do mbal̄ ō, nge njár̄ kāgə̄ əndā rɔ̄n i ta yá̰á̰ kə́ to yo tə́ ō.

¹⁰ Loo ń ré kə̄ngā atə aĺ ō, deē ɔl ta aĺ ō anī, deē a ɔsə rɔ̄n i kə̄ naā tə́ tá a tə́gań yá̰a̰. Tɔdɔ̄ yá̰á̰ ń deē rāań yá̰a̰ kə gōó anī a teēn yá̰á̰ tə́ ní i kum kedə̄.

¹¹ Ré lī do̰ nge kɔ́lən tām̄ ni kɔ́lən aĺ anī, nge kɔ́l lī a ənge i yá̰á̰ rí gír kɔ́l lī tə́?

Deē lōō kɔr̄ najə̄ kadə̄ mān̄ dɔ loon

¹² De gə̄ ndigən̄ najə̄ kɔr̄ nge kum kedə̄, banī ndigən̄ de kə́ mbóo alé i tām̄ najə̄ kɔrə̄n gə̄ tə́.

¹³ A əla gír kɔr̄ najə̄ yān i kə mbóo najə̄ gēé ō, a tɔ̄l̄ ta i kə najə̄ kə́ to kɔ̄r̄ kə́ majaĺ gēé ō.

¹⁴ De kə́ mbóo ɔr̄ najə̄ asən alé. Deē ndul ger̄ ta kə́ bírí alé. I náā n a ɔjən yá̰á̰ kə́ a rāā yá̰a̰ gotən tə́ ní?

¹⁵ De kə́ mbóo rāā kəla kə́ uy tətō banī teēn yá̰á̰ tə́ i sḛ́ý beē ngóy. Ta róbə kə́ yā kaw̄ń kə̄ kem ɓē bo tə́ gə̄gē ní ger̄ alé.

¹⁶ Yá̰á̰ kə́ to kum kaȳ aĺ i yā ɓē ń mban̄g kə́ tū tə́ i ngōn̄ ɓáý ní ō, ngār kə́ kemeé gə̄ i ngé kəsa yá̰a̰ dəloí ɓatə gə̄ ní ō!

¹⁷ Rɔ̄nel̄ i yā ɓē ń mban̄g kə́ tū tə́ i de kə́ gír yā de kə́ bo gə̄ tə́ ō, de kə́ bo kə́ kemeé gə̄ a əsan̄ yá̰a̰ i kə kum mbangneé yā kəngeń tɔ́gə ba i yā ka̰ȳń kasə kadə̄ rāādə́ aĺ ní ō!

¹⁸ De kə́ yay ń mbātə́ rāā dɔ kújə yān kə́ nujə ní, kújə́ ní a əsō dɔn tə́ ō, kújə yā de kə́ nge rāā yá̰a̰ kə njaneé jingling a də̄yā̰ i man̄ ō.

¹⁹ De kə́ bo gə̄ rāān̄ yá̰a̰ kəsa yā rāań rɔ̄nel̄. Kasə nduú rāādə́ adə̄ rɔ̄də́ nel̄də́ ō, nar adə̄də́ yá̰a̰ malang ō.

²⁰ Ɓá tā ba ī-lōō ndɔ̄ĺ mban̄g kemií tə́ gə̄gē ī-lōō ndɔ̄lə́n. Ī-lōō ndɔ̄ĺ de kə́ nge kənge yá̰a̰, kem kújə yāí tə́ gəge, ī-lōō ndɔ̄lə́n. Na sōgə́ yel̄ un najə̄ kɔrīí aw̄ seĺ kə̄ loo gə̄ tə́ ō, tél un gō ndūí ədań najə̄ ń ə́dá ní ō.